Subara hi Jesus—Pagsangyaw nga May Kaisog

“Nagtirok kami hin kaisog . . . basi maisumat ha iyo an maopay nga sumat.”—1 TES. 2:2, NW.

1. Kay ano nga makaruruyag gud an maopay nga sumat han Ginhadian?

 MAKALILIPAY gud an pakabati hin maopay nga sumat! Ngan an gimaopayi nga sumat amo an maopay nga sumat han Ginhadian. Nagpapasarig ito ha aton nga mawawara na an pag-antos, sakit, kakurian, kabidoan, ngan kamatayon. Naghahatag ito hin paglaom nga mabuhi ha waray kataposan, nagsusumat han katuyoan han Dios, ngan nagtututdo ha aton kon paonan-o magkaada hin duok nga relasyon ha iya. Bangin maghunahuna ka nga malilipay an ngatanan ha pagpamati hini nga sumat nga iginsangyaw ni Jesus ha katawohan. Kondi, makasurubo nga diri sugad hito an kahimtang.

2. Ano an iginpapasabot ni Jesus han hiya nagsiring, “Ako waray kanhi paghatag han kamurayawan”?

² Hi Jesus nagsiring ha iya mga disipulo: “Diri kamo maghunahuna nga an akon pagkanhi paghatag hin kamurayawan ha tuna; ako waray kanhi paghatag han kamurayawan kondi ha kampilan. Kay ako nakanhi pagbutang han usa nga tawo kontra ha iya amay, ngan an anak nga babaye kontra ha iroy niya, ngan an umagad nga babaye kontra ha iya ugangan nga babaye. Ngan an mga kaaway han tawo maaamo an mga aada ha panimalay niya.” (Mat. 10:34-36) Imbes nga karawaton an maopay nga sumat, kadam-an an diri nakarawat hito. An iba nagigin kaaway pa ngani han mga nagpapasamwak hito, bisan kon ira kapamilya.

3. Ano an aton ginkikinahanglan basi tumanon an aton pagsangyaw nga buruhaton?

 ³ An aton iginsasangyaw nga kamatuoran pariho han iginsangyaw ni Jesus, ngan an reaksyon han mga nakakabati hito yana pariho han reaksyon han mga nakabati hito hadto. Diri kita nahipapausa hito. Hi Jesus nagsiring ha iya mga disipulo: “An surugoon diri durodaku han iya agaron. Kon ako ginbiling nira hin pagtimaraot amo man kamo pagbibilngon hin pagtimaraot.” (Juan 15:20) Ha damu nga nasud diri kita nakakaeksperyensya hin direkta nga paglutos, kondi may-ada nagtatamay ngan diri interesado. Salit, nagkikinahanglan kita hin pagtoo ngan karig-on basi padayon nga magsangyaw han maopay nga sumat nga may kaisog.—Basaha an 2 Pedro 1:5-8.

4. Kay ano nga hi Pablo kinahanglan ‘magtirok hin kaisog’ basi makagsangyaw?

⁴ Usahay bangin nakukurian ka nga makigbahin ha ministeryo, o baga hin nahahadlok ka nga buhaton an usa nga bahin hito. Kon ito an imo inaabat, diri ka nag-uusahan. Hi apostol Pablo maisugon nga magwarali nga hilarom an pagsabot ha kamatuoran, kondi may mga panahon nga nakurian hiya pagsangyaw. Ha mga Kristiano ha Tesalonika hiya nagsurat: “Katapos nga nag-antos kami ngan ginmaltrato ha Filipos (sugad han iyo hinbabaroan), nagtirok kami hin kaisog pinaagi ha aton Dios basi maisumat ha iyo an maopay nga sumat han Dios nga may daku nga pangalimbasog.” (1 Tes. 2:2, NW) Ha Filipos hira Pablo ngan Silas ginkastigo han mga awtoridad, ginpriso, ngan ginbutang ha pandugan. (Buh. 16:16-24) Bisan pa hito, ‘nagtirok hira hin kaisog’ basi makapadayon ha pagsangyaw. Paonan-o liwat naton ito mahihimo? Basi hibaroan an baton, aton hisgotan kon ano an nakabulig ha mga surugoon han Dios ha kadaan nga panahon nga magin maisugon ha pagsangyaw han kamatuoran mahitungod kan Jehova, ngan aton usisahon kon paonan-o naton hira masusubad.

Kinahanglan an Kaisog ha Pag-atubang han Pagkontra

5. Kay ano nga an mga maunungon kan Jehova pirme nagkikinahanglan hin kaisog?

⁵ Hi Jesus an pinakamaopay nga susbaranan ha pagin maisugon. Kondi tikang pa ha tinikangan han kasaysayan, an ngatanan nga maunungon kan Jehova pirme nagkikinahanglan hin kaisog. Kay ano? Katapos han pagrebelde ha Eden, nagtagna hi Jehova nga magkakaada hin away butnga hadton nag-aalagad ha Dios ngan kan Satanas. (Gen. 3:15) Ini nga away nakita dayon han an matadong nga hi Abel ginpatay han iya bugto. Ha urhi, ginkontra liwat hi Enok, usa nga matinumanon nga nabuhi antes an Baha. Nagtagna hiya nga maabot an Dios upod an Iya yinukot nga baraan basi maghukom ha diri diosnon nga katawohan. (Jud. 14, 15) Ini nga mensahe waray maruyagi han mga tawo. Nangalas hira kan Enok ngan posible nga papatayon hiya kon waray pahalipota ni Jehova an iya kinabuhi. Maisugon gud hi Enok!—Gen. 5:21-24.

6. Kay ano nga nagkinahanglan hi Moises hin kaisog ha pag-atubang kan Paraon?

⁶ Hunahunaa liwat an kaisog ni Moises han nakiistorya hiya kan Paraon, an magmarando nga gintatagad diri la sugad nga representante han mga dios kondi sugad nga dios mismo, an anak han dios nga adlaw nga hi Ra. Bangin pariho hiya han iba nga Paraon nga nagsisingba ha iya kalugaringon nga ladawan. An iya pulong gintatagad nga balaud. Gamhanan hiya, mapahitas-on ngan matig-a an ulo, diri naruruyag nga diktahan kon ano an iya bubuhaton. Ini an Paraon nga pauroutro nga ginkadto ni Moises, usa nga maaghop nga magbarantay hin karnero, bisan kon diri hiya iginpapatawag ngan diri gintatagad hin maopay. Ano an mensahe ni Moises kan Paraon? Makamaratay nga mga peste. Ngan ano an iya iginpapabuhat? Tugotan an minilyon nga uripon ni Paraon nga bumaya ha Ehipto! Nagkinahanglan ba hi Moises hin kaisog? Sigurado gud!—Num. 12:3; Heb. 11:27.

7, 8. (a) Ano nga mga pagsari an naeksperyensyahan han magtinumanon nga nabuhi antes kan Kristo? (b) Ano an nakabulig ha ira nga magin maisugon ha pagdapig ngan pagsuporta ha putli nga pagsingba?

⁷ Han sumunod nga mga siglo, an mga propeta ngan iba nga magtinumanon padayon nga dinapig nga maisugon ha putli nga pagsingba. Ginlutos hira han kalibotan ni Satanas. Hi Pablo nagsiring: “Ginbato hira, ginlagadi hira, ginsulay hira, pinamatay hira hin kampilan: mga naglinakat-lakat  hira nga namamanapton hin mga anit han karnero ngan kanding; mga nagkawawad-an han ngatanan, mga guol, mga ginpakaraot.” (Heb. 11:37) Ano an nakabulig hadton maunungon nga mga surugoon han Dios nga magpabilin nga marig-on? Ha mga bersikulo antes hini, gin-unabi ni Pablo kon ano an nakabulig kanda Abel, Abraham, Sara, ngan ha iba nga magkaada hin kusog basi makailob. Hiya nagsiring: “Waray nira makarawat an mga iginsaad han Dios, kondi bisan kon hirayo pa ini kaopay, [tungod han pagtoo] nakita na nira ngan ira ginpaabot.” (Heb. 11:13, An Maopay nga Sumat) Waray ruhaduha nga an mga propeta sugad kanda Elias, Jeremias, ngan an iba nga magtinumanon nga nabuhi antes kan Kristo nga maisugon nga dinapig ha tinuod nga pagsingba nabuligan liwat nga makailob tungod han pagsarig nga matutuman an mga saad ni Jehova.—Tito 1:2.

⁸ Ginpamulat hito nga magtinumanon an maopay ngan makaruruyag nga tidaraon. Babanhawon hira ngan ha kataposan magigin hingpit ngan ‘maluluwas tikang ha pagkauripon han pagkamadinunuton’ pinaagi han pag-alagad ni Jesus sugad nga Hitaas nga Saserdote ngan han 144,000 nga iya kabulig nga saserdote. (Roma 8:21) Dugang pa, hi Jeremias ngan an iba nga maisugon nga alagad han Dios ha kadaan nga panahon nagin marig-on tungod han pasarig ni Jehova nga makikita ha iya saad kan Jeremias: “Hira makikiaway ha imo; kondi diri hira makakadaog ha imo: kay ako upod ha imo, nasiring hi Jehova, ha pagluwas ha imo.” (Jer. 1:19) Yana, napaparig-on liwat kita kon aton pinamamalandong an mga saad han Dios ngan an iya pasarig nga papanalipdan kita ha espirituwal.—Prob. 2:7; basaha an 2 Korinto 4:17, 18.

Gugma an Nagpagios kan Jesus nga Magsangyaw nga May Kaisog

9, 10. Ha ano nga paagi iginpakita ni Jesus an kaisog ha atubangan (a) han mga lider han relihiyon, (b) han grupo han mga sundalo, (c) han hitaas nga saserdote, (d) ni Pilato?

⁹ An aton Susbaranan, hi Jesus, nagpakita hin kaisog ha magkalain-lain nga paagi. Pananglitan, bisan kon gindumtan hiya han mga prominente ngan maimpluwensya, waray hiya mahadlok ha pagsumat han tinuod nga mensahe nga karuyag han Dios nga hibaroan han mga tawo. Waray-kahadlok nga iginbuhayhag niya an pagpakamatadong-ha-kalugaringon ngan buwa nga katutdoan han mga lider han relihiyon. Matin-aw ngan prangka nga ginkondenar hira ni Jesus. Ha usa nga higayon, hiya nagsiring: “Kairo niyo, mga eskriba ngan mga Pariseo, mga salingkapaw! Kay sugad kamo han mga pinabusag nga mga lurubngan, nga ha gawas matahom, kondi an sakob puno han mga tul-an han mga patay nga mga tawo, ngan han ngatanan nga mga kahugawan. Sugad man kamo, nga ha gawas napakita ha mga tawo nga mga magtadong, kondi ha sakob mga puno kamo hin pagkasalingkapaw ngan karaotan.”—Mat. 23:27, 28.

¹⁰ Han ginkaatubang ni Jesus an mga sundalo ha hardin han Getsemani, waray-kahadlok nga nagpakilala hiya. (Juan 18:3-8) Ha urhi gindara hiya ha atubangan han Sanhedrin ngan gin-imbistigar han hitaas nga saserdote. Bisan kon maaram hiya nga an hitaas nga saserdote namimiling la hin hinungdan basi patayon hiya, waray hiya mahadlok ha pagsumat nga Hiya an Kristo ngan Anak han Dios. Nagsiring liwat hiya nga makakakita hira ha iya nga “nalingkod ha too han gahum, ngan makanhi ha mga dampog han kalangitan.” (Mar. 14:53, 57-65) Waray pag-iha katapos hito, nakagapos nga inatubang hi Jesus  kan Pilato, nga makakatalwas unta ha iya. Kondi hi Jesus nagpabilin nga hilom ngan waray bumaton ha mga akusasyon ha iya. (Mar. 15:1-5) Ini ngatanan nagkinahanglan hin daku nga kaisog.

11. Paonan-o an kaisog nakakaw-ing ha gugma?

¹¹ Kondi hi Jesus nagsiring kan Pilato: ‘Tungod hini ginpakatawo ako ngan tungod hini ako kinanhi ha kalibotan, basi ako magtestigo han kamatuoran.’ (Juan 18:37) Ginsugo hiya ni Jehova nga magsangyaw han maopay nga sumat, ngan nalipay ha pagbuhat hito tungod kay nahigugma hiya ha iya Amay. (Luk. 4:18, 19) Hi Jesus may-ada liwat gugma ha mga tawo. Maaram hiya nga makuri an ira pagkinabuhi. Ha pariho nga paagi, maisugon ngan waray-kahadlok nga nagsasangyaw kita tungod han aton hilarom nga gugma kan Jehova ngan ha aton igkasi-tawo.—Mat. 22:36-40.

An Baraan nga Espiritu Nabulig ha Aton ha Pagsangyaw nga May Kaisog

12. Ano an hinungdan han kalipay han siyahan nga mga disipulo?

¹² Pipira ka semana tikang han kamatay ni Jesus, nalipay an mga disipulo tungod han bag-o nga mga disipulo nga igindugang ni Jehova. Ha usa la ka adlaw, mga 3,000 nga Judio ngan proselita tikang ha damu nga nasud nga nakada ha Jerusalem ha pagsaurog han Pentekostes an nabawtismohan! Sigurado nga nagin iristoryahon ito ha bug-os nga Jerusalem! An Biblia nasiring: “An kahadlok inabot ha ngatanan nga mga kalag, ngan damu nga mga katingalahan ngan mga tigaman, nga binuhat han mga apostol.”—Buh. 2:41, 43.

13. Kay ano nga an mga disipulo nag-ampo nga magkaada hin kaisog, ngan ano an resulta?

¹³ Nasina hinduro an mga lider han relihiyon ngan gindakop hira Pedro ngan Juan, ginpriso hira hin usa ka gab-i, ngan ginpinahan nga diri magyakan mahitungod kan Jesus. Han ginpagawas hira, iginsumat nira ha kabugtoan an nahitabo, ngan nag-ampo hira ngatanan mahitungod han pagkontra nga ira naieksperyensyahan. Hira naghangyo: “O, Ginoo, . . . hatagi an imo mga uripon, nga igyakan nira an imo pulong ha waray kahadlok.” Ano an resulta? “Hira ngatanan napuno han espiritu santo, ngan hira nagyakan han pulong han Dios ha waray kahadlok.”—Buh. 4:24-31.

14. Paonan-o an baraan nga espiritu nabulig ha aton ha pagsangyaw?

¹⁴ Tigamni nga an gamhanan nga baraan nga espiritu ni Jehova an nakabulig ha mga disipulo nga magkaada hin kaisog ha pagyakan han pulong han Dios. An kaisog nga magyakan han kamatuoran ha iba, bisan ha mga nakontra ha aton mensahe, diri nadepende ha aton kondi ha kusog nga tikang kan Jehova. Mahimo niya ihatag ngan ihahatag gud niya an iya baraan nga espiritu kon mangaro kita hito. Pinaagi han bulig ni Jehova, maipapakita liwat naton an kaisog nga ginkikinahanglan basi malamposan an bisan ano nga pagkontra.—Basaha an Salmo 138:3.

An mga Kristiano Yana Nagsasangyaw nga May Kaisog

15. Paonan-o ginbabahin-bahin han kamatuoran an mga tawo yana?

¹⁵ Yana, sugad han naglabay, padayon nga ginbabahin-bahin han kamatuoran an mga tawo. May-ada nakarawat, kondi may-ada liwat diri nakakasabot o nag-aapresyar han aton paagi han pagsingba. An iba nagpapakaraot, nagtatamay, o nagdudumot pa ngani ha aton, sugad han igintagna ni Jesus. (Mat. 10:22) Usahay, an media nagpapagawas hin sayop nga mga sumat ngan maraot nga propaganda kontra ha aton. (Sal. 109:1-3) Kondi, an katawohan ni Jehova maisugon nga nagpapasamwak han maopay nga sumat ha bug-os nga kalibotan.

16. Ano nga eksperyensya an nagpapakita nga an kaisog mahimo makapabag-o han panhunahuna han aton ginsasangyawan?

¹⁶ An aton kaisog mahimo makapabag-o han panhunahuna han mga tawo ha mensahe han Ginhadian. Usa nga bugto nga babaye ha Kyrgyzstan an nagsiring: “Samtang nagsasangyaw ako, usa nga tagbalay an nagsiring ha akon: ‘Natoo ako ha Dios kondi diri ha Dios han mga Kristiano. Bumalik ka pa ngani dinhi, ipapakagat ko ikaw ha akon ayam!’ Ha iya luyo may-ada daku nga bulldog nga nakahigot. Kondi durante han kampanya han Kingdom News Num. 37 nga ‘Hirani Na an Kataposan han Palso nga Relihiyon!,’ nagdesisyon ako nga bumalik hito nga balay  kay bangin makaistorya ko an usa nga kapamilya hito nga lalaki. Kondi, hiya la gihapon an nag-abri han purtahan. Nag-ampo dayon ako kan Jehova ngan nagsiring: ‘Kumusta, nahinunumdoman ko pa an aton pag-istorya tulo ka adlaw na an naglabay, pati na an imo ayam. Kondi karuyag ko gud ikaw hatagan hini tungod kay pariho ha imo, natoo liwat ako ha usa la nga matuod nga Dios. Hirani na bungkagon han Dios an mga relihiyon nga nagpapasipara ha iya. Damu pa an imo mahibabaroan mahitungod hito kon babasahon mo ini.’ Nahipausa ako nga ginkarawat niya an Kingdom News. Katapos kinadto ako ha sunod nga balay. Paglabay hin pipira ka minuto, ginlanat ako han lalaki dara-dara an Kingdom News. Hiya nagsiring, ‘Ginbasa ko ini. Ano an kinahanglan ko buhaton basi diri ako hukman han Dios?’” Natikangan hiya hin pag-aram ngan nagtikang pagtambong ha mga katirok.

17. Paonan-o an kaisog han usa nga bugto nakaparig-on ha estudyante han Biblia nga nahahadlok ha tawo?

¹⁷ An aton kaisog mahimo liwat makaaghat ha iba nga magin maisugon. Ha Russia, usa nga bugto nga babaye nga sakay hin bus an nagtanyag hin magasin ha iya igkasi-pasahero. Hinkit-an ito han usa nga lalaki ngan tigda nga binuhát ha iya lingkoran, ginrabot an magasin ha kamot han bugto, ginkurumos ngan ginlabog ha salog. Ginbuyayawan niya an bugto, gin-aro an adres ngan ginsidngan nga diri na magsangyaw hito nga lugar. An bugto nag-ampo kan Jehova ha pangaro hin bulig ngan ginhunahuna an ginsiring ni Jesus: “Diri kamo mahadlok ha nakakamatay han lawas.” (Mat. 10:28) Kalmado nga tinukdaw hiya ngan nagsiring ha lalaki, “Diri ko ihahatag an akon adres, ngan magpapadayon ako pagsangyaw dinhi.” Katapos hinaw-as hiya. Diri hiya maaram nga sakay liwat ha bus an usa han iya gindudumarahan hin pag-aram ha Biblia. Ito nga babaye diri natambong ha mga katirok tungod ha kahadlok ha tawo. Kondi, han iya nakita an kaisog han bugto, nagdesisyon hiya nga matambong na ha mga katirok.

18. Ano an mabulig ha imo nga magsangyaw nga may kaisog sugad kan Jesus?

¹⁸ Hini nga kalibotan nga bulag ha Dios, ginkikinahanglan an kaisog ha pagsangyaw sugad kan Jesus. Ano an mabulig ha imo ha pagbuhat hito? Hunahunaa an tidaraon. Parig-ona pirme an imo gugma ha Dios ngan ha igkasi-tawo. Pangaro kan Jehova hin kaisog pinaagi han pag-ampo. Hinumdumi pirme nga diri ka gud nag-uusahan, kay kaupod mo hi Jesus. (Mat. 28:20) An baraan nga espiritu magpapakusog ha imo. Bibendisyonan ngan bubuligan ka ni Jehova. Salit, hinaot magin maisugon kita ngan magsiring: “An Ginoo amo an akon paratambulig; diri ako mahahadlok: Ano ba an mabubuhat han tawo ha akon?”—Heb. 13:6.

Ano an Imo Baton?

• Kay ano nga ginkikinahanglan han mga surugoon han Dios an kaisog?

• Mahitungod ha pagin maisugon, ano an aton mahibabaroan . . .

ha magtinumanon nga nabuhi antes kan Kristo?

kan Jesu-Kristo?

ha mga Kristiano ha siyahan nga siglo?

ha mga igkasi-Kristiano yana?

[Mga Pakiana]

[Retrato ha pahina 21]

Waray-kahadlok nga iginbuhayhag ni Jesus an mga lider han relihiyon

[Retrato ha pahina 23]

Hi Jehova naghahatag ha aton hin kaisog ha pagsangyaw