Aada Ka ba ha Husto nga Lugar Kon Umabot an Kataposan?

KON bungkagon ni Jehova ha Armagedon an maraot nga sistema yana, ano an mahitatabo ha mga matadong? Ini an baton han Proberbios 2:21, 22: “An matadong maukoy dida ha tuna, ngan an hingpit mapabilin dida hini. Kondi an magraot paghihinginlan tikang ha tuna. Ngan an mga malingoon pagrarabuton tikang dida.”

Kondi, paonan-o magpapabilin ha tuna an mga matadong? May-ada ba hira lugar nga aayopan? Diin hira sadang mahimutang kon umabot an kataposan? May-ada upat nga asoy ha Biblia mahitungod han katalwasan nga nagpapatin-aw hini.

May Panahon nga Importante an Lugar nga Hinmumutangan

Mahitungod ha pagluwas ha mga patriarka nga hira Noe ngan Lot, ini an aton mababasa ha 2 Pedro 2:5-7: “Waray [an Dios] pag-awil han daan nga kalibotan, kondi ginluwas niya hi Noe, parawali ha katadongan, upod in pito han pagpalunupi niya han kalibotan han diri magtinoohon ha Dios; ngan, ginhimo niya nga abo an mga bungto nga Sodoma ngan Gomorra, han paghukmi ha pagkabungkag, nga ginhimo hira nga susbaranan hadton mga nagpangabuhi hin diri pagtahod ha Dios; ngan ginluwas niya an matadong nga hi Lot, nga nasakit ha maglaw-ay nga ginawian han mga magraot.”

Paonan-o hi Noe nakatalwas ha Baha? An Dios nagsiring ha iya: “An kataposan han ngatanan nga unod inabot ha akon atubangan kay an tuna puno hin panraugdaog tumikang ha ira; ngan, kitaa, pupoohon ko hira, lakip an tuna. Paghimo ikaw hin usa nga arka nga kahoy nga Goper.” (Gen. 6:13, 14) Ginhimo ni Noe an arka sugad han iginsugo ha iya ni Jehova. Pito ka adlaw antes magtikang an Baha, ginsugo hiya ni Jehova nga tirukon an mga hayop ngadto ha arka ngan sumulod hito upod an iya bug-os nga pamilya. Ha ikapito ka adlaw ginsadhan an purtahan, “ngan nag-inuran ha bawbaw han tuna kap-atan ka adlaw ngan kap-atan ka gab-i.” (Gen. 7:1-4, 11, 12, 16) Hi Noe ngan an iya pamilya “naluwas ha tubig.” (1 Ped. 3:20) Kon karuyag nira maluwas, kinahanglan aadto hira ha sulod han arka. Waray iba nga talwas nga lugar ha bawbaw han tuna.—Gen. 7:19, 20.

Ha kahimtang ni Lot, iba liwat an mga instruksyon. Ginsumatan hiya han duha nga anghel kon diin hiya sadang gumawas. Hira nagsiring ha iya: “Bisan hin-o nga imo dinhi hini nga bungto [han Sodoma], dad-a hira ha gawas hini nga lugar: tungod kay amon rurub-on ini nga lugar.” Kinahanglan hira ‘pumalagiw ngadto ha bukid.’—Gen. 19:12, 13, 17.

An mga eksperyensya nira Noe ngan Lot nagpapamatuod nga hi Jehova “maaram ha pagluwas han matinumanon ha Dios tikang ha panulay, ngan pagkapot ha diri matinumanon ha Dios ha ilarom ha pagkahinukman ngada ha adlaw ha paghukom.” (2 Ped. 2:9) Hinin duha nga kahimtang, an ira kaluwasan nakadepende ha ira hinmumutangan. Hi Noe kinahanglan sumulod ha arka; hi Lot kinahanglan gumawas ha Sodoma. Kondi pirme ba sugad hini an kahimtang? Maluluwas ba ni Jehova an magtadong diin man hira nahimumutang nga diri na hira kinahanglan bumalhin? Ha pagbaton hini nga pakiana, tagda an duha pa nga asoy mahitungod han pagluwas.

Importante ba Pirme an Hinmumutangan?

Ha panahon ni Moises, antes ipadapat ni Jehova an ikanapulo nga peste ha Ehipto, Iya ginsugo an mga Israelita nga ipahid an dugo han karnero han Paskua ha hamba han purtahan han ira balay. Kay ano? Basi nga kon ‘hi Jehova  lumabay ha paghampak ha mga Ehiptohanon ngan makakita hiya han dugo ha bawbaw han balabag ngan ha bawbaw han duha nga harigi, malabay hiya ha igbaw han sada, ngan diri tutugotan an magguguba pagsakob ha ira mga balay paghampak ha ira.’ Hito mismo nga gab-i, “pinanhampak ni Jehova an ngatanan nga suhag ha tuna ha Ehipto, tikang ha suhag ni Paraon nga nalingkod ha iya lingkuranan nga hadianon ngadto ha suhag han bihag nga nakadto ha bilanggoan; ngan an ngatanan nga suhag han kabakahan.” Waray bumalhin an mga Israelita, kondi natalwas an ira mga suhag.—Eks. 12:22, 23, 29.

Tagda liwat an kahimtang ni Rahab, usa nga bigaon nga naukoy ha syudad han Jeriko. Hito nga panahon titikangan na han mga Israelita an pagsakop ha Tuna nga Iginsaad. Han nasantop ni Rahab nga bubungkagon an Jeriko, iya ginsumatan an duha nga Israelita nga espiya nga an mga umurukoy ha syudad nahahadlok hinduro ha nasulong nga mga Israelita. Iya gintago an mga espiya ngan ginpasumpa hira nga luwason hiya ngan an iya bug-os nga pamilya kon sakupon na an Jeriko. Ginsugo han mga espiya hi Rahab nga tirukon an iya pamilya ha sulod han iya balay nga nakada ha kuta han syudad. Kon gumawas hira, mahiaapi hira ha kabungkagan. (Jos. 2:8-13, 15, 18, 19) Kondi, ha urhi nagsiring hi Jehova kan Josue nga “an kuta han bungto mahilalaprak.” (Jos. 6:5) An iginsaad han mga espiya nga talwas nga lugar baga hin namimeligro. Paonan-o maluluwas hi Rahab ngan an iya pamilya?

Pag-abot han panahon ha pagsakop han Jeriko, nan-gugliat an mga Israelita ngan ginhuypan an mga budyong. An Josue 6:20 nasiring: “Han pakabati han mga tawo [han Israel] han tunog han budyong, . . . an katawohan naggugliat hin makusog hinduro nga tingog, ngan an kuta nahilaprak.” Waray tawo nga makakapugong han kapukan han kuta. Kondi, milagroso nga waray mabungkag an balay ni Rahab. Ginsugo ni Josue an duha nga espiya: “Kadto ha balay han bigaon, ngan dad-a tikang didto an babaye, ngan an ngatanan nga iya, sugad han iyo iginsumpa ha iya.” (Jos. 6:22) Naluwas an ngatanan nga nakadto ha sulod han balay ni Rahab.

Ano an Pinakaimportante?

Ano an aton hibabaroan ha pagluwas kanda Noe ngan Lot, ha mga Israelita ha panahon ni Moises, ngan kan Rahab? Paonan-o kita nabubuligan hini nga mga asoy nga mahibaroan an lugar nga sadang naton himutangan kon umabot an kataposan han maraot nga sistema yana?

Oo, natalwas hi Noe ha sulod han arka. Kondi kay ano nga nakadto hiya? Diri ba tungod han iya pagtoo ngan pagkamasinugtanon? An Biblia nasiring: “Ginbuhat ni Noe; sugad ha ngatanan nga kanan Dios ginsugo ha iya, iya ginbuhat.” (Gen. 6:22; Heb. 11:7) Kumusta  man kita? Ginbubuhat ba naton an ngatanan nga ginsusugo ha aton han Dios? Hi Noe usa liwat nga “parawali ha katadongan.” (2 Ped. 2:5) Ginsusubad ba naton hiya ha pagin madasigon ha pagsangyaw bisan kon an mga tawo ha aton teritoryo diri namamati?

Hi Lot waray mabungkag tungod kay pinalagiw hiya tikang ha Sodoma. Ginluwas hiya tungod kay matadong hiya para kan Jehova ngan naguol hinduro ha malaw-ay nga paggawi han magraot nga katawohan han Sodoma ngan Gomorra. Naguguol gud ba kita ha malaw-ay nga paggawi nga kalyap hinduro yana? O nahiara na gud kita hito salit baga hin natural na la ito? Ginbubuhat ba naton an ngatanan nga aton mahihimo basi magin “waray buring ngan kasaypanan” ngan mamurayawon?—2 Ped. 3:14.

Ha kahimtang han mga Israelita ha Ehipto ngan ni Rahab ha Jeriko, an kaluwasan nakadepende ha pagpabilin ha sulod han ira balay. Nagkinahanglan ini hin pagtoo ngan pagkamasinugtanon. (Heb. 11:28, 30, 31) Handurawa an pagbinantay han tagsa nga Israelita nga pamilya ha ira suhag samtang “may-ada daku nga panuok” ha tagsa nga balay han mga Ehiptohanon. (Eks. 12:30) Handurawa an pagpurundok ni Rahab ngan han iya pamilya samtang nababatian nira an mga lagubo han narurumpag nga pader nga nagtitikahirani ha ira. Nagkinahanglan hiya hin daku nga pagtoo basi magpabilin nga masinugtanon ngan diri gumawas hito nga balay.

Hirani na bungkagon an maraot nga kalibotan ni Satanas. Diri pa kita maaram kon paonan-o pananalipdan ni Jehova an iya katawohan ha makaharadlok nga ‘adlaw han iya kasina.’ (Sep. 2:3) Kondi, hain man kita ngan anoman an aton kahimtang hito nga panahon, makakasiguro kita nga an aton kaluwasan nadepende ha aton pagtoo ngan pagkamasinugtanon kan Jehova. Yana, sadang kita magkaada hin husto nga pagtagad ha gintatawag han tagna ni Isaias nga aton “mga sulod.”

‘Sulod ha Iyo mga Sulod’

“Kadi, katawohan ko, sulod ikaw ha imo mga sulod, ngan panadhi an imo mga ganghaan palibot ha imo,” siring ha Isaias 26:20. “Tumago ka ha madali nga panahon, ngada nga an kaaligutgot matapos.” Ini nga tagna posible nga nagkaada siyahan nga katumanan han 539 A.K.P. han ginsakop han mga Mediahanon ngan Persiahanon an Babilonya. Ha pagsulod ha Babilonya ni Ciro nga Persiahanon, matin-aw nga iya ginsugo an ngatanan nga diri gumawas ha ira balay tungod kay ginsugo niya an iya mga sundalo nga patayon an bisan hin-o nga aada ha gawas.

Ha aton panahon, an “mga sulod” nga gin-unabi hini nga tagna posible nga may duok nga kalabotan ha sobra 100,000 nga kongregasyon han mga Saksi ni Jehova ha bug-os nga kalibotan. Ito nga mga kongregasyon importante gud ha aton kinabuhi. Padayon nga magigin importante ito ha aton tubtob ha “daku nga kagol-anan.” (Pah. 7:14) An katawohan han Dios ginsusugo nga sumulod ha ira “mga sulod” ngan magtago “ngada nga an kaaligutgot matapos.” Importante nga magkultibar ngan magtipig kita hin maopay nga pagtagad ha kongregasyon ngan magin determinado gud nga magpabilin nga duok hito. Kinasingkasing nga sundon naton an igin-aghat ni Pablo: “Magpinalandonganay an usa kag usa ha aton ha pag-aghat ha gugma ngan ha mga mag-opay nga buhat; diri ta bayaan an aton pagturotarampo, sugad han batasan han iba, kondi maglinaygayay kita labi na gud, nga [aton] gintatan-aw nga an adlaw nagtitikahirani na.”—Heb. 10:24, 25.

[Mga Retrato ha pahina 7]

Ano an aton mahibabaroan ha naglabay nga mga pagluwas han Dios?

[Retrato ha pahina 8]

Ha aton panahon, ano an mahimo ipasabot han “mga sulod”?