Pagkarawat nga Mapasalamaton—Paghatag nga Kinasingkasing

HI JEHOVA nga aton mahigugmaon ngan langitnon nga Amay nagtatagad gud ha aton. An iya Pulong nagpapasarig nga nagmamangno gud hiya ha ngatanan nga iya surugoon. (1 Ped. 5:7) Usa nga paagi nga ipinapakita niya ito amo an pagtagana hin magkalain-lain nga bulig basi makag-alagad kita ha iya nga matinumanon. (Isa. 48:17) Karuyag ni Jehova nga karawaton naton an iya igintatagana nga bulig, labi na kon nakukurian kita tungod han mga problema. Iginpapatin-aw ito ha Mosaiko nga Balaud.

Ilarom han Balaud, mahigugmaon nga nagtagana hi Jehova hin bulig ha “mga kablas,” sugad han ilo, balo, ngan dumuruong. (Leb. 19:9, 10; Deut. 14:29) Maaram hiya nga an iba han iya surugoon bangin manginahanglan hin bulig han ira igkasi-tumuroo. (Jak. 1:27) Salit, diri kita sadang mag-alang nga karawaton an bulig hadton ginpagios ni Jehova nga bumulig ha aton. Kondi, karuyag naton karawaton ito nga may husto nga disposisyon.

Ha luyo nga bahin, ginpapabug-atan han Pulong han Dios nga an Iya katawohan may-ada liwat higayon ha paghatag. Hinumdumi an asoy mahitungod han “kablas nga babaye nga balo” nga naobserbahan ni Jesus ha templo ha Jerusalem. (Luk. 21:1-4) Posible gud nga nakapahimulos hiya ha mahigugmaon nga tagana ni Jehova ha mga balo nga gin-unabi ha Balaud. Kondi bisan kon pobre hiya, an nahinunumdoman ha iya amo an iya paghatag, diri an iya pagkarawat. Sigurado nga nalipay hiya ha iya pagkamahinatagon, tungod kay siring ni Jesus nga “mas daku an kalipay ha paghatag kay ha pagkarawat.” (Buh. 20:35, NW) Salit, paonan-o mo mababatasan an ‘paghatag’ ngan maeksperyensyahan an kalipay nga resulta hito?—Luk. 6:38.

“Ano ba an Akon Ihahatag kan Jehova?”

An salmista nagpakiana: “Ano ba an akon ihahatag kan Jehova tungod han iya mga pakaopay ha akon?” (Sal. 116:12) Ano nga kaopayan an iya nakarawat? Ginbuligan hiya ni Jehova durante han iya “kakurian ngan kasubo.” Dugang pa, hi Jehova ‘nagluwas han iya kalag tikang ha kamatayon.’ Yana karuyag niya ‘maghatag’ kan Jehova. Ano an iya hihimoon? Hiya nagsiring: “Magbabayad ako han akon mga saad ngadto kan Jehova.” (Sal. 116:3, 4, 8, 10-14) Determinado hiya nga tumanon an ngatanan niya nga saad ngan obligasyon kan Jehova.

Mahihimo mo liwat ito. Paonan-o? Pinaagi ha pagsunod ha mga balaud ngan prinsipyo han Dios ha ngatanan nga panahon. Salit, siguroha nga an pagsingba kan Jehova an pinakaimportante ha imo kinabuhi ngan magpagiya ha espiritu han Dios ha ngatanan nga imo ginbubuhat. (Ekles. 12:13; Gal. 5:16-18) Syempre, diri mo gud bug-os nga mababaydan an ngatanan nga ginbubuhat ni Jehova para ha imo. Kondi, nalilipay hi Jehova han imo kinasingkasing nga pagsakripisyo ha pag-alagad ha iya. (Prob. 27:11) Daku gud nga pribilehiyo nga mapalipay hi Jehova hini nga paagi!

Bulig ha Ikakaopay han Kongregasyon

Sigurado nga mauyon ka nga damu nga kapulsanan an imo nakarawat ha Kristiano nga  kongregasyon. Pinaagi hito nagtatagana hi Jehova hin hura nga espirituwal nga pagkaon. Hinbaroan mo an kamatuoran nga nagtalwas ha imo ha palso nga relihiyon ngan espirituwal nga kasisidman. (Juan 8:32) Ha mga katirok, asembleya, ngan kombensyon nga ginhikay han “matinumanon ngan maaramon nga uripon,” nakarawat mo an kahibaro nga maggigiya ha imo ha kinabuhi nga waray kataposan ha paraiso nga tuna nga waray na kasakit ngan pag-antos. (Mat. 24:45-47, NW) Maiihap mo ba an ngatanan nga kapulsanan nga imo nakarawat—ngan makakarawat pa—pinaagi han kongregasyon han Dios? Ano an imo maibabalos ha kongregasyon?

Hi apostol Pablo nagsurat: “An bug-os nga lawas nga nagkaarangay ha pagtarampo, ngan gindara, pinaagi hito nga kinakarawat tikang ha tagsa-tagsa nga kaluluthan, sumala ha ginbuhat han tagsa-tagsa nga bahin ha iyo nga suruklan ha tagsa nga bahin nahimo ha pagpatubo han lawas, ha pagparig-on hito ha gugma.” (Efe. 4:15, 16) Bisan kon ito nga teksto aplikado labi na ha dinihogan nga mga Kristiano, an prinsipyo hito mahimo iaplikar han ngatanan nga Kristiano yana. Oo, an tagsa nga membro han kongregasyon makakabulig ha ikakaopay ngan pag-uswag hito. Ha ano nga mga paagi?

Mahihimo naton ito pinaagi han pangalimbasog nga dasigon ngan parig-unon an iba ha pag-alagad ha Dios. (Roma 14:19) Makakabulig liwat kita ha “pagpatubo han lawas” pinaagi han pagkultibar han bunga han espiritu han Dios ha aton pakig-upod ha kabugtoan. (Gal. 5: 22, 23) Dugang pa, mahimo kita mamiling hin mga higayon nga ‘magbuhat hin maopay ha ngatanan, labi na gud ha panimalay han pagtoo.’ (Gal. 6:10; Heb. 13:16) An ngatanan ha kongregasyon—lalaki ngan babaye, batan-on ngan lagas—makakabulig ha “pagparig-on hito ha gugma.”

Dugang pa, magagamit naton an aton abilidad, kusog, ngan panag-iya ha pakigbahin ha nagluluwas han kinabuhi nga buruhaton han kongregasyon. “Kinarawat niyo ha waray bayad,” siring ni Jesus. Ano an aton ibabalos? “Ihatag man niyo ha waray bayad,” siring niya. (Mat. 10:8) Salit, bug-os nga makigbahin ha importante nga buruhaton nga pagsangyaw han mensahe han Ginhadian ngan paghimo hin disipulo. (Mat. 24:14; 28:19, 20) Limitado na ba an imo mahihimo ha pagbuhat hini? Hinumdumi an kablas nga balo nga iginhulagway ni Jesus. Gutiay gud la an iya naihatag. Kondi nagsiring hi Jesus nga mas daku an bili hito kay han ginhatag han iba. Iya ginhatag an ngatanan nga iya maihahatag.—2 Kor. 8:1-5, 12.

Pagkarawat nga May Husto nga Disposisyon

Bangin may mga panahon nga kinahanglan mo an bulig han kongregasyon. Ayaw gud pag-alang ha pagkarawat han bulig nga maihahatag han kongregasyon ha panahon nga nakukurian ka paglampos han mga problema dinhi hini nga sistema. Hi Jehova nagtatagana hin kwalipikado ngan matinagaron nga kalalakin-an basi mangnoan an kongregasyon. Mabulig hira ha imo kon makaeksperyensya ka hin mga pagsari ngan kakurian. (Buh. 20:28) Karuyag han mga tigurang ngan han iba ha kongregasyon nga liawon, buligan, ngan panalipdan ka durante han magkuri nga kahimtang.—Gal. 6:2; 1 Tes. 5:14.

Kondi, siguroha nga husto an imo disposisyon kon makarawat mo an ginkikinahanglan nga bulig. Pirme apresyara an bulig nga imo nakakarawat. Hunahunaa nga an bulig han imo igkasi-tumuroo kapahayagan han diri-takos nga pagkabuotan han Dios. (1 Ped. 4:10) Kay ano nga importante ito nga disposisyon? Tungod kay diri naton karuyag magin pariho han kadam-an ha kalibotan nga diri mapasalamaton.

Magin Timbang Ngan Makatadunganon

Ha surat ni Pablo ha kongregasyon ha Filipos, hiya nagsiring mahitungod kan Timoteo: “Waray ko iba nga tawo nga may sugad nga hunahuna nga nagmamangno gud hin totoo ha iyo kahimtangan.” Kondi, hiya nagdugang: “An  ngatanan nagpapangita ha ira mga kalugaringon [“nga kaopayan,” NW], ngan diri an mga bagay ni Jesu-Kristo.” (Fil. 2:20, 21) Kon aton pamalandungon an ginsiring ni Pablo, paonan-o naton malilikyan an pagin sobra kaokupado ha aton kalugaringon nga kaopayan?

Diri naton sadang piriton an kabugtoan ha kongregasyon nga maggahin hin panahon ngan atensyon ha aton kon napabulig kita ha aton problema. Kay ano? Hunahunaa ini: Sigurado nga magpapasalamat gud kita kon an usa nga bugto maghatag hin materyal nga bulig ha panahon han duro nga panginahanglan. Kondi oobligaron ba naton hiya nga ihatag an sugad nga bulig? Syempre diri. Ha pariho nga paagi, bisan kon an aton mahigugmaon nga kabugtoan pirme nalilipay pagbulig ha aton, kinahanglan magin timbang ngan makatadunganon kita ha aton ginlalaoman nga ira maihahatag nga panahon. Oo, anoman an buhaton han aton mga igkasi-tumuroo basi buligan kita nga malamposan an makuri nga kahimtang, karuyag naton nga kinaburut-on nga buhaton nira ito.

Sigurado nga an imo Kristiano nga kabugtoan pirme andam ngan disidido bumulig ha imo. Kondi, may mga panahon nga diri nira maihahatag an ngatanan nga imo ginkikinahanglan. Kon mahitabo ito, sarig nga hi Jehova an mabulig ha imo ha anoman nga pagsari nga bangin atubangon mo, sugad han iya ginbuhat ha salmista.—Sal. 116:1, 2; Fil. 4:10-13.

Salit, ayaw pag-alang ha pagkarawat nga mapasalamaton han anoman nga tagana ha imo ni Jehova—labi na ha panahon han duro nga kakurian ngan problema. (Sal. 55:22) Karuyag niya nga buhaton mo ito. Kondi, karuyag liwat niya nga magin “malipayon [ka] nga humaratag.” Salit, magin determinado ‘ha imo kasingkasing’ nga maghatag han anoman nga igintutugot han imo kahimtang ha pagsuporta ha tinuod nga pagsingba. (2 Kor. 9:6, 7) Hito nga paagi, mahihimo mo an pagkarawat nga mapasalamaton ngan paghatag nga kinasingkasing.

[Kahon/Retrato ha pahina 31]

“Ano ba an akon ihahatag kan Jehova tungod han iya mga pakaopay ha akon?”—Sal. 116:12

▪ Pamiling hin mga higayon ha ‘pagbuhat hin maopay ha ngatanan’

▪ Dasiga ngan parig-ona an iba ha pag-alagad ha Dios

▪ Madasigon nga makigbahin ha paghimo hin disipulo tubtob ha igintutugot han imo kahimtang