“Mag-agma” Kamo
“Mag-agma” Kamo
“An kataposan han ngatanan nga mga butang hirani na. . . . Magmaligdong [“mag-agma,” NW] ha pag-ampo.”—1 PED. 4:7.
1. Ano an tema han igintutdo ni Jesus?
HAN hi Jesu-Kristo nakanhi pa ha tuna, an tema han iya igintutdo amo an Ginhadian han Dios. Pinaagi hito nga Ginhadian, igbibindikar ni Jehova an iya pagkasoberano ha uniberso ngan pagbabaraanon an iya ngaran. Salit, gintutdoan ni Jesus an iya mga disipulo nga mag-ampo ha Dios: “Kumanhi an imo ginhadian. Matuman an imo pagburut-an, sugad ha langit, amo man ha tuna.” (Mat. 4:17; 6:9, 10) Hirani na gud bungkagon hito nga Ginhadian an kalibotan ni Satanas, katapos ipapatuman hito an kaburut-on han Dios ha bug-os nga tuna. Sugad han igintagna ni Daniel, an Ginhadian han Dios “magpipinitpinit ngan mag-aanaw hini ngatanan nga ginhadian [yana], ngan ini matindog ha kadayonan.”—Dan. 2:44.
2. (a) Paonan-o mahibabaro an mga sumurunod ni Jesus nga nagmamando na hiya ha Ginhadian? (b) Ano pa an iginpapasabot han tigaman?
2 Tungod kay an pag-abot han Ginhadian han Dios importante gud ha mga sumurunod ni Jesus, nagpakiana hira ha iya: “Ano an tigaman han imo pagkanhi, ngan han kataposan han kalibotan?” (Mat. 24:3) May-ada makikita nga tigaman tungod kay an presensya ni Kristo ha pagmando ha Ginhadian diri makikita han mga tawo. Magkalain-lain an bahin hito nga tigaman nga igintagna ha Kasuratan. Salit, an mga sumurunod ni Jesus nga buhi hito nga panahon makakasabot nga nagtikang na hiya ha pagmando ha langit. Ito liwat an magtitigaman han tinikangan han peryodo nga ginsisiring ha Biblia nga “kataposan nga mga adlaw” han maraot nga sistema nga nagmamando ha kalibotan yana.—2 Tim. 3:1-5, 13; Mat. 24:7-14.
Mag-agma Kamo ha Kataposan nga mga Adlaw
3. Kay ano nga kinahanglan mag-agma an mga Kristiano?
3 Hi apostol Pedro nagsurat: ‘An kataposan han ngatanan nga butang hirani na, busa magbuotan kamo, ngan mag-agma ha pag-ampo.’ (1 Ped. 4:7) An mga sumurunod ni Jesus kinahanglan mag-agma, ngan magbantay ha mga hitabo ha kalibotan nga nagpapasabot nga nagmamando na hiya ha Ginhadian. Ngan mas mag-aagma pa gud hira samtang nagtitikahirani an kataposan hinin maraot nga sistema. Hi Jesus nagsiring ha iya mga disipulo: “Mag-agma [“padayon nga magbantay,” NW] kamo, kay diri kamo maaram kon san-o an pagbalik han agaron han balay [ha paghukom ha kalibotan ni Satanas].”—Mar. 13:35, 36.
4. Isaysay an kaibahan han mga tawo nga bahin han kalibotan ni Satanas ngan han mga surugoon ni Jehova. (Iupod an kahon.)
4 An mga tawo ha kabug-osan ginmamandoan ni Satanas, ngan diri hira mabinantayon may kalabotan ha kahulogan han mga hitabo ha kalibotan. Diri hira maaram nga hi Kristo nagmamando na ha Ginhadian. Kondi an tinuod nga mga sumurunod ni Kristo nag-aagma ngan maaram han totoo nga kahulogan han panhitabo ha naglabay nga siglo. Han 1925, hinbaroan han mga Saksi ni Jehova nga an Girra ha Kalibotan I ngan an panhitabo nga sumunod hito nagpapamatuod gud nga hi Kristo nagtikang na pagmando ha Ginhadian ha langit han 1914. Kon sugad, nagtikang na an kataposan nga mga adlaw hinin maraot nga sistema nga ginmamandoan ni Satanas. Bisan kon damu nga maobserbahon nga tawo an diri maaram han kahulogan han panhitabo, nakikita nira an daku nga kaibahan han peryodo antes han Girra ha Kalibotan I ngan han peryodo katapos hito.—Kitaa an kahon nga “Nagtikang Na an Panahon han Kasamok.”
5. Kay ano nga importante nga magpadayon kita ha pagbantay?
5 Haros usa ka siglo na yana, an makangingirhat nga panhitabo ha bug-os nga kalibotan nagpapamatuod nga nagkikinabuhi na kita ha kataposan nga mga adlaw. Halipot na hinduro an nahibibilin nga panahon antes sugoon ni Jehova hi Kristo nga manguna ha gamhanan nga mga anghel kontra ha kalibotan ni Satanas. (Pah. 19:11-21) Ginpapahamangnoan an tinuod nga mga Kristiano nga padayon nga magbantay. Salit, importante nga padayon nga buhaton ito samtang ginhuhulat naton an kataposan hini nga sistema. (Mat. 24:42) Kinahanglan magpadayon kita ha pagbantay, ngan ha giya ni Kristo, tumanon gud naton an importante nga buruhaton ha bug-os nga tuna.
Bug-os-Kalibotan nga Buruhaton
6, 7. Paonan-o nag-uuswag an pagsangyaw han Ginhadian hinin kataposan nga mga adlaw?
6 An buruhaton nga kinahanglan tumanon han mga surugoon ni Jehova igintagna sugad nga bahin han kabug-osan nga tigaman nga nagpapasabot nga aanhi na kita ha kataposan hinin maraot nga sistema. Iginsaysay ni Jesus inin bug-os-kalibotan nga buruhaton han gin-unabi niya an damu nga mahitatabo ha panahon han kataposan. Upod han iya tagna inin importante nga kapahayagan: “Ini nga maopay nga sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.”—Mat. 24:14.
7 Tagda an pipira nga pamatuod may kalabotan hito nga tagna ni Jesus. Gutiay gud la an nagpapasamwak han maopay nga sumat han nagtikang an kataposan nga mga adlaw han 1914. Kondi yana damu na gud hira. May-ada na sobra 7,000,000 nga Saksi ni Jehova nga nagsasangyaw ha bug-os nga tuna, nga naorganisa ha sobra 100,000 nga kongregasyon. Ha Memoryal han kamatayon ni Kristo han 2008, may-ada 10,000,000 nga tinambong upod han mga Saksi ni Jehova. Mas damu gud ito kay han 2007.
8. Kay ano nga malampuson gud an aton pagsangyaw bisan pa han pagkontra?
8 Maopay gud nga pamatuod an nahihimo ha ngatanan nga nasud mahitungod han Ginhadian han Dios antes umabot an kataposan hini nga sistema! Nahihimo ito bisan pa kon hi Satanas an “dios hini nga kalibotan.” (2 Kor. 4:4) Impluwensyado niya an ngatanan nga bahin han politika, relihiyon, komersyo, ngan propaganda hini nga kalibotan. Kon sugad, ano an hinungdan han urusahon nga kalamposan han pagsangyaw? Tungod ito han bulig ni Jehova. Salit, malampuson nga nagpapadayon an pagsangyaw bisan pa han pangalimbasog ni Satanas ha pagpaundang hito.
9. Kay ano nga an aton kalamposan ha espirituwal masisiring nga milagro?
9 An kalamposan han pagsangyaw, an pagtikadamu, ngan an pag-uswag han espirituwal nga kahibaro han katawohan ni Jehova masisiring nga milagro. Kon waray bulig han Dios, sugad han giya ngan panalipod ha iya katawohan, diri maglalampos an pagsangyaw. (Basaha an Mateo 19:26.) Makakasiguro kita nga ha bulig han baraan nga espiritu han Dios ha mga mabinantayon nga disidido mag-alagad, ini nga pagsangyaw magpapadayon nga malampuson “ngan niyan an kataposan maabot.” Hirani na gud ito!
“Daku nga Kagol-anan”
10. Sumala kan Jesus, ano an mahitatabo ha tiarabot nga daku nga kagol-anan?
10 An kataposan hinin maraot nga sistema maabot ha tinatawag nga “daku nga kagol-anan.” (Pah. 7:14) Waray ginsisiring an Biblia kon mationan-o ito kahilawig, kondi hi Jesus nagsiring: “Niyan maabot an daku nga kagol-anan, sugad nga waray pa mahinabo tikang ha tinikangan han kalibotan tubtob yana, ngan diri gud mahinanabo [utro].” (Mat. 24:21) Kon huhunahunaon an kagol-anan nga naeksperyensyahan na han katawohan, sugad han Girra ha Kalibotan II nga mga 50 tubtob 60 ka milyon an nagkamatay, duro pa gud hito an tiarabot nga daku nga kagol-anan. Matatapos ito ha girra han Armagedon. Mahitatabo ito kon gamiton na ni Jehova an iya langitnon nga pwersa ha pagbungkag han tagsa nga bahin han sistema ni Satanas ha tuna.—Pah. 16:14, 16.
11, 12. Ano nga hitabo an magtitigaman han pagtikang han daku nga kagol-anan?
11 Waray unabiha ha tagna kon san-o magtitikang an siyahan nga bahin han daku nga kagol-anan, kondi gin-uunabi gud an makatirigamnan nga hitabo nga magtitigaman han pagtikang hito. Ito nga hitabo amo an pagbungkag ha ngatanan nga palso nga relihiyon pinaagi han kagamhanan ha politika. Ha mga tagna ha Pahayag kapitulo 17 ngan 18, an palso nga relihiyon iginpapariho hin puta nga nakikighilawas ha politikal nga sistema ha tuna. Gin-uunabi han Pahayag 17:16 nga hirani na umabot an panahon nga inin mga bahin han politika “magdudumot han puta, ngan paglalaglagon ngan paghuhuboan hiya nira, ngan pangangaunon nira an iya unod, ngan pagsusunugon gud hiya ha kalayo.”
12 Kon umabot na ito nga panahon, ‘ibubutang han Dios ha ira mga kasingkasing [magmarando ha politika] an pagbuhat han iya kaburut-on’ basi bungkagon an ngatanan nga palso nga relihiyon. (Pah. 17:17) Salit ini nga pagbungkag masisiring nga tikang ha Dios. Paghukom niya ito ha salingkapaw nga relihiyon nga maiha na nga nagtututdo hin mga doktrina nga nakontra ha kaburut-on han Dios ngan nagtitimaraot ha iya mga surugoon. Diri naglalaom an kadam-an nga maabot an kabungkagan han palso nga relihiyon. Kondi an magtinumanon nga surugoon ni Jehova naglalaom hito. Ngan hinin kataposan nga mga adlaw, iginpapahibaro nira ito ha mga tawo.
13. Ano an nagpapasabot nga tigda nga maabot an kataposan han palso nga relihiyon?
13 Diri gud makakatoo an mga tawo ha kabungkagan han palso nga relihiyon. An tagna nasiring nga bisan an iba han “kahadian ha tuna” magpapahayag mahitungod hito nga kabungkagan: “Kairo, kairo, . . . kay ha usa la ka oras inabot na an paghukom ha imo.” (Pah. 18:9, 10, 16, 19) An mga pulong dinhi nga “usa la ka oras” nagpapasabot nga tigda nga maabot ito.
14. Kon atakehon na han mga kaaway ni Jehova an iya mga surugoon, ano an iya bubuhaton?
14 Maaram kita nga katapos bungkagon an palso nga relihiyon, aatakehon an mga surugoon ni Jehova, nga nagpapasamwak han iya mensahe han paghukom. (Esek. 38:14-16) Kon magtikang na ito, an mga naatake makikig-away kan Jehova, nga nagsasaad nga magpapanalipod ha iya magtinumanon nga katawohan. Hi Jehova nasiring: “Ha akon pangabugho ngan ha kalayo han akon kapungot ako nagyakan . . . Ngan hira makakakilala nga ako hi Jehova.” (Basaha an Esekiel 38:18-23.) An Dios nasiring: “Hiya nga nakawkaw ha iyo [iya magtinumanon nga surugoon] nakawkaw han nawotawo han [akon] mata.” (Sak. 2:8) Salit kon an mga kaaway ni Jehova magtikang na han ira bug-os-kalibotan nga pag-atake ha iya mga surugoon, magios na hiya. An iya pagbubuhaton magriresulta ha kataposan nga bahin han daku nga kagol-anan, an Armagedon. Ha pagpanguna ni Kristo, ipapadapat na han gamhanan nga mga anghel an paghukom ni Jehova ha kalibotan ni Satanas.
Kon Ano an Sadang Buhaton Naton
15. Tungod kay hirani na an kataposan hini nga sistema, ano an sadang buhaton naton?
15 Tungod kay hirani na gud an kataposan hinin maraot nga sistema, ano an sadang buhaton naton? Hi apostol Pedro nagsurat: “Tungod kay ini ngatanan nga butang pagtutunawon hin sugad hito, ano nga klase hin pagkatawo an angay ha iyo ha baraan nga mga paggawi ngan mga buhat han diosnon nga debosyon!” (2 Ped. 3:11, NW) Pinabubug-atan hito nga mga pulong nga kinahanglan padayon nga magbantay kita basi masiguro nga nagawi kita uyon ha mga prinsipyo han Dios ngan nagkikinabuhi nga may diosnon nga debosyon, nga nagpapakita han aton gugma ha iya. Nag-uupod ito han pagbuhat han aton gimaopayi ha pagsangyaw han maopay nga sumat han Ginhadian antes umabot an kataposan. Hi Pedro nagsurat liwat: ‘An kataposan han ngatanan nga butang hirani na. Mag-agma kamo ha pag-ampo.’ (1 Ped. 4:7) Nagigin duok kita kan Jehova ngan nagpapakita han aton gugma ha iya pinaagi han padayon nga pag-ampo, naghahangyo nga giyahan kita pinaagi han iya baraan nga espiritu ngan han bug-os-kalibotan nga kongregasyon.
16. Kay ano nga kinahanglan sundon gud naton an sagdon han Dios?
16 Hinin peligroso nga panahon, kinahanglan sundon gud naton an sagdon han Pulong han Dios: “Tan-awa niyo hin maopay kon mationan-o iton iyo panggawi, diri sugad ha mga diri maaram, kondi sugad ha mga maaram; pagpahimulosan an oras, kay an mga adlaw magraot.” (Efe. 5:15, 16) Mas kalyap gud an karaotan yana kay ha naglabay. Nagamit hi Satanas hin damu nga paagi basi pugngan o ulangon an mga tawo ha pagbuhat han kaburut-on ni Jehova. Sugad nga mga surugoon han Dios, maaram kita hini, ngan diri naton tutugotan an bisan ano nga makadaot han aton pagkamaunungon ha iya. Maaram liwat kita han hirani na mahitabo, ngan nasarig kita kan Jehova ngan ha iya mga katuyoan.—Basaha an 1 Juan 2:15-17.
17. Isaysay an aabaton han mga matatalwas ha Armagedon kon banhawon na an mga patay.
17 Matutuman gud an urusahon nga saad han Dios ha pagbanhaw han mga patay, tungod kay “may pagkabanhaw han . . . magtadong ngan diri man magtadong.” (Buh. 24:15) Tigamni an pagkasigurado hito nga saad: “May pagkabanhaw”! Matutuman gud ito, kay hi Jehova an nagsiring hito! An Isaias 26:19 nagsasaad: “An imo mga patay mabubuhi. . . . Pagmata ngan pagkanta, kamo nga nag-uukoy ha tapotapo. . . . An tuna masalikway han mga patay.” An pamatuod nga gintuman na han Dios an iba nga tagna nagpapasarig ha aton nga iya liwat tutumanon ini nga saad ha bag-o nga kalibotan. Daku gud nga kalipay kon magkirigta na liwat an mga binanhaw ngan an ira mga hinigugma! Oo, hirani na an kataposan han kalibotan ni Satanas, ngan hirani na umabot an bag-o nga kalibotan han Dios. Importante gud nga magpabilin kita nga nag-aagma!
Nahinunumdoman Mo Ba?
• Ano an tema han igintutdo ni Jesus?
• Mationan-o kamainuswagon yana an pagsangyaw han Ginhadian?
• Kay ano nga importante nga mag-agma?
• Ano nga punto han saad ha Buhat 24:15 an makaparig-on ha imo?
[Mga Pakiana]
[Kahon/Retrato ha pahina 16,17]
NAGTIKANG NA AN PANAHON HAN KASAMOK
The Age of Turbulence: Adventures in a New World an titulo han libro ni Alan Greenspan han 2007. Ha sulod hin haros 20 ka tuig, hiya an tsirman han United States Federal Reserve Board, nga nanginginano han bangko sentral han bug-os nga nasud. Ginpapabug-atan ni Greenspan an daku nga kaibahan han sitwasyon han kalibotan antes han 1914 ngan katapos hito:
“Sumala ha ngatanan nga report antes han 1914, an kalibotan hadto baga hin magtitikauswag gud an pamatasan ngan sibilisasyon; an katawohan baga hin magtitikahingpit. Han ika-19 ka siglo, natapos an makasurubo nga pagnegosyo hin mga uripon. Baga hin nagtikaiban an sobra nga kamadarahog. . . . Padayon nga nag-uswag an teknolohiya ha bug-os nga kalibotan han ika-19 ka siglo, nga tungod hito nahimo an mga riles han tren, telepono, bombilya, sine, awto, ngan mga gamit ha balay, ngan damu pa. Naghurohilawig an kinabuhi tungod han pamaagi ha pagtambal, napauswag nga nutrisyon, ngan hura nga makukuhaan hin limpyo nga tubig . . . Inabat han ngatanan nga magpapadayon ini nga pag-uswag.”
Kondi . . . “An Girra ha Kalibotan I mas nakadaot han pamatasan ngan sibilisasyon kay han mas makabungkag ha pisikal nga Girra ha Kalibotan II: an siyahan nga girra nakadaot han mag-opay nga ginlalaoman. Diri ko nahingangalimtan an panahon antes han Girra ha Kalibotan I, han an tidaraon han katawohan baga hin malaksi ngan padayon nga nag-uuswag. Daku na gud an kaibahan han aton panhunahuna kay han naglabay nga siglo kondi posible nga mas reyalistiko kita yana. Magpapadayon ba an epekto han terorismo, pagpaso han klima, o pagtikakusog han politika ha pagpauswag han pagkinabuhi yana sugad han nagin epekto han Girra ha Kalibotan I hadto? Waray makakasiguro han baton hito.”
Nahinumdoman ni Greenspan nga han estudyante pa hiya nagsiring an iya propesor ha Economics nga hi Benjamin M. Anderson (1886-1949): “Malipayon gud nga ginhihinumdom han mga may buot na hadto an panahon antes han Girra ha Kalibotan I. Inabat nira an seguridad nga waray na maeksperyensyahi tikang hadto.”—Economics and the Public Welfare.
Sugad liwat hito an konklusyon ni G. J. Meyer ha iya libro nga A World Undone nga iginpublikar han 2006. Aton mababasa: “An panhitabo ha kasaysayan agsob nga ginsisiring nga ‘nakagbag-o han ngatanan.’ Nahitabo gud ini ha Daku nga Girra [1914-1918]. Tungod han girra, nabag-o gud an ngatanan: diri la an mga giutan, mga gobyerno ngan dadangatan han mga nasud, kondi kon paonan-o liwat ginlalantaw han mga tawo an kalibotan ngan an ira kalugaringon tikang hadto. Sugad ito hin lat-ang nga nakagbulag han panahon antes ngan katapos han girra.”
[Retrato ha pahina 18]
Ha Armagedon, gagamiton ni Jehova an gamhanan nga mga anghel