“Ini an Dalan, Maglakat Kamo Dida Hini”

An Istorya ni Emilia Pederson

Iginsumat ni Ruth E. Pappas

HAN 1878 natawo an akon Nanay nga hi Emilia Pederson. Nagin maestra hiya, kondi an karuyag gud niya buhaton amo an pagbulig ha mga tawo nga magin duok ha Dios. An pamatuod hito nga hingyap ni Nanay amo an daku nga baol nga nakatago ha amon balay ha gutiay nga bungto han Jasper, Minnesota, E.U.A. Ginpalit niya ito basi sudlan han iya mga gamit tipakadto ha Tsina, diin karuyag niya magserbisyo sugad nga misyonera. Kondi han mamatay an iya nanay, kinahanglan isakripisyo niya an iya mga plano ngan magpabilin ha balay basi mangnoan an iya kamanghoran. Han 1907, nagpakasal hiya kan Theodore Holien. Natawo ako han Disyembre 2, 1925—an puto han ira pito nga anak.

May mga pakiana hi Nanay ha Biblia nga karuyag gud niya hibaroan an baton. Usa hito an may kalabotan ha katutdoan nga an impyerno amo an lugar diin ginsasakit ha kalayo an magraot. Ginpakianhan niya an nabisita nga superbisor han Luterano nga Iglesia kon diin niya mababasa ha Biblia an basihan hini. Kondi ginsidngan la hiya nga diri na importante an ginsisiring han Biblia—kinahanglan igtutdo an impyerno.

Natagbaw an Iya Kagutom ha Espirituwal

Waray pag-iha katapos han 1900, an manghod ni Nanay nga hi Emma, kinadto ha Northfield, Minnesota, basi mag-aram hin musika. Inukoy hiya ha balay han iya maestro, hi Milius Christianson, nga an asawa usa nga Estudyante han Biblia, an tawag ha mga Saksi ni Jehova hadto. Naunabi ni Emma nga may-ada hiya bugto nga mahilig magbinasa han Biblia. Waray pag-iha, nagsurat hi Mrs. Christianson kan Nanay lakip an mga baton han iya mga pakiana ha Biblia.

Usa ka adlaw, an Estudyante han Biblia nga hi Lora Oathout inabot sakay han tren tikang ha Sioux Falls, South Dakota, basi magsangyaw ha Jasper. Gin-adman ni Nanay an literatura nga iya nakarawat, ngan han 1915, nagtikang hiya makiistorya ha iba han mga kamatuoran ha Biblia ngan manaltag hin mga literatura nga iginhatag ni Lora ha iya.

Han 1916, hinbaroan ni Nanay nga matambong hi Charles Taze Russell ha kombensyon ha Sioux City, Iowa. Karuyag ni Nanay nga tumambong. Hito nga panahon, lima na an iya anak ngan an puto nga hi Marvin, lima pa la ka bulan. Bisan pa hito, nagbiyahe hiya kaupod han ngatanan niya nga anak sakay han tren hin mga 160 kilometro pakadto ha Sioux City basi tumambong ha kombensyon. Namati hiya han mga pahayag ni Bugto Russell, nagkita han “Photo-Drama of Creation,” ngan nagpabawtismo. Han iya pag-uli, nagsurat hiya hin artikulo mahitungod han kombensyon nga iginpublikar ha Jasper Journal.

Han 1922, usa hi Nanay han mga 18,000 nga tinambong ha kombensyon ha Cedar Point, Ohio. Katapos hito, waray na hiya umundang ha pagpasamwak han Ginhadian han Dios. An iya susbaranan nagdasig ha amon nga sundon an  sagdon: “Amo ini an dalan, maglakat kamo dida hini.”—Isa. 30:21.

Mag-opay nga Resulta han Pagsangyaw

Temprano han tuig 1920, binalhin hin balay an akon mga kag-anak ha gawas han Jasper. Nagkaada hi Tatay hin malampuson nga negosyo ngan hin daku nga pamilya nga susuportahan. Diri pariho kan Nanay, waray hi Tatay mag-aram ha Biblia, kondi bug-os-kasingkasing nga nasuporta hiya ha pagsangyaw ngan nag-aabiabi ha nagbibiyahe nga mga paramangno, nga tinatawag hadto nga pilgrimo. Agsob nga kon nagpapahayag ha balay an nagbibiyahe nga paramangno, usa ka gatos o sobra pa an natambong—napupuno an amon sala, pangaonan, ngan katurogan.

Han mga syete anyos ako, tumawag hi Dada Lettie ngan nagsiring nga karuyag mag-aram ha Biblia an iya mga amyaw, hi Ed Larson ngan an iya asawa. Ginkarawat dayon nira an mga kamatuoran ha Biblia ngan gin-imbitar an usa pa nga amyaw, hi Martha Van Daalen nga may walo nga anak, basi umapi ha pag-aram. Hira liwat nga bug-os nga pamilya nagin Estudyante han Biblia. a

Hito nga panahon, nagtikang magtrabaho kan Tatay hi Gordon Kammerud, usa nga batan-on nga naukoy hin pipira ka kilometro tikang ha amon. Ginpahamangnoan hiya: “Paglikay ha mga anak nga babaye han aton agaron. Naiiba an ira relihiyon.” Kondi, nagtikang hiya pag-aram ha Biblia ngan waray pag-iha nakombinse nga hin-agian na niya an kamatuoran. Paglabay hin tulo ka bulan, nagpabawtismo hiya. Nagin tumuroo liwat an iya mga kag-anak, ngan an amon pamilya—mga Holien, Kammerud, ngan Van Daalen—nagin duok nga magsarangkay.

Naparig-on han mga Kombensyon

Nadasig hinduro hi Nanay han kombensyon ha Cedar Point nga diri gud niya karuyag pumalya ha sunod. Salit, an akon nahinunumdoman han bata pa ako amo an higrayo nga biyahe basi tumambong hito nga mga kombensyon. Makatirigamnan an kombensyon han 1931 ha Columbus, Ohio, tungod kay dida hito ginkarawat an ngaran nga mga Saksi ni Jehova. (Isa. 43:10-12) Presko pa liwat ha akon panumdoman an kombensyon ha Washington, D.C., han 1935, diin ginkilala ha usa nga makasaysayan nga pahayag an “daku nga kadam-an,” o an “daku nga panon,” nga gin-unabi ha libro han Pahayag. (Pah. 7:9; King James Version) An akon kabugtoan nga hira Lilian ngan Eunice kaupod han sobra 800 nga ginbawtismohan didto.

An amon pamilya nagbiyahe pakadto ha mga kombensyon ha Columbus, Ohio, han 1937; Seattle, Washington, han 1938; ngan New York City han 1939. Kaupod namon ha pagbiyahe an pamilya han Van Daalen, Kammerud ngan iba pa, ngan nagtutolda kami kon napahuway ha dalan. Han 1940, nagpakasal hi Eunice kan Leo Van Daalen, ngan nagpayunir hira. Hito gihapon nga tuig, ginkasal hi Lilian kan Gordon Kammerud, ngan hira liwat nagpayunir.

 Espesyal an kombensyon han 1941 nga gindumara ha St. Louis, Missouri. Didto, yinukot nga batan-on an nakakarawat han libro nga Children. Maopay gud an nagin epekto ha akon hito nga kombensyon. Waray pag-iha katapos hito, han Septyembre 1, 1941, nagpayunir ako ha edad nga 15, dungan ni Marvin ngan han iya asawa.

Tungod kay parauma an kadam-an ha amon komunidad, an iba nga kabugtoan diri nakakatambong ha kombensyon kay agsob nga nahitutuman ito ha panahon han pangani. Salit katapos han kombensyon, nagkakaada kami hin repaso ha amon libong basi makapahimulos adton waray makatambong. Makalilipay ito nga mga katirok.

Gilead Ngan mga Toka ha Iba nga Nasud

Han Pebrero 1943, naestablisar an Gilead School basi bansayon an mga payunir ha pagmisyonero. Kaupod ha siyahan nga klase an unom nga membro han pamilya Van Daalen—an magburugto nga hira Emil, Arthur, Homer, ngan Leo; an ira patod nga hi Donald; ngan an asawa ni Leo, an akon bugto nga hi Eunice. Nalilipay ngan namimingaw kami han tilakat na hira kay diri kami maaram kon magkikirigta pa kami utro. Katapos han gradwasyon, hira nga unom igintoka ha Puerto Rico, diin waray pa mag-dose an Saksi hito nga panahon.

Paglabay hin usa ka tuig, hira Lilian ngan Gordon sugad man hira Marvin ngan Joyce ineskwela ha ikatulo nga klase han Gilead. Igintoka liwat hira ha Puerto Rico. Katapos, han Septyembre 1944, ha edad nga 18, ineskwela ako ha ikaupat nga klase han Gilead. Kahuman han gradwasyon han Pebrero 1945, nakaupod ko an akon kabugtoan ha Puerto Rico. Naiiba gud ito nga eksperyensya para ha akon! Bisan kon makuri an pag-aram hin Espanyol, waray pag-iha an pipira ha amon nagdudumara na hin sobra 20 nga pag-aram ha Biblia. Ginbendisyonan gud ni Jehova an buruhaton. Yana, may-ada na mga 25,000 nga Saksi ha Puerto Rico.

Mga Trahedya ha Amon Pamilya

Nagpabilin ha Puerto Rico hira Leo ngan Eunice katapos ipanganak hi Mark han 1950. Han 1952 nagplano hira nga umuli basi bisitahon an mga paryente. Han Abril 11, sinakay hira ha eruplano. Makasurubo, waray pag-iha katapos han paglupad, nagkras ito ha dagat. Namatay hira Leo ngan Eunice. An dos-anyos nga hi Mark nakit-an nga naglinutaw-lutaw ha dagat. Gin-itsa hiya ha baluto-nga-goma han usa nga nakatalwas ngan gintabangan basi makaginhawa utro—ngan nabuhi hiya. b

Paglabay hin lima ka tuig, han Marso 7, 1957, han nagbibiyahe hira Nanay ngan Tatay pakadto ha Kingdom Hall, naplatan hira. Samtang ginliliwanan ni Tatay an ruyda ha ligid han kalsada, nabunggo hiya hin sarakyan ngan namatay dayon. Mga 600 an tinambong han pahayag ha lubong, ngan naihatag an maopay nga pamatuod ha komunidad diin talahuron gud hi Tatay.

Bag-o nga mga Toka

Antes mamatay hi Tatay, igintoka ako ha Argentina. Han Agosto 1957, inabot ako ha syudad han Mendoza ha kabungtoran ha ubos han Andes Mountains. Han 1958, igintoka ha Argentina hi George Pappas nga gradwado ha ika-30 nga klase han Gilead. Nagin maopay kami nga magsangkay, ngan nagpakasal kami han Abril 1960. Han 1961, namatay hi Nanay ha edad nga 83. Matinumanon nga naglakat hiya ha  dalan han tinuod nga pagsingba ngan nakabulig ha damu nga buhaton liwat ito.

Sulod hin napulo ka tuig, nag-alagad kami nga mag-asawa upod han iba pa nga misyonero ha magkalain-lain nga urukyan han mga misyonero. Katapos, pito ka tuig nga nagmangno kami ha sirkito. Han 1975 binalik kami ha Estados Unidos basi mangnoan an mga kapamilya nga may sakit. Han 1980 gintokahan an akon bana ha pagmangno ha sirkito nga Espanyol an yinaknan. Hito nga panahon mga 600 nga kongregasyon na ha Estados Unidos an Espanyol. Ha sulod hin 26 ka tuig, nabisita namon an damu hito ngan nakita an pagtikadamu nga inabot hin sobra 3,000.

Naglakat Hira ha “Dalan”

Nalipay liwat hi Nanay nga nagpayunir an batan-on nga mga membro han iya pamilya. Pananglitan, han 1953 nagpayunir hi Carol nga anak han akon suhag nga bugto nga hi Ester. Nagpakasal hi Carol kan Dennis Trumbore, ngan tikang hadto nagpadayon hira ha pagpayunir. Usa pa nga anak nga babaye ni Ester, hi Lois, an nagpakasal kan Wendell Jensen. Ineskwela hira ha ika-41 nga klase han Gilead ngan nagmisyonero hin 15 ka tuig ha Nigeria. Hi Mark, nga an mga kag-anak naaksidente ha eruplano, gin-ampon ngan ginpadaku han bugto ni Leo, hi Ruth La Londe, ngan han iya bana nga hi Curtiss. Hi Mark ngan an iya asawa, hi Lavonne, nagpayunir hin pipira ka tuig ngan nagpadaku han ira upat nga anak uyon ha “dalan.”—Isa. 30:21.

Hi Orlen na la an akon bugto nga buhi pa ngan mga 95 anyos na hiya. Matinumanon pa gihapon hiya nga nag-aalagad kan Jehova. Malipayon gud kami ni George nga nagpapadayon ha bug-os-panahon nga ministeryo.

An Ginbilin ni Nanay

Aadi na ha akon an usa han pinakabirilhon nga panag-iya ni Nanay—an iya lamesa. Regalo ito ha iya ni Tatay han ira kasal. Nakabutang ha usa han mga hunos hito an iya scrapbook nga may-ada mga surat ngan artikulo nga iya iginsurat nga iginpublikar ha peryodiko ngan nakagpamatuod hin maopay han Ginhadian. An pipira hini tikang pa han temprano han tuig 1900. Nakatago liwat ha hunos an mag-iha na nga surat han iya mga anak nga misyonero. Nalilipay gud ako ha pagbasa hito hin pauroutro! Ngan an iya mga surat ha amon pirme gud makapadasig ngan positibo. Waray matuman ni Nanay an iya hingyap nga magin misyonera. Kondi, an iya kadasig nga magmisyonera nag-aghat ha iba han sumunod nga henerasyon. Ginpapamulat ko gud an pagkirigta utro han amon daku nga pamilya kaupod hira Nanay ngan Tatay ha paraiso nga tuna!—Pah. 21:3, 4.

[Mga footnote]

[Retrato ha pahina 17]

Emilia Pederson

[Retrato ha pahina 18]

1916: Nanay, Tatay (kinukugos hi Marvin); ha ubos, tikang ha wala tipatoo: Orlen, Ester, Lilian, Mildred

[Retrato ha pahina 19]

Leo ngan Eunice, antes mamatay

[Retrato ha pahina 20]

1950: Tikang ha wala tipatoo, ha luyo: Ester, Mildred, Lilian, Eunice, Ruth; ha prente: Orlen, Nanay, Tatay, ngan Marvin

[Retrato ha pahina 20]

George ngan Ruth Pappas samtang nagmamangno ha sirkito han 2001