Usa Ka ba nga “Tinaporan han Diri-Takos nga Pagkabuotan han Dios”?
Usa Ka ba nga “Tinaporan han Diri-Takos nga Pagkabuotan han Dios”?
‘Maghigugmaay gud kamo hin minagburugto ha usa kag usa. Mag-una ha pagpasidungog ha usa kag usa.’—ROMA 12:10.
1. Ano nga mga pasarig an aton mababasa ha Pulong han Dios?
AN Pulong han Dios pauroutro nga nagpapasarig ha aton nga hi Jehova mabulig ha aton kon kita nanluluya o nasusubo. Pananglitan, tigamni inin nakakaliaw nga mga pulong: “Hi Jehova nakapot hadton ngatanan nga natutumba, ngan nagpapabangon hadton nanhihipakulob.” “Gintatambal niya an may mga ruba nga kasingkasing, ngan ginpuputos niya an ira mga samad.” (Sal. 145:14; 147:3) Dugang pa, an aton langitnon nga Amay mismo nasiring: “Ako, hi Jehova an imo Dios, makapot han imo too nga kamot, nga masiring ha imo: Ayaw kahadlok; ako mabulig ha imo.”—Isa. 41:13.
2. Paonan-o binubuligan ni Jehova an iya mga surugoon?
2 Kondi, paonan-o hi Jehova ‘nakapot ha aton kamot,’ nga aadto man hiya ha diri-nakikita nga mga langit? Paonan-o hiya ‘nagpapabangon ha aton kon kita nanhihipakulob’ tungod ha duro nga kasubo? Hi Jehova nga Dios nabulig ha magkalain-lain nga paagi. Pananglitan, gintatagan niya an iya katawohan hin “kapin kaopay nga gahum” pinaagi han iya baraan nga espiritu. (2 Kor. 4:7; Juan 14:16, 17) An mga surugoon han Dios napaparig-on liwat han iya gamhanan nga mensahe ha Biblia. (Heb. 4:12) May-ada pa ba iba nga paagi nga ginpaparig-on kita ni Jehova? Mababasa naton an baton ha libro han Siyahan nga Pedro.
“Diri-Takos nga Pagkabuotan han Dios nga Iginpapakita ha Magkadirodilain nga Paagi”
3. (a) Ano an ginsiring ni apostol Pedro mahitungod han mga pagsulay? (b) Ano an ginhihisgotan ha ikatarapos han siyahan nga surat ni Pedro?
3 Hi apostol Pedro nagsurat ha dinihogan nga mga tumuroo nga sadang hira malipay tungod han hura nga balos nga naghuhulat ha ira. Katapos, hiya nagdugang: “Bisan niyan ha gutiay la nga panahon, kon may kinahanglan, pagsub-on kamo ha magkadirodilain nga mga pagsulay.” (1 Ped. 1:1-6) Tigamni an pulong nga “magkadirodilain.” Nagpapasabot ito nga iba-iba an pagsulay. Kondi, waray pabay-i ni Pedro an iya kabugtoan nga nababaraka kon malalamposan ba nira an sugad nga mga pagsulay. Lugod, iginpapatin-aw ni Pedro nga makakasiguro an mga Kristiano nga bubuligan hira ni Jehova nga malamposan an tagsa nga pagsulay nga inaatubang nira, anoman nga klase ito. Mababasa ito nga pasarig ha ikatarapos han iya surat, diin naghisgot hiya may kalabotan ha “kataposan han ngatanan nga mga butang.”—1 Ped. 4:7.
4. Kay ano nga nakakaliaw ha aton an mga pulong ha 1 Pedro 4:10?
4 Hi Pedro nagsiring: “Uyon ha regalo nga nakarawat han kada tagsa, gamita ito ha pagmangno ha usa kag usa sugad nga maopay nga mga tinaporan han diri-takos nga pagkabuotan han Dios nga iginpapakita ha magkadirodilain nga paagi.” (1 Ped. 4:10, NW) Ginamit niya utro an pulong nga “magkadirodilain.” Baga hin nasiring hiya, ‘Damu kalain an mga pagsulay, kondi iginpapahayag an diri-takos nga pagkabuotan han Dios ha damu liwat nga paagi.’ Kay ano nga nakakaliaw ito? Nagpapasabot ito nga anoman nga klase an pagsulay ha aton, may-ada pirme kapahayagan han diri-takos nga pagkabuotan han Dios nga katugbang hito. Kondi, natigamnan mo ba an ginsiring ni Pedro kon paonan-o iginpapahayag ha aton an diri-takos nga pagkabuotan ni Jehova? Pinaagi han mga igkasi-Kristiano.
“Pagmangno ha Usa kag Usa”
5. (a) Ano an sadang buhaton han tagsa nga Kristiano? (b) Ano nga mga pakiana an iginbangon?
5 Ha pakiistorya ni Pedro ha ngatanan nga membro han kongregasyon, hiya nagsiring: “Labaw ha ngatanan nga mga bagay maghigugmaay gud kamo hinduro [ha] usa kag usa.” Ngan nagpadayon hiya: “Uyon ha regalo nga nakarawat han kada tagsa, gamita ito ha pagmangno ha usa kag usa.” (1 Ped. 4:8, 10; NW) Salit, an kada usa ha kongregasyon may-ada bahin ha pagparig-on ha mga igkasi-Kristiano. Igintapod ha aton an birilhon nga butang nga gintatag-iya ni Jehova, ngan responsabilidad naton an paghatag hito ha iba. Kon sugad, ano an igintapod ha aton? Siring ni Pedro nga usa ito nga “regalo.” Ano ito nga regalo? Paonan-o naton ‘gagamiton ito ha pagmangno ha usa kag usa’?
6. Ano an pipira han mga regalo nga igintapod ha mga Kristiano?
6 An Pulong han Dios nasiring: “An ngatanan nga maopay nga hatag ngan an ngatanan nga hingpit nga hatag tikang ha igbaw.” (Jak. 1:17) Oo, an ngatanan nga regalo nga igintapod ni Jehova ha iya katawohan mga kapahayagan han iya diri-takos nga pagkabuotan. Usa han maopay nga regalo ha aton ni Jehova amo an baraan nga espiritu. Nabulig ito ha aton nga makultibar an mga kalidad nga nakakalipay ha Dios sugad han gugma, pagkamaopay, ngan pagkamalumo. Sugad nga resulta, napapagios kita hito nga mga kalidad nga kinasingkasing nga higugmaon ngan kinaburut-on nga buligan an aton mga igkasi-tumuroo. An tinuod nga kinaadman ngan kahibaro kaupod liwat ha mag-opay nga regalo nga nakakarawat naton ha bulig han baraan nga espiritu. (1 Kor. 2:10-16; Gal. 5:22, 23) Ha pagkamatuod, an ngatanan nga aton kusog, abilidad, ngan talento mahimo tagdon nga mga regalo nga sadang gamiton ha pagdayaw ngan pagpasidungog ha aton langitnon nga Amay. Gintagan kita han Dios hin responsabilidad nga gamiton an aton mga abilidad ngan kalidad sugad nga paagi ha pagpakita han diri-takos nga pagkabuotan han Dios ha aton mga igkasi-tumuroo.
“Gamita Ito ha Pagmangno”—Paonan-o?
7. (a) Ano an iginpapasabot han mga pulong nga “uyon ha”? (b) Ano an sadang igpakiana naton ha aton kalugaringon, ngan kay ano?
7 Mahitungod han mga regalo nga nakarawat naton, hi Pedro nagsurat liwat: “Uyon ha regalo nga nakarawat han kada tagsa, gamita ito.” An mga pulong nga “uyon ha” nagpapasabot nga iba-iba an mga kalidad ngan abilidad diri la ha klase kondi ha kaopayon liwat hito. Anoman an regalo, an kada usa ginsasagda nga ‘gamiton ito [an bisan ano nga regalo nga nakarawat niya] ha pagmangno ha usa kag usa.’ Dugang pa, usa nga sugo an mga pulong nga, “gamita ito . . . sugad nga maopay nga mga tinaporan.” Salit, sadang pakianhan naton an aton kalugaringon: ‘Ginagamit ko gud ba an mga regalo nga igintapod ha akon basi maparig-on an akon mga igkasi-tumuroo?’ (Itanding an 1 Timoteo 5:9, 10.) ‘O ginagamit ko ba an mga abilidad nga akon nakarawat tikang kan Jehova para la ha akon kapulsanan—basi magin riko o magin kilala ha komunidad?’ (1 Kor. 4:7) Kon gagamiton naton an mga regalo ha aton “ha pagmangno ha usa kag usa,” mapapalipay naton hi Jehova.—Prob. 19:17; basaha an Hebreo 13:16.
8, 9. (a) Ano an pipira nga paagi nga an mga Kristiano ha bug-os nga kalibotan nagmamangno para ha kaopayan han mga igkasi-tumuroo? (b) Paonan-o an kabugtoan ha iyo kongregasyon nabulig ha usa kag usa?
8 Gin-uunabi ha Biblia an iba-iba nga paagi han pagmangno han mga Kristiano ha usa kag usa ha siyahan nga siglo. (Basaha an Roma 15:25, 26; 2 Timoteo 1:16-18.) Sugad man yana, an sugo nga gamiton an regalo han usa para ha kaopayan han mga igkasi-tumuroo, bug-os-kasingkasing nga ginbubuhat han tinuod nga mga Kristiano. Tagda an pipira nga paagi nga mahihimo naton ito.
9 Damu nga kabugtoan an nagasto hin mga oras kada bulan ha pag-andam hin mga bahin ha katirok. Ha mga katirok, kon iginpapahayag nira an espirituwal nga mga impormasyon nga hinbaroan nira durante han ira pag-aram ha Biblia, an ira maaramon nga mga pulong nagpapagios ha ngatanan ha kongregasyon nga magpailob. (1 Tim. 5:17) Oo, damu an kabugtoan nga kilala tungod han ira gugma ngan pagpaid ha mga igkasi-tumuroo. (Roma 12:15) An iba regular nga nabisita ha mga magluya ngan nag-aampo upod nira. (1 Tes. 5:14) Ngan an iba nagsusurat hin kinasingkasing nga pagparig-on ha mga igkasi-Kristiano nga nag-aantos hin kakurian. An iba pa mahigugmaon nga nabulig hadton may-ada mga limitasyon ha pisikal basi makatambong ha mga katirok ha kongregasyon. Yinukot nga Saksi an nabulig ha mga igkasi-tumuroo ha pagtukod hin mga balay nga naguba han mga kalamidad. An malumo nga gugma ngan praktikal nga bulig hinin mahigugmaon nga kabugtoan, mga kapahayagan han “diri-takos nga pagkabuotan han Dios nga iginpapakita ha magkadirodilain nga paagi.”—Basaha an 1 Pedro 4:11.
Hain an Mas Importante?
10. (a) Madasigon hi Pablo ha ano nga duha nga paagi han iya pag-alagad ha Dios? (b) Paonan-o naton ginsusubad hi Pablo yana?
10 An mga surugoon han Dios gintaporan diri la han mga regalo nga magagamit ha pagbulig ha ira mga igkasi-tumuroo kondi han mensahe liwat nga isasangyaw nira ha ira igkasi-tawo. Maaram hi apostol Pablo hinin duha nga paagi han pag-alagad kan Jehova. Nagsurat hiya ha kongregasyon ha Efeso mahitungod han pagin “tinaporan han diri-takos nga pagkabuotan han Dios” nga iginhatag ha iya para ha ira kaopayan. (Efe. 3:2, NW) Kondi, nagsiring liwat hiya: ‘Naproybahan na kami han Dios ha pagtapuri han maopay nga sumat.’ (1 Tes. 2:4, NW) Pariho kan Pablo, maaram liwat kita nga gintaporan kita han toka sugad nga magwarali han Ginhadian han Dios. Pinaagi han madasigon nga pagsangyaw, nangangalimbasog kita nga subaron hi Pablo sugad nga waray pagkakapoy nga parasamwak han maopay nga sumat. (Buh. 20:20, 21; 1 Kor. 11:1) Maaram kita nga an pagsangyaw han mensahe han Ginhadian makakatalwas han mga kinabuhi. Kondi, ha pariho nga panahon, nangangalimbasog kita ha pagsubad kan Pablo pinaagi ha pagbiling hin mga higayon ha ‘paghatag hin espirituhanon nga regalo’ ha mga igkasi-tumuroo.—Basaha an Roma 1:11, 12; 10:13-15.
11. Paonan-o naton sadang tagdon an mga toka ha aton nga pagsangyaw ngan pagparig-on ha kabugtoan?
11 Hain an mas importante hinin duha nga buruhaton han mga Kristiano? An pagpakiana hito baga hin pariho ha pagpakiana mahitungod han tamsi, Hain an mas importante ha duha nga pako hito? Matin-aw an baton. Kinahanglan gamiton han tamsi an duha nga pako basi makalupad. Sugad man, kinahanglan makigbahin kita ha duha nga paagi han aton pag-alagad ha Dios basi matuman naton an ngatanan nga sugo ha aton sugad nga mga Kristiano. Salit, imbes nga tagdon sugad nga magkabulag nga toka an aton pagsangyaw han maopay nga sumat ngan pagparig-on ha mga igkasi-tumuroo, gintatagad naton ito sugad han pagtagad nira apostol Pedro ngan Pablo—sugad nga magkaupod nga responsabilidad. Ha ano nga paagi?
12. Paonan-o kita nag-aalagad sugad nga instrumento ni Jehova?
12 Sugad nga mga ebanghelisador, ginagamit naton an ngatanan nga abilidad ha pagtutdo basi mabantad naton an kasingkasing han aton mga igkasi-tawo pinaagi han nagpaparig-on nga mensahe han Ginhadian han Dios. Hito nga paagi, naglalaom kita nga mabubuligan hira nga magin mga disipulo ni Kristo. Kondi, ginagamit liwat naton an anoman nga aton abilidad ngan iba pa nga regalo basi madasig an aton mga igkasi-tumuroo pinaagi han makaparig-on nga mga pulong ngan pagkamabinuligon—sugad nga kapahayagan han diri-takos nga pagkabuotan han Dios. (Prob. 3:27; 12:25) Hito nga paagi, binubuligan naton hira nga magpabilin nga mga disipulo ni Kristo. Ha duha nga buruhaton—pagsangyaw ha mga tawo ngan “pagmangno ha usa kag usa”—may-ada kita dungganon nga pribilehiyo ha pag-alagad sugad nga instrumento ni Jehova.—Gal. 6:10.
‘Maghigugmaay Gud Kamo ha Usa kag Usa’
13. Ano an mahitatabo kon umundang kita ha “pagmangno ha usa kag usa”?
13 Ginsagda ni Pablo an iya mga igkasi-tumuroo: ‘Maghigugmaay gud kamo hin minagburugto. Mag-una ha pagpasidungog ha usa kag usa.’ (Roma 12:10) Oo, an paghigugma ha aton kabugtoan nagpapagios ha aton nga bug-os-kasingkasing nga mag-alagad sugad nga mga tinaporan han diri-takos nga pagkabuotan han Dios. Maaram kita nga kon maglampos hi Satanas ha pagpugong ha aton ha “pagmangno ha usa kag usa,” madadaot niya an aton pagkaurosa. (Kol. 3:14) Tungod hito, an kakulang hin pagkaurosa magriresulta ha kakulang hin kadasig ha pagsangyaw. Maaram gud hi Satanas nga kinahanglan madaot niya bisan an usa la han aton mga pako basi diri kita makalupad, siring pa.
14. Hin-o an nagpapahimulos han aton “pagmangno ha usa kag usa”? Paghatag hin ehemplo.
14 An “pagmangno ha usa kag usa” nabulig diri la ha nagpakakarawat han diri-takos nga pagkabuotan han Dios kondi hadton nagbubuhat liwat hito. (Prob. 11:25) Pananglitan, tagda an mag-asawa nga hira Ryan ngan Roni, ha Illinois, E.U.A. Han hinbaroan nira nga naguba an damu nga balay han mga igkasi-Saksi tungod han bagyo nga Katrina, napagios hira han ira gugma ha kabugtoan nga umundang ha trabaho, bayaan an ira apartment, pumalit hin segunda-mano nga treyler, aydon ito basi magin angayan ukyan, ngan nagbiyahe hin 1,400 kilometro ngadto ha Louisiana. Nag-ukoy hira didto hin sobra usa ka tuig samtang iginhahatag an ira panahon, kusog, ngan katigayonan basi buligan an ira kabugtoan. “Ha pagbulig hini nga buruhaton, mas nagin duok ako ha Dios. Nakita ko kon paonan-o ginmamangnoan ni Jehova an iya katawohan,” siring ni Ryan, nga 29 an edad. Nagsiring pa hiya: “Daku gud an akon hinbaroan ha pagbuhat upod han mas edaran nga kabugtoan kon paonan-o an pagmangno ha kabugtoan. Hinbaroan ko liwat nga damu pa an maibubulig namon nga mga burobata ha organisasyon ni Jehova.” Hi Roni, nga 25 an edad, nagsiring: “Nagpapasalamat gud ako yana nga nakakabulig ako ha iba. Yana pa gud la ako nagin malipayon hin sugad hini ha akon bug-os nga kinabuhi. Maaram ako nga ha maabot nga mga tuig, padayon nga magpapahimulos ako hinin makalilipay nga eksperyensya.”
15. Kay ano nga sadang kita magpadayon ha pag-alagad sugad nga mga tinaporan han diri-takos nga pagkabuotan han Dios?
15 Oo, an pagsugot ha mga sugo han Dios nga pagsangyaw han maopay nga sumat ngan pagparig-on ha mga igkasi-tumuroo nagriresulta hin mga bendisyon ha ngatanan. Napaparig-on ha espirituwal an mga nabubuligan naton, samtang inaabat naton an tinuod nga kalipay nga resulta la han paghatag. (Buh. 20:35) An bug-os nga kongregasyon mas maghihigugmaay samtang an tagsa nga membro mahigugmaon nga nagtatagad ha iba. Dugang pa, an gugma ngan pagtagad naton ha usa kag usa matin-aw nga nagpapakilala ha aton sugad nga tinuod nga mga Kristiano. Hi Jesus nagsiring: “Tungod hini an ngatanan makilala, nga kamo akon mga tinon-an, kon kamo maghigugmaay [ha] usa kag usa.” (Juan 13:35) Labaw ha ngatanan, napapasidunggan an aton mahigugmaon nga Amay, hi Jehova, samtang an iya hingyap nga maparig-on adton nanginginahanglan, nakikita ha iya mga surugoon ha tuna. Salit, sadang gud naton gamiton an regalo ha aton “ha pagmangno ha usa kag usa sugad nga maopay nga mga tinaporan han diri-takos nga pagkabuotan han Dios”! Magpapadayon ka ba ha pagbuhat hito?—Basaha an Hebreo 6:10.
Nahinunumdoman Mo Ba?
• Ha ano nga mga paagi ginpaparig-on ni Jehova an iya mga surugoon?
• Ano an igintapod ha aton?
• Ano an pipira nga paagi nga mabubuligan naton an aton mga igkasi-tumuroo?
• Ano an magpapagios ha aton nga padayon nga gamiton an regalo ha aton “ha pagmangno ha usa kag usa”?
[Mga Pakiana]
[Mga Retrato ha pahina 13]
Ginagamit mo ba an “regalo” ha imo ha pagmangno ha iba o ha pagpalipay ha imo kalugaringon?
[Mga Retrato ha pahina 15]
Nagsasangyaw kita han maopay nga sumat ha iba ngan nabulig ha mga igkasi-Kristiano
[Retrato ha pahina 16]
An mga nagbuboluntaryo ha pagbulig takos kumendasyonan tungod han ira pagsakripisyo ha kalugaringon