Paonan-o Ka Makakagpadayon ha Pagsangyaw?

NAKAPOY ka na ba hinduro nga tungod hito karuyag mo na umundang ha pagsangyaw? Bangin masarihan an aton pagpailob tungod han duro nga pagkontra, kabaraka, pagin masakiton, impluwensya han mga kaupod, o kawaray interes han aton nasasangyawan. Kondi, hunahunaa an susbaranan ni Jesus. Gin-ilob niya an pinakamakuri nga pagsari “tungod han kalipay nga ibinutang ha iya atubangan.” (Heb. 12:2) Maaram hiya nga pinaagi ha pagpamatuod nga buwa gud an mga akusasyon kan Jehova mapapalipay niya Hiya.—Prob. 27:11.

Pinaagi ha pagpadayon ha pagsangyaw, mapapalipay mo liwat hi Jehova. Kondi, kumusta man kon may-ada mga problema nga nagpapaluya ha imo ha espirituwal? Hi Krystyna, nga lagas na ngan masakiton, nagsiring: “Kasagaran nga nakakapoy ngan nasusubo ako. An mga problema tungod ha pagtikalagas, sugad han pagkasakit ngan kabaraka nakakawara han akon kadasig.” Paonan-o ka makakagpadayon ha pagsangyaw bisan pa hito nga mga problema?

Subara an mga Propeta

Basi makagpadayon ha pagsangyaw, nangangalimbasog an magtinumanon nga magwarali nga masubad an disposisyon han mga propeta hadto. Tagda pananglitan hi Jeremias. Han ginsugo hiya sugad nga propeta, nag-alang anay hiya. Kondi, nailob niya an makuri nga toka ha sobra 40 ka tuig tungod kay bug-os nga sinarig hiya ha Dios.—Jer. 1:6; 20:7-11.

Napaparig-on hi Henryk ha susbaranan ni Jeremias. Siring niya: “Ha akon sobra 70 ka tuig nga pakigbahin ha pagsangyaw, usahay nanluluya ako tungod ha diri maopay nga reaksyon han mga tawo, sugad han ira pagkontra, o kawaray-interes. Ha sugad nga mga kahimtang, ginpapahinumdom ko an akon kalugaringon han susbaranan ni Jeremias. An iya gugma kan Jehova ngan marig-on nga pagtoo nagpakusog ha iya nga magpadayon ha panagna.” (Jer. 1:17) Nadasig liwat hi Rafał han susbaranan ni Jeremias. Siring niya: “Sinarig hi Jeremias ha Dios imbes nga hunahunaon an iya kalugaringon. Maisugon nga nagpadayon hiya bisan pa han pagkontra han kadam-an. Gindudumdom ko ito pirme.”

An susbaranan ni propeta Isaias nakabulig liwat ha damu nga magpadayon ha pagsangyaw. Nagsiring ha iya an Dios nga an iya mga kahimungto diri mamamati ha iya. “Patamboka an kasingkasing hini nga katawohan, ngan pabug-ata an ira mga talinga,” siring ni Jehova. Mapapakyas ba hi Isaias? Diri, maaram gud hito an Dios! Han ginsugo hiya sugad nga propeta, hiya nagsiring: “Iini ako; pakadtoa ako.” (Isa. 6:8-10) Gintuman ni Isaias an sugo ha iya. Tutumanon mo ba liwat an sugo nga pagsangyaw?

Sugad kan Isaias, basi makagpadayon ha pagsangyaw bisan pa han diri-makinarawaton nga mga tawo, kinahanglan diri naton hunahunaon an ira karaway-interes. Nalalamposan ni Rafał an kahulop hini nga paagi: “Ginbabalewaray ko la an nakakasakit o diri makaparig-on nga ginsisiring han mga tawo. Katungod nira nga buhaton an ira karuyag.” Hi Anna nagsiring liwat: “Diri ko ginhuhunahuna an bisan ano nga nakakasubo o diri makapadasig. Nakabulig ha akon an pag-ampo ngan pagbasa han inadlaw nga teksto antes ako magsangyaw. Salit nawawara dayon an negatibo nga panhunahuna.”

Hi propeta Esekiel nanagna ha matinalapason nga mga Judio nga bihag ha Babilonya. (Esek. 2:6) Kon waray isumat ni Esekiel an pahamangno han Dios ha mga tawo ngan kon namatay an usa nga maraot nga waray mapahamangnoi, hi Esekiel an may baratunon hito. Hi Jehova nagsiring ha iya: “An iya dugo akon susukton dida ha imo kamot.”—Esek. 3:17, 18.

 Hi Henryk nangalimbasog ha pagsubad han disposisyon ni Esekiel. Siring niya: “Karuyag ko nga waray ako baratunon ha dugo han ngatanan. Namimeligro an presyoso nga kinabuhi han mga tawo.” (Buh. 20:26, 27) Ito liwat an inabat ni Zbigniew, nga nagsiring: “Nagpadayon gud hi Esekiel anoman an ginhunahuna han iba. Nabulig ini ha akon nga tagdon an pagsangyaw sugad han pagtagad hito han Maglalarang.”

Diri Ka Nag-uusahan

Diri ka nag-uusahan kon nagsasangyaw ka. Sugad kan apostol Pablo, makakasiring liwat kita: ‘Mga kabulig kita han Dios ha pagbuhat.’ (1 Kor. 3:9) Hi Krystyna, nga usahay nasusubo, nagsiring: “Salit nanginginyupo ako pirme kan Jehova nga parig-unon ako. Diri gud niya ako ginpapabay-an.” Oo, ginkikinahanglan naton an bulig han espiritu han Dios ha aton pagsangyaw!—Sak. 4:6.

Kon nagsasangyaw kita, an baraan nga espiritu nabulig liwat ha aton nga ipakita an mga kalidad nga “bunga han espiritu.” (Gal. 5:22, 23) Ngan ito nga mga kalidad an nabulig ha aton basi makagpadayon ha pagsangyaw, anoman an mahitabo. Hi Henryk nagsiring: “Napapauswag an akon personalidad tungod ha pagsangyaw. Nagigin mapailubon ngan makonsiderasyon ako ngan diri dayon nawawad-an hin paglaom.” An pagpadayon ha pagsangyaw bisan pa han magkalain-lain nga problema makakabulig ha imo nga mas makultibar an bunga han espiritu.

Ginagamit ni Jehova an iya mga anghel ha paggiya hinin importante nga buruhaton. (Pah. 14:6) An Biblia nagsusumat nga may-ada “napulo ka yukot ka tag napulo ka yukot, ngan mga yukot han mga yukot” nga anghel. (Pah. 5:11) Ha paggiya ni Jesus, nabulig hira ha mga surugoon han Dios dinhi ha tuna. Ginhuhunahuna mo ba ito kon nagsasangyaw ka?

“An pamalandong nga kaupod naton an mga anghel ha pagsangyaw nagpaparig-on ha akon,” siring ni Anna. “Pinabibilhan ko an ira bulig pinaagi han pagmangno ni Jehova ngan ni Jesus.” Daku gud nga pribilehiyo nga makaupod ha buruhaton an magtinumanon nga anghel!

Kumusta man an mga igkasi-magwarali han Ginhadian? Bendisyon gud nga makaupod naton an damu nga magtinumanon nga Saksi. Sigurado nga naieksperyensyahan mo nga husto gud ini nga proberbio: “An puthaw nakakapatarom han puthaw: amo man an tawo makakapatarom han nawong han iya sangkay.”—Prob. 27:17.

An pagsangyaw kaupod han iba maopay nga higayon nga makita naton an epektibo nga mga paagi nga bangin bag-o ha aton. Hi Elżbieta nagsiring, “An pag-upod ha iba-iba nga magwarali ha pagsangyaw higayon nga naipapakita ko an gugma ha igkasi-tumuroo ngan ha mga tawo nga amon nakakaistorya.” Salit, pakig-upod ha iba-iba nga magwarali. Hito nga paagi magigin makaruruyag gud an imo pagsangyaw.

Atamana hin Maopay an Imo Kalugaringon

Basi pirme magin madasigon ha pagsangyaw, kinahanglan magplano kita hin maopay, magkaada hin regular nga eskedyol han personal nga pag-aram, ngan igo nga pagpahuway. Karuyag sidngon, kinahanglan mangnoan naton hin maopay an aton kalugaringon ha espirituwal ngan ha pisikal.

An Biblia nasiring: “An mga hunahuna han maduruto tipakadto la ha kahuraan.” (Prob. 21:5) Hi Zygmunt, nga 88 anyos na yana, nagsiring: “An pagkaada regular nga eskedyol ha pagsangyaw nabulig ha akon nga magin mabungahon. Ginbabahin-bahin ko hin maopay an akon oras basi magkaada igo nga panahon ha pagsangyaw.”

An hilarom nga kahibaro ha Kasuratan nagpaparig-on ngan nagsasangkap ha aton ha pagsangyaw. Sugad la nga kinahanglan kumaon kita basi magmakusog an aton lawas, kinahanglan regular nga kumaon kita han espirituwal nga pagkaon basi makagpadayon ha pagsangyaw. An pag-aram han Pulong han Dios kada adlaw nga hito nga paagi ‘nakakakaon kita ha igo nga panahon,’ magpapakusog ha aton ha pagsangyaw.—Mat. 24:45-47.

Ginbag-o ni Elżbieta an iya pagkinabuhi basi mapauswag an iya pagsangyaw. Siring niya:  “Gin-ibanan ko an oras han pagkinita ha telebisyon basi mas hilawig an akon oras ha pag-andam ha pagsangyaw. Kon nagbabasa ako han Biblia kada gab-i, ginhuhunahuna ko an mga tawo nga akon nakaistorya ha teritoryo. Nagbibiling ako hin mga teksto ngan artikulo nga makakabulig ha ira.”

An igo nga pagpahuway mabulig ha imo nga magpadayon nga madasigon ngan makigbahin hin bug-os ha pagsangyaw. Kondi, an sobra nga kaliawan mahimo makaapekto han imo pagkaepektibo ha buruhaton. Hi Andrzej, nga madasigon nga magwarali, nagsiring: “An kakulang hin pahuway nagriresulta hin duro nga kakapoy, ngan tungod hito masayon la mawara an kadasig. Nangangalimbasog gud ako nga malikyan ito.”—Ekles. 4:6.

Bisan pa han aton pangalimbasog, gutiay la an nakarawat han maopay nga sumat. Kondi, diri gud hingangalimtan ni Jehova an aton ginbubuhat. (Heb. 6:10) Bisan kon damu an diri nakikiistorya ha aton, bangin mag-iristorya hira mahitungod han aton pagbisita kon bumaya na kita. An epekto hito baga hin pariho ha aton mababasa mahitungod kan Esekiel: An mga tawo ‘mahibabaro nga may-ada usa nga manaragna dida ha ira.’ (Esek. 2:5) Oo, diri masayon an aton pagsangyaw, kondi nagpapahimulos kita ngan an iba nga namamati ha aton.

“An pagsangyaw nabulig ha aton nga mapauswag an personalidad ngan maipakita an gugma ha Dios ngan ha aton igkasi-tawo,” siring ni Zygmunt. “Daku nga pribilehiyo an pakigbahin hinin nagluluwas-kinabuhi nga buruhaton. Diri na gud ini mauutro ha sugad nga kahimtang,” siring liwat ni Andrzej. Makakarawat mo liwat an damu nga bendisyon kon magpapadayon ka ha pagsangyaw yana.—2 Kor. 4:1, 2.

[Mga Retrato ha pahina 31]

An pagmangno ha aton espirituwal ngan pisikal nga panginahanglan nabulig ha aton nga magpadayon ha pagsangyaw