An mga Liso han Kamatuoran Nakaabot ha Higrayo nga Rehiyon

AN Republika han Tuva ha Russia nahimumutang ha durho nga bahin ha sur han Siberia, ngan ha sur ngan este hito aada an Mongolia. Damu nga tawo ha Tuva an naukoy ha higrayo nga komunidad nga makuri maabot han mensahe han Ginhadian. Kondi usa ka higayon, may-ada grupo nga nagbiyahe tikang ha pipira nga higrayo nga lugar han Tuva ngadto ha Kyzyl, an kapital hito, basi tumambong hin seminar. Hinbaroan ito ni Maria, usa nga payunir ha Kyzyl, ngan nahunahuna niya nga talagsahon ini nga higayon ha pagsangyaw han maopay nga sumat ha ira.

Hiya nagsaysay han nahitabo: “An eskwelahan diin ako nagtututdo nag-eskedyol hin seminar mahitungod ha pagsulbad han problema ha pag-abuso ha de-alkohol nga irinmon, droga ngan iba pa. Mga 50 an matambong hito nga tikang ha pinakahigrayo nga rehiyon han Tuva. Upod hito an mga magturutdo, sikologo, paramangno han kaopayan han kabataan, ngan iba pa.” Para kan Maria, maopay ito nga higayon ha pagsangyaw kondi diri masayon. Hiya nagsaysay: “Awdanon ako ngan kinukurian ha diri-pormal nga pagsangyaw. Kondi, nag-ampo ako kan Jehova nga tagan ako hin kaisog nga malamposan an akon kahadlok ngan gamiton ini nga higayon ha pagsangyaw.” Naglampos ba hiya?

Hi Maria nagpadayon: “Nakita ko an Awake! nga naghisgot mahitungod han phobia. Nahunahuna ko nga bangin maruyagan ito hin sikologo, salit gindara ko ito ha eskwelahan. Hito nga adlaw usa han mga maestra nga tinambong ha seminar an kinadto ha akon opisina ngan gintanyag ko ha iya an magasin. Malipayon nga ginkarawat niya ito. Nagsiring pa ngani hiya nga may-ada hiya phobia. Kinabuwasan, gintagan ko hiya han libro nga Questions Young People Ask—Answers That Work, Tomo 1. Malipayon nga ginkarawat liwat niya ito. Tungod han iya positibo nga reaksyon, nahunahuna ko nga bangin maruyag liwat hito an iba nga magturutdo. Salit nagdara ako ha eskwelahan hin usa ka karton nga Young People Ask ngan iba pa nga publikasyon.” Waray pag-iha, naubos an sulod han karton. Iginsumat ni Maria an nahitabo: “An pipira nga kaupod han maestra nga akon gintagan han Young People Ask kinadto ha akon opisina ngan nagpakiana, ‘Diin hira nanhahatag hin libro?’” Husto gud an ira ginkadtoan!

Sabado an kataposan nga adlaw han seminar. Day off ito ni Maria, salit nagbutang hiya hin mga literatura ha pipira nga lamesa ha iya opisina. Nagsurat hiya ha blackboard: “Dear Teachers! Mahimo kamo kumuha hin literatura para ha iyo ngan ha iyo kasangkayan. Inin mag-opay nga publikasyon mabulig ha iyo nga magin malampuson ha trabaho ngan magpaparig-on han iyo pamilya.” Ano an nahitabo? “Hito nga adlaw kinadto ako ha opisina ngan nakita ko nga gutiay na la an nahisalin nga literatura. Nagkuha dayon ako hin dugang nga mga libro ngan magasin.” Han matapos an seminar, nakapahamutang hi Maria hin 380 nga magasin, 173 nga libro, ngan 34 nga brosyur. Pag-uli han mga tinambong ha seminar ha higrayo nga rehiyon diin hira naukoy ngan nagtatrabaho, gindara nira an mga literatura. Hi Maria nagsiring, “Malipayon gud ako nga an mga liso han kamatuoran nakaabot na yana ha pinakahigrayo nga bahin han Tuva!”—Ekles. 11:6.

[Mapa ha pahina 32]

(Para ha aktuwal nga pormat, kitaa an publikasyon)

RUSSIA

REPUBLIKA HAN TUVA