Pamiling hin mga Bahandi nga ‘Natago ha Iya’
Pamiling hin mga Bahandi nga ‘Natago ha Iya’
“Ha iya aada natago an ngatanan nga mga bahandi han kinaadman ngan paghibaro.”—KOL. 2:3.
1, 2. (a) Ano an nadiskobrehan han 1922, ngan nahingain ito? (b) Ano an igin-aaghat han Pulong han Dios ha ngatanan?
AN NADIDISKOBREHAN nga tinago nga mga bahandi agsob nga nagigin laray-ulohan han mga sumat. Pananglitan, han 1922, katapos han damu ka tuig nga maduruto nga pamiling bisan ha makuri nga mga kahimtang, an arkeologo nga taga-Britanya nga hi Howard Carter may-ada nadiskobrehan nga talagsahon gud. Iya hin-agian an lubnganan ni Paraon Tutankhamen. Haros waray pa ito ruba, ngan may-ada mga 5,000 nga butang ha sulod hito.
2 Bisan kon makatirigamnan an nadiskobrehan ni Carter, kadam-an hito an nahingadto ha mga museo o ha personal nga mga koleksyon. Bangin may-ada ito makasaysayan o artistiko nga bili, pero gutiay la an epekto hito ha aton adlaw-adlaw nga kinabuhi o bangin waray pa ngani. Kondi, an Biblia nag-aaghat ha aton nga pamilngon an mga bahandi nga nakakaapekto gud ha aton. Gin-aaghat an ngatanan nga buhaton ito, ngan an balos mas birilhon gud kay han bisan ano nga materyal nga bahandi.—Basaha an Proberbios 2:1-6.
3. Ano an mga kapulsanan han mga bahandi nga igin-aaghat ni Jehova nga pamilngon han mga nagsisingba ha iya?
3 Tagda an bili han mga bahandi nga igin-aaghat ni Jehova nga pamilngon han mga nagsisingba ha iya. Usa hito amo an “kahadlok kan Jehova” nga mahimo magin proteksyon ha aton hinin peligroso nga panahon. (Sal. 19:9) An pakaagi han ‘kahibaro han Dios’ mahimo magresulta ha gidadakui nga dungog nga mahimo makab-ot han tawo—an duok nga relasyon ha Gihitaasi nga Dios. Ngan an hatag han Dios nga mga bahandi nga kinaadman, kahibaro, ngan pagsabot makakabulig ha aton nga malamposan an mga problema ngan kabaraka ha adlaw-adlaw. (Prob. 9:10, 11) Paonan-o naton mabibilngan iton birilhon nga mga bahandi?
Pamiling hin Espirituwal nga mga Bahandi
4. Ano an maggigiya ha aton ha pamiling hin espirituwal nga mga bahandi?
4 Diri sugad han mga arkeologo ngan han iba nga kasagaran na nga namimiling hin mga bahandi ha bisan diin, kita maaram gud kon diin mabibilngan an espirituwal nga mga bahandi. An Pulong han Dios pariho hin mapa nga naggigiya ha aton ha husto nga hinmumutangan han mga bahandi nga iginsaad han Dios. Mahitungod kan Kristo, hi apostol Pablo nagsurat: “Ha iya aada natago an ngatanan nga mga bahandi han kinaadman ngan paghibaro.” (Kol. 2:3) Samtang ginbabasa ito, bangin magpakiana kita: ‘Kay ano nga sadang naton pamilngon ito nga mga bahandi? Ha ano nga paagi ito “natago” kan Kristo? Ngan paonan-o naton ito mabibilngan?’ Basi hibaroan an baton, aton usisahon hin maopay an mga pulong ni apostol Pablo.
5. Kay ano nga nagsurat hi Pablo mahitungod han espirituwal nga mga bahandi?
5 Ginsurat ito ni Pablo ha iya mga igkasi-Kristiano ha Kolosas. Siring niya nga nangangalimbasog gud hiya para ha ira basi ‘lipayon an ira mga kasingkasing ngan magkaurosa hira ha gugma.’ (Basaha an Kolosas 2:1, 2) Kay ano? Matin-aw nga maaram hiya nga an kabugtoan didto bangin naimpluwensyahan han iba ha ira nga nag-aaghat hin Griego nga mga pilosopiya o hin pagsunod utro ha Mosaiko nga Balaud. Marig-on nga nagpahamangno hiya: “Magtagam kamo bangin nga bisan hin-o nga magdara ha iyo ngadto ha kauripon tungod ha iya pilosopiya ngan paglimbong nga waray pulos, sugad ha mga surumatanon han mga tawo, sugad ha binata nga pagturon-an han kalibotan, ngan diri sugad kan Kristo.”—Kol. 2:8.
6. Kay ano nga sadang kita magin interesado ha sagdon ni Pablo?
6 Yana, ito gihapon nga mga impluwensya an ginagamit ni Satanas ngan han iya maraot nga sistema. An panhunahuna, moralidad, tumong, ngan paagi han pagkinabuhi han mga tawo ginmumolde han kalibotanon nga mga pilosopiya, sugad han katutdoan nga diri naeksister an Dios ngan an teoriya han ebolusyon. Daku an impluwensya han palso nga relihiyon ha damu nga popular nga mga selebrasyon. Kadam-an han programa ha TV, sine, musika, ngan iba pa nga kaliawan an gindisenyo basi matagbaw an sayop nga mga hingyap, ngan damu han aada ha Internet an peligroso gud ha ngatanan. An pagkinita o pagpinamati hini ngan han iba nga igin-aaghat han kalibotan madali makaapekto ha aton pagbati ngan disposisyon ha mga instruksyon ni Jehova, ngan bangin diri na kita makakapot hin maopay ha tinuod nga kinabuhi. (Basaha an 1 Timoteo 6:17-19.) Salit, kinahanglan masabtan naton an kahulogan han sagdon ni Pablo ha mga taga-Kolosas ngan sundon ito basi diri kita malimbongan ni Satanas.
7. Sumala kan Pablo, ano an duha nga butang nga mabulig ha mga taga-Kolosas?
7 Mahinunumdoman naton ha mga pulong ni Pablo ha mga taga-Kolosas nga katapos niya unabihon an iya kabaraka, ginpabug-atan niya an duha nga butang nga mabulig ha ira nga maliaw ngan magkaurosa ha gugma. Siyahan, iya gin-unabi an “bug-os nga pagkamarig-on han [“pagsarig ha ira,” NW] paghibaro.” Kinahanglan magin kombinsido gud hira nga husto an ira pagsabot ha Kasuratan basi magin marig-on an pundasyon han ira pagtoo. (Heb. 11:1) Katapos, nag-unabi hiya mahitungod han husto nga ‘kahibaro ha tinago han Dios.’ Kinahanglan diri la simple nga mga kamatuoran an ira hibaroan kondi masabtan liwat nira an mas higlarom nga butang han Dios. (Heb. 5:13, 14) Maopay gud ito nga sagdon ha mga taga-Kolosas ngan ha aton yana! Kondi, paonan-o kita magkakaada hito nga pagsarig ngan husto nga kahibaro? Hi Pablo nagtagana han yawi han nagsiring hiya mahitungod kan Jesu-Kristo: “Ha iya aada natago an ngatanan nga mga bahandi han kinaadman ngan paghibaro.”
Mga Bahandi nga “Natago” kan Kristo
8. Isaysay an kahulogan han pulong nga “natago” kan Kristo.
8 An pagsiring nga an ngatanan nga bahandi han kinaadman ngan kahibaro “natago” kan Kristo diri nangangahulogan nga imposible ito mabilngan. Lugod, nangangahulogan la ito nga basi mabilngan an mga bahandi, kinahanglan mangalimbasog gud kita ngan isentro an aton atensyon kan Kristo. Uyon ini ha ginsiring ni Jesus mahitungod ha iya kalugaringon: “Ako amo an dalan, ngan an kamatuoran, ngan an kinabuhi: waray bisan hin-o nga maabot ha Amay, kon diri maagi ha akon.” (Juan 14:6) Oo, basi mabilngan an kahibaro ha Dios, ginkikinahanglan naton an bulig ngan giya ni Jesus.
9. Ano nga mga papel an iginhatag kan Jesus?
9 Labot ha pagin “an dalan,” hi Jesus nagsiring nga hiya “an kamatuoran, ngan an kinabuhi.” Ipinapakita hini nga labaw pa gud an iya papel ha pagin dalan ngadto ha Amay. May-ada liwat hiya importante nga mga papel basi masabtan an kamatuoran ha Biblia ngan magkaada kinabuhi nga waray kataposan. Oo, natatago kan Jesus an espirituwal nga mga hiyas nga waray kapariho an bili ngan naghuhulat nga madiskobrehan han maduruto nga mga estudyante han Biblia. Aton usisahon an pipira nga hiyas nga nakakaapekto gud ha aton paglaom ha tidaraon ngan ha aton relasyon ha Dios.
10. Ano an aton mahibabaroan mahitungod kan Jesus ha Kolosas 1:19 ngan 2:9?
10 “Aada kan Kristo, ha iya pagkatawo, an hingpit han diosnon nga kinaiya.” (Kol. 1:19; 2:9, An Maopay nga Sumat) Nakaupod ni Jesus an iya langitnon nga Amay hin hilawig hinduro nga panahon, salit mas maaram hiya han personalidad ngan kaburut-on han Dios kay ha bisan hin-o. Ha bug-os nga ministeryo ni Jesus dinhi ha tuna, igintutdo niya an iya hinbaroan ha iya Amay ngan nakita ha iya paggios an mga kalidad nga iginpasilsil han iya Amay. Ito an hinungdan nga nakasiring hi Jesus: “An nakakita ha akon, nakakita man ha Amay.” (Juan 14:9) An ngatanan nga kinaadman ngan kahibaro han Dios natatago o aada kan Kristo, ngan an gimaopayi nga paagi ha paghibaro mahitungod kan Jehova amo an maduruto nga pag-aram han ngatanan nga mahibabaroan mahitungod kan Jesus.
11. Ano an papel ni Jesus ha mga tagna ha Biblia?
11 “Ha iya an ngatanan nga mga manaragna nagtestigo.” (Buh. 10:43) Ipinapakita hito nga natuman kan Jesus an damu nga tagna ha Biblia. Masasabtan la hin husto ito nga mga tagna—tikang ha siyahan nga tagna ni Jehova nga nakarekord ha Genesis 3:15 tubtob ha urusahon nga mga bisyon ha Pahayag—kon tatagdon an papel ni Jesus ha Mesianiko nga Ginhadian. Ito an hinungdan nga damu nga tagna ha Hebreo nga Kasuratan an diri nasasabtan hadton diri nakarawat kan Jesus sugad nga iginsaad nga Mesias. Ito liwat an hinungdan nga hi Jesus gintatagad la nga bantogan nga tawo hadton diri nagpapabili ha Hebreo nga Kasuratan, diin mababasa an damu nga tagna mahitungod han Mesias. An kahibaro mahitungod kan Jesus nabulig ha katawohan han Dios nga masabtan an kahulogan han mga tagna ha Biblia nga waray pa matuman.—2 Kor. 1:20.
12, 13. (a) Ha ano nga paagi hi Jesus “an kalamrag han kalibotan”? (b) Tungod kay gintalwas na tikang ha espirituwal nga kasisidman, ano an obligasyon han mga sumurunod ni Kristo?
12 “Ako amo an kalamrag han kalibotan.” (Basaha an Juan 8:12; 9:5.) Maiha na antes pa matawo hi Jesus ha tuna, hi propeta Isaias nagtagna: “An katawohan nga naglakat ha kasisidman nakakita hin daku nga kapawa: hira nga nag-ukoy dida ha tuna han lambong han kamatayon, ngada ha ira an kahayag sinirang.” (Isa. 9:2) Hi apostol Mateo nagsaysay nga gintuman ni Jesus ito nga tagna han nagtikang Hiya pagsangyaw ngan nagsiring: “Magbasol kamo, kay an ginhadian han langit tikahirani na.” (Mat. 4:16, 17) An ministeryo ni Jesus naghatag ha katawohan hin espirituwal nga kalamrag ngan kagawasan ha pagkauripon ha palso nga mga katutdoan. “Ako, an kalamrag nga kinanhi ha kalibotan,” nagsiring hi Jesus, “basi nga an ngatanan nga nagtutoo ha akon, diri magdayon ha kasisidman.”—Juan 1:3-5; 12:46.
13 Paglabay hin damu ka tuig, hi apostol Pablo nagsiring ha iya mga igkasi-Kristiano: “Ha una nga panahon kamo amo an kasisidman, kondi niyan amo an kalamrag ha Ginoo: manggawi kamo sugad ha mga anak han kalamragan.” (Efe. 5:8) Tungod kay gintalwas na tikang ha espirituwal nga kasisidman, an mga Kristiano obligado nga gumawi sugad nga mga anak han kalamrag. Uyon ini ha ginsiring ni Jesus ha iya mga sumurunod ha Sermon ha Bukid: “Iglawag niyo an iyo mga sugâ ha atubangan han mga tawo, basi hira kumita han iyo mga mag-opay nga buhat, ngan maghimaya hira ha iyo Amay nga aadto ha langit.” (Mat. 5:16) Inaapresyar mo gud ba an espirituwal nga mga bahandi nga imo nabilngan kan Jesus salit irirekomenda mo ito ha iba pinaagi han imo mga pulong ngan maopay nga paggawi sugad nga Kristiano?
14, 15. (a) Ha panahon han Biblia, paonan-o gin-gamit an karnero ngan iba nga hayop ha matuod nga pagsingba? (b) Kay ano nga an papel ni Jesus sugad nga “Karnero han Dios” mas birilhon gud kay han bisan ano nga bahandi?
14 Hi Jesus amo an “Karnero han Dios.” (Juan 1:29, 36) Ha bug-os nga Biblia, an karnero gin-gamit ha makatirigamnan nga paagi ha pagpasaylo han sala ngan pagdaop ha Dios. Pananglitan, katapos ipakita ni Abraham nga andam hiya ha paghalad kan Isaak nga iya anak, ginsidngan hiya nga diri patayon hi Isaak ngan gintagan hin lalakí nga karnero sugad nga kasaliwan. (Gen. 22:12, 13) Han gintalwas an mga Israelita ha Ehipto, gin-gamit na liwat an karnero ha makatirigamnan nga paagi, hini nga higayon sugad nga bahin han paskua ni Jehova. (Eks. 12:1-13) Dugang pa, bahin han kahikayan han Mosaiko nga Balaud an paghalad hin magkalain-lain nga hayop, upod na an karnero ngan kanding.—Eks. 29:38-42; Leb. 5:6, 7.
15 Ito ngatanan nga halad, ngan ha pagkamatuod an ngatanan nga iginhahalad han tawo, diri gud makakahatag hin permanente nga katalwasan tikang ha sala ngan kamatayon. (Heb. 10:1-4) Ha luyo nga bahin, hi Jesus “an Karnero han Dios nga nagkukuha han mga sala han kalibotan.” Ini nga papel ni Jesus mas birilhon gud kay han bisan ano nga materyal nga bahandi nga nadiskobrehan. Salit importante nga maggahin kita hin panahon ha pag-aram hin maopay mahitungod han lukat ngan magpakita hin pagtoo hiton urusahon nga tagana. Ha pagbuhat hito, may-ada kita paglaom nga kumarawat hin hura nga bendisyon ngan balos—himaya ngan dungog upod ni Kristo ha langit para ha ‘gutiay nga panon’ ngan kinabuhi nga waray kataposan ha Paraiso nga tuna para ha ‘iba nga mga karnero.’—Luk. 12:32; Juan 6:40, 47; 10:16.
16, 17. Kay ano nga importante gud nga masabtan naton an papel ni Jesus sugad nga Punoan nga Ahente ngan Maghiringpit han aton pagtoo?
16 Hi Jesus an “Tinikangan [“Punoan nga Ahente,” NW] ngan Maghiringpit han aton pagtoo.” (Basaha an Hebreo 12:1, 2.) Aton mababasa ha Hebreo kapitulo 11 an mapwersa nga paghisgot ni Pablo mahitungod han pagtoo, diin iya ginsaysay an matin-aw nga kahulogan hito ngan gin-unabi an susbaranan nga kalalakin-an ngan kababayin-an sugad kanda Noe, Abraham, Sara, ngan Rahab. Samtang ginhuhunahuna ini ngatanan, gin-aghat ni Pablo an iya mga igkasi-Kristiano nga maghangad ngadto kan Jesus nga amo an Punoan nga Ahente ngan Maghiringpit han aton pagtoo. Kay ano?
17 Bisan kon adton magtinumanon nga kalalakin-an ngan kababayin-an nga mababasa ha Hebreo kapitulo 11 may-ada marig-on nga pagtoo ha saad han Dios, diri hira maaram han ngatanan nga detalye kon paonan-o tutumanon han Dios an iya saad pinaagi han Mesias ngan han Ginhadian. Ha pagkamatuod, bisan adton gin-gamit ni Jehova ha pagsurat han damu nga tagna mahitungod han Mesias waray makasabot hin bug-os han kahulogan han ira ginsurat. (1 Ped. 1:10-12) Kondi yana, nakikita na naton an katumanan han kadam-an nga tagna mahitungod kan Jesus, ngan ginhihingpit hito an aton pagtoo. Salit makakasiring kita nga hi Jesus an Punoan nga Ahente ngan Maghiringpit han aton pagtoo. Importante gud nga masabtan naton hin matin-aw ngan kilalahon ito nga papel ni Jesus!
Padayon nga Mamiling
18, 19. (a) Unabiha an iba nga espirituwal nga hiyas nga natatago kan Kristo. (b) Kay ano nga kinahanglan nga padayon nga mamiling kita hin espirituwal nga mga bahandi kan Jesus?
18 Aton ginhisgotan an pipira la han importante nga papel ni Jesus ha katuyoan han Dios ha pagluwas han katawohan. May-ada iba pa nga espirituwal nga hiyas nga natatago kan Kristo. An pakaagi hito makakahatag ha aton hin kalipay ngan mga bendisyon. Pananglitan, gintawag ni apostol Pedro hi Jesus nga “Prinsipe han kinabuhi” ngan “bitoon ha kaadlawon.” (Buh. 3:15; 5:31; 2 Ped. 1:19) Ha Biblia gintatawag liwat hiya nga “Amen.” (Pah. 3:14) Maaram ka ba han kahulogan ngan pagkaimportante hini nga mga papel? Hi Jesus nagsiring nga padayon nga ‘mamiling, ngan imo hiaagian.’—Mat. 7:7.
19 Ha bug-os nga kasaysayan, waray pariho kan Jesus nga an kinabuhi puno gud hin kahulogan ngan may daku nga epekto ha aton paglaom nga mabuhi ha waray kataposan. Aada ha iya an espirituwal nga mga bahandi nga masayon mabilngan han bisan hin-o nga bug-os-kasingkasing nga namimiling hito. Hinaot magmalipayon ka ngan matagbaw ha pakaagi han mga bahandi nga ‘natatago ha iya.’
Nahinunumdoman Mo Ba?
• Ano nga mga bahandi an igin-aaghat ha mga Kristiano nga pamilngon?
• Kay ano nga an sagdon ni Pablo ha mga taga-Kolosas aplikado pa gihapon ha aton yana?
• Unabiha ngan isaysay an pipira han espirituwal nga bahandi nga “natago” kan Kristo.
[Mga Pakiana]
[Retrato ha pahina 5]
An Biblia pariho hin mapa nga naggigiya ha aton basi mabilngan an mga bahandi nga “natago” kan Kristo