Subara an Pagkamaunungon ni Itay

“DAGKU ngan magpakaurosa an imo mga buhat, O Ginoo nga Dios, nga Makagagahum; magtadong ngan mga totoo an imo mga dalan, Hadi ha mga katuigan. Hin-o ba an diri mahadlok ha imo, O Ginoo, ngan maghimaya ha imo ngaran? Kay ikaw la an maputli [“maunungon,” NW].” Ini nga kanta nga ginkanta ha langit han ‘mga nagdaog ha mananap, ngan ha iya ladawan,’ nagpapatin-aw han pagkamaunungon han Dios. (Pah. 15:2-4) Karuyag ni Jehova nga subaron hiya han iya mga magsiringba ha pagpakita hinin makaruruyag nga kalidad.

Ha luyo nga bahin, ginbubuhat ni Satanas an ngatanan nga iya mahihimo basi ibulag an mga surugoon han Dios dinhi ha tuna tikang ha gugma han Dios nga ira ginsisingba. Bisan pa hito, damu an nagpapabilin nga maunungon ha Dios bisan ha magkuri hinduro nga kahimtang. Mapasalamaton gud kita nga ginpapabilhan gud ni Jehova an sugad nga debosyon! Oo, ginpapasarig kita: “An Ginoo nahigugma han matadong ngan diri nagsisikway han iya mga tawo nga matinumanon.” (Sal. 37:28, An Maopay nga Sumat) Basi mabuligan kita nga magpabilin nga maunungon,  iginlakip niya ha iya Pulong an mga asoy mahitungod han damu nga nagin maunungon. Usa hito an mahitungod kan Itay nga Giteohanon.

“Dumuruong Ngan Hinalin”

Posible nga hi Itay usa nga tuminungnong han kilala nga syudad han Gat ha Pilistia nga lugar han higante nga hi Goliat ngan han iba pa nga makaharadlok nga mga kaaway han Israel. An siyahan nga higayon nga aton mababasa ha Biblia an mahitungod han eksperyensyado nga girriro nga hi Itay amo an ha panahon nga hi Absalon nagrebelde kan Hadi David. Hito nga panahon, hi Itay ngan an 600 nga Pilisteohanon nga kalalakin-an nga inupod ha iya naukoy hirani ha Jerusalem sugad nga mga distyero.

An kahimtang ni Itay ngan han iya mga sumurunod bangin nagpahinumdom kan David han iya hadto pagin puga, han hiya ngan an 600 nga Israelita nga girriro pinalagiw ngadto ha tuna han mga Pilisteohanon nga nasasakopan ni Akis, an hadi han Gat. (1 Sam. 27:2, 3) Ano an bubuhaton ni Itay ngan han iya katawohan yana nga hi Absalon nagrebelde kan David? Madapig ba hira kan Absalon, magpapabilin nga waray dinadapigan, o madapig kan David?

Handurawa an kahimtang samtang hi David nga napalagiw ha Jerusalem inundang dida ha lugar nga tinatawag nga Bet-merak. (2 Sam. 15:17) Dinhi ginpanginano ni David an iya kasundalohan samtang nalabay hira ha iya. Kitaa! Kaupod niya diri la an maunungon nga mga Israelita kondi an ngatanan liwat nga Kereteohanon ngan an ngatanan nga Peleteohanon. Dugang pa, nakada liwat an ngatanan nga Giteohanon—hi Itay ngan an iya 600 nga girriro.—2 Sam. 15:18.

Tungod han kinasingkasing nga pagpaid, hi David nagsiring kan Itay: “Kay ano nga ikaw inupod man ha amon, balik, ngan hunong upod ha hadi [matin-aw nga nagtutudlok kan Absalon]: kay ikaw usa ka dumuruong ngan hinalin liwat; balik ngadto ha imo kalugaringon nga lugar. Hinbabaroan nga kakulop ka pa la aabot, hihimoon ko ba nga niyan nga adlaw maglatagaw ka upod ha amon nga kinikita mo nga makadto ako ngain ako pakahimo? Balik ikaw, ngan dad-a pagbalik an imo kabugtoan; an kalooy ngan an kamatuoran umupod unta ha imo.”—2 Sam. 15:19, 20.

Iginpahayag ni Itay an iya marig-on nga pagkamaunungon. Hiya binaton: “Sugad nga hi Jehova buhi, ngan sugad nga an akon ginoo an hadi buhi, ha pagkamatuod kon ano nga lugar an hingadtoan han akon ginoo nga hadi, makamatayon ba o kinabuhi, bisan ngain an imo surugoon makadto man.” (2 Sam. 15:21) Ini nga mga pulong bangin nagpahinumdom kan David han puropariho hito nga ginsiring han iya apoy-ha-tuhod nga hi Rut. (Rut 1:16, 17) An mga pulong ni Itay nakabantad han kasingkasing ni David, ngan hiya nagsiring kan Itay: “Kadto na ngan tabok” ha Walog han Kidron. Salit, “hi Itay an Giteohanon tinabok ngan an ngatanan nga iya mga tawo, ngan an ngatanan nga kabataan nga upod niya.”—2 Sam. 15:22.

“Ha Pagtutdo ha Aton”

“An ngatanan nga mga butang nga nahisurat na nga daan ginsurat ha pagtutdo ha aton,” siring han Roma 15:4. Salit maopay nga pakianhan naton an aton kalugaringon, Ano nga mga leksyon an aton mahibabaroan ha susbaranan ni Itay? Tagda kon ano an posible nga nagpagios ha iya nga magin maunungon kan David. Bisan kon hi Itay dumuruong ngan distyero tikang ha Pilistia, iya ginkilala hi Jehova sugad nga buhi nga Dios ngan hi David sugad nga dinihogan ni Jehova. Waray hiya magpaapekto ha away han mga Israelita ngan mga Pilisteohanon. Para ha iya, hi David diri la an tawo nga nagpatay han magdaraog nga Pilisteohanon nga hi Goliat ngan han damu pa nga iya igkasi-Pilisteohanon. (1 Sam. 18:6, 7) Kilala ni Itay hi David sugad nga tawo nga nahigugma kan Jehova ngan sigurado nga maaram liwat hiya han mag-opay nga kalidad ni David. Sugad nga resulta, hi David nagkaada hilarom nga pagtagad kan Itay. Aw, igintapod pa ngani ni David an ikatulo nga bahin han iya kasundalohan “ilarom han kamot ni Itay” ha ultimo nga pakig-away ha kasundalohan ni Absalon!—2 Sam. 18:2.

Kita liwat diri sadang magpaapekto ha pagkaiba-iba han kultura, rasa, o tribo. Kinahanglan wad-on naton an pagpasulabi ngan pagdumot ngan apresyaron an mag-opay nga kalidad han iba. An nagin maopay nga relasyon nira David ngan Itay nagpapakita nga an aton pagkilala  ngan gugma kan Jehova makakabulig ha aton ha paglampos han sugad nga mga ulang.

Samtang aton ginpapamalandong an susbaranan ni Itay, mahimo naton pakianhan an aton kalugaringon: ‘Sugad ba liwat ako kamaunungon ha Harangdon nga David, hi Kristo Jesus? Iginpapakita ko ba an akon pagkamaunungon pinaagi han madasigon nga pakigbahin ha pagsangyaw han Ginhadian ngan panhimo hin disipulo?’ (Mat. 24:14; 28:19, 20) ‘Tubtob diin ako andam magpailob basi pamatud-an an akon pagkamaunungon?’

An mga ulo han pamilya magpapahimulos liwat ha pagpamalandong han susbaranan ni Itay ha pagkamaunungon. An iya pagdapig kan David ngan an iya desisyon nga umupod ha dinihogan han Dios nga hadi nakaapekto ha iya katawohan. Ha pariho nga paagi, an mga desisyon han mga ulo han pamilya ha pagsuporta han tinuod nga pagsingba nakakaapekto ha ira mga pamilya ngan mahimo pa ngani magin hinungdan hin temporaryo nga mga kakurian. Kondi, ginpapasarig kita: “Matinumanon ka [Jehova] hadton nagtutuman.”—Sal. 18:25, An Maopay nga Sumat.

Katapos han pakig-away ni David kan Absalon, waray na iginsaysay an Kasuratan mahitungod kan Itay. Kondi, an halipot nga asoy mahitungod ha iya ha Pulong han Dios nabulig gud ha aton nga masabtan an iya disposisyon durante hiton makuri nga panahon ha kinabuhi ni David. Oo, an paghisgot han Biblia mahitungod kan Itay nagpapamatuod nga kinikilala ngan ginbabalosan ni Jehova an sugad nga pagkamaunungon.—Heb. 6:10.