Ipahiuyon ha mga Pulong ni Jesus an Imo Disposisyon

“An ginpakanhi han Dios nagyayakan han pulong han Dios.”—JUAN 3:34.

1, 2. Ha ano iginpariho an mga pulong ni Jesus ha Sermon ha Bukid, ngan kay ano nga makakasiring kita nga iginbasar ito ha “pulong han Dios”?

 USA han gidadakui nga diamante yana amo an 530-karat nga Star of Africa. Presyoso gud ito nga hiyas! Kondi, mas birilhon gud an espirituwal nga mga hiyas ha Sermon ha Bukid ni Jesus. Diri ito urusahon tungod kay an iya mga pulong nagtikang kan Jehova! Ha pag-unabi kan Jesus, an Biblia nasiring: “An ginpakanhi han Dios nagyayakan han pulong han Dios.”—Juan 3:34-36.

² Bisan kon an Sermon ha Bukid waray mag-30 minutos, may-ada ito 21 nga kotasyon tikang ha walo nga libro han Hebreo nga Kasuratan. Salit bug-os nga iginbasar ito ha “pulong han Dios.” Aton usisahon yana kon paonan-o maiaaplikar naton an damu han birilhon nga pulong nga mababasa dida hinin maopay hinduro nga sermon han hinigugma nga Anak han Dios.

“Pakighiuli Siyahan ha Imo Bugto”

3. Katapos pahamangnoan ni Jesus an iya mga disipulo mahitungod han resulta han kasina, ano an iya iginsagdon?

³ Sugad nga mga Kristiano, malipayon ngan mamurayawon kita tungod kay may-ada kita baraan nga espiritu han Dios, ngan bahin han bunga hito an kalipay ngan kamurayawan. (Gal. 5:22, 23) Diri karuyag ni Jesus nga mawara han iya mga disipulo an ira kamurayawan ngan kalipay, salit nagpahamangno hiya han makamaratay nga resulta han padayon nga kasina. (Basaha an Mateo 5:21, 22.) Katapos, nagsiring hiya: “Busa, kon ikaw magdadara han imo halad ha halaran,  ngan mahinumdom ka, nga an imo bugto may gutiay nga butang kontra ha imo. Bayai didto an imo halad ha atubangan han halaran, ngan lakat pakighiuli siyahan ha imo bugto, ngan niyan balik, ngan paghalad han imo halad.”—Mat. 5:23, 24.

4, 5. Kay ano nga importante an pakigmurayaw ha napasubo nga bugto?

⁴ Importante an halad nga mga hayop ha templo ha Jerusalem tungod kay bahin ito hadto han pagsingba kan Jehova han iya katawohan. Kondi pinabug-atan ni Jesus an mas importante—pakighiuli ha bugto nga napasubo antes maghalad ha Dios.

⁵ An “pakighiuli” nangangahulogan hin ‘pakigmurayaw basi mahibalik an maopay nga relasyon.’ Salit, ano nga leksyon an mahibabaroan naton tikang hini nga mga pulong ni Jesus? Sigurado nga mahibabaroan naton nga an pagtratar ha iba nakakaapekto gud han aton relasyon kan Jehova. (1 Juan 4:20) Oo, waray pulos an mga halad ha Dios hadto kon maraot an pagtratar han naghahalad ha iya igkasi-tawo.—Basaha an Mika 6:6-8.

Importante Gud an Pagkamapainubsanon

6, 7. Kay ano nga kinahanglan an pagpaubos kon nangangalimbasog kita ha pagpahiuli han mamurayawon nga relasyon ha bugto nga aton napasubo?

⁶ An pakigmurayaw ha napasubo nga bugto posible nga makagsari han aton pagkamapainubsanon. An mapainubsanon nga tawo diri nakikiglantugi o nakikiaway ha igkasi-tumuroo basi ipirit an iya mga katungod. Makakadaot ito—pariho han nahitabo ha mga Kristiano ha kadaan nga Korinto. Mahitungod hito, hi apostol Pablo nagsiring hinin makabantad ha hunahuna nga punto: ‘Usa na nga karat-an nga naggigikiha-kiha kamo. Kay ano nga diri na la niyo antuson an maraot? Kay ano nga diri na la kamo magpalimbong?’—1 Kor. 6:7.

⁷ Waray magsiring hi Jesus nga kinahanglan kumadto kita ha aton bugto basi la kombinsihon hiya nga husto kita ngan sayop hiya. Tumong naton nga maipahiuli an mamurayawon nga relasyon. Ha pakigmurayaw, kinahanglan tangkod nga isumat naton an aton inaabat. Kinahanglan tagdon liwat naton nga nabibido hiya, ngan kon kita an nagsayop, mapainubsanon nga mangaro kita hin pasaylo.

‘Kon an Imo Too nga Mata Nakakapakdol ha Imo’

8. Isumaryo an mga pulong ni Jesus ha Mateo 5:29, 30.

⁸ Ha Sermon ha Bukid, nagsagdon hi Jesus may kalabotan ha moralidad. Maaram hiya nga an aton diri-hingpit nga mga bahin han lawas may-ada maraot nga impluwensya ha aton. Salit hi Jesus nagsiring: ‘Kon an imo too nga mata nakakapakdol ha imo, kuhaa ngan ipilak ito, kay may pulos pa ha imo nga an usa ka bahin nimo mawara kay ha mahulog an imo bug-os nga lawas ngadto ha impyerno [“Gehenna,” NW]. Ngan kon an imo too nga kamot nakakapakdol ha imo, utda ngan ipilak ito, kay may pulos pa ha imo nga an usa ka bahin nimo mawara kay ha mahulog an imo bug-os nga lawas ngadto ha impyerno.’—Mat. 5:29, 30.

9. Paonan-o an aton “mata” o “kamot” ‘makakapakdol’ ha aton?

 ⁹ An “mata” nga gin-unabi ni Jesus nagsisimbolo han abilidad ha pagsentro han aton atensyon ha usa nga butang, ngan an “kamot” nagsisimbolo han aton nahihimo pinaagi han aton mga kamot. Kon diri kita mag-ikmat, ini nga mga bahin han lawas ‘makakapakdol’ ngan makakapaundang ha aton ha ‘paglakat upod han Dios.’ (Gen. 5:22; 6:9) Salit, kon nasusulay ha pagtalapas kan Jehova, kinahanglan gumios dayon kita, simboliko nga aton kuhaon an mata o utdon an kamot.

10, 11. Ano an makakabulig ha aton basi malikyan an imoralidad?

¹⁰ Paonan-o naton mapupugngan an aton mga mata ha pagkinita hin imoral? “Ako naghimo hin kauyonan ha akon mga mata,” siring han mahadlukon ha Dios nga hi Job. Salit ‘paonan-o ako makakatan-aw ha usa nga uray?’ (Job 31:1) Hi Job inasaw-an nga determinado nga diri talapason an mga balaud han Dios ha moral. Sadang buhaton naton ito, inasaw-an man kita o solo. Basi malikyan an imoralidad, kinahanglan magpagiya kita ha baraan nga espiritu, nga nabulig ha mga nahigugma ha Dios nga mapugngan an kalugaringon.—Gal. 5:22-25.

¹¹ Basi malikyan an imoralidad, pakianhan naton an aton kalugaringon, ‘Ginpapasagdan ko ba an akon mga mata nga makaaghat ha akon nga magbasa o magkita hin maglaw-ay nga impormasyon o retrato ha mga libro, telebisyon, o kompyuter?’ Hinumdoman liwat naton an ginsiring han disipulo nga hi Jakobo: ‘An tagsa-tagsa ginsusulay kon ginsisimang ngan gin-uulohan han iya kalugaringon nga kaipa. Niyan an kairiphon han human na mag-anak, nabunga hin sala; ngan an sala kon tigurang na, nag-aanak hin kamatayon.’ (Jak. 1:14, 15) Oo, kon an usa nga dedikado ha Dios padayon nga “nasiplat” nga may imoral nga mga motibo ha diri kapariho hin sekso, kinahanglan magbag-o dayon hiya pariho han pagkuha han mata ngan paglabog hito, siring pa.—Basaha an Mateo 5:27, 28.

12. Ano nga sagdon ni Pablo an makakabulig ha aton basi maatohan an imoral nga mga hingyap?

¹² Tungod kay an sayop nga paggamit han aton kamot mahimo magresulta hin seryoso nga pagtalapas ha mga prinsipyo ni Jehova ha moral, kinahanglan magin determinado kita nga magpabilin nga limpyo ha moral. Salit, sadang sundon naton an sagdon ni Pablo: “Pakamatya niyo an iyo mga bahin nga mga tungod ha tuna: pagpakighilawas, pagkamahugaw, pag-abat nga mapaso, maraot nga tinguha, ngan pagkaipa, nga amo an pagsingba ha mga dios-dios.” (Kol. 3:5) Pinabubug-atan han pulong nga “pakamatya” kon ano an kinahanglan gud buhaton basi maatohan an imoral nga mga hingyap.

13, 14. Kay ano nga importante nga likyan naton an imoral nga panhunahuna ngan panggawi?

¹³ Posible gud nga ipautod na la han usa nga may diabetes an iya tiil basi maghurohilawig an iya kinabuhi. Ha sugad nga paagi, importante an simboliko nga ‘pagpilak’ han mata ngan kamot basi malikyan naton an imoral nga panhunahuna ngan paggawi nga makakamatay han aton espirituwalidad. An pagpabilin nga limpyo ha hunahuna, moral, ngan espirituwal amo la an paagi basi makalikay ha dayon nga kabungkagan nga ginsisimbolohan han Gehenna.

¹⁴ Tungod han napanunod nga sala ngan pagkadiri-hingpit, kinahanglan an pangalimbasog basi magpabilin nga limpyo ha moral. “Ginpapaantos ko inin akon lawas, ngan iginbutang ko ha pagkauripon: bangin tingali, ha kahuman ko na magwali ha iba, ako lugod [an] isikway,” siring ni Pablo. (1 Kor. 9:27) Salit magin determinado kita nga sundon an sagdon ni Jesus ha moralidad ngan diri gud magbuhat hin bisan ano nga magpapakita hin kawaray utang nga kaburut-on ha iya halad lukat.—Mat. 20:28; Heb. 6:4-6.

“Batasana an Paghatag”

15, 16. (a) Paonan-o nagpakita hi Jesus hin susbaranan han paghatag? (b) Ano an iginpapasabot han ginsiring ni Jesus ha Lukas 6:38?

¹⁵ An mga pulong ngan an gimaopayi nga susbaranan ni Jesus nag-aaghat han paghatag. Ipinakita niya an duro nga pagkamahinatagon pinaagi ha pagkanhi ha tuna para ha kaopayan han diri-hingpit nga katawohan. (Basaha an 2 Korinto 8:9.)  Kinaburut-on nga binayaan niya an kahimayaan ha langit basi magin tawo ngan iginhalad an iya kinabuhi para ha makasasala nga katawohan, nga an iba ha ira makarawat hin bahandi ha langit sugad nga iya igkasi-manurunod han Ginhadian. (Roma 8:16, 17) Ngan gin-aghat niya hira nga magin mahinatagon han hiya nagsiring:

¹⁶ “Batasana an paghatag, ngan an mga tawo mahatag ha iyo. Igbubuhos nira ha iyo sabakan an maopay nga sukol, dinasok, inuy-og ngan nagsasap-ay. Kay an suruklan nga iyo igsusukol, ira liwat igsusukol ha iyo sugad nga balos.” (Luk. 6:38, NW) An ‘pagbuhos ha sabakan’ nagtutudlok ha kustomre han iba nga parabaligya ha pagsulod han mga pinalit ha halapad nga pilo han igbaw nga panapton nga gintakgongan ngan ginhimo nga surudlan han mga pumaralit. An aton kinaburut-on nga pagkamahinatagon mahimo magresulta han aton pakakarawat hin maopay nga sukol sugad nga balos, posible nga ha panahon nga nanginginahanglan kita.—Ekles. 11:2.

17. Paonan-o ipinakita ni Jehova an gimaopayi nga susbaranan ha paghatag, ngan ano nga paghatag an magpapalipay ha aton?

¹⁷ Hi Jehova nahigugma ngan nabalos ha malipayon nga nahatag. Hiya mismo nagpakita hin gimaopayi nga susbaranan pinaagi ha pagtubyan han iya bugtong nga Anak ‘basi nga an ngatanan nga natoo ha iya, diri mawara, kondi magkaada kinabuhi nga waray kataposan.’ (Juan 3:16) Hi Pablo nagsurat: “An nagpupugas hin kahuraan mahura man an pag-aanihon. An tagsa-tagsa humatag sugad han uyon han iya kasingkasing; diri ha kasubo o ha kinahanglan; kay an Dios nahigugma ha malipayon nga humaratag.” (2 Kor. 9:6, 7) An paghatag han aton panahon, kusog, ngan katigayonan para ha tinuod nga pagsingba sigurado nga magpapalipay ha aton ngan maghahatag hin hura nga balos.—Basaha an Proberbios 19:17; Lukas 16:9.

“Diri Mo Patunggon an Trumpeta ha Imo Unhan”

18. Ha ano nga mga kahimtang ‘waray balos’ kita tikang ha aton langitnon nga Amay?

¹⁸ “Magmatngon kamo ha diri pagbuhat han iyo mga matadong nga buhat ha atubangan han mga tawo, basi hikit-an kamo nira; ha lain nga kaagi, waray kamo balos ha iyo Amay, nga aadto ha langit.” (Mat. 6:1) Iginpapasabot ni Jesus nga an “matadong nga buhat” nauyon ha kaburut-on han Dios. Diri iginpapasabot niya nga an diosnon nga mga buhat diri gud angay buhaton ha dayag, kay ginsagda niya an iya mga disipulo nga ‘iglawag an ira mga suga ha atubangan han mga tawo.’ (Mat. 5:14-16) Kondi ‘waray balos’ kita tikang ha aton langitnon nga Amay kon ginbubuhat naton ito ‘basi hikit-an’ ngan dayawon, pariho han mga artista ha pasalida ha teatro. Kon ito an aton motibo, diri kita magkakaada hin duok nga relasyon ha Dios o waray kataposan  nga mga bendisyon han pagmando han Ginhadian.

19, 20. (a) Ano an iginpasabot ni Jesus han gin-unabi niya an ‘pagpatunog hin trumpeta’ kon ‘naglilimos’? (b) Ha ano nga paagi diri naton iginpapahibaro ha wala nga kamot an ginbubuhat han too?

¹⁹ Kon husto an aton disposisyon, susundon naton an sagdon ni Jesus: “Salit, kon ikaw nahatag hin limos tungod ha kalooy, ayaw pagpatunog hin trumpeta ha imo unhan, sugad han ginbubuhat han mga salingkapaw ha mga sinagoga ngan ha mga dalan basi dayawon hira han mga tawo. Ha pagkamatuod ako nasiring ha iyo, Nakarawat na nira an ira bug-os nga balos.” (Mat. 6:2, NW) An “mga limos tungod ha kalooy,” mga donasyon para ha mga pobre. (Basaha an Isaias 58:6, 7.) Hi Jesus ngan an iya mga apostol may-ada pundo para ha pagbulig ha mga pobre. (Juan 12:5-8; 13:29) Tungod kay ha panlimos diri literal nga nagpapatunog hin trumpeta ha unhan, matin-aw nga gin-gamit ni Jesus an pagpasobra han magsiring hiya nga diri kamo ‘magpatunog hin trumpeta’ ha iyo unhan kon kamo ‘naglilimos tungod ha kalooy.’ Diri naton ipaparayaw ha publiko an sugad nga paghatag pariho han ginbuhat han Judio nga mga Pariseo. Gintawag hira ni Jesus nga mga salingkapaw tungod kay iginpasamwak nira an ira mga donasyon “ha mga sinagoga ngan ha mga dalan.” Ito nga mga salingkapaw ‘nakakarawat na han ira bug-os nga balos.’ An pagdayaw han mga tawo ngan paglingkod ha unahan sapit han kilala nga mga rabi ha sinagoga amo la an balos ha ira, kay hi Jehova diri mahatag ha ira hin bisan ano. (Mat. 23:6) Kon sugad, paonan-o sadang gumawi an mga disipulo ni Kristo? Hi Jesus nagsagdon ha ira—ngan ha aton:

²⁰ ‘Kondi kon maglimos ka, diri mo pasabuton an imo wala nga kamot kon ano an ginbubuhat han imo too, basi matago an imo limos; ngan an imo Amay nga nagkikita ha tago magbabalos ha imo.’ (Mat. 6:3, 4) An aton mga kamot kasagaran nga magkabulig ha pagbuhat. Salit, an diri pagpahibaro ha wala nga kamot han ginbubuhat han too, nangangahulogan nga diri naton iginpapasamwak an aton pagbulig, o donasyon, bisan ha mga duok ha aton sugad han pagin duok han aton wala ha too nga kamot.

21. An balos tikang kan Jehova nga ‘nagkikita ha tago’ nag-uupod han ano?

²¹ Kon diri naton iginhahambog an aton paghatag, an aton ‘mga limos’ magigin ha tago. Kon sugad, an aton Amay ‘nga nagkikita ha tago’ magbabalos ha aton. Tungod kay an aton langitnon nga Amay naukoy ha langit ngan diri nakikita han tawo, nagpapabilin hiya “ha tago.” (Juan 1:18) Kaupod han balos tikang kan Jehova nga ‘nagkikita ha tago’ an pagdara ha aton ngada ha duok nga relasyon ha iya, pagpasaylo han aton mga sala, ngan paghatag ha aton hin kinabuhi nga waray kataposan. (Prob. 3:32; Juan 17:3; Efe. 1:7) Mas maopay gud ito kay ha pagkarawat han pagdayaw han mga tawo!

Sadang Pabilhan an Presyoso nga mga Pulong

22, 23. Kay ano nga sadang pabilhan naton an mga pulong ni Jesus?

²² An Sermon ha Bukid sigurado nga puno hin espirituwal nga mga hiyas nga may-ada damu nga mag-opay nga bahin. Waray ruhaduha nga may-ada ito presyoso nga mga pulong nga makapalipay ha aton bisan hinin masamok nga kalibotan. Oo, magigin malipayon kita kon aton pabilhan an mga pulong ni Jesus ngan ipahiuyon hito an aton disposisyon ngan pagkinabuhi.

²³ Bibendisyonan an tagsa-tagsa nga ‘namamati’ ngan ‘nagbubuhat’ han igintututdo ni Jesus. (Basaha an Mateo 7:24, 25.) Salit magin determinado kita ha pagsunod han iya sagdon. Damu pa nga pulong niya ha Sermon ha Bukid an paghihisgotan ha ultimo nga artikulo hini nga serye.

Ano an Imo Baton?

• Kay ano nga importante an pakighiuli ha napasubo nga bugto?

• Paonan-o naton malilikyan an kahipakdol pinaagi han aton “too nga mata”?

• Ano an sadang magin disposisyon naton may kalabotan ha paghatag?

[Mga Pakiana]

[Retrato ha pahina 11]

Maopay gud an ‘pakighiuli’ ha imo napasubo nga igkasi-tumuroo!

[Mga Retrato ha pahina 13]

Ginbibendisyonan ni Jehova adton malipayon nga nahatag