Nahinunumdoman Mo Ba?

Nagpahimulos ka ba ha pagbasa han bag-o nga mga gowa han An Barantayan ngan The Watchtower? Kitaa kon mababaton mo an masunod nga mga pakiana:

• Kay ano nga importante gud nga tipigan naton an aton integridad sugad nga Kristiano?

An pagtipig han aton integridad naghahatag ha aton hin higayon nga ipakita an aton pagdapig ha pagkasoberano ni Jehova tungod han gugma ngan pamatud-an nga buwaon hi Satanas. Nagigin basihan liwat ito han Dios ha paghukom ha aton salit importante ha aton paglaom ha tidaraon.—12/15, pahina 4-6.

• Ano an pipira nga titulo nga naghuhulagway han responsabilidad ni Jesus ha katuyoan han Dios?

An bugtong nga Anak. An Pulong. An Amen. An Manlalaban han bag-o nga kauyonan. An Hitaas nga Saserdote. An iginsaad nga Binhi.—12/15, pahina 15.

• Kay ano nga makatirigamnan an pagsugoa ni Elias ha iya surugoon nga kumita ha dagat samtang nag-aampo hi Elias nga umuran? (1 Hadi 18:43-45)

Iginpakita ni Elias nga maaram hiya han sikolo han tubig. An mga dampog nga napuporma ha igbaw han dagat nagtitipakadto ha igbaw han tuna ngan nagigin uran.—Ene.-Mar., pahina 15-16.

• Paonan-o kita magigin mas malipayon ha aton ministeryo?

Mahimo naton iandam an aton kasingkasing ngan magsentro ha kon paonan-o gud naton mabubuligan an iba. Mahimo kita magsangyaw nga an tumong amo an pagtikang hin pag-aram ha Biblia. Kon umatubang kita hin kawaray interes, mahimo naton bag-ohon an aton presentasyon ngan mag-unabi hin topiko nga makapainteres ha mga tawo ha aton teritoryo.—1/15, pahina 8-10.

• An sanla ba nga gin-uunabi ha Biblia amo an sakit nga kilala yana sugad nga sanla?

Ha kadaan nga mga panahon, may-ada gud tinatawag nga sanla, usa nga impeksyon tungod han bakterya. (Leb. 13:4, 5) An Biblia nag-uunabi liwat hin sanla dida ha mga panapton ngan balay. Posible nga ini nga “sanla” nagtutudlok ha usa nga klase hin alamag o tagiptip. (Leb. 13:47-52)—2/1-E, pahina 19.

• Ano an sadang magin epekto han mga katutdoan han Biblia ha disposisyon ngan mga kustomre han usa nga Kristiano may kalabotan ha mga lubong?

Bisan kon nasusubo an usa nga Kristiano ha kamatay han iya mga hinigugma, maaram hiya nga an mga patay waray sarabotan. Pakarauton man hiya han mga diri tumuroo, iya ginlilikyan an mga kustomre nga may kalabotan ha toloohan nga an mga patay makakaimpluwensya ha mga buhi. Basi malikyan an mga problema, ginsusurat han iba nga Kristiano an ira mga tugon mahitungod han mga kahikayan ha lubong.—2/15, pahina 29-31.

• Sumala ha Salmo 1:1, ano an tulo nga butang nga kinahanglan naton likyan basi magin malipayon?

Gin-uunabi hini nga bersikulo an “sagdon han mga magdaraot,” “dalan han mga magpakasasala,” ngan “lingkoran han mga magyinubiton.” Oo, basi magin malipayon, kinahanglan likyan naton an mga tawo nga nagyuyubit o nagbabalewaray han mga balaud han Dios. Lugod, sadang kita malipay ha balaud ni Jehova.—3/1-E, pahina 17.

• An “basahon ni Jasar” ba ngan an “basahon han mga Pagpakig-away ni Jehova” mga nawara nga libro han Biblia? (Jos. 10:13; Num. 21:14)

Diri. Baga hin mga dokumento ito nga diri giniyahan han Dios nga naeksister hadto ngan gin-unabi han mga parasurat han Biblia.—3/15, pahina 32.

• Ano an daku nga pagbag-o nga ginhimo ha usa nga moderno nga hubad han Latin nga Biblia?

Han 1979, gin-aprobahan ni Papa Juan Paulo II an Nova Vulgata, usa nga bag-o nga hubad ha Latin. Mababasa ha pipira nga bahin han siyahan nga edisyon an ngaran han Dios nga Iahveh. (Eks. 3:15; 6:3) Kondi, han iginpublikar han 1986 an ikaduha nga opisyal nga edisyon, ginliwanan hin Dominus [Ginoo] an Iahveh.—4/1-E, pahina 22.