An Kooperasyon Nakakabulig ha Espirituwal nga Pag-uswag

IMPORTANTE gud an kooperasyon ha mga naruruyag magkaada hin pamilya nga mahunahunaon ha espirituwal. Han ginlarang ni Jehova an siyahan nga mag-asawa, iya ginpabug-atan an pagkaimportante han kooperasyon. Kinahanglan makigkooperar hi Eva kan Adan sugad nga iya “kabulig.” (Gen. 2:18) An bana ngan asawa sadang magbinuligay. (Ekles. 4:9-12) Ginkikinahanglan liwat an kooperasyon basi matuman an papel nga iginhatag ni Jehova ha mga kag-anak ngan anak.

Pagsingba han Pamilya

Hira Barry ngan Heidi may-ada lima nga anak. Napamatud-an nira nga an urosa nga pangalimbasog nga magkaada regular nga pag-aram ha Biblia sugad nga pamilya nabulig ha ira nga mag-uswag. Hi Barry nagsaysay: “Ha amon pag-aram, may mga panahon nga gintatagan ko hin gudtiay nga bahin an kabataan. Usahay gintutokahan ko hira nga magbasa hin artikulo ha Awake! ngan isumat ha pamilya an ira hinbaroan. Ginpapraktis liwat namon an isisiring ha pagsangyaw basi an tagsa ha ira may-ada inandam nga presentasyon.” Hi Heidi nagsiring: “Kami ngatanan may-ada listahan hin espirituwal nga mga tumong nga karuyag namon makab-ot, ngan ha panapanahon ginrirepaso namon ito ha pag-aram han pamilya basi mahibaroan an amon pag-uswag.” Naobserbahan liwat hini nga mag-asawa nga an pag-eskedyol hin gab-i nga diri magkita hin TV naghahatag hin higayon ha bug-os nga pamilya nga magbasa.

Mga Katirok han Kongregasyon

Hira Mike ngan Denise may-ada upat nga anak. Paonan-o an kooperasyon nagin mapulsanon ha ira pamilya? Hi Mike nagsiring: “May mga panahon nga bisan kon ginpaplano namon hin maopay nga diri maurhi ha mga katirok, diri ito natutuman, kondi tungod han kooperasyon nahimo namon ito.” Hi Denise nagsaysay: “Han nagtitikadagku an kabataan, an kada usa ha ira gintokahan hin mga buruhaton ha balay. An amon anak nga babaye nga hi Kim nabulig ha pagluto ngan pag-andam han lamesa.” An ira anak nga hi Michael nagsiring: “Kada Martes han gab-i may-ada katirok ha amon balay. Salit naglilimpyo kami ngan ginpaplastar an mga lingkoran.” Hi Matthew, an usa pa nira nga anak, nagsiring liwat: “Ginsisiguro ni Tatay nga ha mga gab-i nga may katirok makauli hiya hin temprano tikang ha trabaho basi buligan kami ha pagpangandam ha pagtambong.” Ano an nagin resulta?

Bawî an Ngatanan nga Pangalimbasog

Hi Mike nagsaysay: “Han 1987 nagpayunir kami ni Denise. Hito nga panahon, tulo han amon anak an nalungon pa ha amon. An duha nagpayunir liwat, ngan an iba nagboluntaryo ha mga proyekto han pagtukod hin mga pasilidad ha Bethel. Nakabulig kami hin 40 nga indibiduwal nga magdedikar ngan magpabawtismo, ngan nakadugang ini ha kalipay han amon pamilya. Nakapribilehiyo liwat an amon pamilya nga magboluntaryo ha mga proyekto ha pagpanukod, bisan ha iba nga nasud.”

Oo, bawî gud an ngatanan nga pangalimbasog han pamilya ha pagkooperar. May-ada ka pa ba nahuhunahuna nga paagi nga mahimo magkooperar an kada tagsa ha iyo pamilya? Makakasiguro ka nga an kooperasyon makakabulig ha iyo nga mas mag-uswag ha espirituwal.

[Retrato ha pahina 28]

An pagpraktis hin mga presentasyon makakabulig ha pamilya nga mag-uswag ha ministeryo ha kanataran