Hunahunaa Pirme an Balos
Hunahunaa Pirme an Balos
“Nagpapadayon ako ngadto ha kataposan tungod ha balos.”—FIL. 3:14.
1. Ano nga balos an ginlaoman ni apostol Pablo?
HI APOSTOL Pablo, nga kilala liwat nga Saulo han Tarso, membro han prominente nga pamilya. Igintutdo ha iya han kilala nga magturutdo han Balaud nga hi Gamaliel an relihiyon han iya kaapoy-apoyan. (Buh. 22:3) Magkakaada unta hi Pablo hin maopay nga propesyon; kondi iya ginbayaan an iya relihiyon ngan nagin Kristiano. Tungod hito, naglaom hiya han balos nga kinabuhi nga waray kataposan—an pagin waray kamatayon nga hadi ngan saserdote ha Ginhadian han Dios ha langit. Ito nga Ginhadian magmamando ha paraiso nga tuna.—Mat. 6:10; Pah. 7:4; 20:6.
2, 3. Paonan-o pinabilhan gud ni Pablo an balos nga kinabuhi ha langit?
2 Ginpapabilhan gud ni Pablo ito nga balos han hiya nagsiring: “Kon ano nga mga bagay an akon ganansya hadto, ini akon gin-isip nga karag tungod kan Kristo. Totoo ha pagkamatuod, gin-isip ko nga karag an ngatanan nga mga bagay tungod ha minahal gud nga pagkilala kan Kristo Jesus nga akon Ginoo: nga tungod ha iya ginkaragan ko an ngatanan nga mga bagay, ngan gin-isip ko hira nga mga sighot.” (Fil. 3:7, 8) An katungdanan, karikohan, propesyon, kabantogan, nga importante para ha kadam-an, gintagad ni Pablo sugad nga sighot han hinbaroan niya an kamatuoran mahitungod han katuyoan ni Jehova para ha katawohan.
3 Tikang hadto, an pinakaimportante kan Pablo amo an birilhon nga kahibaro kan Jehova ngan kan Kristo, nga mahitungod hito hi Jesus nagsiring ha pag-ampo ha Dios: “Ini amo an kinabuhi nga waray kataposan, nga hira kumilala ha imo, nga amo la an matuod nga Dios, ngan hi Jesu-Kristo nga imo ginpakanhi.” (Juan 17:3) An duro nga hingyap ni Pablo nga makarawat an kinabuhi nga dayon matin-aw gud ha iya ginsiring ha Filipos 3:14: “Nagpapadayon ako ngadto ha kataposan tungod ha balos han hitaas nga pagtawag han Dios kan Kristo Jesus.” Oo, nakasentro an iya hunahuna ha balos nga kinabuhi nga waray kataposan ha langit sugad nga bahin han Ginhadian han Dios.
Dayon nga Kinabuhi ha Tuna
4, 5. Ano an balos ha damu nga nagbubuhat han kaburut-on han Dios yana?
4 Para ha kadam-an nga nagpili ha pagbuhat han kaburut-on han Dios, takos gud pangalimbasogan an balos nga kinabuhi nga dayon ha bag-o nga kalibotan. (Sal. 37:11, 29) Nagpasarig hi Jesus nga sigurado ini nga paglaom. Hiya nagsiring: “Bulahan an mga maaghop, kay hira makakapanunod han tuna.” (Mat. 5:5) Hi Jesus mismo an nangunguna nga makakapanunod han aton tuna, sugad han ginsisiring han Salmo 2:8, ngan makakaupod niya an 144,000 nga igkasi-magmarando ha langit. (Dan. 7:13, 14, 22, 27) An daku nga panon nga magkikinabuhi ha tuna “makakapanunod” han tunan-on nga bahin han Ginhadian nga ‘igin-andam ha ira tikang han pagtindoga han kalibotan.’ (Mat. 25:34, 46) Ngan ginpapasarig kita nga matutuman ini ngatanan tungod kay an Dios, nga nagsasaad hito, “diri makakagbuwa.” (Tito 1:2) Sugad kan Josue, makakasarig liwat kita ha katumanan han mga saad han Dios. Hiya nagsiring ha mga Israelita: “Waray usa nga butang [“pulong,” NW] nga nakawang ha ngatanan nga mag-opay nga butang nga kan Jehova nga iyo Dios iginyakan . . . ha iyo; an ngatanan natuman para ha iyo, waray usa nga butang nga nakawang hini.”—Jos. 23:14.
5 An kinabuhi ha bag-o nga kalibotan han Dios diri magigin makasurubo sugad han kahimtang yana. Mawawaray na gud an girra, krimen, kakurian, kawaray-hustisya, sakit, ngan kamatayon. An mga tawo magigin mahimsog ngan magkikinabuhi ha tuna nga nagin paraiso na. Makalilipay gud ito nga kinabuhi labaw pa han aton mahuhunahuna. Oo, hito nga panahon makalilipay gud an kada adlaw. Makaruruyag gud ito nga balos!
6, 7. (a) Ano an ginbuhat ni Jesus nga malalaoman naton nga mahitatabo ha bag-o nga kalibotan? (b) Ano an malalaoman bisan han mga patay?
6 Han hi Jesus nakanhi ha tuna, gintagan hiya han Dios hin gahum pinaagi han baraan nga espiritu ha pagpakita han urusahon nga mga butang nga mahitatabo ha bug-os nga tuna ha bag-o nga kalibotan. Pananglitan, ginsidngan ni Jesus an 38 ka tuig na nga paralisado nga lumakat. An Biblia nagsusumat nga an lalaki linakat. (Basaha an Juan 5:5-9.) Ha usa pa nga higayon, nakakita hi Jesus hin “tawo nga buta tikang han iya kabata” ngan iya gintambal. Han ginpakianhan mahitungod han nagtambal ha iya, binaton hiya: “Tikang ha tinikangan han kalibotan waray pa gud hinbatian, nga bisan hin-o nga nakapagbuklad han mga mata han usa nga natawo nga buta tikang ha kabata. Kon ini nga tawo diri tikang ha Dios, hiya diri makakahimo hin bisan ano.” (Juan 9:1, 6, 7, 32, 33) Mahihimo ni Jesus ini ngatanan tungod kay gintagan hiya hin gahum han Dios. Bisan diin hiya kumadto, “adton nagkikinahanglan han pagtambal, iya gintambal.”—Luk. 9:11.
7 Diri la matatambal ni Jesus an magsakit ngan baldado kondi mababanhaw liwat niya an mga patay. Pananglitan, han namatay an 12-anyos nga daragita nasubo gud an iya mga kag-anak. Kondi hi Jesus nagsiring: “Daragita, ha imo ako nasiring, bumuhat ka.” Ngan binuhat hiya! Nahahanduraw mo ba an inabat han iya mga kag-anak ngan han iba nga nakadto? (Basaha an Markos 5:38-42.) Ha bag-o nga kalibotan han Dios, magigin duro an kalipay kon banhawon na an damu nga tawo, tungod kay “may pagkabanhaw han . . . magtadong ngan diri man magtadong.” (Buh. 24:15; Juan 5:28, 29) Tikang hito nga panahon, posible nga magkinabuhi hira ha kadayonan.
8, 9. (a) Ha Milenyo nga Pagmando ni Kristo, ano an mahitatabo ha sala nga napanunod kan Adan? (b) Ha ano nakadepende an paghukom ha mga patay?
8 An mga binanhaw diri sisirotan tungod han mga sala nga ira nabuhat antes hira mamatay. (Roma 6:7) Ha Milenyo nga Pagmando ni Kristo, samtang nakakarawat han masinugtanon nga mga sakop han Ginhadian an mga kapulsanan han halad lukat, magtitikahingpit hira tubtob nga bug-os nga mawara na an ngatanan nga epekto han sala ni Adan. (Roma 8:21) ‘Lalamuyon han Ginoo nga hi Jehova ha kadayonan an kamatayon; ngan iya papahiron an mga luha tikang ha ngatanan nga nawong.’ (Isa. 25:8) An Pulong han Dios nasiring liwat nga ‘bubuklaron an mga basahon,’ nga nagpapasabot nga adton buhi hito nga panahon makarawat hin bag-o nga impormasyon. (Pah. 20:12) Samtang nagigin paraiso an tuna, ‘an mga umurukoy ha kalibotan makakatoon han pagkamatadong.’—Isa. 26:9.
9 An mga binanhaw huhukman, diri tungod ha sala nga napanunod kan Adan, kondi depende ha ira bubuhaton. An Pahayag 20:12 nasiring: “An mga minatay pinanhukman sumala ha ira mga buhat, tikang ha mga butang nga nanhisurat ha mga basahon,” nga amo an ira mga buhat katapos hira banhawon. Makaruruyag gud ito nga pagpakita han hustisya, kalooy, ngan gugma ni Jehova! Dugang pa, an magkuri nga nahitabo ha ira hinin daan nga kalibotan “diri na hinunumdoman, o diri na maabot ha panumdoman.” (Isa. 65:17) Tungod han makaparig-on nga bag-o nga impormasyon ngan makapatagbaw nga kinabuhi, diri na hira masusubo ha magraot nga nahitabo ha naglabay. Hingangalimtan na nira iton magraot nga eksperyensya hadto. (Pah. 21:4) Sugad liwat hito an maieksperyensyahan han daku nga panon nga matatalwas ha Armagedon.—Pah. 7:9, 10, 14.
10. (a) Ano an magigin kahimtang han kinabuhi ha bag-o nga kalibotan han Dios? (b) Ano an mabulig ha imo basi hunahunaon pirme an balos?
10 Ha bag-o nga kalibotan han Dios, an mga tawo diri na magkakasakit o mamamatay. “An umurukoy diri masiring: Ako masakit.” (Isa. 33:24) Ha adlaw-adlaw, magmamata an mga umurukoy ha bag-o nga tuna nga nagtitikahingpit an kahimsog, ngan malipayon nga nagpapamulat han sunod nga makaruruyag nga adlaw. Maiikag hira ha makapatagbaw nga buruhaton, ngan pakig-upod ha iba nga nahigugma ha ira. Makalilipay gud nga balos an sugad nga kinabuhi! Kay ano nga diri mo basahon an mga tagna ha Biblia ha Isaias 33:24 ngan 35:5-7? Handurawa nga naieksperyensyahan mo ito. Mabulig ito ha imo nga hunahunaon pirme an balos.
Nahingalimot an Iba han Balos
11. Isaysay an maopay nga tinikangan han pagmando ni Salomon.
11 Kon mahibaro na kita han balos, pangalimbasogan gud naton nga hunahunaon pirme ito tungod kay bangin mahingalimot kita. Pananglitan, han hi Salomon nagin hadi ha Israel, mapainubsanon nga nanginyupo hiya ha Dios hin pagsabot ngan husto nga pagturotimbang basi makaghukom hiya hin matadong ha Iya katawohan. (Basaha an 1 Hadi 3:6-12.) Tungod hito, an Biblia nasiring, “Tinagan han Dios hi Salomon hin kinaadman ngan hin sarabotan nga daku kaopay.” Oo, “an kinaadman ni Salomon linabaw han kinaadman han ngatanan nga mga anak ha Sirangan, ngan han ngatanan nga kinaadman ha Ehipto.”—1 Hadi 4:29-32.
12. Ano an pahamangno ni Jehova ha magigin mga hadi ha Israel?
12 Kondi, ha siyahan nagpahamangno hi Jehova nga an bisan hin-o nga magin hadi ‘diri magpadamu hin mga kabayo ngan hin asawa para ha iya, basi nga an iya kasingkasing diri mahisimang.’ (Deut. 17:14-17) An pagpadamu hin kabayo mangangahulogan nga nadepende an hadi ha iya kasundalohan ha pagpanalipod han nasud imbes nga sumarig kan Jehova, an Parapanalipod. Ngan peligroso an pagpadamu hin asawa tungod kay an iba ha ira tikang ha kahigrani nga pagano nga nasud nga palso an pagsingba, ngan makakapasimang hira ha hadi ha tinuod nga pagsingba kan Jehova.
13. Paonan-o hinngalimtan ni Salomon an pahamangno ha iya?
13 Waray sunda ni Salomon ito nga mga pahamangno. Lugod, iya ginbuhat an igindiri ni Jehova ha mga hadi. Nagpadamu hiya hin kakabayohan ngan mangangabayo. (1 Hadi 4:26) Nagkaada liwat hiya hin 700 nga asawa ngan 300 nga kerida, nga damu an tikang ha kahigrani nga pagano nga nasud. Hira “nagpasimang han iya kasingkasing ha pagsunod han lain nga mga dios; ngan an iya kasingkasing diri hingpit kan Jehova.” Hi Salomon nagbuhat han mangil-ad nga palso nga pagsingba han pagano nga mga nasud nga igintutdo han iya mga asawa. Tungod hito, hi Jehova nagsiring nga “ha waray ruhaduha lalakniton [niya] an ginhadian” tikang kan Salomon.—1 Hadi 11:1-6, 11.
14. Ano an resulta han diri pagsunod ni Salomon ngan han nasud han Israel?
14 Hinngalimtan ni Salomon an iya birilhon nga pribilehiyo ha pagrepresentar han matuod nga Dios. Nakigbahin gud hiya han palso nga pagsingba. Inabot an panahon nga an bug-os nga nasud nag-apostata, nga nagresulta han kabungkag hito han 607 A.K.P. Bisan kon ha urhi binalik an mga Judio ha tinuod nga pagsingba, paglabay hin mga siglo hi Jesus nagsiring: “An ginhadian han Dios kukuhaon ha iyo, ngan ihahatag ha usa nga nasud, nga mapabunga ha iya.” Ito gud an nahitabo. Hi Jesus nagsiring: “Kitaa, an iyo balay binabayaan ha iyo nga mamingaw.” (Mat. 21:43; 23:37, 38) Tungod han pagkadiri-matinumanon han nasud, nawara hito an daku nga pribilehiyo ha pagrepresentar han matuod nga Dios. Han 70 K.P., ginbungkag han Romano nga kasundalohan an Jerusalem ngan an templo, ngan nagin uripon an damu nga nanhibilin nga Judio.
15. Paghatag hin mga ehemplo han nahingalimot ha kon ano gud an importante.
15 Hi Judas Iskariote usa han 12 nga apostol ni Jesus. Hinbatian niya an mag-opay nga katutdoan ni Jesus ngan hinkit-an an iya mga milagro pinaagi han bulig han baraan nga espiritu han Dios. Kondi, waray bantayi ni Judas an iya kasingkasing. Hiya an gintaporan han surudlan han kwarta nira nga 12 nga apostol ngan ni Jesus. Kondi “hiya kawatan nga aadto ha iya an supot, ngan iya kinukuha an iginsusulod.” (Juan 12:6) Tungod han iya duro nga kahakog, nakigkunsabo hiya ha salingkapaw nga punoan nga mga saserdote ha pagtraydor kan Jesus kabalyo hin 30 ka bug-os nga salapi. (Mat. 26:14-16) An usa pa nga nahingalimot amo hi Demas, nga kaupod ni apostol Pablo. Waray bantayi ni Demas an iya kasingkasing. Hi Pablo nagsiring: “Hi Demas binulag ha akon tungod ha paghigugma hini nga kalibotan.”—2 Tim. 4:10; basaha an Proberbios 4:23.
Leksyon Para ha Aton
16, 17. (a) Mationan-o kakusog an pagkontra ha aton? (b) Ano an makakabulig ha aton basi maatohan an bisan ano nga pagsulay ni Satanas ha aton?
16 Sadang tagdon hin maopay han ngatanan nga surugoon han Dios an mga ehemplo ha Biblia, kay kita ginpapahamangnoan: ‘Ini ngatanan nga bagay nahinabo nga susbaranan, ngan ipinanurat ha pagsagdon ha aton nga inabotan han kataposan han katuigan.’ (1 Kor. 10:11) Yana, nagkikinabuhi kita ha kataposan nga mga adlaw hinin maraot nga sistema.—2 Tim. 3:1, 13.
17 Hi Satanas nga Yawa, an “dios hini nga kalibotan,” maaram nga “halipot na la nga oras iton iya pag-ukoy.” (2 Kor. 4:4; Pah. 12:12) Bubuhaton niya an ngatanan ha pagsulay ha mga surugoon ni Jehova basi madaot an ira integridad sugad nga Kristiano. Kontrolado ni Satanas ini nga kalibotan, upod na an mga propaganda hito. Kondi, an katawohan ni Jehova may-ada mas gamhanan pa hito—“an kapin kaopay nga gahum.” (2 Kor. 4:7) Makakasarig kita hini nga gahum tikang ha Dios nga mabulig ha aton nga maatohan an bisan ano nga pagsulay ni Satanas ha aton. Salit, ginsasagda kita nga mag-ampo pirme, nasarig nga hi Jehova “mahatag han espiritu santo ha mga nangangaro ha iya.”—Luk. 11:13.
18. Ano an sadang hunahunaon naton mahitungod hini nga kalibotan?
18 Napaparig-on liwat kita ha paghibaro nga an bug-os nga sistema ni Satanas hirani na bungkagon kondi matatalwas an tinuod nga mga Kristiano. “An kalibotan nawawara, ngan an iya kairiphon: kondi an nagbubuhat ha kaburut-on han Dios nagpapadayon ha gihapon.” (1 Juan 2:17) Salit, diri gud maaramon nga maghunahuna an usa nga surugoon han Dios nga may-ada pa mas birilhon hini nga sistema kay ha iya relasyon kan Jehova! Ini nga kalibotan nga kontrolado ni Satanas sugad hin tikalunod nga barko. Kondi, hi Jehova nagtatagana han Kristiano nga kongregasyon sugad nga “sakayan” para ha iya magtinumanon nga surugoon. Samtang nagtitikahirani hira ha bag-o nga kalibotan, makakasarig hira hini nga saad: “Paglalaglagon an mga magburuhat hin maraot; kondi an mga nahulat kan Jehova, makakapanunod . . . han tuna.” (Sal. 37:9) Salit, hunahunaa pirme inin makalilipay nga balos!
Nahinunumdoman Mo Ba?
• Ano an inabat ni Pablo ha balos nga iginhatag ha iya?
• Ha ano nakadepende an paghukom ha mga mabubuhi ha kadayonan ha tuna?
• Ano an maaramon nga buhaton mo yana?
[Mga Pakiana]
[Retrato ha pahina 12,13]
Nahahanduraw mo ba nga nakakarawat mo an balos kon ginbabasa mo an mga asoy han Biblia?