An Pulong ni Jehova Buhi

Importante nga mga Punto ha Libro han Pahayag—II

ANO an tidaraon hadton nagsisingba kan Jehova nga Dios ngan hadton diri? Ano an mahitatabo kan Satanas ngan ha iya mga demonyo? Ano nga mga bendisyon an mapapahimulsan han masinugtanon nga katawohan durante han Usa ka Yukot ka Tuig nga Pagmando ni Kristo? An baton hini ngan han iba pa nga importante nga pakiana mahibabaroan ha Pahayag 13:1–22:21. a Ginhihisgotan hini nga mga kapitulo an kataposan nga 9 han 16 nga bisyon nga nakita ni apostol Juan han ikatarapos han siyahan nga siglo K.P.

“Bulahan an nagbabasa, ngan hira nga nanmamati han mga pulong hini nga tagna, ngan nagtitipig han mga butang nga nanhisurat dida,” nagsurat hi Juan. (Pah. 1:3; 22:7) An pagbasa ngan pag-aplikar han aton hinbabaroan ha libro han Pahayag makakadasig ha aton pag-alagad, makakaparig-on han aton pagtoo ha Dios ngan ha iya Anak, hi Jesu-Kristo, ngan makakahatag ha aton hin makalilipay nga paglaom ha tidaraon. b—Heb. 4:12.

IGINTAKBO AN PITO NGA YAHONG HAN KASINA HAN DIOS

(Pah. 13:1–16:21)

‘An mga nasud nagkasisina, ngan inabot an kasina han Dios, ngan an oras ha paghibang ha mga naghihibang han tuna,’ siring ha Pahayag 11:18. Ha pagpakita kon kay ano nga inabot an kasina han Dios, iginhuhulagway ha ikawalo nga bisyon an ginbubuhat han ‘mananap nga may-ada napulo nga sungay ngan pito nga ulo.’—Pah. 13:1.

Ha ikasiyam nga bisyon, nakita ni Juan an “Kordero nga natukdaw ha Bukid [han] Sion” ngan upod niya an “usa ka gatos, kap-atan kag upat ka yukot.” Hira an “tinubos tikang ha mga tawo.” (Pah. 14:1, 4) Sumunod an pagpasamwak han mga anghel. Ha sunod nga bisyon, nakita ni Juan an “pito nga anghel nga may-ada pito nga mga peste.” Matin-aw nga hi Jehova mismo an nagsugo ha ira nga itakbo an “pito nga mga yahong han kasina han Dios” ha iba-iba nga bahin han kalibotan ni Satanas. An mga yahong may sulod nga mga kapahayagan ngan pahamangno han paghukom nga ipapadapat han Dios. (Pah. 15:1; 16:1) Inin duha nga bisyon naghahatag hin detalye han dugang nga paghukom pinaagi han Ginhadian nga may kalabotan ha ikatulo nga kairo ngan ha paghuyop han ikapito nga trumpeta.—Pah. 11:14, 15.

Baton ha Pakiana Mahitungod ha Kasuratan:

13:8—Ano an “basahon han kinabuhi han Kordero”? Simboliko ini nga basahon diin an nakasurat la dinhi amo an mga ngaran hadton magmamando kaupod ni Jesu-Kristo ha iya Ginhadian ha langit. Upod na hini an mga ngaran han dinihogan nga Kristiano nga aanhi pa ha tuna nga may-ada paglaom nga mabuhi ha langit.

13:11-13—Paonan-o an mananap nga may-ada duha nga sungay nagios sugad hin dragon ngan nagpapalusad hin kalayo tikang ha langit? An asoy nga an duha-an-sungay nga mananap—an Anglo-Amerikano nga Gahum ha Kalibotan—nagyayakan sugad hin dragon nagpapasabot nga nakontra, nananarhog, ngan nagamit ito hin kamadarahog basi mapiritan an mga tawo nga karawaton an paagi han pagmando hito. Nagpapalusad ito hin kalayo tikang ha langit ha paagi nga nagpapakapropeta ito pinaagi ha pag-angkon nga napirde hito an magraot nga pwersa ha duha nga girra ha kalibotan han ika-20 ka siglo ngan nagdaog kontra ha Komunismo.

 16:17—Ano an “hangin” diin igintakbo an ikapito nga yahong? An “hangin” nagsisimbolo han panhunahuna ni Satanas, an “espiritu [o, hilig han hunahuna] nga niyan nagbubuhat dida ha mga anak han diri-masinugtanon.” Inin nakakahilo nga hangin ginhahanggab han bug-os nga maraot nga sistema ni Satanas.—Efe. 2:2.

Mga Leksyon Para ha Aton:

13:1-4, 18. An “mananap” nga nagsisimbolo han pagmando han tawo nahaw-as tikang “ha dagat,” nga amo an masamok nga katawohan. (Isa. 17:12, 13; Dan. 7:2-8, 17) Ini nga mananap, nga ginhimo ngan gintagan hin gahum ni Satanas, may-ada numero nga 666, nga nagpapasabot hin duro nga pagkadiri-hingpit. An pakasabot kon ano an mananap nabulig ha aton nga diri ito sundon o singbahon nga may pagdayaw pariho han ginbubuhat han katawohan ha kabug-osan.—Juan 12:31; 15:19.

13:16, 17. Bisan pa han kakurian nga bangin atubangon naton ha adlaw-adlaw nga buruhaton, sugad han ‘pagpalit o pagbaligya,’ diri naton tugotan an mananap nga magmando ha aton. An pagkarawat han ‘tigaman han mananap ha aton kamot o ha agtang’ mangangahulogan hin pagtugot hito nga magkontrol ha aton paggios ngan mag-impluwensya ha aton hunahuna.

14:6, 7. An pagpasamwak han anghel nagtututdo ha aton nga sadang naton isangyaw nga may pagkaapurado an maopay nga sumat han naestablisar nga Ginhadian han Dios. Sadang naton buligan an aton mga estudyante ha Biblia nga magkaada hilarom nga pagtahod kan Jehova ngan maghimaya ha iya.

14:14-20. Kon matapos na an ‘pag-ani ha tuna,’ nga amo an pagtirok hadton maluluwas, ilalabog na han anghel ngadto ha “daku nga pug-anan hin ubas, han kasina han Dios” an natirok nga “mga balagon ha tuna.” Ito nga balagon—an nakikita nga maraot nga sistema han pagmando ni Satanas ha katawohan upod an “mga sanga” han magraot nga bunga hito—bubungkagon na ha kadayonan. Sadang kita magin determinado nga diri maimpluwensyahan han balagon ha tuna.

16:13-16. An “maghugaw nga espiritu” nagsisimbolo han propaganda han demonyo nga an katuyoan amo an pagsiguro nga diri maimpluwensyahan an mga hadi ha tuna han pagtakbo han pito nga yahong han kasina han Dios, kondi maaghat lugod nga kontrahon hi Jehova.—Mat. 24:42, 44.

16:21. Samtang nagtitikahirani an kataposan hini nga kalibotan, an kapahayagan han paghukom ni Jehova kontra ha maraot nga sistema ni Satanas posible nga pinaagi han mabug-at hinduro nga mga pulong ha paghukom han Dios nga ginsisimbolohan hin yelo. Bisan pa hito, an kadam-an han katawohan magpapadayon ha pagpasipara ha Dios.

NAGMAMANDO AN MADAUGON NGA HADI

(Pah. 17:1–22:21)

Mangil-ad nga bahin han kalibotan ni Satanas an ‘Babilonya nga Daku,’ an imperyo han palso nga relihiyon. Ha ika-11 nga bisyon, ipinakita hiya sugad nga “daku nga puta”—usa nga imoral nga babaye—“nga nagliliningkod ha bawbaw han mapula nga mananap.” Bug-os nga bubungkagon hiya han “napulo nga mga sungay” han mananap mismo nga iya sinasakyan. (Pah. 17:1, 3, 5, 16) Ha ika-12 nga bisyon, iginpariho an puta ha “daku nga bungto,” iginpahayag an kapukan hito ngan iginpasamwak an apurado nga panawagan ha katawohan han Dios nga ‘gumawas’ tikang hito. Damu an nasubo gud ha kapukan han daku nga bungto. Kondi, nagkalipay an langit tungod han “pagkasal han Kordero.” (Pah. 18:4, 9, 10, 15-19; 19:7) Ha ika-13 nga bisyon, an sakay han “mabusag nga kabayo” nakig-away ha mga nasud, ngan ginbungkag niya an maraot nga kalibotan ni Satanas.—Pah. 19:11-16.

Kumusta man an “daan nga halas, nga amo an Yawa ngan Satanas”? San-o hiya ‘ilalabog ngadto ha linaw nga kalayo’? Usa ito han mga ginhisgotan ha ika-14 nga bisyon. (Pah. 20:2, 10) An kataposan nga duha nga bisyon naghuhulagway han kinabuhi ha Milenyo. Samtang tikatarapos na an “pahayag,” nakita ni Juan an ‘salog han tubig han kinabuhi nga naagos ha butnga han mga dalan,’ ngan gintagan hin maopay nga imbitasyon an bisan hin-o nga “inuuhaw.”—Pah. 1:1; 22:1, 2, 17.

Baton ha Pakiana Mahitungod ha Kasuratan:

17:16; 18:9, 10—Kay ano nga an “kahadian ha tuna” nasusubo han kawara han organisasyon  nga hira mismo an nagbungkag? Kahakog an hinungdan han ira kasubo. Han nabungkag an Babilonya nga Daku, matin-aw nga nasantop han mga hadi ha tuna nga daku gud an naibulig hito ha ira. Ginamit han Babilonya nga Daku an relihiyon sugad nga pasangilan han panalumpigos han mga hadi. Nakabulig liwat ito ha pagdani ha mga batan-on nga makigbahin ha girra. Dugang pa, daku an naibulig hito basi magpabilin nga nagpapasakop an katawohan.

19:12—Kay ano nga hi Jesus la an maaram han iya waray igpahibaro nga ngaran? Ini nga ngaran baga hin nagrirepresentar han katungdanan ngan mga pribilehiyo ni Jesus durante han Adlaw han Ginoo, sugad han iginsaysay ha Isaias 9:6. Waray maaram hini nga ngaran kondi hiya la tungod kay naiiba gud an iya mga pribilehiyo ngan hiya la an makakasabot kon ano an kahulogan han pagkaada hin sugad kahitaas nga katungdanan. Kondi, iginpapaangbit ni Jesus an pipira hini nga pribilehiyo ha mga membro han iya sugad-asawa nga klase, nga hito nga paagi ‘ginsuratan hira han iya bag-o nga ngaran.’—Pah. 3:12.

19:14—Hin-o an mangangabayo nga makakaupod ni Jesus ha Armagedon? An ‘kasundalohan ha langit’ nga maupod kan Jesus ha girra han Dios amo an mga anghel ngan an dinihogan nga magdaraog nga nakakarawat na han ira langitnon nga balos.—Mat. 25:31, 32; Pah. 2:26, 27.

20:11-15—Kan kanay ngaran an nakasurat ha “basahon [o, libro] han kinabuhi”? Amo ini an basahon diin nakasurat an mga ngaran han ngatanan nga makarawat han kinabuhi nga waray kataposan—mga dinihogan nga Kristiano, membro han daku nga kadam-an, ngan magtinumanon nga surugoon han Dios nga makakaeksperyensya han ‘pagkabanhaw han magtadong.’ (Buh. 24:15; Pah. 2:10; 7:9) Mahisusurat la ha “basahon han kinabuhi” an ngaran hadton ‘babanhawon nga diri-magtadong’ kon magkinabuhi hira uyon ha “mga butang nga nanhisurat ha mga basahon” han instruksyon nga bubuklaron durante han Milenyo. Kondi, mahimo pa ito mapara. An ngaran han mga dinihogan magigin permanente la kon mapamatud-an nira nga matinumanon hira tubtob ha kamatayon. (Pah. 3:5) Magigin permanente an mga ngaran hadton makarawat han kinabuhi ha tuna kon makapasar hira ha ultimo nga pagsari ha kataposan han usa ka yukot ka tuig.—Pah. 20:7, 8.

Mga Leksyon Para ha Aton:

17:3, 5, 7, 16. “An kinaadman nga tikang ha kahitas-an” nabulig ha aton nga masabtan an “katingalahan han babaye, ngan han [mapula nga] mananap nga nagdadara ha iya.” (Jak. 3:17) Inin simboliko nga mananap nagtikang sugad nga Liga han mga Nasud ngan naorganisa utro sugad nga Nagkakaurosa nga mga Nasud. Diri ba an pagpahayag han kahulogan hini nga misteryo sadang magpagios ha aton nga magin madasigon ha pagsangyaw han maopay nga sumat han Ginhadian han Dios ngan ha pagpasamwak han adlaw han iya paghukom?

21:1-6. Makakasiguro gud kita nga matutuman an igintagna nga mga bendisyon pinaagi han pagmando han Ginhadian. Kay ano? Tungod kay may kalabotan hito, iginsiring: ‘Nagkabubuhat na ito’!

22:1, 17. An ‘salog han tubig han kinabuhi’ nagsisimbolo han tagana ni Jehova ha pagluwas han mga masinugtanon tikang ha sala ngan kamatayon. Napapahimulosan na ini nga tubig yana. Hinaot nga diri la kita magpasalamat ha imbitasyon nga kumadto ngan ‘uminom han tubig han kinabuhi nga waray bayad’ kondi magmaduruto liwat ha pag-imbitar ha iba!

[Mga footnote]

[Retrato ha pahina 5]

Urusahon gud nga mga bendisyon an maieksperyensyahan han masinugtanon nga katawohan ha pagmando han Ginhadian!