Apresyara an Mas Harangdon nga Moises
Apresyara an Mas Harangdon nga Moises
“An Ginoo nga iyo Dios magtitindog [“magpapabangon,” NW] hin manaragna, sugad ha akon tikang ha iyo mga kabugtoan: kamo mamati ha iya.”—BUH. 3:22.
1. Paonan-o nabag-o ni Jesu-Kristo an kasaysayan?
DUHA ka yukot ka tuig na an naglabay, damu nga anghel ha langit an nagdayaw ha Dios tungod ha katawo han bata nga lalaki ngan hinbatian ito han pipira nga magbarantay han karnero. (Luk. 2:8-14) Paglabay hin trenta ka tuig, ito nga bata nagin adulto ngan nagtikang han iya tulo ngan tunga ka tuig nga ministeryo, nga nagbag-o gud han kasaysayan. An kilala nga historyador han ika-19 ka siglo nga hi Philip Schaff nakagsiring mahitungod hini nga batan-on: “Bisan kon waray hiya iginsurat, an iya ginbuhat ngan ginsiring nakaaghat ha damu nga parasurat hin libro, kanta, sermon, ngan paradebuho.” Ito nga bantogan nga batan-on amo hi Jesu-Kristo.
2. Ano an ginsiring ni apostol Juan mahitungod kan Jesus ngan ha Iya ministeryo?
2 Hi apostol Juan nagsurat mahitungod han ministeryo ni Jesus ngan ha konklusyon hito, hiya nagsiring: “Ha pagkamatuod, damu pa an iba nga ginbuhat ni Jesus, nga kon iginsurat ito hin detalyado, ha akon paghunahuna, diri maigo ha kalibotan an iginsurat nga linukot nga mga basahon.” (Juan 21:25, NW) Maaram hi Juan nga gutiay la nga bahin an iya maisusurat ha ngatanan nga ginsiring ngan ginbuhat ni Jesus durante hiton makatirigamnan nga tulo ngan tunga ka tuig. Kondi, importante gud an igin-asoy ni Juan ha iya Ebanghelyo.
3. Paonan-o naton masasabtan hin bug-os an responsabilidad ni Jesus ha katuyoan han Dios?
3 Labot la han asoy han upat nga importante nga Ebanghelyo, mababasa ha iba nga teksto ha Biblia an makaparig-on ha pagtoo nga impormasyon mahitungod han kinabuhi ni Jesus. Pananglitan, an asoy ha Biblia mahitungod han matinumanon nga kalalakin-an nga nabuhi antes kan Jesus nabulig ha aton nga masabtan hin bug-os an Iya responsabilidad ha katuyoan han Dios. Aton paghisgotan an pipira hini.
Matinumanon nga Kalalakin-an nga Nagpadagaw kan Kristo
4, 5. Hin-o an nagpadagaw kan Jesus, ngan paonan-o?
4 Hi Juan ngan an tulo pa nga nagsurat han Ebanghelyo nag-unabi kan Moises, David, ngan Salomon sugad nga kalalakin-an nga nagpadagaw kan Jesus, an Dinihogan ngan pinili han Dios nga Hadi. Ha ano nga paagi nagpadagaw kan Jesus ito nga mga surugoon han Dios hadto, ngan ano an aton hibabaroan mahitungod hini nga mga asoy?
5 Ha pag-unabi hin pipira, an Biblia nagsusumat ha aton nga hi Moises usa nga propeta, manlalaban, ngan paratalwas. Sugad liwat hito hi Jesus. Hi David magbarantay han karnero ngan hadi nga nagdaog kontra han mga kaaway han Israel. Magbarantay liwat hi Jesus ngan magdaraog nga hadi. (Esek. 37:24, 25) Han matinumanon pa hi Salomon, maaramon hiya nga magmarando, ngan ha iya paghadi mamurayawon gud an Israel. (1 Hadi 4:25, 29) Sugad man, pinakamaaramon hi Jesus ngan gintawag nga “Prinsipe ha Pagdait” o Kamurayawan. (Isa. 9:6) Matin-aw nga puropariho an responsabilidad ni Jesus hito nga kalalakin-an kondi labaw gud an Iya katungdanan ha katuyoan han Dios. Siyahan, aton itanding hi Jesus kan Moises ngan tigamni kon paonan-o an ira kaparihoan mabulig ha aton nga maapresyar hin bug-os an responsabilidad ni Jesus ha katuyoan han Dios.
Hi Moises—Nagpadagaw kan Jesus
6. Paonan-o iginsaysay ni apostol Pedro nga importante an pamati kan Jesus?
6 Waray pag-iha katapos han Pentekostes 33 K.P., gin-unabi ni apostol Pedro an tagna ni Moises nga natuman kan Jesu-Kristo. Natukdaw hi Pedro ha atubangan han mga Judio ha templo. ‘Nanhipausa’ gud hira han gintambal ni Pedro ngan ni Juan an makililimos nga piol tikang ha pagkabata, ngan karuyag hibaroan han mga tawo kon ano an nahitabo. Iginsaysay ni Pedro nga ini nga milagro nahimo pinaagi han baraan nga espiritu ni Jehova nga nagios pinaagi kan Jesu-Kristo. Katapos, ginkotar niya an Hebreo nga Kasuratan ngan nagsiring: “Hi Moises, matuod, siniring: An Ginoo nga iyo Dios magtitindog hin manaragna, sugad ha akon tikang ha iyo mga kabugtoan: kamo mamati ha iya ha ngatanan nga mga bagay, nga iya isinisiring ha iyo.”—Buh. 3:11, 22, 23; basaha an Deuteronomio 18:15, 18, 19.
7. Kay ano nga nasasabtan han mga namamati kan Pedro an iya ginsiring mahitungod han propeta nga mas harangdon kan Moises?
7 Ito nga mga pulong ni Moises pamilyar gud ha mga namamati kan Pedro. Sugad nga mga Judio, gintatahod nira hi Moises. (Deut. 34:10) Ginpapamulat gud nira an pag-abot han propeta nga mas harangdon kan Moises. Ito nga propeta diri la paratalwas sugad kan Moises, kondi an Mesias, an “Kristo, an Pinili” ni Jehova.—Luk. 23:35; Heb. 11:26.
Kaparihoan ni Jesus Ngan ni Moises
8. Ano an pipira nga kaparihoan ni Moises ngan ni Jesus?
8 Ha pipira nga paagi, magkapariho an tunan-on nga pagkinabuhi ni Jesus ngan ni Moises. Pananglitan, sugad nga minasus-an, waray hira mapatay han mabangis nga magmarando. (Eks. 1:22–2:10; Mat. 2:7-14) Dugang pa, pariho hira gintawag “tikang ha Ehipto.” Hi propeta Hosea nagsiring: “Han bata pa an Israel, hadto akon hiya hinigugma, ngan tinawag an akon anak tikang ha Ehipto.” (Hos. 11:1) Gin-uunabi ni Hosea an panahon han paggawas han mga Israelita ha Ehipto ha panguna han pinili han Dios nga lider nga hi Moises. (Eks. 4:22, 23; 12:29-37) Kondi, gin-uunabi liwat niya an tidaraon, diri la an panhitabo ha naglabay. An iya mga pulong usa nga tagna nga natuman han binalik tikang ha Ehipto hira Jose ngan Maria kaupod hi Jesus han mamatay hi Hadi Herodes.—Mat. 2:15, 19-23.
9. (a) Ano nga mga milagro an ginbuhat ni Moises ngan ni Jesus? (b) Pag-unabi hin iba pa nga kaparihoan ni Jesus ngan ni Moises. (Kitaa an kahon nga “Dugang nga Kaparihoan ni Jesus Ngan ni Moises,” ha pahina 26.)
9 Pariho nagbuhat hin mga milagro hi Moises ngan hi Jesus, nga nagpapamatuod nga binubuligan hira ni Jehova. Hi Moises an siyahan nga tawo nga nagbuhat hin milagro. (Eks. 4:1-9) Pananglitan, nagbuhat hiya hin milagro nga gamit an tubig. Ha iya sugo, nagin dugo an tubig han Nilo ngan han danaw hito, natunga an Dagat nga Pula, ngan binugwak an tubig ha bato ha disyerto. (Eks. 7:19-21; 14:21; 17:5-7) Nagbuhat liwat hi Jesus hin milagro nga gamit an tubig. An iya siyahan nga milagro amo an paghimo han tubig nga magin alaksiw ha panagtawo han kasal. (Juan 2:1-11) Ngan ginpalinaw niya an mabalud nga Dagat han Galilea. Ha usa nga higayon, naglakat pa ngani hiya ha tubig! (Mat. 8:23-27; 14:23-25) An iba nga kaparihoan ni Moises ngan ni Jesus, an mas Harangdon nga Moises, makikita ha kahon ha pahina 26.
Apresyara hi Kristo Sugad nga Propeta
10. Ano an tinuod nga propeta, ngan kay ano nga usa hito hi Moises?
10 Ginhuhunahuna han kadam-an nga an propeta nananagna han tidaraon, kondi bahin la ito han iya responsabilidad. An tinuod nga propeta tagapagyakan ni Jehova, ngan nagpapasamwak han “urusahon nga mga buhat han Dios.” (Buh. 2:11, 16, 17) An iya tagna mahimo mag-upod han pagpahibaro han mahitatabo ha tidaraon, pagsumat han katuyoan ni Jehova, o pagpasamwak han Iya paghukom. Sugad hito hi Moises. Igintagna niya an tagsa han Napulo nga Peste nga nahitabo ha Ehipto. Iginsumat niya ha mga Israelita an Balaud nga kauyonan ha Sinai. Ngan iya gintutdoan an nasud han kaburut-on han Dios. Kondi, may-ada pa maabot nga propeta nga mas harangdon kan Moises.
11. Paonan-o gintuman ni Jesus an responsabilidad sugad nga propeta nga mas harangdon kan Moises?
11 Ha siyahan nga siglo, hi Sakarias ginios sugad nga propeta han iginpahayag niya an katuyoan han Dios mahitungod han iya anak nga hi Juan. (Luk. 1:76) An iya anak nagin hi Juan nga Parabaptis, nga nagpahibaro han pag-abot han maiha na nga ginpapamulat nga propeta nga mas harangdon kan Moises—hi Jesu-Kristo. (Juan 1:23-36) Sugad nga propeta, damu an igintagna ni Jesus. Pananglitan, iginsumat niya an iya kamatayon, igintagna kon paonan-o ngan diin hiya mamamatay, ngan kon hin-o an mapatay ha iya. (Mat. 20:17-19) Diri makatoo an iya mamarati han igintagna liwat niya nga mabubungkag an Jerusalem ngan an templo hito. (Mar. 13:1, 2) Nagpapadayon an iya mga tagna tubtob yana.—Mat. 24:3-41.
12. (a) Paonan-o gintikangan ni Jesus an bug-os-kalibotan nga pagsangyaw? (b) Kay ano nga ginsusunod naton yana an susbaranan ni Jesus?
12 Labot pa ha pagin propeta, parawali ngan magturutdo hi Jesus. Iginwali niya an maopay nga sumat han Ginhadian han Dios, ngan mas maisugon nga nagyakan kay ha iba. (Luk. 4:16-21, 43) Hiya an pinakabantogan nga magturutdo. “Waray pa tawo nga nagyakan sugad hini,” siring han mga nakabati ha iya. (Juan 7:46) Madasigon hi Jesus ha pagpasamwak han maopay nga sumat, ngan naaghat niya an iya mga sumurunod nga magin madasigon liwat. Hito nga paagi, gintikangan niya an bug-os-kalibotan nga pagsangyaw ngan pagtutdo nga nagpapadayon tubtob yana. (Mat. 28:18-20; Buh. 5:42) Ha naglabay nga tuig, mga pito ka milyon nga sumurunod ni Kristo an naggamit hin 1,500,000,000 ka oras ha pagsangyaw ngan pagtutdo han kamatuoran han Biblia. Nakikigbahin ka gud ba hito nga buruhaton?
13. Ano an nabulig ha aton nga magpabilin nga ‘nag-aagma’?
13 Gintuman gud ni Jehova an tagna nga magpapabangon hiya hin propeta nga pariho kan Moises. Paonan-o ito nakakaapekto ha imo? Mas napaparig-on ba hito an imo pagsarig nga matutuman an mga tagna may kalabotan ha aton tidaraon? Oo, an pamalandong ha susbaranan han mas Harangdon nga Moises nabulig ha aton nga “mag-agma” ngan magkaada maopay nga panhunahuna ha pagbubuhaton han Dios ha diri na mag-iiha.—1 Tes. 5:2, 6.
Apresyara hi Kristo Sugad nga Manlalaban
14. Paonan-o hi Moises an manlalaban butnga han mga Israelita ngan han Dios?
14 Pariho kan Moises, hi Jesus usa nga manlalaban. Hi Moises an manlalaban han Balaud nga kauyonan butnga ni Jehova ngan han mga Israelita. Kon an mga anak ni Jakob sinugot ha balaud han Dios, magpapabilin hira nga espesyal nga panag-iya han Dios, an iya kongregasyon. (Eks. 19:3-8) Ito nga kauyonan nagtikang han 1513 A.K.P. tubtob han siyahan nga siglo K.P.
15. Paonan-o hi Jesus an mas hitaas nga manlalaban?
15 Han 33 K.P., gintikangan ni Jehova an mas maopay nga kauyonan ha bag-o nga Israel, ‘an Israel han Dios,’ nga nagin bug-os-kalibotan nga kongregasyon han dinihogan nga mga Kristiano. (Gal. 6:16) Samtang an kauyonan nga hi Moises an manlalaban nag-upod han mga balaud nga iginsurat han Dios ha bato, an kauyoan nga hi Jesus an manlalaban mas hitaas tungod kay iginsurat ito han Dios ha kasingkasing han tawo. (Basaha an 1 Timoteo 2:5; Hebreo 8:10.) Salit, ‘an Israel han Dios’ amo na yana an espesyal nga panag-iya han Dios, ‘an nasud nga naghahatag han bunga’ han Mesianiko nga Ginhadian. (Mat. 21:43) An mga membro hito nga espirituwal nga nasud kaapi han bag-o nga kauyonan. Kondi, diri la hira an magpapahimulos hito. Diri maihap nga mga tawo, upod na an damu nga nagkamatay, an makarawat hin waray kataposan nga mga bendisyon tungod hiton mas maopay nga kauyonan.
Apresyara hi Kristo Sugad nga Paratalwas
16. (a) Ha ano nga paagi gin-gamit ni Jehova hi Moises ha pagtalwas han Israel? (b) Sumala ha Eksodo 14:13, hin-o an Surok han kaluwasan?
16 Ha ultimo nga gab-i antes han Pagbaya han mga Israelita, nameligro gud an iba han ira mga anak. Diri mag-iiha, malabay an anghel han Dios ha Ehipto, ha pagpatay han ngatanan nga suhag. Ginsumatan ni Jehova hi Moises nga matatalwas an suhag han mga Israelita kon kumuha hira hin dugo han karnero han Paskua ngan ipahid ito ha igbaw ngan ha poste han ira mga purtahan. (Eks. 12:1-13, 21-23) Salit ito an nahitabo. Ha urhi, nameligro na liwat an nasud han Israel. Waray na hira mapapalagiwan butnga han Dagat nga Pula ngan han naglalanat nga kasundalohan han Ehipto. Gintalwas utro ni Jehova an Israel pinaagi kan Moises, nga milagroso nga nagbahin han dagat.—Eks. 14:13, 21.
17, 18. Ha ano nga paagi mas harangdon hi Jesus kan Moises sugad nga paratalwas?
17 Makatirigamnan ito nga pagtalwas, kondi mas makatirigamnan gud an ginbuhat ni Jehova pinaagi kan Jesus. Pinaagi ha iya an mga masinugtanon matatalwas tikang ha pagkauripon ha sala. (Roma 5:12, 18) Ngan ito nga katalwasan amo an “waray kataposan nga pagtubos.” (Heb. 9:11, 12) An ngaran nga Jesus nangangahulogan nga “Hi Jehova an Kaluwasan.” Hi Jesus, sugad nga aton Paratalwas, diri la magtatalwas ha aton tikang ha naglabay nga mga sala kondi naghahatag liwat ha aton hin higayon nga makapahimulos hin mas maopay nga tidaraon. Pinaagi han pagtalwas ha aton tikang ha pagkauripon ha sala, napapanalipdan kita ni Jesus tikang ha kasina han Dios ngan nagkakaada hin maopay nga relasyon kan Jehova.—Mat. 1:21.
18 An katalwas tikang ha sala pinaagi kan Jesus mag-uupod han kagawasan tikang ha magraot nga epekto hito—sakit ngan kamatayon. Basi mahanduraw ito, tagda an nahitabo han kinadto hi Jesus ha balay ni Jairo, nga namatayan han iya 12-anyos nga anak nga daragita. Iya ginpasarig hi Jairo: “Ayaw kahadlok; tumoo ka la; ngan hiya maluluwas.” (Luk. 8:41, 42, 49, 50) Sugad han iya ginsiring, nabanhaw an daragita! Nahahanduraw mo ba an kalipay han mga kag-anak han daragita? Kon sugad, mahahanduraw mo an aton daku nga kalipay kon ‘an ngatanan nga aadto ha lubnganan, makakabati han tingog ni Jesus ngan manggogowa’ ha pagkabanhaw. (Juan 5:28, 29) Oo, hi Jesus an Manluluwas, an aton Paratalwas!—Basaha an Buhat 5:31; Tito 1:4; Pah. 7:10.
19, 20. (a) Paonan-o nakakaapekto ha aton an pamalandong ha responsabilidad ni Jesus sugad nga mas Harangdon nga Moises? (b) Ano an paghihisgotan ha masunod nga artikulo?
19 Tungod kay maaram kita nga mabubuligan naton an mga tawo nga magpahimulos han pagtalwas ni Jesus, napapagios kita nga magsangyaw ngan magtutdo. (Isa. 61:1-3) Dugang pa, an pamalandong ha responsabilidad ni Jesus sugad nga mas Harangdon nga Moises nagpaparig-on han aton pagsarig nga tatalwason niya an iya mga sumurunod kon hukman na an magraot.—Mat. 25:31-34, 41, 46; Pah. 7:9, 14.
20 Oo, hi Jesus an mas Harangdon nga Moises. Damu an iya urusahon nga ginbuhat nga diri gud akos buhaton ni Moises. An mga pulong ni Jesus sugad nga propeta ngan an iya mga buhat sugad nga manlalaban nakakaapekto ha ngatanan nga katawohan. Sugad nga Paratalwas, diri la temporaryo kondi waray kataposan an igintatagana ni Jesus nga katalwasan ha katawohan. Kondi, damu pa an aton hibabaroan mahitungod kan Jesus tikang ha matinumanon nga kalalakin-an hadto. Paghihisgotan ha masunod nga artikulo kon paonan-o hi Jesus mas Harangdon nga David ngan Salomon.
Maisasaysay Mo Ba?
Paonan-o hi Jesus mas harangdon kan Moises sugad nga
• propeta?
• manlalaban?
• paratalwas?
[Mga Pakiana]
[Kahon/Retrato ha pahina 26]
Dugang nga Kaparihoan ni Jesus Ngan ni Moises
◻ Ginbayaan an hitaas nga katungdanan basi mag-alagad kan Jehova ngan ha iya katawohan.—2 Kor. 8:9; Fil. 2:5-8; Heb. 11:24-26.
◻ Ginpili ni Jehova.—Mar. 14:61, 62; Juan 4:25, 26; Heb. 11:26.
◻ Nagrepresentar han ngaran ni Jehova.—Eks. 3:13-16; Juan 5:43; 17:4, 6, 26.
◻ Maaghop.—Num. 12:3; Mat. 11:28-30.
◻ Nagpakaon hin damu nga tawo.—Eks. 16:12; Juan 6:48-51.
◻ Hukom ngan parahatag hin balaud.—Eks. 18:13; Mal. 4:4; Juan 5:22, 23; 15:10.
◻ Gintaporan sugad nga pangulo ha balay han Dios.—Num. 12:7; Heb. 3:2-6.
◻ Iginhulagway nga magtinumanon nga saksi ni Jehova.—Heb. 11:24-29; 12:1; Pah. 1:5.
◻ Han mamatay, ginkuha han Dios an ira lawas.—Deut. 34:5, 6; Luk. 24:1-3; Buh. 2:31; 1 Kor. 15:50; Jud. 9.