Hi Jehova Takos han Aton Urosa nga Pagdayaw

“Pagdayawon [niyo] hi Jehova!”—SAL. 111:1.

1, 2. Ano an kahulogan han “Aleluya,” ngan paonan-o ito ginamit ha Kristiano Griego nga Kasuratan?

 “ALELUYA!” Nababatian pirme ini ha mga singbahan han Kakristianohan. Agsob ito gamiton han iba ha ira adlaw-adlaw nga pakiistorya. Kondi, gutiay la an maaram han sagrado nga kahulogan hito, ngan an pagkinabuhi han damu nga nagamit hito nagpapasipara ha Dios. (Tito 1:16) Iginsasaysay han usa nga diksyonaryo han Biblia nga an “Aleluya” usa nga “pulong nga ginamit han mga parasurat han iba-iba nga salmo basi aghaton an ngatanan nga dumuyog ha ira ha pagdayaw kan Jehova.” Ha pagkamatuod, damu nga eskolar han Biblia an nasiring nga an “Aleluya” nangangahulogan nga “‘Dayawa niyo hi Jah,’ [nga amo hi] Jehova.”

² Husto la nga ha American Standard Revision an Salmo 111:1 iginhubad nga, “Pagdayawon [niyo] hi Jehova!” Ha orihinal nga Griego, upat ka beses nga mababasa an “Aleluya” ha Pahayag 19:1-6 ha pagkalipay tungod ha kabungkag han palso nga relihiyon. Kon mahitabo na ito, an tinuod nga magsiringba labi nga magkakaada hinungdan nga matinalahuron nga magsinggit hin “Aleluya.”

An Iya Urusahon nga mga Buhat

3. Ano an nangunguna nga katuyoan han aton regular nga pagkatirok?

³ An nagkomposo han Salmo 111 may-ada damu nga hinungdan kon kay ano nga takos gud hi Jehova han aton urosa nga pagdayaw. An bersikulo 1 nasiring: “Maghahatag ako hin mga pasalamat [“pagdayaw,” NW] kan Jehova tikang ha bug-os ko nga kasingkasing, dida han kaupdanan han mga magtul-id, ngan dida han katig-uban.” Ginbubuhat liwat ito han mga Saksi ni Jehova yana. An nangunguna nga katuyoan han aton regular nga pagkatirok ha kongregasyon ngan ha dagku nga kombensyon amo an pagdayaw kan Jehova.

4. Paonan-o pinamimiling han mga tawo an mga buhat ni Jehova?

⁴ “An mga buhat ni Jehova dagku, pinamiling han ngatanan nga nahigugma hito.” (Sal. 111:2) Tigamni an pulong nga “pinamiling.” Sumala ha usa nga reperensya, gin-uunabi hini nga bersikulo an mga tawo nga “seryoso ngan kinasingkasing nga namamalandong ngan nag-aaram” han mga linarang ngan buhat han Dios. Hura hin mag-opay nga katuyoan an mga linarang ni Jehova. Iginpahamutang niya an adlaw, tuna, ngan bulan ha eksakto nga distansya ha usa kag usa, salit an aton tuna may-ada igo nga kapaso ngan kalamrag, adlaw ngan gab-i, pagburubag-o han panahon ngan pagtaob ngan paghubas.

5. Ano an iginpapahayag han damu nga nadidiskobrehan han tawo mahitungod han uniberso?

⁵ Damu an nadiskobrehan han mga syentista mahitungod han lokasyon han tuna ha sistema solar sugad man han eksakto nga orbit, kadakuon, ngan mass han aton daku nga bulan. Tungod han lokasyon ngan pagin organisado hini nga  mga linarang ha langit nagkakaada makaruruyag ngan regular nga pagburubag-o han panahon. Damu liwat an hinbabaroan mahitungod han maopay nga pagkadisenyo han natural nga mga pwersa han uniberso. Salit, ha artikulo nga “The Designed ‘Just So’ Universe,” usa nga propesor ha mechanical engineering an nagsiring: “Diri urusahon kon kay ano nga damu gud nga syentista an nagbag-o han ira hunahuna ha naglabay nga 30 ka tuig, nauyon nga ginkikinahanglan an daku nga pagtoo basi makombinse nga an uniberso tigda la nga iniksister nga waray naglarang. Kon mas damu an ebidensya nga may-ada intelihente nga disenyador, mas nasasabtan naton an maopay gud nga pagkadisenyo han tuna.”

6. Ano an imo masisiring mahitungod ha pagkahimo han Dios ha tawo?

⁶ An usa pa nga urusahon nga buhat han Dios amo an pagkahimo ha aton. (Sal. 139:14) Ginlarang niya an tawo nga may-ada hunahuna, importante nga mga organo, abilidad ngan kapas ha pagtrabaho. Pananglitan, milagro gud an hatag-han-Dios nga abilidad ha pagyakan ngan pamati, sugad man ha pagsurat ngan pagbasa. Damu an may-ada hito nga mga abilidad. Urusahon liwat nga obramaestra an pagkahimo han imo lawas nga may kapas ha pagtindog. Makatarag-ob gud an abilidad hito ha pagkiwa-kiwa ngan pagtrabaho, ngan an pagproseso hito han mga kemikal basi magin enerhiya. Labot pa hito, an urusahon nga mga bahin nga nakakabulig nga magkauruyon an imo hunahuna ngan mga sentido diri gud nasusubad han mga syentista. Ha pagkamatuod, may nahihimo la an mga tawo tungod kay ginlarang hira nga may-ada hunahuna ngan mga sentido. Bisan an eksperto na gud nga inhinyero diri makakahimo hin bisan ano nga garamiton nga pariho kaopay ngan kamapulsanon ha mga tudlo. Pakianhi an imo kalugaringon, ‘Mahihimo ba an mag-opay hinduro nga butang kon diri tungod han mapulsanon gud nga mga tudlo nga hinimo han Dios?’

Urusahon nga mga Buhat Ngan Kalidad han Dios

7. Kay ano nga an Biblia usa han urusahon nga mga buhat han Dios?

⁷ Kaupod han urusahon nga mga buhat ni Jehova an iba pa nga makaruruyag nga butang nga iya ginhimo para ha katawohan, sugad han iginsasaysay ha Kasuratan. An Biblia mismo usa nga obramaestra tungod ha pagkauruyon han mga libro hito. Diri pariho ha iba nga libro, ‘ginpakaaghat gud ito han Dios ngan may kapulsanan ha pagtutdo.’ (2 Tim. 3:16) Pananglitan, iginsasaysay ha siyahan nga libro han Biblia, an Genesis, kon paonan-o ginbungkag han Dios an magraot ha tuna ha panahon ni Noe. Iginsusumat han ikaduha nga libro, an Eksodo, kon paonan-o ginbindikar ni Jehova an iya pagka-Dios han gintalwas niya an Israel ha pagkauripon ha Ehipto. Posible nga ito an nahunahuna han salmista han hiya nagsiring: “An iya buhat amo an dungganon ngan harangdon; ngan an iya katul-iran aada ha kagihaponan. Ginhimo niya nga hinumdoman an iya mga urusahon [nga buhat]: Hi Jehova puno hin grasya ngan malolooyon.” (Sal. 111:3, 4) Diri ka ba nauyon nga an buhat ni Jehova ha bug-os nga kasaysayan, upod na an iya ginhimo durante ha imo panahon, nagpapahinumdom gud han iya pagin “dungganon ngan harangdon”?

8, 9. (a) Ano an kaibahan han mga buhat han Dios ha damu nga buhat han tawo? (b) Ano nga mga kalidad han Dios an imo naruruyagan?

⁸ Hinumdumi nga ginpapabug-atan liwat han salmista an mag-opay gud nga kalidad ni Jehova sugad han “katul-iran” o pagkamatadong, pagin “puno hin grasya” o pagkabuotan, ngan pagkamaloloy-on. Maaram ka nga an mga buhat han magpakasasala agsob nga diri uyon ha katadongan. Kasagaran nga tungod ito han kahakog, kaawa, ngan kahambog. Makikita ito ha makabungkag nga mga armas nga ginhihimo han tawo basi mag-aghat hin girra ngan magkaada pinansyal nga ganansya. Nagriresulta ini hin duro nga kasakitan ngan kahadlok ha damu nga inosente nga biktima. Damu liwat nga buhat han tawo an nagin hinungdan han pag-antos han tinalumpigos nga mga pobre. Sugad nga ehemplo, bangin damu an mag-unabi han mga uripon nga ginpatukod hin mga piramid, nga ginamit la sugad nga lubnganan han mapahitas-on nga mga Paraon. Dugang pa, damu nga buhat han tawo yana an diri la matalumpiguson kondi nagdadaot o “naghihibang han tuna.”—Basaha an Pahayag 11:18.

⁹ Kaiba gud hito an mga buhat ni Jehova, kay  pirme ito uyon ha katadongan! Kaupod ha iya mga buhat an maloloy-on nga kahikayan para ha katalwasan han makasasala nga katawohan. Pinaagi han lukat, ‘iginpahayag han Dios an iya katadongan.’ (Roma 3:25, 26) Oo, waray gud kataposan an iya katadongan! May kalabotan ha pagkabuotan, mapailubon nga ipinakita ito han Dios ha iya pagtratar ha makasasala nga katawohan. May higayon nga matinalahuron nga naghangyo pa ngani hiya ha ira nga isalikway an nakakadaot nga panggawi ngan buhaton an husto.—Esek. 18:25. a

Matinumanon ha Iya mga Saad

10. Ano nga susbaranan han pagkamatinumanon an ipinakita ni Jehova may kalabotan ha iya kauyonan kan Abraham?

¹⁰ ‘Naghatag hiya hin pagkaon ngadto ha mga nahadlok ha iya. Ha dayoday hinunumdoman niya an iya tugon’ o kauyonan. (Sal. 111:5) Baga hin an kauyonan kan Abraham an gin-uunabi dinhi han salmista. Nagsaad hi Jehova nga iya bibendisyonan an katulinan ni Abraham ngan ira tatag-iyahon an ganghaan han ira mga kaaway. (Gen. 22:17, 18; Sal. 105:8, 9) Ha siyahan nga katumanan hito nga mga saad, an katulinan ni Abraham nagin an nasud han Israel. Ito nga nasud maiha nga nauripon ha Ehipto, kondi “an Dios nahinumdom han iya saad kan Abraham” ngan gintalwas hira. (Eks. 2:24) Katapos hito, nakita ha pagtratar ni Jehova ha ira nga mahinatagon gud hiya. Naghatag hiya ha ira hin materyal ngan espirituwal nga pagkaon basi pakusgon ngan parig-unon hira. (Deut. 6:1-3; 8:4; Neh. 9:21) Han sumunod nga mga siglo, an Israel pauroutro nga nagtalapas ha Dios bisan kon nagsugo hiya hin mga propeta basi aghaton hira nga magbasol. Sobra 1,500 ka tuig katapos nga gintalwas han Dios an mga Israelita ha Ehipto, iya ginsugo an iya bugtong nga Anak nganhi ha tuna. Kondi iginsalikway hi Jesus han kadam-an nga Judio ngan inuyon nga patayon hiya. Hito nga panahon nag-organisa hi Jehova hin bag-o nga espirituwal nga nasud, ‘an Israel han Dios.’ Kaupod ni Kristo, ito nga nasud an nagin espirituwal nga binhi ni Abraham, nga igintagna ni Jehova nga iya gagamiton ha pagbendisyon ha katawohan.—Gal. 3:16, 29; 6:16.

11. Ha ano nga paagi padayon nga ‘nahinunumdom’ hi Jehova han iya kauyonan kan Abraham?

¹¹ Hi Jehova padayon nga ‘nahinunumdom’ han iya kauyonan ngan han mga bendisyon nga iya iginsaad pinaagi hito. Yana, naghahatag hiya hin hura nga espirituwal nga pagkaon ha sobra 400 nga yinaknan. Padayon nga binabaton liwat niya an aton mga pag-ampo para han materyal nga panginahanglan, sugad han: “Tagan mo kami niyan hin kan-on namon ha ikinaadlaw.”—Luk. 11:3; Sal. 72:16, 17; Isa. 25:6-8.

An Urusahon nga Gahum ni Jehova

12. Ha ano nga paagi iginhatag ha Israel hadto an “panurundon han mga nasud”?

¹² “Iginpakita niya ha iya katawohan an gahum han iya mga buhat, pinaagi han paghatag ha ira han panurundon han mga nasud.” (Sal. 111:6) Usa han makasaysayan nga hitabo ha Israel nga bangin nahunahuna han salmista amo an milagroso nga pakatalwas nira ha Ehipto. Han ginpasulod ni Jehova an mga Israelita ha Tuna nga Iginsaad, nasakop nira an mga ginhadian ha este ngan weste han Salog Jordan. (Basaha an Nehemia 9:22-25.) Oo, iginhatag ni Jehova ha Israel an “panurundon han mga nasud.” Makatirigamnan gud ito nga pagpakita han gahum han Dios!

13, 14. (a) Ano nga pagpakita han gahum han Dios may kalabotan han Babilonya an bangin nahunahuna han salmista? (b) Ano pa nga mas makatirigamnan nga pagtalwas an ginbuhat ni Jehova?

¹³ Kondi, maaram gud kita nga bisan pa han ngatanan nga ginbuhat ni Jehova para ha Israel, waray hira magpakita hin pagtahod ha iya ngan ha ira kaapoy-apoyan nga hira Abraham, Isaak, ngan Jakob. Padayon nga nagrebelde hira tubtob nga ginamit han Dios an Babilonya ha pagpaiwas ha ira tikang ha napanunod nga tuna, ngan ha pagbihag ha ira. (2 Kron. 36:15-17; Neh. 9:28-30) Sugad han ginsiring han iba nga eskolar han Biblia, kon an nagkomposo han Salmo 111 buhi pa han nakabalik an Israel tikang ha kabihag ha Babilonya, nagkaada hiya dugang nga hinungdan ha pagdayaw kan Jehova  tungod han Iya pagkamaunungon ngan pagkagamhanan. Iya ini ipinakita pinaagi han pagtalwas ha mga Judio tikang ha Babilonya—an imperyo nga may balaud nga diri buhian an mga bihag.—Isa. 14:4, 17.

¹⁴ Paglabay hin mga lima ka siglo, ginamit ni Jehova an iya gahum ha mas makatirigamnan nga paagi ha pagtalwas ha mga mabinasulon tikang ha pagkauripon ha sala ngan kamatayon. (Roma 5:12) Tungod hito nagin posible para ha 144,000 nga magin dinihogan han espiritu nga sumurunod ni Kristo. Han 1919, ginamit ni Jehova an iya gahum ha pagtalwas ha gutiay nga dinihogan nga nanhibilin tikang ha kabihag ha palso nga relihiyon. An ira mga nahihimo hini nga panahon han kataposan nagigin posible la tungod han gahum han Dios. Kon magmatinumanon hira tubtob ha kamatayon, makakaupod hira ni Jesu-Kristo ha langit ha pagmando ha tuna para ha kaopayan han mabinasulon nga katawohan. (Pah. 2:26, 27; 5:9, 10) Magigin panurundon nira an tuna, nga labaw pa gud kay ha napanunod han Israel hadto.—Mat. 5:5.

Mapulsanon Pirme, Masasarigan nga mga Prinsipyo

15, 16. (a) Ano an nahiuupod ha mga buhat han Dios? (b) Ano nga mga sugo an iginhatag han Dios ha Israel hadto?

¹⁵ “An mga buhat han iya mga kamot kamatuoran ngan katadongan; an ngatanan nga iya mga turumanon diri mabalhin. Gintukod ito ha kagihaponan; ginbuhat ito ha kamatuoran ngan ha kamatul-iran.” (Sal. 111:7, 8) Usa han ‘mga buhat han mga kamot’ ni Jehova amo an duha nga papan nga bato nga ginsuratan han napulo nga importante nga balaud para ha Israel. (Eks. 31:18) Ini nga mga balaud ngan an iba pa nga surundon nga nagin bahin han Mosaiko nga Balaud, iginbasar ha mapulsanon pirme ngan masasarigan nga mga prinsipyo.

¹⁶ Pananglitan, an usa han mga balaud nga nakasurat ha mga papan nasiring: “Ako hi Jehova nga imo Dios, maabugho nga Dios.” Dugang pa, nasiring ito nga hi Jehova ‘nagpapakita hin kalooy ha yinukot nga nahigugma ha iya ngan nagbabantay han iya mga sugo.’ Nakasurat liwat ha mga papan an mapulsanon pirme nga mga prinsipyo sugad han “tahuron mo an imo amay ngan an imo iroy” ngan “diri ka mangawat,” sugad man an puno-hin-kinaadman nga balaud nga diri maipa ha gintatag-iya han iba.—Eks. 20:5, 6, 12, 15, 17.

An Aton Baraan Ngan Talahuron nga Manluluwas

17. Kay ano nga sadang pagbaraanon han mga Israelita an ngaran han Dios?

¹⁷ “Ginpadara niya an pagtubos ngadto ha iya katawohan; iginsugo niya an iya tugon ha waray kataposan; baraan ngan talahuron an iya ngaran.” (Sal. 111:9) Bangin nahunahuna na liwat  han salmista an pagkamaunungon ni Jehova ha iya saad kan Abraham. Tungod hito, waray bayai ni Jehova an iya katawohan han gin-uripon hira ha Ehipto ngan han ginbihag hira ha Babilonya. Hito nga mga kahimtang, gintalwas han Dios an iya katawohan. Iton duha pa la nga ginbuhat han Dios, igo na nga hinungdan basi pagbaraanon han Israel an Iya ngaran.—Basaha an Eksodo 20:7; Roma 2:23, 24.

18. Para ha imo, kay ano nga usa nga pribilehiyo an pagdayaw ha ngaran han Dios?

¹⁸ Sugad liwat hito an sadang buhaton han mga Kristiano yana, nga gintalwas ha waray-paglaom nga kauripon ha sala ngan kamatayon. Kinahanglan pangalimbasogan gud naton nga magkinabuhi uyon ha siyahan nga hangyo ha surubdan nga pag-ampo: ‘Pagdayawon an imo ngaran.’ (Mat. 6:9) Ha pagpamalandong han mahimayaon nga ngaran han Dios, sadang kita magkaada husto nga kahadlok ha iya. An nagsurat han Salmo 111 may-ada husto nga pagsabot ha kahadlok ha Dios. Hiya nagsiring: ‘An kahadlok kan Jehova amo an tinikangan han kinaadman; maopay an pagsabot han ngatanan nga tukib han iya mga tugon [“nagtutuman han iya mga sugo,” NW].’—Sal. 111:10.

19. Ano an pag-aadman naton ha sunod nga artikulo?

¹⁹ An husto nga kahadlok ha Dios mabulig ha aton nga kangalasan an maraot. Mabulig liwat ito ha aton ha pagsubad han mag-opay nga kalidad han Dios sugad han gin-uunabi ha Salmo 112, nga aton pag-aadman ha  sunod nga artikulo. Iginsasaysay hito nga salmo kon paonan-o kita magigin kwalipikado basi makaupod han minilyon nga malipayon nga magdadayaw ha Dios ha waray kataposan. Takos gud hiya hito. “An pagdayaw ha iya . . . waray kataposan.”—Sal. 111:10.

[Footnote]

Mga Pakiana nga Angay Pamalandungon

• Kay ano nga hi Jehova takos han aton urosa nga pagdayaw?

• Ano nga mga kalidad ni Jehova an nakikita ha iya mga buhat?

• Ano an imo masisiring mahitungod han pribelihiyo nga tawagon ha ngaran han Dios?

[Mga Pakiana]

[Retrato ha pahina 20]

An nangunguna nga katuyoan han aton regular nga pagkatirok amo an pagdayaw kan Jehova

[Retrato ha pahina 23]

An ngatanan nga balaud ni Jehova iginbasar ha mapulsanon pirme ngan masasarigan nga mga prinsipyo