An Matinumanon nga Tinaporan Ngan an Nagmamando nga Lawas Hito

“Hin-o gud an matinumanon nga tinaporan, an maaramon, nga tataporan han iya agaron ha pagmangno ha iya grupo han mga surugoon basi padayon nga maghatag ha ira hin igo nga pagkaon ha husto nga panahon?”—LUK. 12:42, NW.

1, 2. Ano an importante nga pakiana ni Jesus han iginsumat niya an kabug-osan nga tigaman han kataposan nga mga adlaw?

 HAN iginsumat ni Jesus an kabug-osan nga tigaman han kataposan nga mga adlaw, hiya nagpakiana: “Hin-o gud an matinumanon ngan maaramon nga uripon nga gintaporan han iya agaron ha iya mga surugoon han panimalay, ha paghatag ha ira han ira pagkaon ha husto nga panahon?” Katapos, nagsiring hiya nga ini nga uripon babalosan tungod han iya pagkamatinumanon pinaagi ha pagtapod ha iya han ngatanan nga panag-iya han Agaron.—Mat. 24:45-47, NW.

² Pipira ka bulan antes hito, nagbangon hi Jesus hin pariho nga pakiana. (Lukas 12:42-44)  Iya gintawag an uripon nga “tinaporan.” An tinaporan amo an paramangno o administrador han balay nga nanginginano han mga surugoon. Kondi, an tinaporan usa liwat nga surugoon. Hin-o ini nga uripon, o tinaporan, ngan paonan-o hiya naghahatag han “pagkaon ha husto nga panahon”? Importante nga kilalahon naton an ahensya nga ginagamit ha paghatag han espirituwal nga pagkaon.

3. (a) Ano an ginhuhunahuna han mga komentarista han Kakristianohan mahitungod ha gin-unabi ni Jesus nga “uripon”? (b) Hin-o an “tinaporan,” o “uripon,” ngan hin-o an “mga surugoon”?

³ Agsob nga ginhunahuna han mga komentarista han Kakristianohan nga an gin-unabi ni Jesus amo an mga may katungdanan ha nag-aangkon nga mga Kristiano. Kondi hi Jesus, an “agaron” ha ilustrasyon, waray magsiring nga magkakaada damu nga uripon ha iba-iba nga sekta han Kakristianohan. Lugod, matin-aw nga nagsiring hiya nga magkakaada usa la nga “tinaporan,” o “uripon,” nga tataporan han ngatanan nga iya panag-iya. Salit, sugad han agsob isaysay hini nga magasin, an tinaporan nagrirepresentar han ‘gutiay nga panon’ han dinihogan nga mga disipulo sugad nga grupo. Gin-unabi hira ni Jesus ha konteksto han Ebanghelyo ni Lukas. (Luk. 12:32) Ito nga grupo amo gihapon an “mga surugoon,” pero ginpapabug-atan hito an ira responsabilidad sugad nga indibiduwal. Kondi may-ada makapainteres nga pakiana, An tagsa ba nga membro hini nga uripon nakikigbahin ha paghatag hin espirituwal nga pagkaon ha husto nga panahon? Matin-aw an baton kon aton usisahon an ginsisiring han Kasuratan.

Surugoon ni Jehova Hadto

4. Ano an tawag ni Jehova ha nasud han Israel hadto, ngan ano an sadang tigamnan mahitungod hito nga nasud?

⁴ Gintawag ni Jehova an iya katawohan, an kadaan nga nasud han Israel, sugad nga grupo han surugoon. “Kamo an akon mga saksi, nasiring hi Jehova, ngan akon surugoon nga akon ginpili.” (Isa. 43:10) An ngatanan nga Israelita bahin hito nga surugoon. Kondi, sadang tigamnan naton nga an mga saserdote ngan diri-saserdote nga Lebita la an may responsabilidad nga magtutdo ha nasud.—2 Kron. 35:3; Mal. 2:7.

5. Sumala kan Jesus, magkakaada hin ano nga daku nga pagbag-o?

⁵ An nasud ba han Israel an uripon nga gin-unabi ni Jesus? Diri. Hinbaroan naton ito tungod han ginsiring niya ha mga Judio ha iya panahon: “An ginhadian han Dios kukuhaon ha iyo, ngan ihahatag ha usa nga nasud, nga mapabunga [hito].” (Mat. 21:43) Matin-aw nga magkakaada hin pagbag-o. Gagamiton ni Jehova an usa nga bag-o nga nasud. Kondi, may kalabotan ha espirituwal nga instruksyon, may-ada kaparihoan an buruhaton han uripon ha ilustrasyon ni Jesus ngan han “surugoon” han Dios ha Israel hadto.

Naorganisa an Matinumanon nga Uripon

6. Ano nga bag-o nga nasud an naorganisa han Pentekostes 33 K.P., ngan hin-o an nagin bahin hito?

⁶ An bag-o nga nasud, an ‘Israel han Dios,’ ginkukompwesto han espirituwal nga mga Israelita. (Gal. 6:16; Roma 2:28, 29; 9:6) Naorganisa ito han iginbubo an espiritu han Dios han Pentekostes 33 K.P. Katapos hito, an dinihogan han espiritu nga mga Kristiano nagin bahin han nasud nga nag-aalagad yana sugad nga uripon nga gintaporan han Agaron, hi Jesu-Kristo. An tagsa nga membro hito ginsugo nga magsangyaw han maopay nga sumat ngan maghimo hin disipulo. (Mat. 28:19, 20) Kondi, an tagsa ba ha ira makikigbahin ha paghatag hin espirituwal nga pagkaon ha husto nga panahon? Aton usisahon an baton han Kasuratan.

7. Ha tinikangan, ano an importante nga buruhaton han mga apostol, ngan ano an ira nagin dugang nga responsabilidad?

⁷ Han ginpili ni Jesus an iya 12 nga apostol, an ira importante nga buruhaton amo an pagsangyaw han maopay nga sumat sugad nga sinugo. (Basaha an Markos 3:14. a) Ini nga  toka uyon ha kahulogan han Griego nga pulong nga apostolos, nga tikang ha berbo nga nangangahulogan “sinugo.” Kondi paglabay han panahon, han hirani na maestablisar an Kristiano nga kongregasyon, an responsabilidad han apostol nagin “katungdanan” han pagmangno.—Buh. 1:20-26.

8, 9. (a) Ano an responsabilidad han 12 nga apostol? (b) Hin-o pa an gintagan hin dugang nga mga responsabilidad, nga ginparig-on han nagmamando nga lawas?

⁸ Ano an responsabilidad han 12 nga apostol? Mahibabaroan naton an baton hito ha panhitabo katapos han adlaw han Pentekostes. Han nagkaada hin paglantugi mahitungod han adlaw-adlaw nga paghatag hin pagkaon ha mga balo, gintirok han 12 nga apostol an mga disipulo ngan nagsiring: “Diri angay nga bayaan namon an pulong han Dios, ngan magmangno ha mga lamesa.” (Basaha an Buhat 6:1-6.) Katapos, nagpili hira hin kwalipikado nga kalalakin-an ha pagmangno hini nga “buruhaton” basi makagpadayon hira ha “pagpasamwak han pulong.” Ginbendisyonan ni Jehova ini nga kahikayan tungod kay “an pulong han Dios tinubo; ngan an kadamu han mga tinon-an nagdugang gud ha Jerusalem.” (Buh. 6:7) Salit, responsabilidad han mga apostol an pagpakaon ha espirituwal.—Buh. 2:42.

⁹ Inabot an panahon nga gintaporan an iba hin importante nga mga responsabilidad. Pinaagi han giya han baraan nga espiritu, igintoka han kongregasyon ha Antiokia hira Pablo ngan Bernabe nga magin misyonero. Ginkilala liwat hira sugad nga mga apostol bisan kon diri hira kaupod ha orihinal nga 12. (Buh. 13:1-3; 14:14; Gal. 1:19) Ha urhi, ginparig-on han nagmamando nga lawas ha Jerusalem an pagtokahi ha ira. (Gal. 2:7-10) Katapos gud hito, nakigbahin hi Pablo ha paghatag hin espirituwal nga pagkaon. Ginhimo niya an iya siyahan nga surat.

10. Han siyahan nga siglo, an ngatanan ba nga dinihogan nga Kristiano nakigbahin ha pag-andam han espirituwal nga pagkaon? Isaysay.

¹⁰ Kondi, an ngatanan ba nga dinihogan han espiritu nga Kristiano nakigbahin ha pagpanginano han pagsangyaw nga buruhaton ngan ha pag-andam han espirituwal nga pagkaon? Waray. Hi apostol Pablo nagsiring: “Mga apostol ba an ngatanan? Mga manaragna ba an ngatanan? Mga manurutdo ba an ngatanan? O mga magburuhat ba an ngatanan hin mga katingalahan?” (1 Kor. 12:29) Bisan kon an ngatanan nga dinihogan nga Kristiano nagsasangyaw, gutiay la—walo la nga kalalakin-an—an ginpasurat han 27 nga libro han Kristiano Griego nga Kasuratan.

An Matinumanon nga Uripon Yana

11. Ano nga “mga panag-iya” an igintapod ha uripon?

¹¹ An mga pulong ni Jesus ha Mateo 24:45 matin-aw nga nagpapasabot nga may-ada pa gihapon matinumanon ngan maaramon nga uripon nga buhi ha tuna ha panahon han kataposan. Ha Pahayag 12:17 tinatawag hira nga “salin” o nanhibilin han binhi han babaye. Sugad nga grupo, ini nga nanhibilin gintaporan han ngatanan nga panag-iya ni Kristo ha tuna. An “mga panag-iya” han Agaron nga igintapod ha matinumanon nga tinaporan nag-uupod han tunan-on nga mga sakop han Ginhadian ngan pasilidad nga ginagamit ha pagsangyaw han maopay nga sumat.

12, 13. Paonan-o mahibabaroan han Kristiano nga may-ada hiya langitnon nga pagtawag?

¹² Paonan-o mahibabaroan han Kristiano kon may-ada hiya langitnon nga paglaom ngan kaupod ha nanhibilin han espirituwal nga mga Israelita? An baton mababasa ha ginsiring ni apostol Pablo ha pariho ha iya nga may langitnon nga paglaom: “An ngatanan nga ginmamandoan han espiritu han Dios, ini hira amo an mga anak han Dios. Kay waray kamo makakarawat han espiritu ha pagkauripon liwat ngadto ha kahadlok; kondi nakakarawat kamo han espiritu han pagka-pinakaanak, nga tungod hini nangaraba kita: Abba, Amay. An espiritu ngahaw nagtitestigo upod ha aton espiritu, nga mga anak kita han Dios: Ngan kon kita mga anak, mga manurunod man; mga manurunod han Dios, ngan sugad man mga manurunod upod ni Kristo; kon ha pagkamatuod  nag-aantos kita upod ha iya, basi nga paghimayaon man kita upod niya.”—Roma 8:14-17.

¹³ Matin-aw nga ini nga mga indibiduwal dinihogan han baraan nga espiritu han Dios ngan nakakarawat hin langitnon nga “pagtawag” o imbitasyon. (Heb. 3:1) Tikang ha Dios ini nga imbitasyon. Tungod hito, ira liwat ginkarawat nga waray pagruhaduha o kahadlok an pagin mga anak han Dios. (Basaha an 1 Juan 2:20, 21.) Salit diri hira an nagpipili hini nga paglaom, kondi hi Jehova an nagsiselyo ha ira, o nagdidihog han baraan nga espiritu.—2 Kor. 1:21, 22; 1 Ped. 1:3, 4.

An Husto nga Panhunahuna

14. Paonan-o gintatagad han mga dinihogan an pagtawag ha ira?

¹⁴ Paonan-o sadang tagdon hini nga mga dinihogan an ira kalugaringon samtang naghuhulat han ira langitnon nga balos? Nasasantop nira nga bisan kon nakakarawat hira hin makalilipay nga imbitasyon, imbitasyon la ito. Kinahanglan magpabilin hira nga matinumanon tubtob ha kamatayon basi makarawat ito nga balos. Mapainubsanon nga inabat liwat nira an ginsiring ni Pablo: “Mga kabugtoan, waray ako pag-isip ha akon kalugaringon nga nakaptan ko na adto: kondi usa nga bagay [an] akon ginbuhat, nga kinalimtan ko an mga bagay nga tinalikdan, ngan dinadakop ko an mga bagay ha atubangan. Nagpapadayon ako ngadto ha kataposan tungod ha balos han hitaas nga pagtawag han Dios kan Kristo Jesus.” (Fil. 3:13, 14) Kinahanglan mangalimbasog an dinihogan nga nanhibilin nga ‘manggawi hin takos gud ha katungdanan nga igintawag ha ira, ha bug-os nga pagpaubos,’ nga ginbubuhat ito nga “may kahadlok ngan pangurog.”—Efe. 4:1, 2; Fil. 2:12; 1 Tes. 2:12.

15. Paonan-o tatagdon han mga Kristiano an nakikigbahin han mga emblema ha Memoryal, ngan ano an pagtagad han mga dinihogan ha ira kalugaringon?

¹⁵ Ha luyo nga bahin, paonan-o tatagdon han iba nga Kristiano an usa nga nag-aangkon nga dinihogan ngan nakikigbahin han mga emblema ha Memoryal? Diri hiya sadang hukman. Hiya la ngan hi Jehova an maaram hito. (Roma 14:12) Kondi, an tinuod nga dinihogan nga Kristiano diri naglalaom hin espesyal nga atensyon. Diri hira nag-aangkon nga may-ada hira espesyal nga pagsabot nga labaw kay ha eksperyensyado nga mga membro han daku nga panon. (Pah. 7:9) Diri  hira naghuhunahuna nga may-ada hira labaw nga baraan nga espiritu kay ha ira kaupod nga ‘iba nga mga karnero.’ (Juan 10:16) Diri hira naglalaom hin espesyal nga pagtratar; diri liwat hira nag-aangkon nga labaw hira ha mga tigurang ha kongregasyon tungod kay nakikigbahin hira han mga emblema.

16-18. (a) An ngatanan ba nga dinihogan nakikigbahin ha paghatag han bag-o nga espirituwal nga kamatuoran? Iilustrar. (b) Kay ano nga diri kinahanglan konsultahon han Nagmamando nga Lawas an ngatanan nga dinihogan?

¹⁶ An ngatanan ba nga dinihogan ha bug-os nga tuna nakikigkomunikar ha kada tagsa basi maghisgot ngan maghatag hin bag-o nga espirituwal nga kamatuoran? Diri. Bisan kon an uripon, sugad nga grupo, an responsable ha pagpakaon ha mga dinihogan, diri parapriho an ira mga responsabilidad o toka. (Basaha an 1 Korinto 12:14-18.) Sugad han iginsaysay na, han siyahan nga siglo, an ngatanan nakigbahin ha importante nga pagsangyaw. Kondi, pipira la an giniyahan ha pagsurat han mga libro han Biblia ngan pagmangno ha Kristiano nga kongregasyon.

¹⁷ Ha pag-ilustrar: An Kasuratan usahay nag-uunabi nga an kongregasyon nagdudumara han hudisyal nga mga kaso. (Mat. 18:17) Kondi ha pagkamatuod, mga tigurang la an nagdudumara hito sugad nga mga representante han kongregasyon. Kon nagdidesisyon, diri hira napakiana kon ano an opinyon han ngatanan nga membro hito. Ira ginbubuhat an igintoka ha ira para ha bug-os nga kongregasyon.

¹⁸ Ha pariho nga paagi, yana gutiay la nga dinihogan nga kalalakin-an an may responsabilidad ha pagrepresentar han uripon. Hira an nagkukompwesto han Nagmamando nga Lawas han mga Saksi ni Jehova. Nanginginano hira ha buruhaton han Ginhadian ngan ha espirituwal nga pagpakaon. Kondi, sugad han siyahan nga siglo, an Nagmamando nga Lawas diri nakonsulta ha tagsa nga membro han uripon antes magdesisyon. (Basaha an Buhat 16:4, 5.) Pero, an ngatanan nga dinihogan maduruto nga nakikigbahin ha importante nga pag-ani yana. Usa nga grupo an “matinumanon ngan maaramon nga uripon,” kondi iba-iba an ira toka sugad nga indibiduwal.—1 Kor. 12:19-26.

19, 20. Ano an timbang nga panhunahuna han daku nga panon ha “matinumanon ngan maaramon nga uripon” ngan ha Nagmamando nga Lawas hito?

¹⁹ Ano an epekto hito nga impormasyon ha nagtitikadamu nga daku nga panon nga may paglaom nga mabuhi ha waray kataposan ha tuna? Sugad nga bahin han mga panag-iya han Hadi, malipayon hira nga nakooperar ha mga kahikayan han Nagmamando nga Lawas nga nagrirepresentar han “matinumanon ngan maaramon nga uripon.” Inaapresyar han daku nga panon an espirituwal nga pagkaon nga iginhahatag pinaagi han giya han Nagmamando nga Lawas. Kondi bisan kon gintatahod han daku nga panon an uripon sugad nga grupo, nag-iikmat hira nga diri hatagan hin espesyal nga atensyon an bisan hin-o nga indibiduwal nga bahin hito nga uripon. Waray tinuod nga dinihogan an naruruyag o naglalaom han sugad nga pagtagad.—Buh. 10:25, 26; 14:14, 15.

²⁰ “Mga surugoon” man kita nga bahin han dinihogan nga nanhibilin, o membro han daku nga panon, magin determinado kita nga magkooperar ha matinumanon nga tinaporan ngan ha Nagmamando nga Lawas hito. Hinaot an tagsa ha aton padayon nga “magbantay” ngan magin matinumanon tubtob ha kataposan.—Mat. 24:13, 42.

[Footnote]

Nahinunumdoman Mo Ba?

• Hin-o an “matinumanon ngan maaramon nga uripon,” ngan hin-o an mga surugoon?

• Paonan-o mahibabaroan han usa nga may-ada hiya langitnon nga pagtawag?

• Hin-o an may responsabilidad ha pag-andam han bag-o nga espirituwal nga pagkaon?

• Ano an sadang magin pagtagad han usa nga dinihogan ha iya kalugaringon?

[Mga Pakiana]

[Retrato ha pahina 23]

Yana, an Nagmamando nga Lawas nagrirepresentar han matinumanon ngan maaramon nga uripon. May kaparihoan ito ha kahikayan ha siyahan nga siglo