“Panahon ha Paghilom”

“AN PAGYAKAN pariho hin salapi, an paghilom pariho hin bulawan.” Ito an usa nga puplunganon nga ginsisiring nga tikang ha Oriente. Sumala ha Brewer’s Dictionary of Phrase and Fable, pariho ito han Hebreo nga puplunganon nga: “Kon usa ka siklo an bili han usa ka pulong, duha ka siklo an bili han paghilom.” Ngan an maaramon nga hi Hadi Salomon han kadaan nga Israel nagsurat: “Ha tagsa nga butang may-ada usa ka panahon, ngan usa ka panahon para ha tagsa nga tinguha ha sirong han langit: . . . may panahon ha paghilom, ngan may panahon ha pagyakan.”—Ekles. 3:1, 7.

Kondi, san-o angayan an paghilom imbes nga magyakan? An mga pulong nga “hilom,” “paghilom,” ngan “pagmingaw” damu ka beses nga mababasa ha Biblia. Ha konteksto hini nga mga pulong, iginpapakita nga angayan an pagin hilom ha diri maminos ha tulo nga bahin han kinabuhi. Aton usisahon hin maopay an pagin hilom sugad nga paagi ha pagpakita hin pagtahod, ebidensya han pagin maaramon ngan masinabuton, ngan bulig ha pagpamalandong.

Paagi ha Pagpakita hin Pagtahod

An paghilom usa nga paagi ha pagpakita hin pagtahod ngan pagpasidungog. Hi propeta Habakuk nagsiring: “Hi Jehova aada ha iya baraan nga templo: pahiloma an bug-os nga tuna ha iya atubangan.” (Hab. 2:20) An tinuod nga mga magsiringba kinahanglan ‘mahilumon nga maghulat han kaluwasan ni Jehova.’ (Pagta. 3:26) An salmista nagkanta: “Paghilom ha atubangan han Ginoo; ngan paghulat hin mapailubon ha iya; ayaw kabaraka mahitungod han mga mainuswagon.”—Sal. 37:7, An Maopay nga Sumat.

Madadayaw ba naton hi Jehova bisan kon diri kita nagyayakan? Bueno, diri ba usahay nahipapausa gud kita kon nakikita naton an makaruruyag nga mga linarang salit waray igo nga mga pulong ha pagpahayag han aton inaabat? Diri ba an pamalandong hito usa nga paagi ha pagdayaw ha Maglalarang ha aton kasingkasing? Mahitungod han mga linarang, ini an siring han salmista: “Pagdayawa hiya niyo, adlaw ngan bulan: dayawa hiya niyo, kamo ngatanan nga mga bitoon nga magsanag. Dayawa hiya, kamo nga mga langit han kalangitan, ngan kamo nga mga tubig nga ha bawbaw han mga langit. Pagdayawon nira an ngaran ni Jehova; kay hiya nagsugo, ngan hira nagkahihimo.”—Sal.148:3-5.

Hi Jehova takos gud han aton pagtahod, sugad man liwat an iya mga pulong. Pananglitan, ha ultimo nga pahayag ni propeta Moises ha nasud  han Israel, hiya ngan an mga saserdote nagsagdon ha ngatanan: ‘Panhilom kamo, ngan pamati ha tingog ni Jehova nga iyo Dios.’ Bisan an Israelita nga kabataan kinahanglan mamati hin maopay kon nagkakatirok an mga anak ni Israel ha pagbasa han Balaud han Dios. Hi Moises nagsiring: “Tiroka an mga tawo, mga lalaki ngan mga babaye, ngan an kabataan . . . basi hira makatoon.”—Deut. 27:9, 10; 31:11, 12.

Angayan gud la nga an mga magsiringba ni Jehova yana mamati hin matinalahuron ha mga instruksyon nga ira nakakarawat ha Kristiano nga mga katirok pati na ha dagku nga kombensyon! Kon iginsasaysay ha entablado an importante nga mga kamatuoran ha Biblia, diri ba kawaray-pagtahod ha Pulong han Dios ngan ha iya organisasyon an diri-kinahanglanon nga pagpinakiistorya? Durante han programa, panahon ito ha paghilom ngan pamati.

Bisan ha pribado nga iristorya, maipapakita naton an aton pagtahod pinaagi ha pagpamati hin maopay. Pananglitan, an patriarka nga hi Job nagsiring ha mga nag-akusar ha iya: “Tutdui ako, ngan ako mahilom.” Hi Job andam mamati samtang nagyayakan hira. Ngan han hiya na an magyayakan, naghangyo hiya: “Hilom kamo, pabay-i ako, nga ako makayakan.”—Job 6:24; 13:13.

Ebidensya han Pagin Maaramon Ngan Masinabuton

An Biblia nasiring: “Hiya nga magpupugong han iya mga im-im nagbubuhat ha makinaadmananon.” “An tawo nga may sarabotan nahilom.” (Prob. 10:19; 11:12) Tagda kon paonan-o iginpakita ni Jesus nga maaramon ngan masinabuton gud hiya pinaagi han paghilom. Han masantop nga waray pulos an pagyakan ha napupungot nga mga kaaway, “hi Jesus nagmingaw.” (Mat. 26:63) Ha urhi, han ginbibista ni Pilato, hi Jesus “waray magbaton ha iya.” Maaramon nga ginpili niya nga an iya reputasyon an magyakan para ha iya.—Mat. 27:11-14.

Maaramon liwat kita kon ginpupugngan naton an aton im-im, labi na kon nasisina kita. An usa nga proberbio nasiring: “Hiya nga mahinay ha pagkasina may daku nga sarabotan; kondi hiya nga may mahinanalion nga espiritu nagpapahitaas han kalurongan.” (Prob. 14:29) Kon nabaton kita nga diri anay naghuhunahuna, mahimo kita makayakan hin diri maopay. Ha sugad nga mga kahimtang, bangin hunahunaon han aton kaistorya nga waray pulos an aton mga pulong. Ha urhi bangin magbasol kita ngan tungod hito diri magigin murayaw an aton hunahuna.

Maaramon gud an pagin mabinantayon ha aton ginsisiring ha atubangan han magraot nga tawo. Kon ha aton pagsangyaw igkaatubang kita hin mga nanyuyubit, bangin mas maopay an paghilom. Dugang pa, diri ba usahay maaramon an pagpabilin nga hilom basi diri hunahunaon han aton mga kaeskwela o katrabaho nga nauyon kita ha ira maglaw-ay nga intremes o binastos nga iristorya? (Efe. 5:3) An salmista nagsurat: “Pagbabantayan ko an akon baba hin bukado, samtang nga aada an maraot nga tawo ha akon atubangan.”—Sal. 39:1.

An tawo nga “may sarabotan” mabinantayon nga diri mawara an pagtapod ha iya han iba. (Prob. 11:12) Ginsisiguro han tinuod nga Kristiano nga diri isumat an kompidensyal nga mga butang. An mga tigurang kinahanglan magin mabinantayon  gud may kalabotan hini basi diri mawara an pagtapod ha ira han ira mga kakongregasyon.

Bisan kon waray ka ginyayakan kon nahilom ka la, mahimo ito magkaada positibo nga epekto. An Ingles nga parasurat nga hi Sydney Smith han ika-19 ka siglo nagsurat mahitungod han usa niya nga kadungan-dungan: “Ha panapanahon hilom la hiya, ngan tungod hito makalilipay gud hiya igkaistorya.” Oo, ha ordinaryo nga iristorya han duha nga magsangkay, kinahanglan may higayon ha pagyakan an kada usa. An tawo nga maopay magyakan kinahanglan maopay liwat mamati.

“Ha kadam-an nga mga pulong diri kukulangon an kalapasan,” hi Salomon nagpahamangno, “kondi hiya nga magpupugong han iya mga im-im nagbubuhat ha makinaadmananon.” (Prob. 10:19) Salit, kon mas gutiay an ginyayakan, mas gutiay an posibilidad nga makayakan hin diri-maaramon. Ha pagkamatuod, “bisan an lurong, kon hiya nahilom, iniisip nga makinaadmananon; kon iya tinatak-om an iya mga im-im, hiya ginmamahal sugad hin mainalam-agamon.” (Prob. 17:28) Salit, hinaot ha aton pag-ampo hangyoon naton hi Jehova nga ‘magbutang hin bantay ha atubangan han aton baba.’—Sal. 141:3.

Bulig ha Pamalandong

Mahitungod han tawo nga nasunod ha dalan han katadongan, an Kasuratan nagsusumat ha aton nga “adlaw ug gab-i hiya namamalandong ha [kanan Dios] balaud.” (Sal. 1:2) Ha ano nga kahimtang gimaopayi an sugad nga pamalandong?

Hi Isaak nga anak han patriarka nga hi Abraham “nagkadto ha uma ha pagpamalandong ha takna han kakulopay.” (Gen. 24:63) Nagpili hiya hin mamingaw nga panahon ngan lugar basi mamalandong. Hi Hadi David namalandong samtang nagbabantay ha mamingaw nga kagab-ihon. (Sal. 63:6) Hi Jesus hingpit, kondi nangalimbasog gud hiya nga matagbaw an iya panginahanglan nga mag-usahan ngan mamalandong didto ha kabukiran, mga disyerto, ngan iba nga mamingaw nga mga lugar nga hirayo ha aringasa han damu nga tawo.—Mat. 14:23; Luk. 4:42; 5:16.

Diri gud naton maibabalewaray an mag-opay nga epekto han pagin hilom. Maopay ito nga panahon ha pag-usisa ha kalugaringon nga kinahanglanon basi mag-uswag. An pagin hilom makakabulig ha pagkaada hin kamurayawan han hunahuna. Pinaagi han pamalandong durante han mamingaw nga mga panahon, mabubuligan kita nga karawaton an aton mga limitasyon ngan magin mapainubsanon, ngan mas maaapresyar naton an mga butang ha kinabuhi nga importante gud.

Maopay an pagin hilom, kondi may-ada liwat “panahon ha pagyakan.” (Ekles. 3:7) Ha aton panahon, an tinuod nga mga magsiringba sagipo ha pagsangyaw han maopay nga sumat han Ginhadian han Dios “ha bug-os nga kalibotan.” (Mat. 24:14) An kalipay nga resulta hito nababatian ngan nagtitikakusog samtang nagtitikadamu hira. (Mika 2:12) Talinguhaon gud naton nga magin kaupod hadton madasigon nga nagpapasamwak han maopay nga sumat han Ginhadian ngan nagyayakan mahitungod han urusahon nga mga buhat han Dios. Samtang nakikigbahin kita hinin importante nga buruhaton, hinaot makita liwat ha aton paagi han pagkinabuhi nga kinikilala naton nga may mga panahon nga an pagin hilom pariho hin bulawan.

[Retrato ha pahina 3]

Durante han aton mga katirok, kinahanglan kita mamati ngan mahibaro

[Retrato ha pahina 4]

Ha aton pagsangyaw, bangin angayan an pagin hilom kon ginyuyubit

[Retrato ha pahina 5]

An mamingaw nga kahimtang maopay para ha pamalandong