Ipipirit Mo ba an Imo Kalugaringon nga mga Karuyag?

DUHA nga bata an nag-uuyag. Gin-agaw han usa an iya paborito nga uyagan ha iya kauyag ngan gumuliat, “Akon ini!” Tikang ha kabata, an diri hingpit nga mga tawo nagpapakita na hin pagin makikalugaringon. (Gen. 8:21; Roma 3:23) Dugang pa, igin-aaghat han kalibotan ha kabug-osan an ako-anay nga batasan. Basi malikyan ini, kinahanglan atohan naton an pagin makikalugaringon. Kon diri, mahimo gud nga makapakdol kita ha iba ngan madaot an aton relasyon kan Jehova.—Roma 7:21-23.

Ha pag-aghat ha aton nga tagdon an epekto ha iba han aton paggawi, hi apostol Pablo nagsurat: “An ngatanan nga mga bagay tugot han balaud; kondi diri an ngatanan angay. An ngatanan tugot han balaud; kondi diri an ngatanan nakakarig-on.” Nagsiring liwat hi Pablo: “Diri kamo maghatag hin katigayonan hin paghipakdol.” (1 Kor. 10:23, 32) Salit, may kalabotan ha aton mga karuyag, maaramon nga pakianhan naton an aton kalugaringon: ‘Andam ba ako nga isakripisyo an akon mga katungod kon maaapektohan an kamurayawan han kongregasyon? Disidido ba ako ha pagsunod han mga prinsipyo ha Biblia bisan kon makuri an pagbuhat hito?’

Ha Pagpili hin Trabaho Ngan Pakabuhi

Ginhuhunahuna han kadam-an nga personal nga desisyon an ira pagpili hin trabaho ngan gutiay hinduro o waray epekto ito ha iba. Kondi tagda  an eksperyensya han usa nga negosyante ha gutiay nga bungto ha Amerika del Sur. Kilala hiya nga parahuygo ngan parahubog. Kondi, sugad nga resulta han iya pag-aram han Biblia ha bulig han mga Saksi ni Jehova, nag-uswag hiya ha espirituwal ngan nagbag-o han iya pagkinabuhi. (2 Kor. 7:1) Han nagsiring hiya nga karuyag na niya umupod ha kongregasyon ha pagsangyaw ha publiko, mataktika nga gindasig hiya han tigurang nga usisahon an klase han iya pakabuhi. Ha sulod hin pipira ka panahon, ha iya napalit an kadam-an ha ira bungto hin puro nga de-alkohol nga irinmon nga tikang ha tubó—produkto nga damu an gamit kondi hito nga lugar ginagamit la sugad nga makahurubog nga irinmon nga kasagaran ginsasagolan hin soft drink.

Nasantop han negosyante nga kon magsangyaw hiya ha publiko kondi nagbabaligya pa gihapon hito nga produkto, madadaot an reputasyon han kongregasyon ngan an iya relasyon ha Dios. Bisan kon daku an iya sinusuportahan nga pamilya, umundang hiya ha pagbaligya hito. Yana, ginsusuportahan niya an iya pamilya pinaagi ha pagbaligya hin iba nga produkto. Ini nga negosyante, an iya asawa, ngan duha han ira lima nga anak, bawtismado na yana. Madasigon nga nagsasangyaw hira han maopay nga sumat nga may kagawasan ha pagyakan.

Ha Pagpili hin mga Kaupod

An pakig-upod ba ha mga diri-tumuroo nadepende la ha aton karuyag, o ha mga prinsipyo ha Biblia? Usa nga bugto nga babaye an naruyag kumadto ha panagtawo kaupod hin batan-on nga lalaki nga diri Kristiano. Bisan kon ginpahamangnoan na han peligro, naghunahuna hiya nga katungod niya nga buhaton ito salit kinadto hiya. Waray pag-iha han iya pag-abot, gintagan hiya hin irinmon nga ginbutangan hin pampakaturog. Nagmata hiya paglabay hin pipira ka oras ngan nasantop niya nga ginlugos hiya han ginhuhunahuna niya nga sangkay.—Itanding ha Genesis 34:2.

Bisan kon an pakigsangkay ha mga diri-tumuroo diri pirme nagriresulta hin sugad nga trahedya, an Biblia nagpapahamangno: “Lakat kaupod han mga tawo nga makinaadmananon, ngan ikaw makikinaadmananon; kondi an kaupod-upod han mga lurong mag-aantos tungod hini.” (Prob. 13:20) Klaro hinduro ito—peligroso gud an pagpili hin maraot nga kasangkayan! “An tawo nga mainalam-agamon nakita han karaotan, ngan naluok; kondi an tapang nagpapadayon ha unhan ngan nag-aantos tungod hini,” siring han Proberbios 22:3. Oo, makakadaot ha aton ngan ha relasyon naton ha Dios an aton kasangkayan.—1 Kor. 15:33; Jak. 4:4.

Ha Pamado Ngan Pag-ayos

An mga estilo ngan uso paburobag-o. Kondi, an mga prinsipyo han Biblia mahitungod ha pamado ngan pag-ayos diri nagbabag-o. Gin-aghat ni Pablo an Kristiano nga kababayin-an nga “magpakaopay ha ira kalugaringon pinaagi han desente nga pamado, nga may mapainubsanon ngan maopay nga panhunahuna”—naaplikar liwat  ini ha kalalakin-an. (1 Tim. 2:9, NW) Diri iginpapasabot ni Pablo nga kinahanglan simple hinduro an estilo han bado, o sadang magin parapriho an karuyag han ngatanan nga Kristiano. Kondi, ano an pagkamapainubsanon? Sumala ha usa nga diksyonaryo, nangangahulogan ito hin “diri pagpahitaas o pagparayaw . . . husto nga pamado, panyakan, o paggawi.”

Kinahanglan pakianhan naton an aton kalugaringon: ‘Tangkod ba nga masisiring ko nga mapainubsanon ako kon iginpipirit ko an akon katungod ha pamado nga tungod hito nadadani an atensyon han mga tawo? An akon ba pamado naghahatag hin sayop nga impresyon mahitungod han akon pagkatawo?’ Hini nga bahin, malilikyan naton an ‘pakapakdol’ ha iba pinaagi ha ‘pagmangno diri la ha aton kalugaringon nga butang, kondi sugad man ha mga butang han iba.’—2 Kor. 6:3; Fil. 2:4.

Ha mga Ginkasabotan

Han nagkaada hin seryoso nga mga problema an kongregasyon ha Korinto may kalabotan ha sayop o malimbong nga mga buhat, hi Pablo nagsurat: ‘Kay ano nga diri na la niyo antuson an maraot? Kay ano nga diri na la kamo magpalimbong?’ Ginsagdonan ni Pablo an mga Kristiano nga magin andam ha pagsakripisyo imbes nga ikiha an usa nga bugto. (1 Kor. 6:1-7) Gin-aplikar ini han usa nga bugto ha Estados Unidos. Waray hira magkasinabot han iya Kristiano nga agaron mahitungod han waray igsweldo ha iya. Ha pagsunod han giya ha Kasuratan, pauroutro nga gintuhay nira an problema kondi waray nira ito masulbad, salit nangaro hira hin bulig ha mga tigurang ha kongregasyon.—Mat. 18:15-17.

Makasurubo, waray la gihapon masulbad an problema. Katapos han sinsero nga pag-inampo, nagdesisyon an empleyado nga pabay-an na la an kadak-an nga kwarta nga ginhunahuna niya nga waray igsweldo ha iya. Kay ano? Ha urhi hiya nagsiring, “Tungod hini nga diri pagsinabtanay nawawara an akon kalipay ngan nauubos an akon presyoso nga panahon nga magagamit unta ha espirituwal nga buruhaton.” Katapos hito nga desisyon, nagin malipayon utro hiya, ngan inabat niya an bendisyon ni Jehova ha iya pag-alagad.

Bisan ha Gudtiay nga Butang

An diri pagpirit han aton kalugaringon nga mga karuyag nagriresulta liwat hin mga bendisyon ha gudtiay nga butang. Ha siyahan nga adlaw han usa nga distrito nga kombensyon, temprano nga inabot an mag-asawa nga payunir ngan liningkod ha ira karuyag gud nga lingkoran. Han nagtitikang na an programa, usa nga pamilya nga damu an anak an nagdadagmit ha pagsulod hito nga katirokan nga puno hin tawo. Tungod kay nakita han mag-asawa nga payunir nga nagbibiling an pamilya hin igo nga malilingkuran, ginhatag nira nga duha an ira lingkoran. Salit, sarapit nga nakalingkod an bug-os nga pamilya. Paglabay hin pipira ka adlaw katapos han kombensyon, nakakarawat an mag-asawa nga payunir hin surat han pagpasalamat tikang hito nga pamilya. Nasiring hira ha surat nga nahulop gud hira nga naurhi hira ha pag-abot ha kombensyon. Kondi nasaliwnan dayon ito hin kalipay ngan pagpasalamat tungod han pagkabuotan han mag-asawa nga payunir.

Kon may-ada higayon, magin andam kita ha pagsakripisyo han aton mga karuyag para ha kaopayan han iba. Pinaagi ha pagpakita hin gugma nga ‘diri nagbibiling han kalugaringon’ nga bentaha, nabulig kita ha pagtipig han kamurayawan ha sulod han kongregasyon ngan ha aton mga amyaw. (1 Kor. 13:5) Kondi an pinakaimportante ha ngatanan, natitipigan naton an aton pakigsangkay kan Jehova.

[Retrato ha pahina 20]

Andam ka ba nga isakripisyo an imo kalugaringon nga mga karuyag ha pagpili hin bado?

[Retrato ha pahina 20, 21]

Andam ka ba ha paghatag han imo lingkoran ha kabugtoan?