Kristiano nga mga Pamilya—Sunda an Susbaranan ni Jesus!

“Hi Kristo . . . [naghatag ha iyo] hin susbaranan, basi kamo magsunod ha iya mga pagpitad.”—1 PED. 2:21.

1. (a) Ano an papel han Anak han Dios ha paglarang? (b) Ano an pagbati ni Jesus ha katawohan?

 HAN ginhimo ni Jehova nga Dios an langit ngan tuna, an iya suhag nga Anak nakada ha iya hirani sugad nga “labaw nga magburuhat.” Binulig liwat an Anak ha iya Amay han gindisenyo Niya ngan ginlarang an damu kalain nga hayop ngan tanom dinhi ha tuna ngan han Iya gin-andam an Paraiso basi pag-ukyan han tawo. An Anak han Dios nga ha urhi nakilala nga hi Jesus may-ada daku nga gugma ha katawohan. ‘An iya kalipay aada ha mga anak han tawo.’—Prob. 8:27-31; Gen.1:26, 27.

2. (a) Ano an igintagana ni Jehova ha diri-hingpit nga katawohan? (b) Ano an usa nga bahin han kinabuhi diin nagtatagana hin giya an Biblia?

² Katapos makasala an siyahan nga mag-asawa, nagin importante nga bahin han katuyoan ni Jehova an paglukat ha makasasala nga katawohan. Basi matuman ito, igintagana ni Jehova an halad lukat ni Kristo. (Roma 5:8) Dugang pa, igintagana niya an iya Pulong, an Biblia, nga naggigiya ha tawo kon paonan-o magigin malampuson bisan pa han napanunod nga pagkadiri-hingpit. (Sal. 119:105) Ha iya Pulong, naghahatag hiya hin giya basi mabuligan an mga tawo nga magkaada marig-on ngan malipayon nga pamilya. Mahitungod ha pag-asawa, an libro han Genesis nasiring nga an lalaki sadang “tumampo ha iya asawa ngan hira magigin usa nga unod.”—Gen. 2:24.

3. (a) Ano an igintutdo ni Jesus mahitungod han pag-asawa? (b) Ano an aton hihisgotan hini nga artikulo?

³ Durante han ministeryo ni Jesus dinhi ha tuna, ginpabug-atan niya nga an pag-asawa gindisenyo nga magin permanente. Nagtutdo hiya hin mga prinsipyo nga kon iaplikar han kada usa ha pamilya, malilikyan an mga kinaiya ngan paggawi nga mahimo makadaot han pag-asawa  ngan makawara han kalipay han pamilya. (Mat. 5:27-37; 7:12) Hihisgotan hini nga artikulo kon paonan-o an mga katutdoan ni Jesus ngan an iya susbaranan han nakanhi hiya ha tuna makakabulig ha bana, asawa, kag-anak, ngan anak nga magkaada malipayon ngan makapatagbaw nga kinabuhi.

Kon Paonan-o Mapapasidunggan han Kristiano nga Bana an Iya Asawa

4. Ano an kaparihoan han papel ni Jesus ngan han Kristiano nga bana?

⁴ An bana an ginpili han Dios nga magin ulo han pamilya, sugad la nga hi Jesus an Ulo han kongregasyon. Hi apostol Pablo nagsiring: “An asawa nga lalaki amo an ulo han asawa nga babaye, sugad man nga hi Kristo amo iton ulo han singbahan, kay hiya amo an manluluwas han lawas. Mga asawa nga kalalakin-an, higugmaa niyo an iyo mga asawa nga kababayin-an, sugad man nga hi Kristo naghigugma ha singbahan ngan igintubyan niya an iya kalugaringon tungod hito.” (Efe. 5:23-25) Salit an pagtratar ni Jesus ha iya mga sumurunod sadang subaron han Kristiano nga bana ha pagtratar ha iya asawa. Aton tagdon an pipira nga paagi han paggamit ni Jesus han awtoridad nga iginhatag ha iya han Dios.

5. Paonan-o gin-gamit ni Jesus an iya awtoridad ha iya mga disipulo?

⁵ Hi Jesus “maaghop ngan mapainubsanon ha kasingkasing.” (Mat. 11:29) Marig-on liwat hiya nga nagios kon ginkikinahanglan. Waray gud hiya magpasibaya ha iya mga responsabilidad. (Mar. 6:34; Juan 2:14-17) Mahigugmaon nga ginsagdonan niya an iya mga disipulo, pauroutro pa ngani kon ginkikinahanglan. (Mat. 20:21-28; Mar. 9:33-37; Luk. 22:24-27) Kondi, waray hiya mag-isog o magpakaalo ha ira, ngan waray magpaabat nga diri hira hinigugma o diri nira mahihimo an iya igintututdo. Lugod, gindayaw ngan gindasig niya hira. (Luk. 10:17-21) Diri gud urusahon nga gintahod hi Jesus han iya mga disipulo tungod han iya mahigugmaon ngan mapinairon nga pagtratar ha ira!

6. (a) Ano an mahibabaroan han bana ha paagi han pagtratar ni Jesus ha iya mga disipulo? (b) Ano an sagdon ni Pedro ha mga bana?

⁶ An susbaranan ni Jesus nagtututdo ha mga bana nga an pagsubad ha iya pagkaulo nangangahulogan nga diri nira mamaltratuhon an ira asawa. Lugod, magpapakita hira hin pagtahod ngan nagsasakripisyo nga gugma. Hi apostol Pedro nagsagdon ha mga bana nga subaron an mahigugmaon nga mga paagi ni Jesus pinaagi ha pagin masinabuton ha ira mga asawa ngan ‘paghatag ha ira hin dungog.’ (Basaha an 1 Pedro 3:7.) Salit, paonan-o maipapakita han bana an iya awtoridad ngan mapapasidunggan an iya asawa?

7. Paonan-o mapapasidunggan han bana an iya asawa? Isaysay.

⁷ Usa nga paagi nga mapapasidunggan han bana an iya asawa amo an sinsero nga pagtagad han iya opinyon ngan pagbati antes maghimo hin mga desisyon nga makakaapekto ha pamilya. Bangin kinahanglan magdesisyon mahitungod ha pagbalhin hin lugar o trabaho ngan ha adlaw-adlaw nga buruhaton sugad han kon diin magbabakasyon o kon paonan-o magbabadyet an pamilya ha panahon han kakurian. Tungod  kay maaapektohan an pamilya, mapulsanon ngan mahigugmaon kon tatagdon han bana an opinyon han iya asawa, kay makakabulig ito ha bana nga magin timbang ngan mas makonsiderasyon ha pagdesisyon, ngan magigin mas masayon para ha iya asawa nga suportahan hiya. (Prob. 15:22) An Kristiano nga bana nga nagpapasidungog ha iya asawa diri la hihigugmaon ngan tatahuron han iya asawa, kondi labaw ha ngatanan, uuyonan ni Jehova.—Efe. 5:28, 29.

Kon Paonan-o Maipapakita han Asawa an Hilarom nga Pagtahod ha Iya Bana

8. Kay ano nga diri maopay nga susbaranan hi Eva?

⁸ Hi Jesus an hingpit nga susbaranan ha Kristiano nga mga asawa ha pagpasakop ha awtoridad. Daku gud an kaibahan han iya pagtagad ha awtoridad ha disposisyon nga iginpakita ni Eva! Waray hi Eva magin maopay nga susbaranan ha mga asawa. Gintagan han Dios hi Adan hin awtoridad sugad nga ulo ngan an mga instruksyon iginhatag pinaagi ha iya. Kondi, hi Eva waray magpasakop hito. Waray niya sunda an instruksyon nga ginsiring ni Adan ha iya. (Gen. 2:16, 17; 3:3; 1 Kor. 11:3) Oo, nalimbongan hi Eva; kondi nagpakiana unta hiya ha iya bana kon tutuoron ba niya an tingog han nag-aangkon nga nagsusumat han hinbabaroan han Dios. Lugod, nagparagbuot hiya ngan ginpangunahan an iya bana.—Gen. 3:5, 6; 1 Tim. 2:14.

9. Paonan-o hi Jesus nagpakita hin susbaranan ha pagpasakop?

⁹ Ha kabaliktaran, hi Jesus nagpakita hin hingpit nga susbaranan ha pagpasakop ha iya Ulo. Nakita ha iya disposisyon ngan pagkinabuhi nga “waray niya pag-isipa an hinugad han Dios, butang nga aragawon.” Lugod, “gin-ula niya an iya kalugaringon, nga nagpariho hin dagway han uripon.” (Fil. 2:5-7) Yana, sugad nga nagmamando nga Hadi, ito gihapon an disposisyon ni Jesus. Mapainubsanon nga nagpapasakop hiya ha iya Amay ha ngatanan nga butang ngan nasuporta ha Iya pagkaulo.—Mat. 20:23; Juan 5:30; 1 Kor. 15:28.

10. Paonan-o maipapakita han asawa an iya suporta ha pagkaulo han iya bana?

¹⁰ Husto gud nga subaron han Kristiano nga asawa hi Jesus pinaagi han pagsuporta ha pagkaulo han iya bana. (Basaha an 1 Pedro 2:21; 3:1, 2.) Tagda an usa nga sitwasyon nga maipapakita niya ito. An iya anak nagsasarit nga maapi ha buruhaton nga kinahanglan an pagtugot han mga kag-anak. Tungod kay waray pa ito mahisguti nira nga mag-asawa, angayan la nga magpakiana an nanay, “Nagsarit ka na ba kan imo tatay?” Kon waray pa, kinahanglan ipakiistorya niya ito ha iya bana antes magdesisyon. Dugang pa, kinahanglan likyan han Kristiano nga asawa an pagkontra o pagriwa ha opinyon han iya bana ha atubangan han ira mga anak. Kon diri hiya nauyon ha iya bana, makikiistorya hiya nga hira la nga duha.—Efe. 6:4.

An Susbaranan ni Jesus ha mga Kag-anak

11. Ano nga susbaranan an iginpakita ni Jesus ha mga kag-anak?

¹¹ Bisan kon hi Jesus waray mag-asawa o magkaada hin anak, maopay hiya nga susbaranan  ha Kristiano nga mga kag-anak. Paonan-o? Mahigugmaon ngan mapailubon nga nagtutdo hiya ha iya mga disipulo ha pulong ngan buhat. Iginpakita niya ha ira kon paonan-o tutumanon an iya iginsugo. (Luk. 8:1) An disposisyon ngan pagtratar ni Jesus ha iya mga disipulo nagtutdo ha ira kon paonan-o tatrataron an usa kag usa.—Basaha an Juan 13:14-17.

12, 13. Ano an kinahanglan buhaton han mga kag-anak basi mapadaku an ira mga anak nga mahadlukon ha Dios?

¹² Kasagaran na nga ginsusubad han mga anak an ginbubuhat han ira mga kag-anak, maopay man ito o maraot. Salit mga kag-anak, pakianhi an iyo kalugaringon: ‘Ano nga ehemplo an amon iginpapakita ha amon mga anak may kalabotan ha panahon nga amon ginagamit ha pagkinita hin TV o ha kaliawan kon itanding ha panahon nga amon igin-gagahin ha pag-aram han Biblia ngan pagsangyaw? Ano gud ba an prayoridad han amon pamilya? Susbaranan ba kami ha pagsentro han amon kinabuhi ngan mga desisyon ha tinuod nga pagsingba?’ Kinahanglan aada ha kasingkasing han mga kag-anak an balaud ni Jehova basi mapadaku nira an ira mga anak nga mahadlukon ha Dios.—Deut. 6:6.

¹³ Kon nangangalimbasog an mga kag-anak nga iaplikar an mga prinsipyo ha Biblia ha ira adlaw-adlaw nga pagkinabuhi, maoobserbahan ini han ira mga anak. An ira mga pulong ngan katutdoan makakaimpluwensya gud ha ira mga anak. Kondi, kon diri ginbubuhat han mga kag-anak an ira ginsisiring, bangin hunahunaon han ira mga anak nga diri importante o praktikal an mga prinsipyo ha Biblia. Sugad nga resulta, bangin diri maatohan han mga anak an mga pagsulay han kalibotan.

14, 15. Ano nga hingyap an angay patuboon han mga kag-anak ha ira mga anak, ngan ano an usa nga paagi nga mahihimo nira ini?

¹⁴ Maaram an Kristiano nga mga kag-anak nga diri la pagtagana hin materyal nga mga panginahanglan an nahiuupod ha pagpadaku hin anak. Salit diri gud maaramon nga itutdo ha ira an pagkab-ot hin materyalistiko nga mga tumong. (Ekles. 7:12) Hi Jesus nagtutdo ha iya mga disipulo nga pamilngon siyahan an ginhadian ngan an iya katadongan. (Mat. 6:33) Salit basi masubad hi Jesus, kinahanglan mangalimbasog liwat an Kristiano nga mga kag-anak nga ipasilsil ha ira mga anak an hingyap ha pagkab-ot hin espirituwal nga mga tumong.

¹⁵ Usa nga paagi ha pagbuhat hito amo an pagsalingabot han mga higayon nga makaupod han ira mga anak an aada ha bug-os-panahon nga pag-alagad. Hunahunaa an pagdasig nga makakarawat han mga batan-on kon ira makilala an mga payunir o an paramangno han sirkito ngan an iya asawa. An nabisita nga mga misyonero, Bethelite, ngan adton nagbuboluntaryo ha mga proyekto han pagtukod ha magkalain-lain nga nasud mahimo mag-istorya nga may kadasig mahitungod han kalipay ha pag-alagad kan Jehova. Sigurado nga may-ada hira maisusumat nga makapainteres nga mga eksperyensya. An ira susbaranan ha pagsakripisyo ha kalugaringon makakabulig gud ha iyo mga anak nga magdesisyon hin maaramon, magkaada espirituwal  nga tumong, ngan magkuha hin edukasyon nga makakasuporta ha bug-os-panahon nga pag-alagad.

Mga Anak—Ano an Mabulig ha Iyo nga Sundon an Susbaranan ni Jesus?

16. Paonan-o ginpasidunggan ni Jesus an iya tunan-on nga mga kag-anak ngan an iya langitnon nga Amay?

¹⁶ Mga anak, hi Jesus maopay hinduro nga susbaranan ha iyo. Tungod kay iginhatag kanda Jose ngan Maria an responsabilidad ha pagmangno ha iya, nagpasakop hiya. (Basaha an Lukas 2:51.) Maaram hiya nga bisan kon diri hira hingpit, igintapod hiya han Dios ha ira. Tungod hito, kinahanglan niya pasidunggan hira. (Deut. 5:16; Mat. 15:4) Sugad nga adulto, pirme ginbubuhat ni Jesus an nakakalipay ha iya langitnon nga Amay. Nangahulogan ito hin pag-ato ha pagsulay. (Mat. 4:1-10) Mga kabataan, bangin usahay nasusulay kamo nga diri sumugot ha iyo mga kag-anak. Salit ano an makakabulig ha iyo nga sundon an susbaranan ni Jesus?

17, 18. (a) Ano nga pagsulay an gin-aatubang han mga batan-on ha eskwelahan? (b) Ano an maopay nira hinumdoman nga makakabulig ha pag-ato ha mga pagsulay?

¹⁷ Posible gud nga kadam-an han iyo kaeskwela an haros diri nagtatagad o waray pagtagad ha mga prinsipyo han Biblia. Bangin piriton kamo nga umapi ha kwestyonable nga mga buruhaton ngan magyaangyaang kon magdumiri kamo. Nagyayakan ba hira hin nakakaminos o nakakatamay nga mga pulong tungod kay diri kamo naapi ha iba han ira ginbubuhat? Kon amo, ano an iyo reaksyon? Maaram kamo nga kon mahadlok kamo ngan umapi ha ira, mapapasubo niyo an iyo mga kag-anak ngan hi Jehova. Ano an mahitatabo kon sundon niyo an iyo mga kaeskwela? Bangin may mga tumong kamo sugad han pagin payunir o ministeryal, pag-alagad ha teritoryo nga mas nanginginahanglan hin magwarali han Ginhadian, o pagin Bethelite. An pakig-upod ba ha ira makakabulig ha pagkab-ot han iyo mga tumong?

¹⁸ Mga batan-on ha kongregasyon, may-ada ba mga sitwasyon nga nasasarihan an iyo pagtoo? Ano an iyo ginbubuhat? Hunahunaa an iyo susbaranan, hi Jesus. Gin-atohan niya an mga pagsulay ngan marig-on nga ginbuhat an iya hinbaroan nga husto. An paghinumdom hini mabulig ha iyo nga magkaada kaisog ha pagsumat ha iyo mga kaeskwela nga diri niyo karuyag makig-upod ha pagbuhat han mga butang nga maaram kamo nga sayop. Pariho kan Jesus, hunahunaa pirme an kalipay han pag-alagad ngan pagsugot kan Jehova ha bug-os niyo nga kinabuhi.—Heb. 12:2.

An Yawi ha Malipayon nga Kinabuhi Sugad nga Pamilya

19. Ano nga paagi han pagkinabuhi an naghahatag hin tinuod nga kalipay?

¹⁹ Karuyag ni Jehova nga Dios ngan ni Jesus an pinakamaopay para ha katawohan. Bisan kon diri kita hingpit, mahimo kita magin malipayon. (Isa. 48:17, 18; Mat. 5:3) Hi Jesus nagtutdo hin mga kamatuoran basi magin malipayon an katawohan, kondi diri la ito an iya iginsumat ha iya mga disipulo. Igintutdo liwat niya an gimaopayi nga paagi ha pagkinabuhi. Dugang pa, naghatag hiya hin praktikal nga susbaranan han timbang nga pagkinabuhi ngan disposisyon. Anoman an aton papel ha pamilya, kita ngatanan makakapahimulos ha pagsunod han iya susbaranan. Salit mga bana, asawa, kag-anak, ngan anak, sunda an susbaranan ni Jesus! An pagkarawat han iya mga katutdoan ngan pagsunod han iya susbaranan amo gud an yawi basi magkaada makapatagbaw ngan malipayon nga kinabuhi sugad nga pamilya.

Ano an Imo Baton?

• Paonan-o sadang ipakita han mga bana an awtoridad nga iginhatag han Dios ha ira?

• Paonan-o masusubad han asawa an susbaranan ni Jesus?

• Ano an mahibabaroan han mga kag-anak ha paagi han pagtratar ni Jesus ha iya mga disipulo?

• Ano an mahibabaroan han mga batan-on ha susbaranan ni Jesus?

[Mga Pakiana]

[Retrato ha pahina 8]

Antes maghimo hin desisyon nga makakaapekto ha pamilya, ano an bubuhaton han mahigugmaon nga bana?

[Retrato ha pahina 9]

Ha ano nga sitwasyon maipapakita han asawa an iya suporta ha pagkaulo han iya bana?

[Retrato ha pahina 10]

Ginsusubad han kabataan an maopay nga susbaranan han ira mga kag-anak