Mga Pakiana Tikang ha mga Magbarasa

Hi Jesus nagsangyaw na ha bug-os nga nasud han Israel. Kon sugad, kay ano nga nakasiring hi apostol Pedro nga an mga Judio ngan an ira mga magmarando ginios nga “waray sarabotan” han ira iginpapatay hi Jesus?—Buh. 3:17.

Han hi apostol Pedro nakighisgot ha usa nga grupo han mga Judio mahitungod han ira bahin ha pagpatay han Mesias, hiya nagsiring: “Ako maaram, nga iyo ini ginbuhat hin waray sarabotan, sugad man an iyo mga magburuot.” (Buh. 3:14-17) An iba nga mga Judio bangin waray gud makakilala nga hi Jesus an Mesias o waray makasabot han iya katutdoan. An iba liwat bangin ginios nga waray sarabotan tungod han kawaray hingyap nga lipayon an Dios, pagpasulabi, kaawa, ngan kapungot.

Tagda kon paonan-o an kawaray hingyap nga lipayon hi Jehova nakaapekto ha panhunahuna han damu nga tawo ha katutdoan ni Jesus. Agsob hiya magtutdo pinaagi hin mga ilustrasyon nga iya iginsasaysay ha ngatanan nga naruruyag magkaada hin dugang nga kahibaro. Kondi, an iba ha ira nabaya nga diri man la nangangalimbasog nga masabtan ito. Ha usa nga higayon, bisan an iba nga disipulo nahipakdol ha simboliko nga mga pulong nga iya gin-gamit. (Juan 6:52-66) Waray nira masantop nga pinaagi han mga ilustrasyon ni Jesus, nasasarihan hira kon andam ba hira nga bag-ohon an ira panhunahuna ngan mga buhat. (Isa. 6:9, 10; 44:18; Mat. 13:10-15) Ira liwat ginbalewaray an usa nga tagna nga an Mesias magamit hin mga ilustrasyon ha iya pagtutdo.—Sal. 78:2.

An iba nagsalikway han mga katutdoan ni Jesus tungod han pagpasulabi. Han nagtutdo hiya ha sinagoga han iya inuukyan nga bungto han Nasaret, an mga tawo “nanhipausa.” Kondi imbes nga karawaton hi Jesus sugad nga Mesias, nagpakiana hira mahitungod han iya gintikangan: “Diin tikang ini nga mga bagay nga aada hini nga tawo? . . . Diri ba ini an panday nga anak ni Maria, nga bugto ni Jakobo, ngan ni Jose, ngan ni Judas, ngan ni Simon? Ngan diri ba hahani ha aton an iya mga bugto nga kababayin-an?” (Mar. 6:1-3) Para ha mga taga-Nasaret, nagin waray pulos an iya katutdoan tungod han iya ubos nga gintikangan.

Kumusta man an mga lider han relihiyon? Damu ha ira an haros waray gud magtagad kan Jesus tungod han puropariho hito nga mga hinungdan. (Juan 7:47-52) Ginsalikway liwat nira an iya katutdoan tungod kay naaawa hira kay nahingangadto ha iya an atensyon han mga tawo. (Mar. 15:10) Ngan damu han prominente nga tawo an nasina gud han iya ginhukman hira tungod han ira pagkasalingkapaw ngan panlimbong. (Mat. 23:13-36) Tungod han ira tinuyo nga diri pakasabot, husto la nga ginhukman hira ni Jesus: “Kairo niyo, mga makinaadmananon han Kasugoanan! Kay iyo ginkuha an yawi han kinaadman, ngan kamo ngahaw waray sumulod [ha Ginhadian]; ngan an mga naisurulod, iyo gindidid-an.”—Luk. 11:37-52.

Ha sulod hin tulo ngan tunga ka tuig, ginsangyaw ni Jesus an maopay nga sumat ha bug-os nga nasud. Nagbansay liwat hiya hin damu pa nga iba ha pagbuhat hito nga buruhaton. (Luk. 9:1, 2; 10:1, 16, 17) Epektibo gud hi Jesus ngan an iya mga disipulo ha panutdo salit an mga Pariseo nagreklamo: “Kitaa, an kalibotan nasunod ha iya.” (Juan 12:19) Salit diri masisiring nga an kadam-an han mga Judio waray gud sarabotan. Bisan pa hito, ha kabug-osan nagpabilin hira nga “waray sarabotan” ha pagin Mesias ni Jesus. Mahimo unta nira mapahilarom an ira kahibaro ngan gugma ha Mesias, kondi waray nira buhata ito. An iba ha ira binulig pa ngani pagpapatay kan Jesus. Salit, damu ha ira an ginsagdonan ni apostol Pedro: “Busa, magbasol, ngan magbalik kamo, basi an iyo mga sala mapara, basi umabot an mga panahon nga mahalayahay tikang ha atubangan han Ginoo. Ngan iya igpapadara hi Kristo, nga gintungdan ngada ha iyo nga amo hi Jesus.” (Buh. 3:19, 20) Makatirigamnan nga yinukot nga Judio an namati, upod na an ‘daku nga kadam-an han mga saserdote.” Waray na hira gumios nga waray sarabotan. Lugod, nagbasol hira ngan nakakakarawat han pag-uyon ni Jehova.—Buh. 2:41; 4:4; 5:14; 6:7.