Magin ‘Madasigon ha Mag-opay nga Buhat’!
Magin ‘Madasigon ha Mag-opay nga Buhat’!
“[Hi Jesus] naghatag han iya kalugaringon tungod ha aton, ha pagtubos ha aton tikang ha ngatanan nga magraot, ngan pagputli tungod ha iya hin usa nga katawohan nga iya kalugaringon, nga magkasindak [“madasigon,” NW] ha mga mag-opay nga buhat.”—TITO 2:14.
1. Ano an nahitabo ha templo han inabot hi Jesus han Nisan 10, 33 K.P.?
NISAN 10, 33 K.P. adto, pipira na la ka adlaw antes han Paskua. Nagpakadto ha templo an damu nga magsiringba nga nagpapamulat gud hito. Ano an mahitatabo kon umabot hi Jesus? Tulo nga parasurat han Ebanghelyo—hira Mateo, Markos, ngan Lukas—an nag-aasoy nga duha ka beses nga ginpaiwas ni Jesus an namamaligya ngan namamalit didto. Iya pinamaliskad an mga lamesa han magbaralyo hin kwarta ngan an mga lingkoran han namamaligya hin sarapati. (Mat. 21:12; Mar. 11:15; Luk. 19:45) Waray magluya an kadasig ni Jesus tikang nga ginbuhat niya ito tulo ka tuig na an naglabay.—Juan 2:13-17.
2, 3. Paonan-o kita nahibaro nga nadasig hi Jesus diri la ha paglimpyo han templo?
2 Ipinapakita han asoy ni Mateo nga hito nga okasyon nadasig hi Jesus diri la ha paglimpyo han templo. Gintambal liwat niya an mga buta ngan piol nga dinaop ha iya didto. (Mat. 21:14) Gin-unabi ni Lukas an iba pa nga ginbuhat ni Jesus. “Hiya ha adlaw-adlaw nanunutdo didto ha templo.” (Luk. 19:47; 20:1) Salit nakita gud an kadasig ni Jesus ha iya ministeryo.
3 Paglabay han panahon, hi apostol Pablo nagsurat kan Tito ngan nagsaysay nga hi Jesus “naghatag han iya kalugaringon tungod ha aton, ha pagtubos ha aton tikang ha ngatanan nga magraot, ngan pagputli tungod ha iya hin usa nga katawohan nga iya kalugaringon, nga magkasindak [“madasigon,” NW] ha mga mag-opay nga buhat.” (Tito 2:14) Ha ano nga paagi kita yana magigin ‘madasigon ha mag-opay nga buhat’? Ngan paonan-o kita madadasig ha susbaranan han mga hadi han Juda?
Kadasig ha Pagsangyaw Ngan Pagtutdo
4, 5. Paonan-o ipinakita han upat nga hadi han Juda nga madasigon hira ha mag-opay nga buhat?
4 Hira Asa, Jehosapat, Hesekia, ngan Josia nag-organisa hin kampanya ha pagkuha han idolatriya ha Juda. Ginbungkag ni Asa ‘an lain nga mga halaran, ngan higtaas nga lugar, ngan pinamulod an mga harigi, ngan pinangutod an mga Aserim’ o sagrado nga poste. (2 Kron. 14:3) Tungod han kadasig ni Jehosapat ha pagsingba kan Jehova, “pinanguha niya an higtaas nga mga lugar ngan an mga Aserim tikang ha Juda.”—2 Kron. 17:6; 19:3. a
5 Katapos han pito ka adlaw nga sagrado nga selebrasyon han Paskua nga gin-organisa ni Hesekia ha Jerusalem, ‘an bug-os nga Israel nga nakada kinadto ha mga bungto han Juda ngan pinan-gun-ob an mga harigi, pinamulod an mga Aserim, ngan pinamungkag an higtaas nga lugar ngan an mga halaran han bug-os nga Juda ngan Benjamin, didto ha Epraim liwat ngan ha Manases, ngada nga ira nagunaw ini ngatanan.’ (2 Kron. 31:1) Naghadi hi Josia han otso anyos pa la hiya. An Kasuratan nasiring: “Ha ikawalo ka tuig han iya paghadi samtang nga hiya batan-on pa, hiya nagtikang pangita han Dios ni David nga iya amay; ngan ha ikanapulo kag duha ka tuig iya tinikangan an pag-uray han Juda ngan han Jerusalem tikang ha higtaas nga mga lugar, ngan ha mga Aserim, ngan ha mga ladawan nga ginuhitan, ngan ha mga ladawan nga hinurma.” (2 Kron. 34:3) Kon sugad, iton upat nga hadi madasigon ha mag-opay nga buhat.
6. Kay ano nga an aton pagsangyaw maipapariho ha mga kampanya han magtinumanon nga hadi ha Juda?
6 Yana nakikigbahin liwat kita ha kampanya basi buligan an mga tawo nga bayaan an palso nga katutdoan han relihiyon, upod na an idolatriya. Pinaagi han aton pagsangyaw, nakakaistorya naton an ngatanan nga klase hin tawo. (1 Tim. 2:4) Nahinunumdoman han usa nga daragita ha Asya an rituwal nga ginbubuhat han iya nanay ha atubangan han damu nga imahen ha ira balay. Tungod kay nangatadongan an daragita nga diri ngatanan nga imahen makakagrepresentar ha matuod nga Dios, agsob nga nag-aampo hiya nga makilala unta niya kon hin-o ito nga Dios. Han inabrihan niya an nagtuktok ha ira purtahan, nakada an duha nga Saksi nga karuyag bumulig ha iya basi hibaroan an ngaran han matuod nga Dios, hi Jehova. Ngan mapasalamaton gud hiya nga hinbaroan niya an kamatuoran mahitungod ha mga idolo! Yana madasigon na hiya ha pagsangyaw ngan pagbulig ha iba ha espirituwal.—Sal. 83:18; 115:4-8; 1 Juan 5:21.
7. Paonan-o naton masusubad an mga magturutdo nga naglibot ha bug-os nga nasud ha panahon ni Jehosapat?
7 Kon nagsasangyaw kita, nakukobrehan ba naton hin maopay an aton teritoryo? Makapainteres nga ha ikatulo ka tuig han pagmando ni Jehosapat nagsugo hiya hin lima nga prinsipe, siyam nga Lebita, ngan duha nga saserdote ha paglibot ha bug-os nga nasud basi tutdoan an katawohan han balaud ni Jehova. Epektibo gud ito salit an katawohan ha nakapalibot nga nasud nahadlok kan Jehova. (Basaha an 2 Kronikas 17:9, 10.) Pinaagi ha pagbisita ha mga balay ha magkalain-lain nga oras ngan adlaw, posible nga makaistorya naton an iba nga membro han pamilya.
8. Paonan-o naton mapapauswag an aton pagsangyaw?
8 Damu nga surugoon han Dios yana an disidido bumalhin ha lugar nga mas nanginginahanglan hin madasigon nga mga Saksi. Mahihimo mo ba ito? An iba ha aton nga diri makakabalhin mahimo magsangyaw ha aton teritoryo ha mga tawo nga iba an yinaknan. Tungod kay iba-iba an nasyonalidad han nakakaistorya ni Ron ha iya teritoryo, ha edad nga 81 hinbaroan niya an pangumusta ha 32 nga yinaknan! Bag-o la nga iginkatapo niya ha kalsada an Aprikano nga mag-asawa ngan ginkumusta hira ha ira yinaknan nga Yoruba. Ginpakianhan nira hi Ron kon nahingadto na hiya ha Aprika. Han binaton hiya nga waray pa, nagpakiana hira kon paonan-o hiya nahibaro han ira yinaknan. Tungod hito nakasangyaw hiya. Ginkarawat dayon nira an mga magasin ngan iginhatag an ira adres. Iginpasa ito ni Ron ha kongregasyon han lugar diin naukoy an mag-asawa basi madumarahan hira hin pag-aram ha Biblia.
9. Kay ano nga importante an pagbasa han Biblia kon nagsasangyaw kita? Paghatag hin ehemplo.
9 An mga magturutdo nga ginsugo ni Jehosapat ha paglibot ha bug-os nga nasud may-ada dara nga “basahon han balaud ni Jehova.” Ha bug-os nga kalibotan nangangalimbasog kita nga tutdoan an mga tawo ha Biblia, tungod kay Pulong ito han Dios. Ipinapakita naton nga importante an Biblia kon binabasa naton ito mismo ha iba. Pananglitan, usa nga tagbalay an nagsiring kan Linda nga naistrok an iya bana ngan kinahanglan niya mangnoan. An tagbalay nagsiring: “Diri ako maaram kon ano an akon nabuhat salit gintugotan han Dios nga mahitabo ini ha akon.” Binaton hi Linda: “Mahimo ba ako magbasa hin makakaliaw ha imo?” Katapos, iya ginbasa an Jakobo 1:13 ngan nagsiring: “An pag-antos naton ngan han aton mga hinigugma diri sirot han Dios.” Tungod hito, ginhangkopan hiya han tagbalay. Nagsiring hi Linda: “Naliaw ko hiya pinaagi ha pagbasa han Biblia. Usahay an mga teksto nga aton ginbabasa waray pa gud mabatii han tagbalay.” Sugad nga resulta, natikangan an regular nga pag-aram han Biblia.
Mga Batan-on nga Madasigon nga Nag-aalagad
10. Kay ano nga maopay nga susbaranan hi Josia ha Kristiano nga mga batan-on yana?
10 Kon aton paghisgotan utro an susbaranan ni Josia, hibabaroan naton nga nangalimbasog hiya para ha tinuod nga pagsingba sugad nga batan-on ngan mga 20 anyos hiya han gintikangan niya an kampanya kontra ha idolatriya. (Basaha an 2 Kronikas 34:1-3.) Pariho hito an kadasig han damu nga batan-on yana ha ira pagsangyaw.
11-13. Ano nga mga leksyon an aton mahibabaroan ha mga batan-on yana nga madasigon nga nag-aalagad kan Jehova?
11 Hi Hannah nga taga-Inglatera, 13 anyos hadto han nag-aram hiya ha eskwelahan han Pranses nga yinaknan ngan hinbaroan niya nga naorganisa an grupo nga nagyayakan hin Pranses ha kahirani nga bungto. Naruyag an iya tatay nga updan hiya ha pagtambong ha mga katirok didto. Yana 18 na hiya ngan madasigon nga nagsasangyaw ha Pranses nga yinaknan sugad nga regular payunir. Mahimo ka ba liwat mag-aram hin iba nga yinaknan ngan bumulig ha mga tawo nga makilala hi Jehova?
12 Nadasig gud hi Rachel han nakita niya an video nga Pursue Goals That Honor God. Mahitungod han iya ginhunahuna han nagtikang hiya mag-alagad kan Jehova han 1995, hiya nagsiring: “Kahuna ko nga ginbubuhat ko na an gimaopayi uyon ha kamatuoran.” Nagsiring pa hiya: “Katapos makita ito nga drama, nasantop ko nga kulang pa an akon ginbubuhat ha damu na ka tuig. Kinahanglan depensahan ko an kamatuoran ngan hunahunaon ngan pangalimbasogan gud an akon pag-alagad ngan personal nga pag-aram.” Yana inabat ni Rachel nga mas madasigon hiya ha pag-alagad kan Jehova. Ano an resulta hito? “Nagin marig-on an akon relasyon kan Jehova. Mas kinasingkasing na an akon pag-ampo, mas hilarom ngan makapatagbaw an akon pag-aram ngan mas tinuod ha akon an mga asoy ha Biblia. Salit, malipayon gud ako ha pagsangyaw ngan tagbaw samtang nakikita ko nga nakakaliaw ha iba an mga pulong ni Jehova.”
13 Hi Luke usa nga batan-on nga nadasig han usa pa nga video nga Young People Ask—What Will I Do With My Life? Katapos makita ini, hiya nagsurat: “Ginhunahuna ko kon ano an ginbubuhat ko ha akon kinabuhi.” Nagsiring hiya: “Hadto, gin-aghat ako han iba nga unahon an hitaas nga edukasyon basi magkaada pinansyal nga seguridad ngan katapos isunod an espirituwal nga mga tumong. Ito nga pag-aghat diri nakakabulig ha espirituwal nga pag-uswag; lugod nagpapaluya ito.” Batan-on nga kabugtoan, kay ano nga diri gamiton an iyo hinbaroan ha eskwelahan ha pagpauswag han iyo ministeryo sugad han ginbuhat ni Hannah? Ngan kay ano nga diri subaron hi Rachel pinaagi ha pagkab-ot han mga tumong nga nagpapasidungog gud ha Dios? Subara hi Luke, nga naglikay ha mga peligro nga nakalit-ag ha damu nga batan-on.
Madasigon nga Sunda an mga Pahamangno
14. Ano nga klase hin pagsingba an inuuyonan ni Jehova, ngan kay ano nga makuri an pagbuhat hito yana?
14 An katawohan ni Jehova kinahanglan magin limpyo kon karuyag nira nga uyonan an ira pagsingba. Hi Isaias nagpahamangno: ‘Iwas kamo, iwas kamo, lakat kamo tikang didto, ayaw kawkaw hin mahugaw nga butang; gawas tikang ha butnga niya [Babilonya]; maglinis kamo, kamo nga nagdadara han mga garamiton ni Jehova.’ (Isa. 52:11) Damu ka tuig na antes isurat ito ni Isaias, gin-organisa ni Hadi Asa an kampanya ha pagwara han imoralidad ha Juda. (Basaha an 1 Hadi 15:11-13.) Ngan paglabay hin mga siglo, ginsumatan ni apostol Pablo hi Tito nga iginhatag ni Jesus an iya kalugaringon ha pagputli han iya mga sumurunod basi hira magin ‘katawohan nga iya kalugaringon, nga madasigon ha mag-opay nga buhat.’ (Tito 2:14) Ha imoral nga kalibotan yana, diri masayon—labi na ha mga batan-on—an pagpabilin nga limpyo ha moral. Pananglitan, an ngatanan nga surugoon han Dios, batan-on ngan lagas, kinahanglan mangalimbasog nga likyan an pornograpiya nga nakikita ha mga billboard, TV, pelikula, ngan labi na ha Internet.
15. Ano an mabulig ha aton nga kangalasan an maraot?
15 An aton kadasig ha pagsunod ha mga pahamangno han Dios mabulig ha aton nga kangalasan an maraot. (Sal. 97:10; Roma 12:9) Kinahanglan kangalasan naton an pornograpiya basi “malikyan an makusog ngan sugad-magnet nga impluwensya hito,” sumala ha usa nga Kristiano. Basi maibulag an mga metal ha magnet, kinahanglan nga mas makusog an pwersa kay han nakakapadugkot hito. Sugad man, kinahanglan mangalimbasog gud kita basi malikyan an lit-ag han pornograpiya. Kondi mabubuligan kita nga kangalasan ito kon maaram kita han nakakadaot nga epekto hito. Usa nga bugto an nangalimbasog gud nga umundang ha iya nabatasan nga pagkinita hin pornograpiya ha Internet. Iya iginbalhin an kompyuter ha lugar nga nakikita han iya pamilya. Ngan nagin mas determinado hiya nga magin limpyo ha moral ngan madasigon ha mag-opay nga buhat. Diri la ito an iya ginhimo. Tungod kay ginagamit niya an Internet ha iya negosyo, nagdesisyon hiya nga gamiton la ito kon sapit an iya asawa.
Importante an Maopay nga Paggawi
16, 17. Ano an epekto han aton maopay nga paggawi ha nagkikita ha aton? Paghatag hin ehemplo.
16 Maopay gud an paggawi han mga batan-on nga nag-aalagad kan Jehova, ngan gindadayaw gud ini han nagkikita! (Basaha an 1 Pedro 2:12.) Nabag-o an panhunahuna han usa nga binisita ha London Bethel mahitungod ha mga Saksi katapos han iya pagmintinar ha makina han pag-imprinta didto. Naobserbahan ito han iya asawa nga nag-aaram han Biblia kaupod han mga Saksi. Hadto, nadiri an bana nga bumisita an mga Saksi ha ira balay. Kondi pag-uli niya tikang ha pagtrabaho ha Bethel gindayaw gud niya an maopay nga pagtratar ha iya. Siring niya nga waray nagyayakan hin maraot. Waray nagrireklamo ngan murayaw an palibot. Naruyagan gud niya an kadasig han mga batan-on nga nagtatrabaho nga waray sweldo ngan nagamit han ira panahon ngan kusog ha pagbulig nga maipublikar an maopay nga sumat.
17 Sugad man, an kabugtoan nga nagtatrabaho ha sekular basi mangnoan an ira pamilya maopay gud nga empleyado. (Kol. 3:23, 24) Agsob nga nagriresulta ini hin mas may seguridad nga trabaho tungod kay pinabibilhan han mga amo an ira kamaduruto ngan diri karuyag nga mawara hira sugad nga mga empleyado.
18. Paonan-o kita magigin ‘madasigon ha mag-opay nga buhat’?
18 An aton pagsarig kan Jehova, pagsunod ha iya mga instruksyon ngan pag-ataman ha aton katirokan nagpapakita han aton kadasig para ha Iya balay. Dugang pa, karuyag naton makigbahin hin bug-os ha pagsangyaw han Ginhadian ngan paghimo hin disipulo. Batan-on man o lagas, kon nagkikinabuhi kita uyon ha mga prinsipyo para ha putli nga pagsingba, makakarawat naton an damu nga kapulsanan. Ngan padayon nga makikilala kita sugad nga katawohan nga ‘madasigon ha mag-opay nga buhat.’—Tito 2:14.
[Footnote]
a Bangin ginbungkag ni Asa an higtaas nga lugar nga ginamit ha pagsingba ha palso nga mga dios kondi waray niya bungkaga adton ginamit han katawohan ha pagsingba kan Jehova. O bangin gintukod utro an higtaas nga lugar ha ikatarapos han iya pagmando ngan ginbungkag ito han iya anak nga hi Jehosapat.—1 Hadi 15:14; 2 Kron. 15:17.
Mahitungod han mga susbaranan ha Biblia ngan yana, ano an imo hinbaroan ha
• pagin madasigon ha pagsangyaw ngan pagtutdo?
• pagin ‘madasigon ha mag-opay nga buhat’ han Kristiano nga mga batan-on?
• paglikay ha nakakadaot nga mga batasan?
[Mga Pakiana]
[Retrato ha pahina 13]
Ginagamit mo ba pirme an Biblia ha imo pagsangyaw?
[Retrato ha pahina 15]
An pag-aram hin iba nga yinaknan ha eskwelahan makakabulig ha imo nga mag-uswag ha ministeryo