“An Anghel ni Jehova Nakada hin Paglibot”

Iginsumat ni Christabel Connell

Waray kami abat nga dis-oras na tungod ha pagbinaton han mga pakiana ni Christopher mahitungod han Biblia; waray liwat kami makaobserba nga agsob ngay-an hiya magkita ha gawas han bintana. Tubtob nga nagsiring hiya ha amon, “Diri na peligroso an pag-uli yana.” Katapos, iya kami gin-updan ngadto ha amon mga bisikleta ngan inuli kami. Ano an nakita niya nga peligroso gud?

AKO hi Christabel Earl, natawo ha Sheffield, Inglatera, han 1927. Han Girra ha Kalibotan II, nadaot an amon balay han naigo ito hin bomba, salit ginpaukoy ako ha akon lola samtang gintatapos ko an pag-eskwela. Ha usa nga eskwelahan nga gindudumara han mga madre, agsob ako magpakiana ha ira kon kay ano nga duro an karaotan ngan kamadarahog. Waray ako makontento han ira baton ngan han iba pa nga relihiyoso nga mga tawo nga akon ginpakianhan.

Katapos han Girra ha Kalibotan II, nag-eskwela ako ha pagka-nars. Binalhin ako ha London basi magtrabaho ha Paddington General Hospital, kondi ha syudad, mas damu nga kamadarahog an akon nakita. Diri pa la maiha tikang nga linakat an akon magurang nga lalaki pakadto ha Girra ha Korea, nakakita ako hin nag-aaway dida mismo ha gawas han hospital. Waray binulig ha biktima nga nabuta tungod han pagkastigoha. Hito nga panahon, kami ni nanay nagtitinambong han katirok han mga espiritista, kondi diri ko la gihapon masabtan kon kay ano nga duro an karaotan.

Gin-aghat Ako nga Mag-aram han Biblia

Usa ka adlaw, binisita an akon magurang nga hi John, nga Saksi ni Jehova na. “Maaram ka ba kon kay ano nga nahitatabo ini ngatanan nga karaotan?” nagpakiana hiya. “Diri,” siring ko. Ginbasa niya ha Biblia an Pahayag 12:7-12. Yana hinbaroan ko na nga hi Satanas ngan an mga demonyo an nagpapahinabo han karaotan ha kalibotan. Salit, waray pag-iha, nag-aram ako han Biblia sugad han iya iginsagdon. Kondi waray ako magpabawtismo hito nga panahon tungod ha kahadlok ha tawo.—Prob. 29:25.

Nagin Saksi liwat an akon bugto nga hi Dorothy. Pag-uli niya tikang ha internasyonal nga kombensyon ha New York (1953) kaupod an iya maarasawa nga hi Bill Roberts, ginsumatan ko hira nga nag-aram na ako han Biblia. Nagpakiana ha akon hi Bill: “Ginbasa mo ba an ngatanan nga teksto? Ginbagisan mo ba an mga baton ha libro?” Han pagsiring ko nga waray, hiya binaton: “Kon sugad waray ka gud pag-aram! Pakigkita hito nga bugto, ngan pag-aram utro!” Hito nga takna, nagtikang magpasakit ha akon an mga  demonyo. Nahinunumdoman ko nga nag-inampo ako kan Jehova nga panalipdan ngan talwason ako tikang ha ira impluwensya.

Pagpayunir ha Scotland Ngan Ireland

Nabawtismohan ako han Enero 16, 1954, natapos ko an kontrata sugad nga nars han Mayo, ngan nagtikang magpayunir han Hunyo. Paglabay hin walo ka bulan, igintoka ako sugad nga espesyal payunir ha Grangemouth, Scotland. Didto, inabat ko nga an mga anghel ni Jehova ‘nakapalibot’ ha akon samtang nagsasangyaw hito nga hirayo nga teritoryo.—Sal. 34:7.

Han 1956, igintoka ako ha Ireland, ha syudad han Galway, kaupod an duha nga bugto nga babaye. Ha siyahan pa la nga adlaw, nasangyawan ko an usa nga padi. Waray pag-iha, may inabot nga pulis ngan gindara ako ngan han akon kaupod ngadto ha estasyon han pulis. Katapos makuha an amon ngaran ngan adres, nagtawag dayon hiya ha telepono. Nabatian namon nga nagsiring hiya, “Oo, Padre, maaram na ako kon diin hira naukoy.” Ginsugo ngay-an hiya han padi! Napiritan ha pagpaiwas ha amon an tag-iya han balay nga amon ginpipletehan, salit an sanga nga opisina nagsuhestyon nga bumaya kami hito nga lugar. Urhi na kami hin dyes minutos han pag-abot namon ha estasyon han tren. Kondi nakada pa an tren, ngan may-ada tawo nga nagbinantay ha pagsiguro nga makasakay kami hito. Nahitabo ini paglabay hin tulo pa la ka semana tikang han pag-abot namon ha Galway!

Igintoka kami ha Limerick, usa pa nga syudad diin maimpluwensya gud an Katoliko nga relihiyon. Pirme kami ginsisinggitan hin magsamok nga tawo. Damu an nahahadlok ha pakiistorya ha amon ha ira purtahan. Han naglabay nga tuig, usa nga bugto nga lalaki an ginkastigo ha kahirani nga gutiay nga bungto han Cloonlara. Salit nalipay kami nga nakaistorya namon hi Christopher, nga gin-unabi ha tinikangan, nga naghangyo ha amon nga bumalik basi batunon an iya mga pakiana mahitungod ha Biblia. Han amon pagbisita ha iya, may padi nga sinulod ngan ginsidngan hiya nga palakton na kami. Nangatadongan hiya ha padi: “Ini nga kababayin-an gin-imbitar ko ha balay ngan nagtuktok hira antes sumulod. Kondi ikaw, waray ka ngani imbitara, waray ka pa magtuktok.” Nasisina nga linakat an padi.

Diri kami maaram nga an padi nagtirok hin damu nga kalalakin-an, ngan naghinulat ha amon ha gawas han balay nira Christopher. Tungod kay maaram hiya nga nakontra hira ha amon, ginlangan kami niya sugad han iginsaysay ha tinikangan. Waray kami niya palakta mentras nakada pa an kalalakin-an. Hinbaroan namon ha urhi nga hi Christopher ngan an iya pamilya napiritan pagbaya hito nga lugar, ngan binalhin hira ha Inglatera.

Gin-imbitar Ako ha Gilead

Nagpaplano na ako pagtambong ha 1958 nga Divine Will International Assembly ha New York han makarawat ko an imbitasyon ha ika-33 nga klase han Gilead. Imbes nga umuli katapos han asembleya, igintoka ako ha Collingwood, Ontario, Canada tubtob nga nagtikang an klase han 1959. Kondi durante han asembleya, nakilala ko hi Eric Connell. Hinbaroan niya an kamatuoran han 1957 ngan nagtikang magpayunir han 1958. Katapos han asembleya, nagsusurat hiya ha akon kada adlaw samtang nakadto pa ako ha Canada ngan durante han pag-eskwela ko ha Gilead. Diri ako maaram kon ano an mahitatabo ha amon katapos han gradwasyon.

An pag-eskwela ha Gilead usa han pinakaimportante nga hitabo ha akon kinabuhi. Nagin kaklase ko hi Dorothy ngan an iya bana. Igintoka hira ha Portugal. Nasurprisa ako nga igintoka ako ha Ireland. Nasubo gud ako nga diri ko makakaupod an akon bugto! Nagpakiana ako ha usa han mga instruktor kon may-ada ba ako nahimo nga sayop. “Waray,” binaton hiya. “Ikaw ngan an imo partner, hi Eileen Mahoney, inuyon nga kumadto ha bisan diin ha kalibotan,” ngan usa hito an Ireland.

Binalik Ako ha Ireland

Inabot ako ha Ireland han Agosto 1959 ngan igintoka ha kongregasyon han Dun Laoghaire. Hito nga panahon, hi Eric binalik na ha Inglatera ngan nalipay gud hiya nga mas hirani na ako. Karuyag liwat niya magin misyonero. Nagsiring hiya nga tungod kay an Ireland nanginginahanglan  hin mga misyonero, magpapayunir hiya didto. Binalhin hiya ha Dun Laoghaire ngan ginkasal kami han 1961.

Paglabay hin unom ka bulan, naaksidente hin grabe hi Eric ha motorsiklo. Ginutak an iya ulo, ngan diri sigurado an mga doktor kon mabubuhi pa hiya. Katapos hin tulo ka semana ha hospital, ginmangnoan ko hiya ha balay hin lima ka bulan tubtob nga nag-opay hiya. Nagpadayon ako ha ministeryo tubtob ha akon mahihimo.

Han 1965 igintoka kami ha kongregasyon nga may walo nga magwarali ha Sligo, usa nga piyer ha norte-este nga baybayon. Paglabay hin tulo ka tuig, igintoka kami ha mas hirayo nga gutiay nga kongregasyon ha Londonderry, ha norte. Usa ka adlaw, pag-uli namon tikang ha pagsangyaw, may-ada na barikada hin tunukon nga alambre ha dalan. Nagtikang na an kasamok ha Northern Ireland. May-ada mga grupo hin batan-on nga nagsunog hin mga awto. Nagkabahin-bahin an syudad ngadto ha teritoryo han mga Protestante ngan han mga Katoliko. Peligroso gud an pagkadto ha iba-iba nga lugar han syudad.

Pagkinabuhi Ngan Pagsangyaw Durante han Kasamok

Kondi, tungod han amon pagsangyaw, nakaabot kami ha bisan diin. Inabat na liwat namon nga sugad hin nakapalibot ha amon an mga anghel. Kon nahingangadto kami ha mga lugar nga may-ada samok, nabaya dayon kami ngan nabalik kon mamingaw na. Han nagkaada hin samok hirani ha amon balay, may-ada naglalaga pa nga baga nga nahulog ha amon pasamano tikang ha nasusunog nga tindahan han pintura nga kahirani namon. Waray kami mangaturog kay bangin masunog an amon inuukyan. Pagbalhin namon ha Belfast han 1970, hinbaroan namon nga tungod han de-gasolina nga bomba nasunog an tindahan han pintura ngan an balay nga inuukyan namon hadto.

Ha lain nga higayon, samtang nagsasangyaw upod han usa nga bugto, nakakita kami hin tubo nga diri-ordinaryo an kahilaba ha pasamano han usa nga balay. Nagpadayon la kami ha unhan. Paglabay hin pipira ka minuto, binuto ito. Nagtahap an mga tawo nga nagkagawas nga kami an nagbutang han bomba! Hito mismo nga takna, ginpasulod kami han usa nga bugto ha iya balay. Tungod hito waray na kami tahapi han iya mga amyaw.

Han 1971 binalik kami ha Londonderry basi bisitahon an usa nga bugto. Han nag-istorya kami mahitungod han amon biyahe ngan han barikada nga amon gin-agian, nagpakiana hiya, “May-ada ba nakabantay ha barikada?” Han pagsiring namon nga, “Oo, kondi ginbalewaray la kami nira,” nahipausa hiya. Kay ano? Tungod kay han naglabay pa la nga mga adlaw, may-ada doktor ngan pulis nga gintulis ngan ginsunog an ira awto.

Han 1972 binalhin kami ha Cork. Katapos hin pipira ka panahon, binalhin kami ha Naas, sunod ha Arklow. Han 1987, igintoka kami ha Castlebar tubtob yana. Dinhi, nakapribilehiyo gud kami ha pakabulig ha pagtukod hin Kingdom Hall. Han 1999, nagkasakit hin grabe hi Eric. Kondi, tungod han bulig ni Jehova ngan han mahigugmaon nga suporta han kongregasyon, nakailob ako ngan namangnoan ko hiya tubtob nga nag-opay.

Makaduha na kami ni Eric pakaeskwela ha Pioneer Service School. Tigurang pa gihapon hiya tubtob yana. May-ada ako grabe nga artritis salit gin-operahan an akon baliatang ngan duha nga tuhod. Bisan kon naeksperyensyahan ko na an duro nga pagkontra ha pagtoo ngan peligroso nga kasamok ha politika ngan komunidad, usa han pinakamakuri nga pagsari ha akon amo an diri na pakagmaneho. Usa ito nga pagsari tungod kay diri na ako makakalugaring pagbiyahe ha bisan san-o nga karuyag ko. Daku gud an naibubulig ha akon han kongregasyon. Nakakalakat ako yana ha bulig han tungkod, ngan kon hirayo an kakadtoan naggamit ako hin de-bateriya nga traysikol.

Kon sumahon, sobra 100 ka tuig na kami ni Eric nga espesyal payunir—an 98 ka tuig hito dinhi ha Ireland. Diri kami maundang hini nga buruhaton bisan kon mga lagas na kami. Diri kami nasarig ha mga milagro, kondi natoo kami nga an gamhanan nga mga anghel ni Jehova ‘nakapalibot’ ha mga nahahadlok ngan matinumanon nga nag-aalagad ha iya.