Kon Paonan-o Magigin Malipayon ha Pagin Solo

“NGAN nagpakasal hira ngan nagin malipayon ha waray kataposan.” Ini an kasagaran nga mga pulong ha kataposan han panbata nga mga istorya. Pariho liwat hini an mensahe ha romantiko nga mga sine ngan nobela—kinahanglan mag-asawa basi magin malipayon gud! Dugang pa, ha kadam-an nga kultura gin-aaghat gud an mga batan-on nga mag-asawa. “Ginpapaabat ha imo han mga tawo nga pag-asawa gud la an tumong han batan-on nga babaye,” siring ni Debby han mga 25 anyos hiya. “Ira igin-aaghat an ideya nga an kinabuhi nagtitikang katapos mag-asawa.”

Diri sugad hini an panhunahuna han espirituwal nga tawo. Ha panahon han mga Israelita komon an pag-asawa, kondi an Biblia nag-uunabi hin solo nga kalalakin-an ngan kababayin-an nga nagkaada malipayon gud nga kinabuhi. Yana, ginpipili han iba nga Kristiano nga magpabilin nga solo, samtang damu liwat an diri nag-aasawa tungod han pipira nga kahimtang. Anoman an hinungdan han ira pagin solo, ini la gihapon an importante nga pakiana: Paonan-o magigin malampuson an usa nga Kristiano ha pagin solo?

Hi Jesus mismo waray mag-asawa, ngan diri ini urusahon tungod han toka nga iginhatag ha iya. Hiya nagsiring ha iya mga disipulo nga an iba liwat han iya mga sumurunod ‘makakahimo pagkarawat’ han pagin solo. (Mat. 19:10-12) Salit iginpakita ni Jesus nga basi magin malampuson ha pagin solo, kinahanglan naton karawaton o hatagan hin lugar ha aton hunahuna ngan kasingkasing ito nga paagi han pagkinabuhi.

An sagdon ba ni Jesus naaplikar la ha nagdesisyon nga magin solo ha bug-os niya nga kinabuhi basi magin bug-os nga nakasentro ha iya mga toka ha pag-alagad ha Dios? (1 Kor. 7:34, 35) Diri man. Tagda an kahimtang han usa nga Kristiano nga bangin naruruyag mag-asawa kondi ha yana waray hinkikit-an nga angayan nga magin asawa. “Hinin bag-o la, usa han akon katrabaho nga diri Saksi an diri-ginlalaoman nga nagsiring nga karuyag niya ako pakasalan,” siring ni Ana, daraga nga sobra 30 anyos na. “Baga hin nalipay ako, kondi akon dayon ginpugngan an akon inaabat tungod kay karuyag ko nga makaasawa hin makakabulig ha akon nga magin mas duok kan Jehova.”

An hingyap nga mag-asawa ‘ha Ginoo’ nabulig ha damu nga solo nga Kristiano nga kababayin-an pariho kan Ana nga malikyan an pag-asawa hin diri-tumuroo. a (1 Kor. 7:39; 2 Kor. 6:14) Tungod ha pagsunod ha sagdon han Dios, nagdidesisyon hira nga magpabilin nga solo ha sulod hin pipira ka panahon. Paonan-o hira magigin malampuson?

Apresyara an Kapulsanan Hito

An aton disposisyon makakabulig ha aton nga karawaton an usa nga kahimtang nga diri naton karuyag. “Nalilipay ako ha kon ano an may-ada ako ngan diri ko ginhihingyap an mga butang nga waray ako,” siring ni Carmen, daraga nga sobra 40 anyos na. Oo, bangin may-ada mga panahon nga naabat kita hin kamingaw o kapakyasan. Kondi an paghibaro nga naieksperyensyahan liwat ini han damu han aton kabugtoan ha bug-os nga kalibotan makakaaghat ha aton nga magin determinado nga magpadayon ha unhan. Damu na an  ginbuligan ni Jehova nga magin malampuson ha pagin solo ngan makalampos ha iba pa nga kakurian.—1 Ped. 5:9, 10.

Nadiskobrehan han damu nga kabugtoan an kapulsanan han pagin solo. “Para ha akon, an sekreto basi magin malipayon amo an pag-apresyar han mga kapulsanan han anoman nga kahimtang nga imo naieksperyensyahan,” siring ni Ester, daraga nga mga 35 anyos na. “Maaram ako nga mag-asawa man ako o diri, kon akon unahon an Ginhadian, hi Jehova diri mag-aalang paghatag ha akon han bisan ano nga maopay,” siring ni Carmen. (Sal. 84:11) “An akon kinabuhi bangin diri gud sugad han akon karuyag unta mahitabo, kondi malipayon ako ngan padayon nga magigin malipayon.”

Mga Ehemplo ha Biblia ha Pagin Solo

An anak nga babaye ni Jepte waray gud plano nga magpabilin nga solo. Kondi, tungod han saad han iya amay naobligar hiya ha pag-alagad ha santuaryo tikang ha iya pagkabatan-on. Sigurado nga nabag-o hinin diri ginlalaoman nga toka an iya mga plano ngan diri ito uyon ha iya natural nga mga hingyap. Han iya nasantop nga diri hiya mag-aasawa ngan magkakaada hin pamilya, nagmasurub-on hiya ha sulod hin duha ka bulan. Bisan pa hito, ginkarawat niya an iya bag-o nga kahimtang ngan kinaburut-on nga nag-alagad ha santuaryo ha bug-os niya nga kinabuhi. Kada tuig ginkukumendasyonan hiya han iba nga Israelita nga kababayin-an tungod han iya nagsasakripisyo nga disposisyon.—Huk. 11:36-40.

Ha panahon ni Isaias, an iba nga literal nga mga yunuko bangin inabat hin kapakyasan ha ira kahimtang. Waray isaysay ha Biblia kon ano an hinungdan nga nagin mga yunuko hira. Tungod hito nga kahimtang, diri hira mahimo magin tinuod nga membro han kongregasyon han Israel, ngan diri liwat hira makakag-asawa ngan magkakaanak. (Deut. 23:1) Kondi, nasabtan ni Jehova an ira inaabat ngan ginkumendasyonan an ira bug-os-kalag nga pagsunod ha iya kauyonan. Hiya nagsiring nga magkakaada hira hin “handumanan” ngan “ngaran nga dayon” ha iya balay. Karuyag sidngon nga inin magtinumanon nga yunuko magkakaada sigurado nga paglaom nga mabuhi ha waray kataposan ilarom han Mesianiko nga pagmando ni Jesus. Diri gud hira hingangalimtan ni Jehova.—Isa. 56:3-5.

Naiiba gud liwat an kahimtang ni Jeremias. Katapos hiya pilion nga propeta, ginsugo hiya han Dios nga diri mag-asawa tungod kay nabubuhi hiya ha makuri nga panahon ngan tungod han klase han iya toka. Hi Jehova nagsiring: ‘Diri ka kumuha hin asawa, diri ka man mag-angkon hin mga anak nga kalalakin-an o mga anak nga kababayin-an dida hini nga lugar.’ (Jer. 16:1-4) Waray isaysay ha Biblia kon ano an inabat ni Jeremias hini nga mga sugo, kondi ginsisiguro han Biblia nga nalilipay hi Jeremias ha mga pulong ni Jehova. (Jer. 15:16) Paglabay han mga tuig, han gin-ilob ni Jeremias an makangingirhat nga mga kahimtang durante han 18 ka bulan nga paglikusi han Jerusalem, sigurado nga iya nakita an kinaadman ha pagsunod ha sugo ni Jehova nga magpabilin nga solo.—Pagta. 4:4, 10.

Kon Paonan-o Magigin Makapatagbaw an Imo Kinabuhi

An ginhisgotan nga mga tawohan ha Biblia waray mag-asawa, kondi ginsuportahan hira ni Jehova ngan gin-gamit nira an ira kinabuhi ha pag-alagad ha iya. Yana liwat, daku an maibubulig han mapulsanon nga buruhaton basi magin makapatagbaw an aton kinabuhi. Igintagna ha Biblia nga an kababayin-an nga nagpapasamwak han maopay nga sumat magigin sugad hin daku nga panon. (Sal. 68:11) Upod hini an yinukot nga solo nga kababayin-an. Nagin mabungahon an ira ministeryo ngan damu ha ira an ginbendisyonan  hin espirituwal nga mga anak.—Mar. 10:29, 30; 1 Tes. 2:7, 8.

“An akon kinabuhi nagkaada hin direksyon tungod han akon pagpayunir,” siring ni Loli paglabay hin 14 ka tuig nga pagpayunir. “Sugad nga solo, sagipo ako ngan damu an akon buruhaton, nga nakakabulig ha akon nga diri magin masurub-on. Katapos han tagsa nga adlaw naabat ako hin katagbaw tungod kay nakikita ko nga an akon ministeryo nakakabulig gud ha mga tawo. Malipayon ako hinduro.”

Damu nga kabugtoan nga kababayin-an an nag-aram hin iba nga yinaknan ngan nagpahaluag han ira ministeryo pinaagi ha pagsangyaw ha mga tawo nga iba an yinaknan. “Ha syudad nga akon gin-uukyan, damu an langyawanon,” siring ni Ana nga gin-unabi kanina. Nalilipay hiya pagsangyaw ha mga tawo nga nagyayakan hin Franses. “An paghibaro hin yinaknan nga magagamit ko ha pakiistorya ha damu ha ira nag-abri hin bag-o nga teritoryo ngan tungod hito nagin makalilipay gud an akon pagsangyaw.”

An mga solo agsob nga mas gutiay an obligasyon ha pamilya, salit ginsasalingabot han iba ito nga kahimtang basi mag-alagad ha mga lugar nga mas daku an panginahanglan. “Natoo gud ako nga kon mas damu an imo ginbubuhat ha pag-alagad kan Jehova, mas masayon an pagkaada hin duok nga kasangkayan ngan umabat nga ginhihigugma ka,” siring ni Lidiana, daraga nga mga 35 anyos na ngan nag-alagad ha iba nga nasud nga mas daku an panginahanglan. “Damu an akon nagin duok nga kasangkayan nga iba-iba an gintikangan ngan nasyonalidad, ngan an pakigsangkay ha ira nakakapalipay gud ha akon.”

An Biblia nag-unabi kan Felipe nga ebanghelisador nga may upat nga anak nga daraga nga nananagna. (Buh. 21:8, 9) Sigurado nga madasigon liwat hira pariho han ira amay. Gin-gamit ba nira an ira regalo ha panagna para ha kapulsanan han ira igkasi-Kristiano ha Cesarea? (1 Kor. 14:1, 3) Yana, damu an solo nga kababayin-an nga nagpaparig-on liwat ha iba pinaagi han ira regular nga pagtambong ngan pagkomento ha mga katirok.

Ha luyo nga bahin, hi Lydia—usa nga Kristiano ha Filipos han siyahan nga siglo—ginkumendasyonan ha Biblia tungod han iya pagkamaabiabihon. (Buh. 16:14, 15, 40) Posible nga solo o balo hiya nga mahinatagon hinduro ngan tungod hito nakaeksperyensya hin makalilipay nga pakig-upod ha mga nagbibiyahe nga paramangno sugad kanda Pablo, Silas, ngan Lukas. An pagin mahinatagon nagriresulta liwat hin sugad hito nga mga bendisyon yana.

Pagtagbaw han Panginahanglan nga Umabat nga Ginhihigugma Kita

Labot pa ha pagin okupado ha mapulsanon nga buruhaton nga naghahatag hin katagbaw ha kinabuhi, kita ngatanan may-ada panginahanglan nga umabat nga ginhihigugma kita. Paonan-o matatagbaw han mga solo ito nga panginahanglan? Siyahan, pirme aada hi Jehova ha paghigugma, pagparig-on, ngan pamati ha aton. May mga panahon nga hi Hadi David inabat nga ‘nag-uusahan ngan kinukurian,’ kondi maaram hiya nga pirme hiya makakadaop kan Jehova basi mangaro hin bulig. (Sal. 25:16; 55:22) Hiya nagsurat: “Kon an akon amay ngan an akon iroy magpasibaya ha akon, dida hini kukuhaon ako ni Jehova.” (Sal. 27:10) Gin-aaghat han Dios an ngatanan niya nga surugoon nga magin duok ha iya ngan magin duok nga kasangkayan niya.—Sal. 25:14; Jak. 2:23; 4:8.

Dugang pa, ha sulod han aton organisasyon ha bug-os nga kalibotan, makakaagi liwat kita hin espirituwal nga mga amay, iroy, ngan kabugtoan nga an ira gugma makakapalipay ha aton. (Mat. 19:29; 1 Ped. 2:17) Damu nga solo nga Kristiano an natatagbaw gud ha pagsunod han susbaranan ni Dorcas, nga “puno hin mag-opay nga mga buhat, ngan han panlimos.” (Buh. 9:36, 39) “Bisan diin ako kumadto, pirme ako namimiling ha kongregasyon hin tinuod nga mga sangkay  nga maghihigugma ngan mabulig ha akon kon masurub-on ako,” siring ni Loli. “Basi maparig-on an sugad nga pagkasarangkay, nangangalimbasog ako nga magpakita hin gugma ngan interes ha iba. Nag-alagad ako ha walo nga kongregasyon, ngan pirme ako nakakaagi hin tinuod nga kasangkayan. Kasagaran na nga diri ko hira mga kaedad—an iba mga edaran na ngan an iba liwat mga tinedyer.” Ha tagsa nga kongregasyon may-ada mga nanginginahanglan hin gugma ngan kaupod-upod. An pagpakita hin sinsero nga interes daku gud nga bulig ha ira ngan makakatagbaw han aton mismo hingyap nga maghigugma ngan higugmaon.—Luk. 6:38.

An Dios Diri Mahingangalimot

Iginpapakita han Biblia nga an ngatanan nga Kristiano kinahanglan magsakripisyo ha magkalain-lain nga paagi tungod kay nabubuhi kita ha makuri nga mga panahon. (1 Kor. 7:29-31) Adton nagpapabilin nga solo tungod han ira determinasyon nga sundon an sugo han Dios nga mag-asawa la hin igkasi-tumuroo takos gud hin hilarom nga pagtahod ngan konsiderasyon. (Mat. 19:12) Kondi inin darayawon nga pagsakripisyo diri nangangahulogan nga diri hira mahimo magin tinuod nga malipayon.

“An akon makapatagbaw nga kinabuhi nadepende ha akon relasyon kan Jehova ngan ha akon pag-alagad ha iya,” siring ni Lidiana. “May-ada ako kilala nga mga inasaw-an nga malipayon ngan may-ada liwat diri malipayon. Tungod hini kombinsido ako nga an akon kalipay diri nadepende ha kon mag-aasawa ba ako ha tidaraon o diri.” Sugad han iginpatin-aw ni Jesus, an kalipay nadepende labi na ha paghatag ngan pag-alagad, usa nga butang nga mahihimo han ngatanan nga Kristiano.—Juan 13:14-17; Buh. 20:35.

Sigurado nga an pinakadaku nga hinungdan han aton kalipay amo an kahibaro nga bibendisyonan kita ni Jehova tungod han anoman nga pagsakripisyo naton ha pagbuhat han iya kaburut-on. Ginpapasarig kita han Biblia: “An Dios diri nga diri matadong, nga hikalimtan niya an iyo buhat ngan an iyo gugma nga iyo iginpakita tungod ha iya ngaran.”—Heb. 6:10.

[Footnote]

[Blurb ha pahina 25]

“Nalilipay ako ha kon ano an may-ada ako ngan diri ko ginhihingyap an mga butang nga waray ako.”—Carmen

[Retrato ha pahina 26]

Malipayon hira Loli ngan Lidiana ha pag-alagad ha mga lugar nga mas daku an panginahanglan

[Retrato ha pahina 27]

Gin-aaghat han Dios an ngatanan niya nga surugoon nga magin duok ha iya