Apresyara hi Jesus—An Mas Harangdon nga David Ngan Salomon
Apresyara hi Jesus—An Mas Harangdon nga David Ngan Salomon
“Kitaa, durodaku pa kan Salomon an hahani.”—MAT. 12:42.
1, 2. Ha panhunahuna han tawo, kay ano nga urusahon an pagsugoa kan Samuel nga dihogan hi David sugad nga hadi?
PARA kan propeta Samuel, hi David mas naangay nga magbarantay han mga karnero kay ha magin hadi. Dugang pa, diri kilala an iya natawohan nga bungto, an Betlehem. Iginhulagway ito sugad nga “gutiay nga nahisasakot ha mga yukot han Juda.” (Mika 5:2) Kondi, inin diri-kilala nga batan-on tikang ha gutiay nga bungto didihogan na ni Samuel sugad nga tidaraon nga hadi han Israel.
2 An batan-on nga hi David diri amo an suhag nga anak nga iginpresenta han iya amay nga hi Jesse kan Samuel basi dihogan, ngan diri liwat hiya an ikaduha o ikatulo. Hi David, nga putó ha walo nga anak ni Jesse, waray ngani didto ha ira balay han inabot hi Samuel basi dihogan sugad nga masunod nga hadi han Israel an usa han mga anak hiton matinumanon nga tawo. Kondi hi David an ginpili ni Jehova, ngan ito an importante.—1 Sam. 16:1-10.
3. (a) Ano an pinakaimportante kan Jehova kon gin-uusisa niya an usa nga tawo? (b) Ano an nahitabo katapos dihogan hi David?
3 Nakita ni Jehova an waray makita ni Samuel. Nababasa han Dios an kasingkasing ni David, ngan nakalipay ito ha iya. Ha Dios, diri importante an hitsura, kondi kon ano gud an pagkatawo. (Basaha an 1 Samuel 16:7.) Salit han nasantop ni Samuel nga waray napili hi Jehova ha pito nga mas magurang nga mga anak ni Jesse, naghangyo hiya nga paulion an putó tikang ha sarabsaban. An asoy nasiring: “[Hi Jesse] nagsugo, ngan ipinadara [hi David] ngada. Yana hiya gimula, ngan matahom an panagway, ngan makaruruyag pagkit-on. Ngan hi Jehova nagsiring: Buhat, dihugi hiya; kay amo hiya. Dida hito kinuha hi Samuel han sungay nga may lana, ngan dihogan hiya ha butnga han iya kabugtoan: ngan an espiritu ni Jehova kinada nga makusganon kan David tikang hadto nga adlaw ngan ha tiarabot pa.”—1 Sam. 16:12, 13.
Hi David Nagpadagaw kan Kristo
4, 5. (a) Isaysay an pipira nga kaparihoan ni David ngan ni Jesus. (b) Kay ano nga matatawag hi Jesus nga Mas Harangdon nga David?
4 Pariho kan David, hi Jesus natawo ha Betlehem, mga 1,100 ka tuig katapos matawo hi David. Para ha mga tawo, hi Jesus diri liwat angay magin hadi. Karuyag sidngon, diri hiya an klase hin hadi nga ginlalaoman han damu ha Israel. Kondi, pariho kan David, hi Jesus pinili ngan hinigugma ni Jehova. a (Luk. 3:22) Sugad man, “an espiritu ni Jehova kinada” kan Jesus.
5 Damu pa an kaparihoan ni David ngan ni Jesus. Pananglitan, nagtraydor kan David an iya magsaragdon nga hi Ahitopel, ngan nagtraydor liwat kan Jesus an iya apostol nga hi Judas Iskariote. (Sal. 41:9; Juan 13:18) Hinigugma gud ni David ngan ni Jesus an lugar ha pagsingba kan Jehova. (Sal. 27:4; 69:9; Juan 2:17) Hi Jesus manurunod liwat ni David. Antes matawo hi Jesus, an anghel nagsumat ha iroy niya: “An Ginoo nga Dios mahatag ha iya han lingkoran nga hadianon ni David, nga iya amay.” (Luk. 1:32; Mat. 1:1) Kondi, tungod kay an ngatanan nga saad may kalabotan ha Mesias matutuman kan Jesus, labaw gud hiya kan David. Hiya an Mas Harangdon nga David, an Mesianiko nga Hadi nga maiha na nga ginpapamulat.—Juan 7:42.
Sunda an Magbarantay Nga Hadi
6. Ha ano nga mga paagi maopay nga magbarantay hi David?
6 Magbarantay liwat hi Jesus. Ano an mga kalidad han maopay nga magbarantay? Matinumanon ngan maisugon hiya nga nagmamangno, nagpapakaon, ngan nagbabantay ha iya panon. (Sal. 23:2-4) Sugad nga batan-on, magbarantay hi David, ngan ginmangnoan niya hin maopay an kakarnerohan han iya amay. Maisugon hiya han nameligro an panon ngan iginbutang ha peligro an iya kinabuhi basi panalipdan an mga karnero tikang ha leon ngan oso.—1 Sam. 17:34, 35.
7. (a) Ano an nag-andam kan David ha iya mga buruhaton sugad nga hadi? (b) Paonan-o ginpamatud-an ni Jesus nga hiya an Maopay nga Magbarantay?
7 An pagmangno ni David hin kakarnerohan ha kapatagan ngan kabungtoran ha sulod hin mga katuigan nag-andam ha iya ha magbug-at nga buruhaton ngan responsabilidad ha pagmangno ha nasud han Israel. b (Sal. 78:70, 71) Hi Jesus liwat susbaranan nga magbarantay. Ginpapakusog ngan ginigiyahan hiya ni Jehova samtang iya ginmamangnoan an iya “gutiay nga panon” ngan an ‘iba nga mga karnero.’ (Luk. 12:32; Juan 10:16) Hito nga paagi ginpapamatud-an ni Jesus nga hiya an Maopay nga Magbarantay. Kilala gud niya an iya panon salit tinatawag niya an tagsa ha ngaran. Hinigugma gud niya an iya mga karnero salit han nakanhi hiya ha tuna kinaburut-on nga nagsakripisyo hiya para ha ira. (Juan 10:3, 11, 14, 15) Sugad nga Maopay nga Magbarantay, ginbubuhat ni Jesus an diri akos buhaton ni David. An iya halad lukat naghatag hin higayon ha katawohan nga matalwas tikang ha kamatayon. Waray makakapugong ha iya ha pagtugway han iya “gutiay nga panon” ngadto ha diri-mamaratyon nga kinabuhi ha langit ngan han ‘iba nga mga karnero’ ngadto ha kinabuhi nga waray kataposan ha matadong ngan bag-o nga kalibotan diin waray na sugad-lobo nga mga tawo.—Basaha an Juan 10:27-29.
Sunda an Magdaraog nga Hadi
8. Kay ano nga masisiring naton nga magdaraog nga hadi hi David?
8 Sugad nga hadi, maisugon nga girriro hi David nga nagpanalipod ha tuna nga gin-uukyan han katawohan han Dios, ngan gintatalwas ‘ni Jehova hi David bisan diin hiya kumadto.’ Ha panguna ni David, napahaluag an mga giutan han nasud tikang ha salog han Ehipto tubtob ha Salog Euprates. (2 Sam. 8:1-14) Pinaagi han gahum ni Jehova, nagin gamhanan hinduro nga magmarando hi David. An Biblia nasiring: “An bantog ni David ginawas ngadto ha ngatanan nga tuna; ngan gindara ni Jehova an kahadlok ha iya ngada ha ngatanan nga nasud.”—1 Kron. 14:17.
9. Isaysay kon paonan-o hi Jesus magdaraog sugad nga Pinili nga Hadi.
9 Pariho kan Hadi David, maisugon hi Jesus han nakanhi hiya ha tuna. Sugad nga Pinili nga Hadi, iya iginpakita an iya awtoridad ha mga demonyo ngan gintalwas an mga biktima tikang ha ira impluwensya. (Mar. 5:2, 6-13; Luk. 4:36) Bisan an punoan nga kaaway, hi Satanas nga Yawa, waray makaimpluwensya kan Jesus. Pinaagi han bulig ni Jehova, gindaog niya an kalibotan nga kontrolado ni Satanas.—Juan 14:30; 16:33; 1 Juan 5:19.
10, 11. Ano an responsabilidad ni Jesus sugad nga Girriro nga Hadi ha langit?
10 Mga 60 ka tuig tikang han kan Jesus kamatay, pagkabanhaw, ngan pagsaka ha langit , hi apostol Juan nakakarawat hin bisyon mahitungod kan Jesus ha Iya responsabilidad sugad nga Girriro nga Hadi ha langit. Hi Juan nagsurat: “Akon hinkit-an, ngan kitaa, an usa nga mabusag nga kabayo, ngan an nangangabayo may-ada pana; ngan tinagan hiya hin usa nga pudong-pudong: ngan hiya linakat nga nananaog, ngan ha pagdaog.” (Pah. 6:2) Hi Jesus an sakay han busag nga kabayo. “Tinagan hiya hin usa nga pudong-pudong” o korona han nahitrono hiya sugad nga Hadi ha langit han 1914. Katapos hito, “hiya linakat nga nananaog.” Oo, pariho kan David, magdaraog nga hadi hi Jesus. Waray pag-iha katapos magin Hadi hi Jesus, ginpirde niya hi Satanas ngan ginlabog hiya ngan an iya mga demonyo ha tuna. (Pah. 12:7-9) Magpapadayon hiya tubtob nga matapos an iya “pagdaog,” ha pagbungkag ha maraot nga sistema ni Satanas.—Basaha an Pahayag 19:11, 19-21.
11 Kondi, pariho kan David, mapinairon nga hadi hi Jesus, ngan pananalipdan niya an ‘daku nga panon’ ha Armagedon. (Pah. 7:9, 14) Dugang pa, ha pagmando ni Jesus upod an binanhaw nga 144,000 nga iya mga igkasi-manurunod, magkakaada hin ‘pagkabanhaw han magtadong ngan diri-magtadong.’ (Buh. 24:15) Adton babanhawon ha tuna may-ada paglaom nga mabuhi ha waray kataposan. Makaruruyag gud ito nga tidaraon! Hinaot magin determinado kita ngatanan nga magpadayon ha ‘pagbuhat hin maopay’ basi buhi kita kon an tuna mapuno na hin magtadong ngan maglipayon nga sakop han Mas Harangdon nga David.—Sal. 37:27-29.
Ginbaton an Pag-ampo ni Salomon nga Tagan hin Kinaadman
12. Ano an igin-ampo ni Salomon?
12 An anak ni David nga hi Salomon nagpadagaw liwat kan Jesus. c Han nagin hadi hi Salomon, hi Jehova nagpakita ha iya ha inop ngan nagsiring nga ihahatag Niya an bisan ano nga iya pangaroon. Mahimo unta hiya mangaro hin dugang nga bahandi, gahum, o hilawig nga kinabuhi. Lugod, naghangyo hiya kan Jehova: “Tagi ako yana hin kinaadman ngan hin hibaro, nga ako makahimo paggawas ngan pagsakob ha atubangan hini nga katawohan: kay hin-o an makahimo paghukom hini nga imo katawohan, nga sugad kadaku?” (2 Kron. 1:7-10) Ginbaton ni Jehova an pag-ampo ni Salomon.—Basaha an 2 Kronikas 1:11, 12.
13. Kay ano nga waray kapariho an kinaadman ni Salomon, ngan hin-o an Surok hito?
13 Han hi Salomon nagpapabilin pa nga matinumanon kan Jehova, an iya kinaadman waray gud matupngi han iya mga kadungan-dungan. Hi Salomon nagyakan hin ‘tulo ka yukot nga sambingay.’ (1 Hadi 4:30, 32, 34) Damu hini an iginsurat ngan pinabibilhan pa gihapon hadton namimiling hin kinaadman. An rayna han Sheba nagbiyahe hin mga 2,400 kilometro basi sarihan an kinaadman ni Salomon pinaagi hin “magkuri nga mga pakiana.” Gindayaw niya an kinaadman ni Salomon ngan an kauswagan han iya ginhadian. (1 Hadi 10:1-9) Iginpakilala ha Biblia an Surok han kinaadman ni Salomon, nasiring: ‘An bug-os nga tuna naninguha pagkada ha atubangan ni Salomon, ha pagpamati han iya kinaadman, nga kanan Dios iginbutang ha iya kasingkasing.’—1 Hadi 10:24.
Sunda an Maaramon nga Hadi
14. Ha ano nga mga paagi hi Jesus “durodaku pa kan Salomon”?
14 Usa la nga tawo an linabaw kan Salomon ha kinaadman. Hiya amo hi Jesu-Kristo, nga nagpakilala sugad nga “durodaku pa kan Salomon.” (Mat. 12:42) Hi Jesus nagyakan hin “mga pulong han kinabuhi nga waray kataposan.” (Juan 6:68) Pananglitan, ha Sermon ha Bukid nagtutdo hiya hin damu nga prinsipyo nga nagpapatin-aw han mga sambingay ni Salomon. Iginsaysay ni Salomon an pipira nga paagi nga magigin malipayon an mga magsiringba ni Jehova. (Prob. 3:13; 8:32, 33; 14:21; 16:20) Ginpabug-atan ni Jesus nga an tinuod nga kalipay nagtitikang ha mga butang nga may kalabotan ha pagsingba kan Jehova ngan ha katumanan han Iya mga saad. Hi Jesus nagsiring: “Malipayon adton mahunahunaon han ira espirituwal nga panginahanglan, tungod kay ira an ginhadian han langit.” (Mat. 5:3, NW) Adton nagsusunod han prinsipyo ha mga katutdoan ni Jesus mas nagigin duok kan Jehova, “an burabod han kinabuhi.” (Sal. 36:9; Prob. 22:11; Mat. 5:8) Hi Kristo an personipikasyon han “kaaram han Dios.” (1 Kor. 1:24, 30) Sugad nga Mesianiko nga Hadi, hiya may-ada han “espiritu han kinaadman.”—Isa. 11:2.
15. Paonan-o kita makakapahimulos ha kinaadman tikang ha Dios?
15 Sugad nga mga sumurunod han Mas Harangdon nga Salomon, paonan-o kita makakapahimulos han kinaadman tikang ha Dios? Tungod kay an kinaadman ni Jehova aada ha iya Pulong, kinahanglan mangalimbasog kita nga pamilngon ito pinaagi ha pag-aram hin maopay han Biblia, labi na han mga pulong ni Jesus, ngan pagpamalandong hito. (Prob. 2:1-5) Dugang pa, kinahanglan padayon nga mag-ampo kita ha Dios para hin kinaadman. An iya Pulong nagpapasarig ha aton nga babatunon an aton sinsero nga mga pag-ampo para hin bulig. (Jak. 1:5) Ha bulig han baraan nga espiritu, mahibabaroan naton an presyoso nga kinaadman ha Pulong han Dios nga makakabulig ha aton ha paglampos han mga problema ngan ha paghimo hin maaramon nga desisyon. (Luk. 11:13) Hi Salomon gintawag liwat nga “paragtirok” nga “padayon nga nagtutdo hin kinaadman ha mga tawo.” (Ekles. 12:9, 10; NW) Hi Jesus, sugad nga Ulo han Kristiano nga kongregasyon, paragtirok liwat han iya katawohan. (Juan 10:16; Kol. 1:18) Salit, importante nga tumambong kita ha mga katirok, diin ‘padayon nga gintututdoan kita.’
16. Ano an kaparihoan ni Salomon ngan ni Jesus?
16 Damu an nahimo ni Salomon sugad nga hadi. Nag-organisa hiya hin programa han pagpanukod ha bug-os nga nasud, nanguna ha paghimo hin mga palasyo, kalsada, burutangan hin tubig, syudad nga tiripigan, syudad para ha mga karomata, ngan syudad para ha mga mangangabayo. (1 Hadi 9:17-19) Nakapahimulos gud an bug-os nga ginhadian ha iya mga gintukod. Hi Jesus liwat usa nga magturukod. Iya gintukod an iya kongregasyon ha “bato.” (Mat. 16:18) Mangunguna liwat hiya ha pagpanukod ha bag-o nga kalibotan.—Isa. 65:21, 22.
Sunda an Hadi han Kamurayawan
17. (a) Kay ano nga maopay gud an pagmando ni Salomon? (b) Ano an diri mahihimo ni Salomon?
17 An ngaran nga Salomon tikang ha pulong nga nangangahulogan hin “kamurayawan.” Hi Hadi Salomon nagmando ha Jerusalem, nga an ngaran hito nangangahulogan hin “Pagkaada hin Doble nga Kamurayawan.” Waray-kapariho an kamurayawan ha Israel ha sulod han 40 ka tuig nga iya pagmando. An Biblia nagsusumat may kalabotan hito nga mga tuig: “An Juda ngan an Israel nag-ukoy ha waray kataragman, an tagsa ka tawo ha sirong han iya balagon ngan ha sirong han iya kahoy nga igera, tikang ha Dan bisan ngadto ha Beer-seba, ha ngatanan nga mga adlaw ni Salomon.” (1 Hadi 4:25) Kondi bisan pa han daku nga kinaadman ni Salomon, waray gud hiya kapas nga wad-on an sakit, sala, ngan kamatayon han iya nasasakopan. An Mas Harangdon nga Salomon makakagwara hito ngatanan.—Basaha an Roma 8:19-21.
18. Ha kongregasyon, ano an aton napapahimulosan?
18 Yana pa la ha Kristiano nga kongregasyon, may-ada na kamurayawan. Oo, nagpapahimulos kita hin tinuod nga espirituwal nga paraiso. May-ada kita mamurayawon nga relasyon ha Diyos ngan ha aton igkasi-tawo. Tigamni an igintagna ni Isaias mahitungod han mga bendisyon nga aton napapahimulosan yana: “Ira pamamandayon an ira mga kampilan nga mga punta hin arado, ngan an ira mga bangkaw nga mga garab nga ipangarapon; an nasud diri na mabikyaw han kampilan patok ha nasud, diri na man nira mababatasan an away.” (Isa. 2:3, 4) Kon nagpapagiya kita ha espiritu han Dios, makakadugang kita hini nga kamurayawan.
19, 20. Ano an mga hinungdan han aton pagkalipay?
19 Kondi, magigin mas maopay pa gud an tidaraon. Samtang an masinugtanon nga katawohan nagpapahimulos hin waray kapariho nga kamurayawan ilarom han pagmando ni Jesus, hinay-hinay hira nga “magkakaluwas tikang ha pagkauripon han pagkamadinunuton” tubtob nga magin hingpit hira. (Roma 8:21) Katapos nga malamposan an ultimo nga pagsari ha kataposan han Usa ka Yukot ka Tuig nga Pagmando, “an maaghop makakapanunod han tuna, ngan maglilipay hira tungod han kahuraan han kamurayaw.” (Sal. 37:11; Pah. 20:7-10) Oo, malalabwan gud han pagmando ni Kristo Jesus an pagmando ni Salomon ha mga paagi nga diri gud naton mahahanduraw!
20 Sugad la nga an Israel nalipay ha panguna nira Moises, David, ngan Salomon, mas malilipay gud kita ha pagmando ni Kristo. (1 Hadi 8:66) Daku an aton pagpasalamat kan Jehova ha pagpakanhi han iya bugtong nga Anak—an Mas Harangdon nga Moises, David, ngan Salomon!
[Mga footnote]
a An ngaran nga David posible nga nangangahulogan hin “Hinigugma.” Ha bawtismo ngan transpigurasyon ni Jesus, hi Jehova nagyakan tikang ha langit nga nagtatawag ha iya nga “akon hinigugma nga Anak.”—Mat. 3:17; 17:5.
b Hi David nagin pariho liwat hin nati nga karnero nga nasarig ha iya magbarantay. Sinarig hiya ha Harangdon nga Magbarantay, hi Jehova, para ha panalipod ngan giya. Hiya nagsiring nga may bug-os nga pagsarig: ‘Hi Jehova amo an akon magbarantay; waray makukulang ha akon.’ (Sal. 23:1) Iginpakilala ni Juan nga Parabaptis hi Jesus sugad nga “an Karnero han Dios.”—Juan 1:29.
c Makapainteres nga an ikaduha nga ngaran ni Salomon nga Jedidia nangangahulogan hin “Hinigugma ni Jehova.”—2 Sam. 12:24, 25.
Maisasaysay Mo Ba?
• Ha ano nga paagi hi Jesus an Mas Harangdon nga David?
• Ha ano nga paagi hi Jesus an Mas Harangdon nga Salomon?
• Kay ano nga inaapresyar mo hi Jesus, an Mas Harangdon nga David ngan Salomon?
[Mga Pakiana]
[Retrato ha pahina 31]
An kinaadman nga iginhatag han Dios kan Salomon nagpadagaw ha kinaadman han Mas Harangdon nga Salomon
[Retrato ha pahina 32]
Malalabwan gud han pagmando ni Jesus an pagmando ni Salomon ngan David ha paagi nga diri gud naton mahahanduraw!