Malipay ha Pagbulig ha Iba nga Magin mga Disipulo

“Lakat kamo, ngan manhimo kamo hin mga tinon-an.”—MAT. 28:19.

1-3. (a) Ano an inaabat han damu mahitungod han pagdumara hin mga pag-aram ha Biblia? (b) Ano nga mga pakiana an aton paghihisgotan?

 “HA NAGLABAY nga 11 ka semana, ginbuligan ko ha pag-aram ha Biblia an usa nga pamilya tikang ha Pakistan,” nagsurat an usa nga bugto nga babaye nga nag-aalagad ha grupo nga nagyayakan hin Hindi ha Estados Unidos. “Syempre, nagin magsarangkay kami,” siring niya. “Nahingangatangis ako kon nahuhunahuna ko nga hirani na bumalik ini nga pamilya ha Pakistan. Diri la ito tungod ha kamingaw nga diri ko na hira makakaupod kondi tungod liwat ha kalipay samtang gintututdoan ko hira mahitungod kan Jehova.”

² Pariho hini nga bugto, nakaeksperyensya ka na ba han kalipay tungod ha pagbulig ha usa nga mag-aram ha Biblia? Nalipay gud hi Jesus ngan an iya mga disipulo ha siyahan nga siglo ha pagbulig ha iba nga magin mga disipulo. Han an 70 nga disipulo nga ginbansay ni Jesus binalik nga may makalilipay nga sumat, hi Jesus mismo ‘nalipay gud ha espiritu.’ (Luk. 10:17-21) Sugad man, damu yana an nalilipay gud ha pagbulig ha iba nga magin mga disipulo. Ha pagkamatuod, han 2007, an maduruto ngan maglipayon nga magwarali nagdumara hin aberids nga unom ngan tunga ka milyon nga pag-aram ha Biblia kada bulan!

³ Kondi, an iba nga magwarali waray pa makaeksperyensya han kalipay ha pagdumara hin  pag-aram ha Biblia. An iba bangin waray gindumara nga pag-aram ha naglabay pa la nga mga tuig. Ano nga mga ulang an bangin atubangon naton samtang nangangalimbasog kita ha pagdumara hin pag-aram ha Biblia? Paonan-o naton ito malalamposan? Ngan ano nga mga balos an aton makakarawat kon buhaton naton an bug-os nga mahihimo ha pagsugot hini nga sugo ni Jesus: “Lakat kamo, ngan manhimo kamo hin mga tinon-an”?—Mat. 28:19.

Mga Ulang nga Makakawara han Aton Kalipay

4, 5. (a) Ano an reaksyon han damu nga tawo ha pipira nga lugar ha kalibotan? (b) Ano nga mga ulang an inaatubang han mga magwarali ha iba nga lugar?

⁴ Ha pipira nga lugar ha kalibotan, naruruyag gud an mga tawo han aton mga literatura ngan interesado mag-aram ha Biblia kaupod naton. Usa nga mag-asawa tikang ha Australia nga temporaryo nga nag-aalagad ha Zambia an nagsurat: “Tinuod an mga istorya. Mabungahon gud nga teritoryo an Zambia. Makaruruyag an pagsangyaw ha kalye! An mga tawo nadaop ha amon, an iba naghahangyo pa ngani hin partikular nga mga magasin.” Ha bag-o la nga tuig, an kabugtoan ha Zambia nagdumara hin sobra 200,000 nga pag-aram ha Biblia—ha aberids, sobra usa an gindumara han kada magwarali.

⁵ Kondi, ha iba nga lugar, an mga magwarali bangin nakukurian ha pagpahamutang hin mga literatura ngan ha regular nga pagdumara hin mga pag-aram ha Biblia. Kay ano? Agsob nga waray ha balay an mga tawo kon nabisita an magwarali, samtang adton aada ha balay bangin diri interesado ha relihiyon. Bangin nagdaku hira ha pamilya nga diri relihiyoso o nangangalas ha pagkasalingkapaw han palso nga relihiyon. Damu an nadaot ha espirituwal—nanluluya ngan nagpapatlaag tungod han palso nga mga magbarantay. (Mat. 9:36) Oo, an sugad nga mga tawo bangin naglilikay na ha mga paghisgot mahitungod han Biblia.

 6. An iba nga magwarali bangin may-ada ano nga mga limitasyon?

⁶ An pipira nga matinumanon nga magwarali naatubang hin iba nga ulang nga nakakawara han ira kalipay. Bisan kon aktibo gud hira hadto ha pagbulig ha iba nga magin mga disipulo, nakukurian na hira yana tungod han sakit o mga limitasyon han kalagas. Tagda liwat an pipira nga limitasyon nga bangin ginhihimo naton nga pasangilan. Pananglitan, inaabat mo ba nga diri ka kwalipikado ha pagdumara hin pag-aram ha Biblia? Bangin inaabat mo an inabat ni Moises han ginsugo hiya ni Jehova nga makiistorya kan Paraon. Hi Moises nagsiring: “Pasayloa ako, Jehova, kondi diri ako maopay magyakan, bisan tikang kakulop, o antes pa hito.” (Eks. 4:10, NW) Tungod ha kahadlok nga mapakyas, napasangil an usa nga waray hiya kapas. Bangin nababaraka kita nga an tawo diri magigin disipulo tungod kay diri kita maopay magtutdo. Basi malikyan ito, bangin palabyon naton an higayon ha pagdumara hin pag-aram. Paonan-o naton malalamposan an mga ulang nga gin-unabi pa la?

Iandam an Imo Kasingkasing

 7. Kay ano nga madasigon hi Jesus ha iya ministeryo?

⁷ An siyahan nga paagi amo an pag-andam han aton kasingkasing. Hi Jesus nagsiring: “An kahuraan han kasingkasing amo an iginyayakan han baba.” (Luk. 6:45) Madasigon hi Jesus ha ministeryo tungod han iya kinasingkasing nga pagtagad ha kaopayan han iba. Pananglitan, han naobserbahan niya nga nanluluya ha espirituwal an iya mga igkasi-Judio, “hiya nalooy ha ira.” Nagsiring hiya ha mga disipulo: “An babrion banos . . . Mag-ampo kamo ha Ginoo han babrion, basi hiya magsugo hin mga magbabari ha iya babrion.”—Mat. 9:36-38.

 8. (a) Ano an sadang pamurubuuton naton? (b) Ano an mahibabaroan naton ha ginsiring han usa nga estudyante han Biblia?

⁸ Samtang binubuligan naton an iba nga magin mga disipulo, sadang pamurubuuton naton nga daku gud an aton napapahimulosan tungod kay may-ada binulig ha aton ha pag-aram ha Biblia. Hunahunaa liwat an mga tawo nga aton masasangyawan ngan kon mationan-o hira magpapahimulos kon mabatian nira an mensahe nga dara naton. Usa nga babaye an nagsurat ha sanga nga opisina ha iya nasud: “Karuyag ko isumat ha iyo nga nagpapasalamat gud ako ha mga Saksi nga nagtututdo ha akon ha balay. Maaram ako nga usahay nauuyam na hira ha akon tungod kay damu an akon pakiana salit pirme hira nag-iiha. Kondi mapailubon hira ha akon ngan disidido magtutdo han ira hinbabaroan. Nagpapasalamat  ako kan Jehova ngan kan Jesus nga nakilala ko hira.”

 9. Ha ano iginsentro ni Jesus an iya atensyon, ngan paonan-o naton masusubad hiya?

⁹ Syempre, diri ngatanan nagkarawat han mga katutdoan ni Jesus. (Mat. 23:37) An iba nagsunod ha iya hin pipira ka panahon kondi inabot an takna nga waray na hira umuyon ha iya mga katutdoan ngan “waray na pagkalakat upod ha iya.” (Juan 6:66) Kondi, waray magpaapekto hi Jesus ha diri maopay nga reaksyon han iba nga maghunahuna hiya nga waray pulos an iya mensahe. Bisan kon waray mamunga an damu nga liso nga iya iginsabwag, iginpadayon niya an maopay nga iya ginbubuhat. Nakita niya nga an kapatagan magbusag na para ha pag-ani ngan nalipay gud hiya ha pakabulig hito. (Basaha an Juan 4:35, 36.) Imbes nga kitaon la an mamara nga tuna ha butnga han mga tanom nga trigo, mahimo ba liwat naton isentro an atensyon ha mabubuligan pa ha teritoryo nga igintoka ha aton? Aton usisahon kon paonan-o naton matitipigan ito nga positibo nga disposisyon.

Pagsabwag nga Tumong an Pag-ani

10, 11. Ano an imo mahihimo basi matipigan mo an imo kalipay?

¹⁰ An parauma nagsasabwag hin liso basi may anihon. Sugad man, kinahanglan magsangyaw kita basi makagtikang hin mga pag-aram ha Biblia. Kondi, ano man kon regular ka nga nagsasangyaw pero gutiay la an balay nga may tawo o diri mo nakakaistorya utro an imo mga ginbabalik-bisita? Makasurubo ini. Sadang ka ba umundang ha pagsangyaw ha kada purtahan? Syempre diri! Damu pa gihapon an nakakaistorya pinaagi hinin epektibo nga paagi han pagsangyaw.

¹¹ Kondi basi matipigan mo an imo kalipay, mapapauswag mo ba an imo mga paagi ha pagsangyaw, bangin upod na an iba pa nga paagi basi makaistorya an mga tawo? Pananglitan, nasarihan mo na ba an pagsangyaw ha mga tawo ha kalye o ha ira gintatrabahoan? Makakaistorya mo ba hira ha telepono o makukuha an mga numero han telepono hadton nasangyawan mo na han mensahe han Ginhadian basi matawagan mo  hira? Pinaagi ha pagpailob ngan pagpauyon-uyon ha imo ministeryo, malilipay ka ha pakabiling hin mga tawo nga makarawat han mensahe han Ginhadian.

Paglampos ha Kawaray Interes

12. Ano an sadang buhaton naton kon damu ha aton teritoryo an diri interesado?

¹² Ano man kon damu ha iyo teritoryo an diri interesado ha relihiyon? Maipapahiuyon mo ba an imo pakiistorya pinaagi ha pag-unabi hin topiko nga makakapainteres ha ira? Hi apostol Pablo nagsurat ha mga igkasi-tumuroo ha Korinto: “Ha mga Judio, sugad ako hin Judio . . . Ha mga waray masakop ha kasugoanan, sugad hin waray kasakop ha kasugoanan, diri nga waray [ako] kasugoanan han Dios.” Ano an motibo ni Pablo? “Ako [nagin] ngatanan nga mga butang tungod ha ngatanan nga mga tawo, basi nga ha ngatanan nga paagi maluwas ko an iba,” siring niya. (1 Kor. 9:20-22) Makakahunahuna ba liwat kita hin mga topiko nga makakapainteres ha mga tawo ha aton teritoryo? Damu nga diri-relihiyoso an naruruyag nga mas magin duok hira sugad nga pamilya. Bangin nagpipinamiling liwat hira hin katuyoan ha kinabuhi. Maisusumat ba naton ha ira an mensahe han Ginhadian ha paagi nga makakapainteres ha ira?

13, 14. Paonan-o kita nagigin mas malipayon gud tungod ha pagbulig ha iba nga magin mga disipulo?

¹³ Nagtitikadamu nga magwarali an nagigin mas malipayon gud tungod han ira pagbulig ha iba nga magin mga disipulo, bisan ha mga lugar diin kadam-an an diri interesado. Paonan-o? Pinaagi ha pag-aram hin iba nga yinaknan. Naobserbahan han usa nga mag-asawa nga sobra 60 na an edad nga damu hinduro an naukoy nga Intsik nga estudyante upod an ira mga pamilya ha teritoryo han ira kongregasyon. “Tungod hini, nadasig kami nga mag-aram hin Inintsik,” siring han bana. “Bisan kon nangahulogan ini hin pag-aram hito nga yinaknan kada adlaw, nagresulta ini hin damu nga pag-aram ha Biblia ha mga Intsik ha amon lugar,” siring niya.

¹⁴ Bisan kon diri ka mag-aram hin iba nga yinaknan, magagamit mo hin maopay an bokleta nga Good News for People of All Nations kon masangyawan mo adton iba an yinaknan. Makakakuha ka liwat hin literatura ha yinaknan han mga tawo nga imo nasasangyawan. Oo, nagkikinahanglan hin dugang nga panahon ngan pangalimbasog ha pakigkomunikar ha mga tawo nga iba an yinaknan ngan kultura. Kondi, hinumdumi an prinsipyo ha pulong han Dios: ‘An nagpupugas hin hura mahura man an pag-aanihon.’—2 Kor. 9:6.

Nabulig an Bug-os nga Kongregasyon

15, 16. (a) Kay ano nga responsabilidad han bug-os nga kongregasyon an pagbulig ha iba nga magin mga disipulo? (b) Ano an naibubulig han mga edaran na nga kabugtoan?

¹⁵ Kondi, an pagbulig ha iba nga magin mga disipulo diri nadepende ha pangalimbasog han usa la nga tawo. Lugod, nabulig hito an bug-os nga kongregasyon. Kay ano? Hi Jesus nagsiring: “Tungod hini an ngatanan makilala, nga kamo akon mga tinon-an, kon kamo maghigugmaay [ha] usa kag usa.” (Juan 13:35) Ngan kon an mga estudyante han Biblia natambong ha mga katirok, agsob nga nadadasig gud hira han paghigugmaay han mga Saksi. Usa nga estudyante han Biblia an nagsurat: “Nalilipay gud ako ha pagtambong ha mga katirok. Maabiabihon gud hira!” Hi Jesus nagsiring nga adton nagigin iya sumurunod bangin kontrahon han ira pamilya. (Basaha an Mateo 10:35-37.) Kondi, nagsaad hiya nga ha kongregasyon magkakaada hira hin damu nga espirituwal nga “kabugtoan nga kalalakin-an, ngan . . . kababayin-an, ngan mga iroy, ngan mga anak.”—Mar. 10:30.

¹⁶ Daku an naibubulig han aton edaran na nga kabugtoan ha pag-uswag han mga estudyante han Biblia. Ha ano nga paagi? Bisan kon an iba ha ira diri na makakalugaring ha pagdumara hin pag-aram ha Biblia, an ira makapadasig nga mga komento ha mga katirok ha kongregasyon nagpaparig-on han pagtoo han ngatanan nga namamati. An ira rekord han paglakat “ha dalan han pagkamatadong” nagdudugang hin kadayawan han kongregasyon ngan nakakaaghat ha mga tangkod-an-kasingkasing ngada ha organisasyon han Dios.—Prob. 16:31.

Paglampos ha Aton Kahulop

17. Ano an mahihimo naton basi malamposan an aton pag-abat hin kawaray-kapas ha pagdumara hin pag-aram?

¹⁷ Kumusta man kon inaabat mo nga waray ka  kapas ha pagdumara hin pag-aram ha Biblia? Hinumdumi nga ginbuligan ni Jehova hi Moises pinaagi ha paghatag ha iya han baraan nga espiritu ngan hin kaupod, an iya bugto nga hi Aaron. (Eks. 4:10-17) Hi Jesus nagsaad nga an espiritu han Dios mabulig ha aton ha pagsangyaw. (Buh. 1:8) Dugang pa, nagsugo hi Jesus hin mga magburuhat basi magsangyaw nga padis-padis. (Luk. 10:1) Salit, kon nakukurian ka ha pagdumara hin pag-aram ha Biblia, pag-ampo para han espiritu han Dios nga hatagan ka hin kinaadman ngan katapos, pagbiling hin kaupod ha pagsangyaw nga makakaparig-on ha imo ngan makakabulig ha imo an iya eksperyensya. Makaparig-on ha pagtoo an paghinumdom nga ginpili ni Jehova nga gamiton an ordinaryo nga mga tawo—an “magluya nga mga bagay ha kalibotan”—basi matuman inin importante gud nga buruhaton.—1 Kor. 1:26-29.

18. Paonan-o naton malalamposan an kahulop ha diri pakabulig ha estudyante han Biblia?

¹⁸ Paonan-o naton malalamposan an kahulop ha diri pakabulig ha estudyante han Biblia? Maopay nga hinumdoman naton nga an pagbulig ha iba nga magin mga disipulo diri pariho ha pagluto hin pagkaon nga an kalamposan o kapakyasan nadepende la ha usa nga tawo—ha kusinero. Lugod, diri la ito ha aton kalugaringon nga pangalimbasog. Hi Jehova an pinakaimportante nga bahin hito tungod kay ginpapahirani niya an tawo ha iya. (Juan 6:44) Kita ngan an iba ha kongregasyon nagbubuhat han aton gimaopayi ha paggamit han maopay nga paagi han pagtutdo basi buligan an estudyante nga mag-uswag. (Basaha an 2 Timoteo 2:15. a) Ngan an estudyante kinahanglan gumios uyon ha iya hinbabaroan. (Mat. 7:24-27) Nasusubo gud kita kon naundang hiya ha pag-aram. Hingyap naton nga an mga estudyante han Biblia maghimo hin husto nga pagpili, kondi an tagsa nga tawo “may baratunon ha Dios tungod ha iya kalugaringon.”—Roma 14:12, NW.

Ano an mga Balos?

19-21. (a) Ano nga mga kapulsanan an nakakarawat naton ha pagdumara hin mga pag-aram ha Biblia? (b) Ano an pagtagad ni Jehova ha ngatanan nga nagsasangyaw?

¹⁹ An pagdumara hin mga pag-aram ha Biblia nabulig ha aton nga magin aktibo pirme ha pamiling siyahan han Ginhadian. Iginpapasilsil liwat hito an mga kamatuoran han Pulong han Dios hin mas hilarom ha aton hunahuna ngan kasingkasing. Kay ano? An payunir nga hi Barak nagsaysay: “An pagdumara hin mga pag-aram ha Biblia nag-aaghat ha imo nga magin mas maopay nga estudyante han Pulong han Dios. Hinbaroan ko nga kinahanglan parig-unon ko pa an akon pagtoo antes ako makagtutdo hin maopay ha iba.”

²⁰ Kon waray ka gindudumara nga pag-aram ha Biblia, nangangahulogan ba nga an imo pag-alagad waray pulos ha Dios? Syempre diri! Inaapresyar gud ni Jehova an aton mga pangalimbasog ha pagdayaw ha iya. An ngatanan nga nagsasangyaw “mga kabulig han Dios ha pagbuhat.” Kondi, an pagdumara hin pag-aram ha Biblia nakakadugang han aton kalipay samtang nakikita naton kon paonan-o ginpapatubo han Dios an liso nga aton iginsabwag. (1 Kor. 3:6, 9) “Samtang nakikita mo nga an estudyante han Biblia nag-uuswag, daku gud an imo pagpasalamat kan Jehova tungod kay ginagamit ka niya nga hatagan ito nga tawo hin maopay nga regalo—an higayon nga makilala hi Jehova ngan makakarawat hin kinabuhi nga waray kataposan,” siring ni Amy nga usa nga payunir.

²¹ An pagbuhat han aton gimaopayi ha pagtikang hin mga pag-aram ha Biblia mabulig ha aton nga magin aktibo pirme ha pag-alagad ha Dios yana ngan magpaparig-on han aton paglaom nga matalwas ngadto ha bag-o nga kalibotan. Pinaagi han bulig ni Jehova, hinaot mabuligan liwat naton adton namamati ha aton. (Basaha an 1 Timoteo 4:16.) Makalilipay gud ito!

[Footnote]

Nahinunumdoman Mo Ba?

• Ano nga mga ulang an bangin makapugong ha iba ha pagdumara hin mga pag-aram ha Biblia?

• Ano an mahimo naton buhaton kon diri interesado an damu nga tawo ha aton teritoryo?

• Ano nga mga balos an nakakarawat naton ha pagdumara hin pag-aram ha Biblia?

[Mga Pakiana]

[Mga Retrato ha pahina 9]

Ginpapauswag mo ba an imo mga paagi ha pagsangyaw basi hiagian an mga tawo nga tangkod an kasingkasing?