Ika-125 nga Gradwasyon han Gilead

An mga Misyonero Gindasig nga Subaron hi Jeremias

“MAKASAYSAYAN gud ini nga klase han Gilead,” siring ni Geoffrey Jackson nga membro han Nagmamando nga Lawas, ha iya pahayag ha 6,156 nga nagtambong ha gradwasyon han ika-125 nga klase han Watchtower Bible School of Gilead han Septyembre 13, 2008. Sobra 8,000 na nga misyonero—upod na an 56 nga naggradwar hini nga klase—an naipadara han Gilead ngadto ha “sidsid gud han kalibotan”!—Buh. 1:8.

Hi Bugto Jackson nga tsirman han programa han gradwasyon nagpakiana: “Magigin mas epektibo ba an imo ministeryo kon masasarigan ka?” Katapos, nag-unabi hiya hin upat nga bulig basi magin masasarigan: pagkaada husto nga disposisyon, pagin maopay nga susbaranan, bug-os nga pagbasar ha Pulong han Dios han imo igintututdo, ngan pagin mahunahunaon pirme ha pagpasamwak han ngaran ni Jehova.

Ginhisgotan ni David Schafer nga kabulig han Komite han Pagtutdo an topiko nga “Masasabtan Mo ba an Ngatanan?” Iya ginpasarig an mga estudyante ha Gilead nga mahimo nira “masabtan an ngatanan” nga ira ginkikinahanglan ha pag-alagad sugad nga mga misyonero kon padayon nga pamimilngon nira hi Jehova ngan mapainubsanon nga kikilalahon an “matinumanon ngan maaramon nga uripon.”—Prob. 28:5; Mat. 24:45, NW.

Sunod, hi John E. Barr han Nagmamando nga Lawas nagpahayag han tema nga “Ayaw Tuguti nga May-ada Magbulag ha Imo ha Gugma han Dios.” An iya kinag-anak nga sagdon ha mga naggradwar ngan ha ira mga kag-anak nagwara han anoman nga kabaraka nga bangin inabat nira mahitungod han posible maeksperyensyahan han bag-o nga mga misyonero ha ira toka. “Talwas ngan mahimyang gud an aton kahimtang tungod kay hinigugma kita han Dios,” hiya nagsaysay. Waray makakagbulag han mga misyonero ha gugma han Dios gawas la kon hira mismo an bumulag ha Dios.

Hi Sam Roberson nga membro han Theocratic Schools Department nagdasig ha mga mamarati nga isul-ot an “gimaopayi nga bado.” Pinaagi ha pag-aram han ginbuhat ni Jesus ngan pagsubad ha iya, ‘maisusul-ot [han mga naggradwar] an Ginoo Jesu-Kristo.’ (Roma 13:14) Sunod, ginhisgotan ni William Samuelson nga paramangno han Theocratic Schools Department kon ano an nakakahimo ha usa ka tawo nga dungganon. An panhunahuna han Dios, diri han tawo, an basihan han pagin dungganon.

Gin-interbyu ni Michael Burnett, usa han mga instruktor, an mga estudyante mahitungod han ira mga eksperyensya ha pag-alagad ha kanataran. Samtang naeskwela ha Gilead ha Patterson, New York, an kadam-an ha ira igintoka ha teritoryo nga agsob makobrehan, pero may hin-agian hira nga mga interesado. Hi Gerald Grizzle han Convention Office nag-interbyu hin tulo nga kabugtoan nga naeskwela ha School for Branch Committee Members. An ira ginsiring nakabulig ha mga naggradwar ha Gilead nga magin andam ha mga kahimtang nga ira aatubangon ha ira mga toka ha iba-iba nga nasud.

Hi David Splane, nga membro han Nagmamando  nga Lawas ngan naggradwar ha ika-42 nga klase, nagpahayag han tema nga “Subara hi Jeremias.” Bisan kon nabaraka gud hi Jeremias ha iya toka, ginparig-on hiya ni Jehova. (Jer. 1:7, 8) Paririg-unon liwat ni Jehova an bag-o nga mga misyonero. Hi Bugto Splane nagsiring: “Kon may-ada ka diri iginkakasinabot, pagsurat hin napulo nga kalidad nga naruruyagan mo gud hito nga tawo. Kon diri ka makaihap hin napulo, karuyag sidngon diri mo pa gud hiya kilala.”

Hi Jeremias may pagsakripisyo ha kalugaringon. Han karuyag na niya umundang, nag-ampo hiya, ngan ginbuligan hiya ni Jehova. (Jer. 20:11) Hi Bugto Splane nagsiring: “Kon nanluluya ka, isumat ito kan Jehova. Mahipapausa ka ha mga paagi ni Jehova ha pagbulig ha imo.”

Ha kataposan han programa han gradwasyon, ginpahinumdom han tsirman an mga mamarati nga an mga naggradwar nahibaro hin damu nga paagi ha pagpauswag han ira pagkamasasarigan. Samtang nagsasangyaw hira ha ira teritoryo, magigin mas epektibo an ira mensahe kon masasarigan hira.—Isa. 43:8-12.

[Kahon ha pahina 22]

ESTADISTIKA HAN KLASE

Kadamu han nasud nga ginrepresentaran: 6

Kadamu han nasud nga gintokahan: 21

Kadamu han estudyante: 56

Aberids nga edad: 32.9

Aberids nga mga tuig ha kamatuoran: 17.4

Aberids nga mga tuig ha bug-os-panahon nga ministeryo: 13

[Retrato ha pahina 23]

Ika-125 nga Klase nga Naggradwar ha Watchtower Bible School of Gilead

Ha lista ha ubos, an mga rumbay may numero tikang ha prente tipaluyo, ngan an mga ngaran iginlista tikang ha wala tipatoo ha kada rumbay.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.