Mahimo Ka ba Bumalhin ha Lugar nga Mas Daku an Panginahanglan hin Magwarali?

“Komportable an amon kinabuhi ha Estados Unidos, kondi nabaraka kami nga bangin maimpluwensyahan kami ngan an amon duha nga anak han materyalistiko nga pagkinabuhi didto. Ako ngan an akon asawa mga misyonero hadto, ngan karuyag namon maeksperyensyahan utro iton simple kondi malipayon nga pagkinabuhi.”

TUNGOD kay naaghat hito nga hingyap, han 1991 nagsurat hira Ralph ngan Pam ha pipira nga sanga nga opisina basi isumat an ira hingyap ha pagboluntaryo ha lugar nga mas daku an panginahanglan hin magwarali. Nagbalos an sanga nga opisina han Mexico nga may-ada daku nga panginahanglan didto hin magwarali nga makakagsangyaw ha mga tawo nga Ingles an yinaknan. Ha pagkamatuod, ito nga teritoryo, siring han sanga nga opisina, ‘mabusag na ha pagbari.’ (Juan 4:35) Waray pag-iha, ginkarawat nira Ralph ngan Pam, ngan han ira mga anak—hito nga panahon 8 ngan 12 anyos an pangidaron—an imbitasyon, ngan nangandam ha pagbalhin.

Haluag nga Teritoryo

Hi Ralph nagsumat: “Antes kami bumaya ha Estados Unidos, may kabugtoan nga nababaraka para ha amon an nagsiring: ‘Peligroso hinduro an pagbalhin ha iba nga nasud!’ ‘Ano an iyo bubuhaton kon magkasakit kamo?’ ‘Kay ano nga mabalhin pa kamo ha iba nga teritoryo basi mamiling hin masasangyawan nga Ingles an yinaknan? An sugad nga mga tawo didto diri magkakainteres ha kamatuoran!’ Kondi, disidido na kami bumalhin. Tutal, ini nga desisyon maiha na nga ginturotimbang namon. Ginplinano na namon ito ha sulod hin damu katuig. Ginlikyan ngani namon an pangutang nga maiha an pagbinayad, nagtirok hin kwarta, ngan sugad nga pamilya, makadamu namon pag-iristoryahi an mga problema nga posible atubangon didto.”

Ginbisita anay ni Ralph ngan han iya pamilya an sanga nga opisina han Mexico. Didto, iginpakita ha ira an mapa han bug-os nga nasud ngan siniring: “Ini an iyo teritoryo!” Nag-ukoy hira ha San Miguel de Allende—usa nga syudad nga nahimumutang mga 240 kilometro ha norte-weste han Mexico City—diin damu an langyawanon. Paglabay hin tulo ka tuig tikang han ira pag-abot, naestablisar didto an kongregasyon nga Ingles an ginagamit nga pinulongan, ngan may 19 nga magwarali. Ito an siyahan nga kongregasyon ha Mexico nga ginamit hin Ingles, kondi damu pa an buruhaton.

Ginbabanabana nga may usa ka milyon nga tuminungnong han Estados Unidos nga nag-uukoy  ha Mexico. Dugang pa, damu an propesyonal ngan estudyante nga taga-Mexico nga Ingles an ikaduha nga yinaknan. Hi Ralph nagsiring: “Nag-inampo kami para hin dugang nga magwarali. Ha balay, pirme may ekstra nga kwarto para ha kabugtoan nga nabisita ha amon lugar basi ‘usisahon’ an teritoryo.”—Num. 13:2.

Ginpasimple an Kinabuhi Tungod han Ministeryo

Waray pag-iha inabot an iba pa nga kabugtoan nga naruruyag magpauswag han ira pangalimbasog ha ministeryo. Upod hito an mag-asawa nga hira Bill ngan Kathy nga taga-Estados Unidos. Nagboluntaryo na hira hin 25 ka tuig ha mga teritoryo nga daku an panginahanglan hin magwarali. Nagplano hira pag-aram hin Espanyol, kondi nabag-o ito han binalhin hira ha bungto han Ajijic ha baybayon han Lake Chapala—usa nga maopay hinduro nga lugar nga naruruyagan han mga retirado tikang ha Estados Unidos. Hi Bill nagsiring, “Ha Ajijic nagin mas interesado kami ha pagpamiling hin maaram mag-Ingles ngan naruruyag paghibaro han kamatuoran.” Ha sulod hin duha ka tuig tikang han ira pag-abot, naeksperyensyahan nira an kalipay nga makita an kaestablisar han usa nga kongregasyon—an ikaduha nga Ingles nga kongregasyon ha Mexico.

Hira Ken ngan Joanne nga taga-Canada naruyag pagpasimple han ira kinabuhi ngan paggamit hin dugang nga panahon ha ministeryo. Salit binalhin liwat hira ha Mexico. Hi Ken nagsiring, “Waray dayon kami mahiara pag-ukoy ha lugar nga waray mapaso nga tubig, koryente, o telepono ha sulod hin pipira ka adlaw.” Kondi, an pagsangyaw burabod hin kalipay. Waray pag-iha nagin ministeryal hi Ken, ngan paglabay hin duha ka tuig nagin tigurang. Ha tinikangan, diri komportable an ira anak, hi Britanny, ha gutiay nga Ingles nga kongregasyon tungod kay pipira la an batan-on didto. Pero, han nagtikang hiya pagboluntaryo ha mga proyekto ha pagtukod hin Kingdom Hall, nagkaada hiya damu nga mag-opay nga sangkay ha iba-iba nga lugar han nasud.

Hira Patrick ngan Roxanne nga taga-Texas ha Estados Unidos nalipay paghibaro mahitungod hin hirani la nga teritoryo diin an mga residente maaram mag-Ingles. “Katapos bisitahon an Monterrey—usa nga syudad ha norte-este han Mexico—inabat namon nga ginigiyahan kami ni Jehova ha pagbulig didto,” siring ni Patrick. Ha sulod hin lima ka adlaw, naibaligya nira an ira balay ha Texas ngan binalhin ha Monterrey. Diri masayon an panginabuhi ha Mexico, kondi ha sulod hin duha la ka tuig, naeksperyensyahan nira an kalipay nga makita an gutiay nga grupo han 17 nga magwarali nga nagin kongregasyon nga may 40 nga membro.

Usa pa nga mag-asawa, hira Jeff ngan Deb, an nagpasimple han ira kinabuhi basi madugangan an ira pangalimbasog ha ministeryo. Ginbaligya nira an ira daku nga balay ha Estados Unidos ngan binalhin ha gutiay nga apartment ha syudad han Cancún ha este nga baybayon han Mexico. Ha naglabay, hiara hira pagtambong hin asembleya nga gindudumara ha air-condition nga katirokan hirani ha ira balay. Yana, kinahanglan magbiyahe hira hin walo ka oras basi makatambong ha pinakahirani nga Ingles nga asembleya nga gindudumara ha waray atop nga  estadyum. Kondi, nalipay gud hira nga makita an kaestablisar hin kongregasyon ha Cancún nga may mga 50 nga magwarali.

An pipira nga kabugtoan nga taga-Mexico nagtikang liwat pagbulig ha pagsangyaw ha mga tawo nga Ingles an yinaknan. Pananglitan, han hinbaroan ni Rubén ngan han iya pamilya nga naestablisar an siyahan nga Ingles nga kongregasyon ha San Miguel de Allende ngan an bug-os nga Mexico an teritoryo hito, nagdesisyon dayon hira pagbulig. Nagpapasabot ito nga kinahanglan nira mag-aram hin Ingles, magpahiara hin iba nga kultura, ngan magbiyahe hin higrayo—800 kilometro kada semana—basi makatambong ha katirok. Hi Rubén nagsumat: “Nalilipay kami pagsangyaw ha mga langyawanon nga mag-iha na ha Mexico kondi yana pa la pakabati han maopay nga sumat ha ira yinaknan. An iba ha ira nagtutuok samtang iginpapahayag ha amon an ira apresasyon.” Katapos buligan an kongregasyon ha San Miguel de Allende, hi Rubén ngan an iya pamilya nagpayunir ha syudad han Guanajuato, ha sentral nga Mexico, diin binulig hira pag-establisar hin Ingles nga kongregasyon nga may sobra 30 nga magwarali. Yana, kaupod hira ha Ingles nga grupo ha Irapuato, usa nga bungto nga hirani ha Guanajuato.

Pagsangyaw ha mga Tawo nga Makuri Makaistorya

Dugang pa ha mga langyawanon, damu nga taga-Mexico an maaram mag-Ingles. Agsob nga makuri hira masangyawan tungod kay nag-uukoy hira ha komunidad han mga riko diin surugoon la an naabri han purtahan. Ngan kon an tagbalay man an mag-abri, bangin diri hira mamati tungod kay para ha ira an mga Saksi gutiay ngan lokal la nga sekta. Kondi, kon ginsasangyawan  hira hin taga-iba nga nasud, may pipira ha ira nga namamati.

Tagda pananglitan hi Gloria nga taga-Querétaro, usa nga syudad ha sentral nga Mexico. Hiya nagsiring: “Hadto, iginkaistorya ako hin mga Saksi nga Espanyol an yinaknan kondi waray ako mamati. Pero, han nagkaproblema an akon pamilya ngan kasangkayan, nanluya ako ngan nag-ampo ha Dios, nanginyupo ha iya nga buligan ako nga makabiling hin solusyon. Waray pag-iha, may babaye nga Ingles an yinaknan nga binisita ha amon. Nagpakiana hiya kon may-ada ha amon maaram mag-Ingles. Tungod kay iba an iya nasyonalidad, nagin interesado ako, ngan ginsumatan ko hiya nga maaram ako mag-Ingles. Samtang nag-iistorya hiya, naghunahuna ako, ‘Nag-iinano daw la ini nga Amerikana dinhi?’ Ngan nahinumdom ako nga nag-ampo ako ha Dios para hin bulig. Salit, bangin ini na an baton ha akon pag-ampo.” Inuyon hi Gloria nga dumarahan hin pag-aram ha Biblia, madagmit nga nag-uswag ngan nagin kwalipikado ha bawtismo bisan pa han pagkontra han pamilya. Yana, regular payunir na hiya, ngan an iya bana ngan anak nag-aalagad na kan Jehova.

Mga Balos ha Dugang nga Nangangalimbasog ha Ministeryo

An pagbalhin ha lugar nga may daku nga panginahanglan hin magwarali may mga kakurian, kondi damu an balos. Hi Ralph, nga gin-unabi ha tinikangan, nagsiring: “Nagdumara kami hin pag-aram ha Biblia ha mga taga-Britanya, Tsina, Jamaica, Sweden, ngan bisan ha mga membro han sosiedad ha Ghana nga may mga katungdanan. An iba ha ira sinulod ha bug-os-panahon nga pag-alagad. Ha naglabay nga katuigan, nakita han amon pamilya an kaestablisar han pito nga Ingles nga kongregasyon. Nagpayunir an amon mga anak upod namon, ngan nag-aalagad na yana ha Bethel ha Estados Unidos.”

May-ada yana 88 nga kongregasyon ngan damu nga grupo ha Mexico nga Ingles an ginagamit. Kay ano nga sugad kadagmit an pag-uswag hito? Tungod kay damu ha Mexico nga Ingles an yinaknan an waray pa masangyawi, ngan an iba ha ira namati tungod kay waray kinontra ha ira sugad han posible mahitabo kon aadto hira ha ira nasud. Samtang an iba kinarawat hin pag-aram tungod kay retirado na ngan may panahon na para ha ira espirituwalidad. Dugang pa, sobra ikatulo ka bahin han magwarali ha Ingles nga mga kongregasyon an payunir, ngan nakadugang hira ha kadasig ngan pagdamu hito nga mga kongregasyon.

Mga Bendisyon nga Makakarawat

Sigurado nga damu pa nga tawo ha bug-os nga kalibotan an makarawat han mensahe kon masasangyawan hira ha ira kalugaringon nga yinaknan. Salit, makapadasig an paghibaro nga damu nga hamtong nga kabugtoan—batan-on ngan lagas, solo ngan inasaw-an—an andam pagbalhin ha lugar nga may daku nga panginahanglan hin magwarali. Oo, mahimo hira makaeksperyensya hin kakurian, kondi minos la ini kon itanding ha kalipay nga ira naieksperyensyahan kon nakakabiling hin sinsero nga nakarawat han kamatuoran. Makakahimo ka ba hin mga pagbag-o basi makabalhin ha teritoryo ha iyo nasud o ha iba nga katunaan nga mas daku an panginahanglan hin magwarali? a (Luk. 14:28-30; 1 Kor. 16:9) Kon makakahimo ka, sigurado nga damu nga bendisyon an imo makakarawat.

[Footnote]

[Kahon ha pahina 21]

An Maglipayon nga Retirado Nakakadani hin Atensyon

Hi Beryl nga taga-Britanya binalhin ha Canada. Nagtrabaho hiya didto sugad nga manidyer para ha pipira nga internasyonal nga kompanya. Nagin maabtik liwat hiya nga mangangabayo ngan ginpili pa ngani ha pagrepresentar han Canada ha Olympics han 1980. Han nagretiro hiya, binalhin hiya ngan an iya bana ha Chapala, Mexico, ngan agsob hira kumaon ha restawran. Kon nakakakita hiya hin maglipayon nga retirado nga Ingles an yinaknan, nagpapakilala hiya ngan nagpapakiana kon nag-aano hira ha Mexico. Kasagaran nga mga Saksi iton maglipayon nga tawo. Nahunahuna ni Beryl ngan han iya bana nga kon an kalipay ngan katuyoan ha kinabuhi nagtitikang ha pagkilala ha Dios, karuyag liwat nira makilala Hiya. Katapos tumambong ha mga katirok hin pipira ka bulan, inuyon hi Beryl ha pag-aram ha Biblia ngan nagin Saksi. Ha sulod hin damu ka tuig, nag-alagad hiya sugad nga regular payunir.

[Kahon ha pahina 22]

“Bendisyon nga Kaupod Namon Hira”

Gin-aapresyar gud han lokal nga kabugtoan an mga nabalhin ha lugar nga mas daku an panginahanglan hin magwarali. Usa nga sanga nga opisina ha Caribbean an nagsurat: “Kon bumaya an ginatos nga langyawanon nga nagbuboluntaryo dinhi, magluluya an mga kongregasyon. Bendisyon nga kaupod namon hira.”

An Pulong han Dios nasiring nga “daku nga kadam-an an mga babaye nga nagpapahayag han sumat.” (Sal. 68:11) Salit, diri urusahon nga damu nga solo nga kabugtoan nga kababayin-an an upod han mga binalhin ha iba nga nasud. Iton nagsasakripisyo nga kabugtoan daku nga bulig. Usa nga sanga nga opisina ha Este nga Europa an nakaobserba: “Ha damu han kongregasyon dinhi, damu an kababayin-an, usahay sobra katunga han magwarali. Kadam-an ha ira bag-ohan, kondi nabubuligan hira pinaagi han pagbansay nga igintatagana han solo nga payunir nga kababayin-an tikang ha iba nga nasud. Bendisyon gud ha amon inin langyawanon nga kabugtoan nga kababayin-an!”

Ano an inaabat hini nga kabugtoan ha pag-alagad ha iba nga nasud? “Damu an kakurian,” siring ni Angelica nga sobra 30 anyos ngan nag-alagad hin pipira ka tuig ha iba nga nasud sugad nga solo nga payunir. “Ha usa han akon teritoryo, kada adlaw nakita ako hin nakakapanluya nga kahimtang hin mga tawo samtang nagbabaktas ha malapok nga dalan. Kondi inabat ko an katagbaw ha pagbulig ha mga tawo ha ministeryo. Nalipay liwat ako ha mga kapahayagan hin apresasyon han tuminungnong nga kabugtoan nga kababayin-an nga agsob magpasalamat ha akon pagbalhin basi buligan hira. Usa nga bugto nga babaye an nagsumat ha akon nga an akon pagbalhin ha ira nasud basi magpayunir nakadasig ha iya nga magpayunir liwat.”

Hi Sue, usa nga payunir nga sobra 50 anyos, nasiring: “Sigurado nga makakaeksperyensya ka hin kakurian, kondi minos la ini kon itanding ha bendisyon nga nakakarawat. An ministeryo makalilipay! Tungod kay daku nga panahon nga nakakaupod ko an batan-on nga kababayin-an ha ministeryo, iginsusumat ko ha ira an akon hinbaroan ha Biblia ngan ha mga publikasyon mahitungod ha kon paonan-o aatubangon an mga kakurian. Agsob nira ako sumatan nga an akon pag-ilob ha mga problema samtang nag-aalagad sugad nga solo nga payunir hin damu katuig nakabulig ha ira nga masantop nga mahimo liwat nira maatubang an mga problema. An pagbulig ha ira nakahatag ha akon hin hilarom nga katagbaw.”

[Mapa ha pahina 20]

(Para ha aktuwal nga pormat, kitaa an publikasyon)

MEXICO

Monterrey

Guanajuato

Irapuato

Ajijic

Chapala

Lake Chapala

San Miguel de Allende

Querétaro

MEXICO CITY

Cancún

[Retrato ha pahina 23]

Naeksperyensyahan han iba an kalipay ha pagsangyaw ha mga langyawanon nga pakakabati pa la han maopay nga sumat