Pagtapod hin Responsabilidad—Kay Ano Ngan Paonan-o Bubuhaton Ito?

AN PAGTAPOD hin responsabilidad mas maiha na kay han planeta nga Tuna. Ginlarang ni Jehova an iya bugtong nga Anak ngan gin-gamit hiya sugad nga “labaw nga magburuhat” ha paghimo han uniberso. (Prob. 8:22, 23, 30; Juan 1:3) Han ginlarang han Dios an siyahan nga mag-asawa, ginsugo niya hira nga ‘pun-on an tuna ngan pagtag-iyahon ito.’ (Gen. 1:28) Gintokahan han Maglalarang an mga tawo nga pahaluagon an Paraiso han Eden ngan pun-on an tuna. Oo, tikang ha tinikangan, an pagtapod hin responsabilidad ginbubuhat na ni Jehova ngan han mga nag-aalagad ha iya.

Ano an nahiuupod ha pagtapod hin responsabilidad? Kay ano nga an Kristiano nga mga tigurang sadang mahibaro pagtapod ha iba hin mga toka ha kongregasyon, ngan paonan-o nira bubuhaton ito?

Ano an Nahiuupod ha Pagtapod hin Responsabilidad?

An pagtapod hin responsabilidad nag-uupod han pagpili ha iba nga magin imo representante o paghatag ha iya hin awtoridad. Salit an pagtapod hin responsabilidad nangangahulogan hin pagpabulig ha iba basi matuman an mga katuyoan. Natural la nga magresulta ito hin pagpaangbit hin awtoridad.

An mga gintokahan ha Kristiano nga kongregasyon ginlalaoman nga magtuman han ira  toka, magreport han kahimtang hito, ngan kasagaran na nga mangaro hin suhestyon o sagdon ha nagtapod hito nga responsabilidad. Kondi, an may pinakamabug-at nga responsabilidad amo an bugto nga nagpabulig hito nga buruhaton. Kinahanglan panginanoon niya an dalagan han trabaho ngan magsagdon kon ginkikinahanglan. Pero bangin magpakiana an iba, ‘Kay ano nga itapod pa ha iba an buruhaton kon mahihimo mo man ito?’

Kay Ano nga Itapod ha Iba an Buruhaton?

Hunahunaa ini: Ginlarang ni Jehova an iya bugtong nga Anak ngan ginpabulig hiya ha paglarang han ngatanan iba pa nga butang. Oo, pinaagi ha iya “ginbuhat an ngatanan nga mga buhat, aadto ha mga langit ngan hahani ha tuna, an mga bagay nga sadang makita ngan diri sadang makita.” (Kol. 1:16) Mahihimo unta han Maglalarang an ngatanan bisan kon waray kabulig, kondi karuyag niya nga maeksperyensyahan liwat han iya Anak an kalipay han pakigbahin ha mapulsanon nga buruhaton. (Prob. 8:31) Nakabulig ini ha Anak nga mahibaroan hin dugang pa an mga kalidad han Dios. Gin-gamit han Amay ito nga higayon sugad nga paagi ha pagbansay han iya bugtong nga Anak.

Han hi Jesu-Kristo nakanhi ha tuna, iya ginsubad an iya Amay ha pagtapod ha iba hin mga responsabilidad. Hinay-hinay nga ginbansay niya an iya mga disipulo. Ginpauna niya ha pipira nga lugar an 12 nga apostol ngan ha urhi an 70 pa nga disipulo basi manguna ha pagsangyaw didto. (Luk. 9:1-6; 10:1-7) An ira pagsangyaw nagin pundasyon para kan Jesus, nga ha urhi nagsangyaw liwat hito nga mga lugar. Han binaya hiya ha tuna, igintapod niya ha iya binansay na nga mga disipulo an mas dagku nga responsabilidad, pati na an pagsangyaw ha bug-os nga kalibotan.—Mat. 24:45-47; Buh. 1:8.

An pagtapod hin responsabilidad ngan pagbansay nagin komon ha Kristiano nga kongregasyon. Hi apostol Pablo nagsiring kan Timoteo: “Itubyan ini ngadto hin katataporan nga mga tawo nga magtututdo liwat han iba.” (2 Tim. 2:2, An Maopay nga Sumat) Oo, kinahanglan bansayon han mga eksperyensyado an iba, nga magbabansay liwat ha iba pa.

Kon igintatapod han usa nga tigurang an iba nga buruhaton nga igintoka ha iya, maipapaangbit niya ha iba an kalipay han pagtutdo ngan pagmangno. Tungod kay kinakarawat nga limitado an mga abilidad han tawo, an mga tigurang may-ada mas daku nga hinungdan nga magpabulig ha iba ha mga responsabilidad ha kongregasyon. An Biblia nasiring: “An kaupod han mga ubos amo an kinaadman.” (Prob. 11:2) An pagin mapainubsanon nag-uupod han pagkilala han imo mga limitasyon. Kon maglulugaring ka pagbuhat han ngatanan, bangin kapuyon ka hinduro ngan mawarayan ka na panahon ha imo pamilya. Salit maaramon gud an pagtapod hin responsabilidad ha iba. Pananglitan, tagda an koordinetor han lawas han mga tigurang. Mahimo hiya magpabulig ha iba nga tigurang pag-awdit han kwenta han kongregasyon. Pinaagi ha pag-usisa han mga rekord, mahibabaroan hito nga mga tigurang an kahimtang ha pinansyal han kongregasyon.

An pagtapod hin responsabilidad diri la naghahatag ha gintaporan hin higayon nga magkaada han ginkikinahanglan nga kaabtik ngan eksperyensya, kondi an nagtapod nagkakaada liwat higayon nga obserbahan an abilidad han iya gintokahan. Salit pinaagi ha pagtapod ha iba hin angayan nga mga buruhaton ha kongregasyon, mapuproybahan han mga tigurang an mga potensyal nga magin ministeryal.—1 Tim. 3:10.

Sugad man, pinaagi han pagtapod hin responsabilidad, naipapakita han mga tigurang an ira pagsarig ha iba. Ginbansay ni Pablo hi Timoteo pinaagi han pagpaupod ha iya ha pagmisyonero. Nagin duok hira ha usa kag usa. Gintawag ni  Pablo hi Timoteo nga iya “anak nga matuod ha pagtoo.” (1 Tim. 1:2) Ha pariho nga paagi, nagin duok hi Jehova ngan hi Jesus samtang magkaupod nga ginlalarang nira an ngatanan iba pa nga butang. Pinaagi han pagtapod hin buruhaton ha iba, an mga tigurang mahimo magin duok ha ira.

Kon Kay Ano nga Nag-aalang an Iba

May mga tigurang nga nakukurian pagtapod hin responsabilidad ha iba bisan kon maaram hira han mga kapulsanan hito. Bangin nag-aalang hira tungod kay naabat hira nga maiibanan an ira awtoridad. Bangin naghuhunahuna hira nga kinahanglan kontrolado nira pirme an ngatanan. Kondi, hinumdumi nga antes hi Jesus sumaka ha langit, gintaporan niya an iya mga disipulo hin mabug-at nga toka tungod kay maaram hiya nga mas daku an ira mahihimo kay ha iya!—Mat. 28:19, 20; Juan 14:12.

An iba nga tigurang bangin nagtapod hadto hin responsabilidad kondi waray matagbaw ha mga resulta hito. Bangin mahunahuna nira nga mas maopay ngan madagmit kon hira an magtrabaho hito. Kondi, tagda an susbaranan ni Pablo. Maaram hiya nga mapulsanon an pagtapod hin responsabilidad, kondi maaram liwat hiya nga diri pirme matutuman han mga ginbabansay an iya ginlalaoman. Ha iya siyahan nga pagbiyahe sugad nga misyonero, iya ginbansay an iya batan-on nga kaupod nga hi Markos. Nasubo gud hi Pablo han binaya hi Markos ha iya toka ngan inuli ha ira. (Buh. 13:13; 15:37, 38) Kondi waray niya ito himoa nga hinungdan nga diri na magbansay hin iba. Sugad han gin-unabi na, igin-upod niya an batan-on nga hi Timoteo ha iya pagmisyonero. Han hi Timoteo andam na pagkarawat hin mas mabug-at nga responsabilidad, ginbilin hiya ni Pablo ha Efeso ngan gintaporan hin awtoridad ha pagpili hin mga paramangno ngan ministeryal ha kongregasyon.—1 Tim. 1:3; 3:1-10, 12, 13; 5:22.

Ha pariho nga paagi, an mga tigurang yana diri sadang umundang ha pagbansay hin mga bugto tungod la kay may usa nga napakyas. Maaramon ngan importante nga mahibaro ha pagsarig ngan pagbansay ha iba. Kondi, ano an sadang tagdon han mga tigurang kon nagtatapod hira hin responsabilidad ha iba?

Kon Paonan-o an Pagtapod hin Responsabilidad

Ha pagtapod hin mga responsabilidad, tagda an mga kwalipikasyon han kabugtoan nga imo nahuhunahuna nga tagan hito. Han nanginahanglan hin magdudumara han adlaw-adlaw nga panhatag hin pagkaon ha Jerusalem, an mga apostol nagpili hin ‘pito ka tawo nga mag-opay an kadungganan, puno han espiritu ngan kinaadman.’ (Buh. 6:3) Kon imo tokahan an diri matataporan, bangin diri gud niya ito mahihimo. Salit gudtiay nga toka la anay an ihatag. Kon magmatinumanon an imo gintokahan, bangin maaakos niya an dugang nga responsabilidad.

Kondi labaw pa hito an nahiuupod. Iba-iba an personalidad ngan abilidad. Iba-iba liwat an eksperyensya han kada tagsa. An bugto nga makisangkayon bangin magigin maopay nga attendant, ngan an usa nga mahapsay ngan organisado bangin magigin maopay gud nga kabulig han sekretaryo han kongregasyon. An bugto nga babaye nga maopay ha pagdekorasyon bangin puydi taporan ha pag-ayad han mga bukad para ha Memoryal.

Kon nagtatapod hin mga responsabilidad, espisipiko nga isaysay kon ano an ginlalaoman. Antes magsugo hi Juan nga Parabaptis hin mga mensahero ngadto kan Jesus, iya iginsaysay ha ira kon ano an karuyag niya mahibaroan ngan kon ano an ira igpapakiana. (Luk. 7:18-20) Ha luyo nga bahin, han ginsugo ni Jesus an iya mga disipulo nga  tirukon an nahisalin ha pagkaon nga igintagana ha milagroso nga paagi, hira an iya ginpabuot kon paonan-o ito hihimoon. (Juan 6:12, 13) Nadepende gud ito ha klase han buruhaton ngan ha kwalipikasyon han pabubuligon. An nagtoka ngan an gintokahan kinahanglan maaram gud kon ano an ginlalaoman nga mga resulta ngan kon mationan-o kaagsob ipapahibaro ha nagtoka an kahimtang han buruhaton. Kinahanglan maaram hira nga duha kon ano nga bahin han buruhaton an mahimo desisyonan han gintokahan. Kon kinahanglan ito tapuson ha espisipiko nga petsa, bangin mas maaghat an gintokahan kon pag-istoryahan ngan pagkauyonan kon san-o ito sadang matapos imbes nga ipirit la ito ha iya.

An gintokahan sadang hatagan hin pundo, garamiton, ngan bulig kon kinahanglanon. Bangin mas maopay kon ipahibaro ha iba an kahikayan. Han igintapod ni Jesus kan Pedro “an mga yawi han ginhadian han langit,” ginbuhat niya ito ha atubangan han iba nga mga disipulo. (Mat. 16:13-19) Sugad man, may-ada mga kahimtang nga bangin maopay nga ipahibaro ha kongregasyon kon hin-o an gintokahan ha usa nga buruhaton.

Kinahanglan liwat magin mabinantayon. Kon ikaw la gihapon an magkukontrol han buruhaton nga imo na igintapod ha iba, baga ka hin nasiring, “Diri gud ako natapod ha imo.” Oo, may mga panahon nga bangin an resulta diri sugad han imo ginlalaoman. Kondi kon an gintokahan ginhahatagan hin kagawasan kon paonan-o bubuhaton ito, posible gud nga magkakaada hiya kompyansa ngan eksperyensya. Syempre, diri ini nangangahulogan nga pabay-an na la hiya kon paonan-o niya ito ginbubuhat. Bisan kon gintagan ni Jehova an iya Anak hin bahin ha paglarang, binulig pa gihapon hi Jehova ha buruhaton. Hiya nagsiring ha Maabtik nga Magburuhat: “Paghimoon naton an tawo ha aton ladawan.” (Gen. 1:26) Salit pinaagi han imo mga pulong ngan gios, suportahi an buruhaton, ngan kumendasyoni an pangalimbasog han imo gintokahan. Makakabulig ha iya an halipot nga pagrepaso han mga resulta. Kon an toka diri ginbubuhat ha husto nga paagi, ayaw pag-alang ha paghatag hin dugang nga sagdon o bulig. Hinumdumi nga ikaw an may pinakamabug-at nga responsabilidad tungod kay ikaw an nagtoka hito.—Luk. 12:48.

Damu an nakapahimulos han gintaporan hira hin mga buruhaton ha kongregasyon han mga tigurang nga nagpakita ha ira hin tinuod nga interes. Oo, ha pagsubad kan Jehova, an ngatanan nga tigurang kinahanglan mahibaro kon kay ano nga sadang hira magtapod hin responsabilidad ngan kon paonan-o bubuhaton ito.

[Kahon ha pahina 29]

AN PAGTAPOD HIN RESPONSABILIDAD

• usa nga paagi ha pagpaangbit han kalipay ha kalamposan han usa nga buruhaton

• usa nga paagi basi mas damu an mahimo

• usa nga pagpakita hin kinaadman ngan pagkamapainubsanon

• usa nga paagi ha pagbansay ha iba

• usa nga paagi ha pagpakita hin pagsarig ha iba

[Kahon ha pahina 30]

KON PAONAN-O AN PAGTAPOD HIN RESPONSABILIDAD

• Pagpili hin mga indibiduwal nga kwalipikado ha buruhaton

• Isaysay ito hin matin-aw/pakiistorya hin maopay

• Ipatin-aw kon ano an ginlalaoman nga resulta

• Itagana an mga kinahanglanon

• Ipakita nga interesado ka gud ha buruhaton, ngan ipahayag an imo pagsarig ha gintokahan

• Magin andam ha pagkarawat nga ikaw an may-ada pinakamabug-at nga responsabilidad

[Mga Retrato ha pahina 31]

An pagtapod hin responsabilidad nag-uupod han pagtoka ngan panginano han kahimtang han buruhaton