“Kadi, Sunod ha Akon”

“Kon an bisan hin-o naruruyag sumunod ha akon, magdumiri hiya ha iya kalugaringon ngan pas-anon an iya pasakitan nga kahoy ha adlaw-adlaw ngan padayon nga sumunod ha akon.”—LUK. 9:23, NW.

1, 2. (a) Ano an maopay gud nga imbitasyon ni Jesus? (b) Ano an imo reaksyon ha imbitasyon ni Jesus?

 HA IKATARAPOS han ministeryo ni Jesus, nagsangyaw hiya ha Perea, usa nga rehiyon ha tabok han Jordan ha norte-este han Judea. Gindaop hiya hin batan-on nga lalaki nga nagpakiana kon ano an iya kinahanglan buhaton basi makapanunod han kinabuhi nga waray kataposan. Han masantop ni Jesus nga an batan-on matinumanon nga nasunod han Mosaiko nga Balaud, nagpahayag hiya hin maopay gud nga imbitasyon. Hiya nagsiring: “Lakat, ibaligya an ngatanan nga imo, ngan ipanhatag ha mga kablas, ngan ikaw may-ada manggad ha langit; ngan kadi, sunod ha akon.” (Mar. 10:21) Hunahunaa la—usa nga imbitasyon ha pagsunod kan Jesus, an bugtong nga Anak han Gihitaasi nga Dios!

² Waray karawata hito nga batan-on an imbitasyon, kondi ginkarawat ito han iba. Antes hito, hi Jesus nagsiring kan Felipe: “Sunod ha akon.” (Juan 1:43) Ginkarawat ito ni Felipe ngan nagin apostol. Gin-imbitar liwat ni Jesus hi Mateo, ngan ginkarawat niya ito. (Mat. 9:9; 10:2-4) Oo, gin-imbitar ni Jesus an ngatanan nga nahigugma ha pagkamatadong han hiya nagsiring: “Kon an bisan hin-o naruruyag sumunod ha akon, magdumiri hiya ha iya kalugaringon ngan pas-anon an iya pasakitan nga kahoy ha adlaw-adlaw ngan padayon nga sumunod ha akon.” (Luk. 9:23, NW) Salit, an bisan hin-o mahimo magin sumurunod ni Jesus kon karuyag gud niya. Ito ba an imo hingyap? Kadam-an ha aton an nagkarawat na han mahigugmaon nga imbitasyon ni Jesus, ngan kon nagsasangyaw kita, gin-iimbitar liwat naton an iba.

3. Paonan-o naton malilikyan an kaanod pahirayo ha pagsunod kan Jesus?

³ Kondi, makasurubo nga an iba nga nagpapakita hin interes ha kamatuoran han Biblia diri nagpapadayon ha pag-aram. Lugod, nagluluya hira ngan ha kamaihaan ‘naaanod’ pahirayo ha pagsunod kan Jesus. (Heb. 2:1) Paonan-o naton malilikyan ito? Mabubuligan kita kon pakianhan naton an aton kalugaringon: ‘Kay ano gud ba nga nasunod ako kan Jesus? Ano an kahulogan han pagsunod ha iya?’ An paghinumdom han baton hiton duha nga pakiana mabulig ha aton nga parig-unon an aton determinasyon nga magpabilin ha maopay nga pagkinabuhi nga aton ginpili. Mabulig liwat ito ha aton nga dasigon an iba nga sumunod kan Jesus.

Kay Ano nga Sadang Sundon hi Jesus?

4, 5. Kay ano nga kwalipikado hi Jesus nga magin lider?

⁴ Hi propeta Jeremias nagsiring: “O Jehova, maaram ako nga an paagi han tawo diri aada ha iya ngahaw, diri aada ha tawo nga naglalakat an pagmando han iya mga pitad.” (Jer. 10:23) Pinamamatud-an han kasaysayan nga tinuod an ginsiring ni Jeremias. Nagigin matin-aw gud nga an diri-hingpit nga mga tawo diri maglalampos ha pagmando ha ira kalugaringon. Ginkarawat naton an imbitasyon nga sumunod kan Jesus tungod kay hinbaroan naton nga kwalipikado hiya nga magin Lider naton ha paagi nga diri gud mahihimo han bisan hin-o nga tawo. Tagda an pipira han iya mga kwalipikasyon.

⁵ Siyahan, ginpili ni Jehova mismo hi Jesus sugad nga Mesias nga Lider. Hin-o an mas maaram kay ha aton Maglalarang ha pagpili hin Lider para ha aton? Ikaduha, hi Jesus may-ada mga kalidad nga maruruyagan ngan masusubad naton. (Basaha an Isaias 11:2, 3.) Hingpit hiya nga susbaranan. (1 Ped. 2:21) Ikatulo, hinigugma gud ni Jesus adton nasunod ha iya, sugad han ipinakita niya han iginhalad niya an iya kinabuhi para ha ira. (Basaha an Juan 10:14, 15. a) Ngan ipinapakita niya nga mahigugmaon hiya nga magbarantay  samtang ginigiyahan kita ha kinabuhi nga naghahatag hin kalipay yana ngan hin mahimayaon nga tidaraon ha kadayonan. (Juan 10:10, 11; Pah. 7:16, 17) Tungod hini ngan ha iba pa nga hinungdan, maaramon an aton nagin desisyon han ginpili naton nga sundon hiya. Kondi, ano an kahulogan han pagsunod kan Jesus?

6. Ano an kahulogan han pagsunod kan Jesus?

⁶ An pagin sumurunod ni Kristo diri la kay pagsiring nga Kristiano kita. Mga duha ka bilyon nga tawo yana an nag-aangkon nga Kristiano, kondi an ira mga buhat nagpapakita nga hira ‘magburuhat han karaotan.’ (Basaha an Mateo 7:21-23.) Kon interesado an mga tawo ha imbitasyon nga sumunod kan Jesus, aton iginsasaysay ha ira nga iginpapahiuyon han tinuod nga mga Kristiano an ira bug-os nga pagkinabuhi ha iya mga katutdoan ngan susbaranan—ngan ginbubuhat nira ito adlaw-adlaw. Ha pagpatin-aw han kahulogan hini, tagda an pipira nga impormasyon nga hinbabaroan naton mahitungod kan Jesus.

Subara an Pagpakita ni Jesus han Kinaadman

7, 8. (a) Ano an kinaadman, ngan kay ano nga maaramon gud hi Jesus? (b) Paonan-o ipinakita ni Jesus an kinaadman, ngan paonan-o naton masusubad hiya?

⁷ Ipinakita ni Jesus an damu nga mag-opay nga kalidad, kondi aton la paghihisgotan an upat: an iya kinaadman, pagkamapainubsanon, kadasig, ngan gugma. Siyahan, tagda an iya kinaadman—an iya abilidad ha pag-aplikar han kahibaro ngan pagsabot ha praktikal nga paagi. Hi apostol Pablo nagsurat: “Aada natago [kan Jesus] an ngatanan nga mga bahandi han kinaadman ngan paghibaro.” (Kol. 2:3) Diin nagtikang an kinaadman ni Jesus? Hiya nagsiring: “Sugad han igintutdo ha akon han Amay akon iginyakan ini nga mga bagay.” (Juan 8:28) An iya kinaadman nagtikang kan Jehova, salit diri kita nahipapausa ha pagkahusto han pagturutimbang ni Jesus.

⁸ Pananglitan, gin-gamit ni Jesus an maopay nga pagturutimbang ha iya pagpili hin paagi han pagkinabuhi. Nagdesisyon hiya nga magkinabuhi hin simple, nga nakasentro ha usa la: pagbuhat han kaburut-on han Dios. Maaramon nga gin-gamit niya an iya panahon ngan kusog ha pamiling siyahan han Ginhadian. Ginsusunod naton an susbaranan ni Jesus pinaagi ha pangalimbasog ha pagtipig hin simple nga mata ngan tungod hito nalilikyan naton nga mabug-atan han diri-kinahanglanon nga mga butang nga nakakaubos han aton kusog ngan panahon. (Mat. 6:22) Damu nga Kristiano an nagpasimple han ira pagkinabuhi basi mas damu nga panahon an magamit nira ha ministeryo. An iba nakakagpayunir pa ngani. Kon usa ka ha ira, takos ka gud han kumendasyon. Salit an ‘pamiling siyahan han ginhadian’ nagriresulta hin duro nga kalipay ngan katagbaw.—Mat. 6:33.

Magin Mapainubsanon Pariho kan Jesus

9, 10. Paonan-o ipinakita ni Jesus an iya pagkamapainubsanon?

⁹ An ikaduha nga bahin han personalidad ni Jesus nga aton paghihisgotan amo an iya pagkamapainubsanon. Kon gintatagan hin awtoridad an diri-hingpit nga mga tawo, agsob nga nagigin mapahitas-on hira. Kaiba gud ha ira hi Jesus! Bisan pa han iya importante nga katungdanan ha pagtuman han katuyoan ni Jehova, waray gud magpahitaas hi Jesus. Ngan gindadasig kita nga subaron hiya. Hi apostol Pablo nagsurat: “Karawata niyo ini nga paghunahuna nga iya man ni Kristo Jesus: nga hiya, ha dagway han Dios, waray niya pag-isipa an hinugad han Dios, butang nga aragawon, kondi gin-ula niya an iya kalugaringon, nga nagpariho hin dagway han uripon, kay ginhimo nga ladawan han mga tawo.” (Fil. 2:5-7) Ano an kahulogan hito?

¹⁰ Nagpahimulos hi Jesus han dungganon nga pribilehiyo ha pag-ukoy kaupod han iya Amay ha langit, kondi kinaburut-on nga “gin-ula niya an  iya kalugaringon.” Iginbalhin an iya kinabuhi ha tagoangkan han Judio nga birhen, nga nagtubo didto ha sulod hin siyam ka bulan tubtob nga ipanganak hiya sugad nga waray mahihimo nga minasus-an ha panimalay han pobre nga panday. Ha balay ni Jose, hinay-hinay nga nagtubo hi Jesus ha pagin gutiay nga bata, lalakihay, ngan tinedyer. Waray hiya sala. Kondi, ha iya bug-os nga pagkabatan-on padayon nga nagpasakop hiya ha iya makasasala nga mga kag-anak. (Luk. 2:51, 52) Diri gud matupngan an iya pagkamapainubsanon!

11. Ha ano nga mga paagi masusubad naton an pagkamapainubsanon ni Jesus?

¹¹ Ginsusubad naton an pagkamapainubsanon ni Jesus kon kinaburut-on nga kinakarawat naton an mga toka nga baga hin ubos. Pananglitan, tagda an toka nga pagsangyaw han maopay nga sumat. Baga hin ubos ito, labi na kon an mga tawo diri interesado, nakakatamay, o nakontra. Kondi, pinaagi ha padayon nga pagsangyaw, binubuligan naton an iba nga karawaton an imbitasyon ni Jesus nga sumunod ha iya. Hito nga paagi, nabulig kita ha pagtalwas han mga kinabuhi. (Basaha an 2 Timoteo 4:1-5.) Usa pa nga ehemplo amo an paglimpyo ha aton Kingdom Hall, sugad han paglabog han basura, paglimpyo han salog ngan mga kasilyas. Ini ngatanan ubos nga trabaho! Kondi maaram kita nga an pagmintinar han aton Kingdom Hall—nga sentro han putli nga pagsingba ha aton lugar—bahin han aton sagrado nga pag-alagad. Pinaagi han kinaburut-on nga pagtuman hito nga mga buruhaton nga baga hin ubos, ipinapakita naton an pagkamapainubsanon ngan hito nga paagi ginsusunod naton an mga pitad ni Kristo.

Magin Madasigon, Pariho kan Jesus

12, 13. (a) Paonan-o ipinakita ni Jesus an kadasig? (b) Ano an magpapagios ha aton nga magin madasigon ha ministeryo?

¹² Tagda an kadasig ni Jesus ha ministeryo. Damu an iya ginbuhat han nakanhi hiya ha tuna. Han batan-on pa hiya, posible nga nagtrabaho hiya kaupod han iya pinakaamay nga hi Jose sugad nga panday. Durante han iya ministeryo, nagbuhat hiya hin mga milagro, upod na an pagtambal ha magsakit ngan pagbanhaw ha mga patay. Kondi an iya nangunguna nga buruhaton amo an pagsangyaw han maopay nga sumat ngan pagtutdo hadton disidido mamati. (Mat. 4:23) Sugad nga iya mga sumurunod, ito liwat an aton buruhaton. Paonan-o naton masusubad hiya? Pinaagi ha pagkaada hin mga motibo nga pariho han kan Jesus.

¹³ Labaw ha ngatanan, gugma ha Dios an nagpagios kan Jesus nga magsangyaw ngan magtutdo. Kondi hinigugma liwat ni Jesus an mga kamatuoran nga iya igintutdo. Presyoso ito ha iya sugad hin mga bahandi, ngan karuyag gud niya nga ipaangbit ito ha iba. Ito liwat an inaabat naton sugad nga mga magturutdo. Hunahunaa la an pipira  han presyoso nga kamatuoran nga hinbaroan naton tikang ha Pulong han Dios! Maaram kita han isyu han pagkasoberano ha uniberso ngan kon paonan-o ito masusulbad. Nasasabtan gud naton an igintututdo han Kasuratan mahitungod han kahimtang han mga patay ngan an mga bendisyon nga maabot ha bag-o nga kalibotan han Dios. Hinbaroan man naton an sugad nga mga kamatuoran hinin bag-o la o hadto pa, diri gud nawawara an bili hito. Daan man o bag-o, an sugad nga mga kamatuoran presyoso gud sugad hin mga bahandi. (Basaha an Mateo 13:52. b) Pinaagi ha pagsangyaw nga may kinasingkasing nga kadasig, iginpapahayag naton ha iba nga hinigugma naton an igintutdo ha aton ni Jehova.

14. Paonan-o naton masusubad an paagi han pagtutdo ni Jesus?

¹⁴ Tigamni liwat kon paonan-o hi Jesus nagtutdo. Pirme niya ginpapabug-atan ha iya mamarati an Kasuratan. Agsob nga iginsasaysay niya an importante nga punto pinaagi ha pagsiring: “Nahisurat na.” (Mat. 4:4; 21:13) Ha nakasurat nga iya ginsiring, nagkotar o nag-unabi hiya tikang ha sobra katunga han mga libro han Hebreo nga Kasuratan. Pariho kan Jesus, pirme tikang ha Biblia an aton igintututdo ha ministeryo ngan nangangalimbasog kita nga gamiton an Kasuratan kon posible. Hito nga paagi, binubuligan naton an mga tangkod an kasingkasing nga makasabot nga an igintututdo naton tikang ha Dios, diri an aton kalugaringon nga opinyon. Nalilipay gud kita kon nauyon an usa nga basahon an Biblia ngan paghisgotan an bili ngan kahulogan han Pulong han Dios! Ngan duro an aton kalipay kon kinakarawat nira an imbitasyon nga sumunod kan Jesus.

An Pagsunod kan Jesus Nangangahulogan hin Paghigugma ha Iba

15. Ano an makapadasig gud nga kalidad ni Jesus, ngan paonan-o makakaapekto ha aton an pagpamalandong hito?

¹⁵ An ultimo nga bahin han personalidad ni Jesus nga aton paghihisgotan, makapadasig gud—an iya gugma ha katawohan. Hi apostol Pablo nagsurat: “Naghahadi ha amon an gugma ni Kristo.” (2 Kor. 5:14, Maopay nga Sumat) Kon pinamamalandong naton an gugma ni Jesus ha katawohan ha kabug-osan ngan ha aton sugad nga indibiduwal, nababantad an aton kasingkasing ngan nadadasig kita nga sundon an iya susbaranan.

16, 17. Ha ano nga mga paagi ipinakita ni Jesus an iya gugma ha iba?

¹⁶ Paonan-o ipinakita ni Jesus an gugma ha iba? An iya kinaburut-on nga paghalad han iya kinabuhi para ha katawohan amo an gihilarumi nga kapahayagan han iya gugma. (Juan 15:13) Kondi, durante han iya ministeryo, ipinakita liwat ni Jesus an gugma ha iba nga paagi. Pananglitan, pinaid hiya ha mga nag-aantos hin kasakitan. Han hinkit-an niya hi Maria ngan an iba pa nga nananangis tungod ha kamatay ni Lasaro, inabat gud niya an ira duro nga kasubo. Salit, bisan kon babanhawon na niya hi Lasaro, nagtangis liwat hiya.—Juan 11:32-35.

 ¹⁷ Temprano ha ministeryo ni Jesus, usa nga sanlahon an dinaop ha iya ngan nagsiring: “Kon imo karuyag, makakalinis ka ha akon.” Ano an baton ni Jesus? An rekord nasiring: ‘Nalooy hiya.’ Katapos, nagbuhat hiya hin urusahon: “Inunat niya an iya kamot, ngan kinamkam hiya, ngan siniring ha iya: Karuyag ko, malinisan ka. Ngan ha gilayon han iya pakagyakan, iniwas an [sanla], ngan nalinisan hiya.” Ha Mosaiko nga Balaud, mahugaw an mga sanlahon, ngan matatambal gud ni Jesus ito nga tawo bisan kon diri niya kamkamon hiya. Kondi, han gintambal ni Jesus an sanlahon, iginpaabat niya an pagkamkam ha iya han iba, bangin ha siyahan nga higayon ha damu nga katuigan. Mahigugmaon gud ito nga pagpaid!—Mar. 1:40-42.

18. Paonan-o naton maipapakita an pagpaid?

¹⁸ Sugad nga mga sumurunod ni Kristo, ginsusugo kita nga magin mahigugmaon pinaagi ha pagpakita hin pagpaid. (1 Ped. 3:8) Bangin makuri masabtan an inaabat han igkasi-tumuroo nga nag-aantos hin maiha na nga sakit o duro nga kasub-anan—labi na kon waray pa kita makaeksperyensya hito. Kondi, pinaid hi Jesus ha may sakit bisan kon waray gud hiya magkasakit. Paonan-o naton makukultibar an pariho hito nga pagpaid? Pinaagi han mapailubon nga pagpamati ha mga nag-aantos kon nag-iistorya hira ha aton han ira inaabat. Mahimo liwat naton pakianhan an aton kalugaringon, ‘Kon ako an aada ha ira kahimtang, ano an akon aabaton?’ Kon magigin mapinairon kita ha iba, mas ‘mapaparig-on naton an mga maluya an kasingkasing.’ (1 Tes. 5:14) Hito nga paagi masusunod naton hi Jesus.

19. Ha ano nga mga paagi nadadasig kita han susbaranan ni Jesus?

¹⁹ Makapainteres gud pag-adman an mga pulong ngan buhat ni Jesu-Kristo! Kon mas damu an aton hinbabaroan mahitungod ha iya, mas karuyag naton nga subaron hiya—ngan mas naaaghat kita nga buligan an iba nga buhaton liwat ito. Salit, sadang malipay gud kita ha pagsunod ha Mesianiko nga Hadi—yana ngan ha kadayonan!

[Mga footnote]

Maisasaysay Mo Ba?

• Paonan-o naton maipapakita an kinaadman, sugad han ginbuhat ni Jesus?

• Ha ano nga mga paagi maipapakita naton an pagkamapainubsanon?

• Paonan-o naton makukultibar an kadasig ha ministeryo?

• Ha ano nga mga paagi masusubad naton hi Jesus ha pagpakita hin gugma ha iba?

[Mga Pakiana]

[Kahon/Retrato ha pahina 5]

USA NGA PUBLIKASYON NGA NABULIG HA ATON NGA SUBARON HI KRISTO

Durante han 2007 nga distrito nga kombensyon, iginpagowa an 192-pahina nga libro nga “Kadi, Sunod ha Akon.” Katuyoan hini nga mabuligan an mga Kristiano nga isentro an ira atensyon kan Jesus, labi na ha iya mga kalidad ngan buhat. Katapos han una nga duha nga kapitulo, an siyahan nga seksyon nagsusumaryo han mag-opay nga kalidad ni Jesus—an iya pagkamapainubsanon, kaisog, kinaadman, pagkamasinugtanon, ngan pagpailob.

Nasunod hini an mga bahin nga naghihisgot han mga buruhaton ni Jesus sugad nga magturutdo ngan magwarali han maopay nga sumat ngan an pipira nga paagi diin nakita an iya hilarom nga gugma. An impormasyon ha bug-os nga libro iginpresenta basi buligan an usa nga Kristiano nga subaron hi Jesus.

Nasarig kami nga ini nga libro magpapagios ha aton ngatanan nga usisahon ngan pakianhan an aton kalugaringon: ‘Ginsusunod ko gud ba hi Jesus? Paonan-o ko masusunod hiya hin mas maopay?’ Mabulig liwat ito ha ngatanan nga “tinunguran han kinabuhi nga waray kataposan” nga magin mga sumurunod ni Kristo.—Buh. 13:48.

[Retrato ha pahina 4]

Inuyon hi Jesus nga kumanhi ha tuna ngan matawo sugad nga minasus-an. Ano nga kalidad an ginkinahanglan hito?

[Retrato ha pahina 6]

Ano an magpapagios ha aton nga magin madasigon ha ministeryo?