Ginsusunod Mo ba an “Labaw Gud nga Paagi” han Gugma?

‘AN Dios gugma.’ Ini nga mga pulong ni apostol Juan nagsusumat ha aton han nangunguna nga kalidad han Dios. (1 Juan 4:8) Tungod han gugma han Dios ha katawohan, mahimo kita magin duok ngan magkaada personal nga relasyon ha iya. Ano an usa pa nga epekto ha aton han gugma han Dios? An iba nasiring: “An aton pagkatawo namumolde han bisan ano nga aton ginhihigugma.” Tinuod ito. Kondi tinuod liwat nga namumolde kita han mga tawo nga aton ginhihigugma ngan han nahigugma ha aton. Tungod kay ginlarang kita ha dagway han Dios, may-ada kita kapas nga subaron an iya gugma. (Gen. 1:27) Salit, hi apostol Juan nagsurat nga nahigugma kita ha Dios “kay una hiya naghigugma ha aton.”—1 Juan 4:19.

Upat nga Pulong nga Nagsasaysay han Gugma

Gintawag ni apostol Pablo an gugma nga “labaw gud nga paagi.” (1 Kor. 12:31, NW) Kay ano nga sugad hini an iya pagsaysay han gugma? Ano nga klase hin gugma an iya ginhihisgotan? Basi hibaroan ito, aton usisahon hin maopay an kahulogan han pulong nga “gugma.”

An mga Griego ha kadaan nga panahon may-ada upat nga pulong nga ginagamit ha magkalain-lain nga paagi ha pagsaysay han gugma: stor·geʹ, eʹros, phi·liʹa, ngan a·gaʹpe. Hini nga upat, an a·gaʹpe an gin-gamit ha paghulagway ha Dios han “gugma.” a Mahitungod hini, hi Propesor William Barclay nagsiring ha iya libro nga New Testament Words: “An agapē nagtitikang ha hunahuna: diri ito emosyon nga basta la inaabat; prinsipyo ito nga aton ginsusunod hin kinaburut-on. An agapē may-ada gud kalabotan ha aton pagpili.” Ginhihisgotan dinhi an a·gaʹpe nga amo an gugma nga ginigiyahan han prinsipyo, kondi agsob nga inuupdan ito hin duro nga emosyon. Tungod kay may-ada mag-opay ngan magraot nga prinsipyo, an mga Kristiano sadang giyahan han mag-opay nga prinsipyo ha Biblia nga hi Jehova mismo an naghatag. Kon aton itanding an pagsaysay han Biblia han a·gaʹpe ha iba nga termino nga gin-gamit hito para ha gugma, mas masasabtan naton an gugma nga sadang naton ipakita.

Gugma ha Sulod han Pamilya

Makalilipay gud nga magin bahin han mahigugmaon ngan nagkakaurosa nga pamilya! An Griego nga pulong nga stor·geʹ an agsob gamiton ha pagsaysay han natural nga pagbati ha sulod han pamilya. Nangangalimbasog an mga Kris tiano nga magpakita hin gugma ha ira mga kapamilya. Hi Pablo nagtagna nga ha kataposan nga mga adlaw an kadam-an ‘mawawarayan hin gugma nga kinaiya.’—2 Tim. 3:1, 3.

Ha kalibotan yana, makasurubo nga damu an diri nagpapakita han gugma nga sadang makita ha sulod han pamilya. Kay ano nga damu hinduro nga burod an nagpapapunit? Kay ano nga damu hinduro nga pamilya an nagpapasibaya ha ira lagas nga mga kag-anak? Kay ano nga padayon nga nagtitikadamu an nagdidiborsyo? An hinungdan amo an kawaray hin “gugma nga kinaiya.”

Dugang pa, an Biblia nagsusumat nga “an kasingkasing malimbungon labaw han ngatanan nga butang.” (Jer. 17:9) An gugma ha pamilya nagtitikang ha kasingkasing ngan nag-uupod han aton pagbati. Kondi, makapainteres nga gin-gamit ni Pablo an a·gaʹpe ha pagsaysay han gugma nga sadang ipakita han bana ha iya asawa. Igintanding niya ito ha gugma nga iginpapakita ni Kristo ha kongregasyon. (Efe. 5:28, 29) Ini nga gugma iginbasar ha mga prinsipyo nga iginhatag ni Jehova, an nagpatikang han kahikayan han pamilya.

An tinuod nga gugma ha kapamilya nagpapagios ha aton nga mangnoan an aton lagas nga mga kag-anak o tumanon an aton responsabilidad ha aton mga anak. Nag-aaghat liwat ito ha mga kag-anak nga disiplinahon an ira mga anak ha mahigugmaon nga paagi ngan diri gumios tungod la han emosyon, nga kasagaran nga nagriresulta ha pagin sobra kamatinuguton ha mga anak.—Efe. 6:1-4.

Romantiko nga Gugma Ngan mga Prinsipyo ha Biblia

An gugma han mag-asawa usa gud nga regalo han Dios. (Prob. 5:15-17) Kondi, an pulong nga eʹros, nga nangangahulogan hin romantiko nga gugma, waray gamita han giniyahan nga mga parasurat han Biblia. Kay ano? Mga tuig na an naglabay, an The Watchtower nagsiring: “Baga hin ginbubuhat yana ha bug-os nga kalibotan an sayop nga ginbuhat han mga Griego ha kadaan nga panahon. Ira ginsingba hi Eros sugad nga dios, nagyukbo ha iya altar ngan naghalad ha iya. . . . Kondi makikita ha kasaysayan nga an sugad nga pagsingba ha seksuwal nga gugma nagresulta la hin kaarawdan, sobra nga kalaw-ayan, ngan kabungkag han pag-asawa. Bangin ito an hinungdan nga waray gamita han mga parasurat han Biblia ito nga pulong.” Basi malikyan naton an pakigrelasyon tungod la han kahusay o kagwapo, an romantiko nga gugma kinahanglan giyahan han mga prinsipyo ha Biblia. Salit pakianhi an imo kalugaringon, ‘An akon ba romantiko nga pagbati inuupdan hin tinuod nga gugma?’

Ha panahon han “pagkamakaruruyag” diin agsob nga makusog hinduro an seksuwal nga pagbati han mga batan-on, adton nasunod ha mga prinsipyo ha Biblia magpapabilin nga limpyo ha moral. (1 Kor. 7:36; Kol. 3:5) Gintatagad naton an  pag-asawa nga sagrado nga regalo tikang kan Jehova. Mahitungod han mga mag-asawa, hi Jesus nagsiring: “An gintig-ob han Dios, diri pagbulagon han tawo.” (Mat. 19:6) Imbes nga magtampo tubtob la nga may-ada pa romantiko nga pagbati ha usa kag usa, gintatagad naton an pag-asawa sugad nga seryoso nga saad. Kon nagkakaada hin problema, diri kita namimiling hin pasangilan ha pagbulag kondi nangangalimbasog gud nga ipakita an diosnon nga mga kalidad basi magin malipayon an aton kinabuhi sugad nga pamilya. Ito nga pangalimbasog magriresulta hin nagpapadayon nga kalipay.—Efe. 5:33; Heb. 13:4.

Gugma han Magsarangkay

Diri makalilipay an kinabuhi kon waray kasangkayan! Usa nga proberbio ha Biblia an nasiring: “May-ada sangkay nga surusuok pa kay han bugto.” (Prob. 18:24) Karuyag ni Jehova nga magkaada kita tinuod nga kasangkayan. Damu gud an maaram mahitungod han duok nga pagkamagsangkay nira David ngan Jonatan. (1 Sam. 18:1) Ngan an Biblia nasiring nga “hinigugma” ni Jesus hi apostol Juan. (Juan 20:2) An Griego nga pulong para ha gugma han magsarangkay amo an phi·liʹa. Diri sayop an pagkaada hin duok nga sangkay ha kongregasyon. Kondi, gindadasig kita nga updan hin gugma (a·gaʹpe) an aton “minagburugto nga pagbati” (phi·la·del·phiʹa, gintampo nga pulong nga phiʹlos, an Griego nga pulong para ha “sangkay,” ngan a·del·phosʹ, an Griego nga pulong para ha “bugto”). (2 Ped. 1:7, An Maopay nga Sumat) Basi magpadayon an kamagsarangkay, kinahanglan iaplikar naton ini nga sagdon. Husto la nga pakianhan naton an aton kalugaringon, ‘An akon ba pagbati sugad nga sangkay ginigiyahan han mga prinsipyo ha Biblia?’

An Pulong han Dios nabulig ha aton nga likyan an pagpasulabi. Diri magkaiba an aton pagtratar ha aton igkasi-tawo: buotan ha aton kasangkayan kondi istrikto ha mga diri naton sangkay. Diri liwat kita nag-uulog-ulog basi magkaada hin kasangkayan. Labaw ha ngatanan, an pagsunod ha mga prinsipyo ha Biblia nabulig ha aton nga magkaada hin sarabotan nga ginkikinahanglan basi magin maaramon ha pagpili hin kasangkayan ngan likyan an ‘magraot nga kaupod nga nakakadunot ha mag-opay nga batasan.’—1 Kor. 15:33.

Naiiba nga Bugkos han Gugma!

Naiiba gud an gugma nga nagbubugkos ha mga Kristiano! Hi apostol Pablo nagsurat: “An gugma diri updan hin kasalingkapaw. . . . Pagsighigugmaay gud kamo hin minagburugto an usa kag usa; palabihon niyo [‘magkaada hin malumo nga pagbati,’ NW] an usa kag usa.” (Roma 12:9, 10) Oo, an mga Kristiano may-ada ‘gugma (a·gaʹpe) nga diri salingkapaw.’ Ini nga gugma diri kay emosyon la. Lugod, marig-on nga iginbasar ito ha mga prinsipyo ha Biblia. Kondi, hi Pablo nag-unabi liwat hin “gugma nga minagburugto” (phi·la·del·phiʹa) ngan “malumo nga pagbati” (phi·loʹstor·gos, gintampo nga pulong nga phiʹlos ngan stor·geʹ). Sumala ha usa nga eskolar, an “gugma nga minagburugto” amo an “malumo nga gugma nga nagpapakita hin pagkabuotan, napaid, ngan nabulig.” Kon uupdan hin a·gaʹpe, mabulig ito ha mga nag-aalagad kan Jehova nga magin duok ha usa kag usa. (1 Tes. 4:9, 10) An lain nga termino nga iginhubad nga “malumo nga pagbati” makausa la nga mababasa ha Biblia ngan nagpapasabot hin pagin duok gud sugad hin pamilya. b

An nagbubugkos han tinuod nga mga Kristiano amo an gintampo nga gugma ha pamilya ngan pagbati ha tinuod nga kasangkayan, ngan ginigiyahan ito han gugma nga iginbasar ha mga prinsipyo ha Biblia. An Kristiano nga kongregasyon diri sekular nga organisasyon o grupo nga an katuyoan la amo an pagkaada hin bag-o nga mga kakilala, kondi duok ito nga pamilya nga nagkakaurosa ha pagsingba kan Jehova nga Dios. Gintatagad naton nga kapamilya an aton igkasi-tumuroo, salit gintatawag naton hira nga kabugtoan. Bahin hira han aton espirituwal nga pamilya, hinigugma naton hira sugad nga kasangkayan, ngan an aton pakig-upod ha ira pirme uyon ha mga prinsipyo ha Biblia. Hinaot kita ngatanan padayon nga magburublig ha pagpakita han gugma nga nagbubugkos ngan nagpapakilala han tinuod nga Kristiano nga kongregasyon.—Juan 13:35.

[Mga footnote]

[Blurb ha pahina 12]

Paonan-o ka nabulig ha pagpakita han gugma nga nagbubugkos ha aton?