Subara hi Jesus—Pagtutdo nga May Gugma
Subara hi Jesus—Pagtutdo nga May Gugma
“Waray pa tawo nga nagyakan sugad hini.”—JUAN 7:46.
1. Ano an reaksyon han mga tawo ha paagi han pagtutdo ni Jesus?
HANDURAWA an kalipay ha pagpamati han pagtutdo ni Jesus! Aton mababasa ha Biblia an epekto han iya pagtutdo ha mga nakapamati hito. Pananglitan, an parasurat han Ebanghelyo nga hi Lukas nagsaysay nga an mga kahimungto ni Jesus “nanhipausa han mga pulong nga grasya nga ginowa tikang ha iya baba.” Hi Mateo nagsumat nga han nagtutdo hi Jesus ha Sermon ha Bukid, an mga namati “nanhipausa han iya pagtutdo.” Ngan hi Juan nagsiring nga an mga opisyal nga ginsugo pagdakop kan Jesus binalik nga diri hiya kaupod, ngan nagsiring: “Waray pa tawo nga nagyakan sugad hini.”—Luk. 4:22; Mat. 7:28; Juan 7:46.
2. Ano an mga paagi ni Jesus ha pagtutdo?
2 Husto gud ito nga mga opisyal. Waray ruhaduha nga hi Jesus an pinakabantogan nga Magturutdo ha bug-os nga kasaysayan. An iya pagtutdo matin-aw, simple, ngan diri maninigaran. May-kaabtik nga naggamit hiya hin mga ilustrasyon ngan pakiana. Iginpahiuyon niya an iya pagtutdo ha iya mga kaistorya, may katungdanan man hira o ordinaryo nga tawo. An mga kamatuoran nga iya igintutdo masayon masabtan kondi hilarom an kahulogan. Pero diri la ito an hinungdan kon kay ano nga hi Jesus an bantogan nga Magturutdo.
Gugma an Nangunguna nga Kalidad
3. Sugad nga magturutdo, kay ano nga naiiba hi Jesus ha mga lider han relihiyon ha iya panahon?
3 Sigurado nga may-ada baltok nga mga eskriba ngan Pariseo nga may kahibaro ngan abilidad ha pagtutdo. Kay ano nga an paagi han pagtutdo ni Jesus naiiba gud? An mga lider han relihiyon hito nga panahon waray gugma ha ordinaryo nga mga tawo. Lugod, ira gintamay hira ngan ginhunahuna sugad nga mga ginpanhimaraot. (Juan 7:49) Diri sugad hito hi Jesus. Nalooy hiya ha ira tungod kay hira “nanluluya ngan nagpapatlaag, sugad hin mga karnero nga waray magbarantay.” (Mat. 9:36) Malumo, mapinairon, ngan buotan hiya. An mga lider han relihiyon waray liwat tinuod nga gugma ha Dios. (Juan 5:42) Ha kabaliktaran, hi Jesus nahigugma ha iya Amay ngan nalilipay ha pagbuhat han Iya kaburut-on. An mga lider han relihiyon nagbaliko han mga pulong han Dios basi matuman an ira karuyag, kondi hi Jesus nahigugma ha “pulong han Dios”—iya ito igintutdo, iginsaysay, gindepensahan, ngan igin-aplikar ha iya kinabuhi. (Luk. 11:28) Oo, gugma an nangunguna nga kalidad ni Kristo, ngan nakita ito ha iya mga katutdoan, pagtratar ha mga tawo, ngan paagi han pagtutdo.
4, 5. (a) Kay ano nga importante an pagtutdo nga may gugma? (b) Kay ano nga importante liwat ha pagtutdo an kahibaro ngan kaabtik?
4 Kumusta man kita? Sugad nga mga sumurunod ni Kristo, karuyag naton subaron hiya ha aton ministeryo ngan pagkinabuhi. (1 Ped. 2:21) Salit an aton tumong diri la pagsumat han kamatuoran ha Biblia kondi pagpakita liwat han mga kalidad ni Jehova, labi na an iya gugma. Damu man an aton hinbabaroan o gutiay la, maopay man kita magtutdo o diri, an gugma nga aton iginpapakita makakabulig ha pagtugkad han kasingkasing han aton ginsasangyawan. Basi magin epektibo gud ha panhimo hin disipulo, kinahanglan subaron naton hi Jesus pinaagi ha pagtutdo nga may gugma.
5 Syempre, basi magin maopay nga magturutdo, kinahanglan maaram kita han aton igintututdo ngan may kaabtik ha pagtutdo hito. Ginbuligan ni Jesus an iya mga disipulo nga magkaada hin kahibaro ngan kaabtik, ngan yana ginbubuligan kita ni Jehova nga magkaada hito pinaagi han iya organisasyon. (Basaha an Isaias 54:13; Lukas 12:42.) Bisan pa hito, kinahanglan mangalimbasog kita nga diri la magtutdo han aton hinbabaroan kondi kinasingkasing nga buhaton ito. Kon may-ada kita kahibaro, kaabtik, ngan gugma ha aton pagtutdo, makapatagbaw gud an resulta. Salit ha ano nga mga paagi maipapakita naton an gugma kon nagtututdo kita? Paonan-o ito ginbuhat ni Jesus ngan han iya mga disipulo? Aton usisahon.
Kinahanglan Higugmaon Naton hi Jehova
6. Paonan-o kita nag-iistorya mahitungod han aton hinigugma?
6 Nalilipay kita pag-istorya han mga butang nga importante ha aton, ngan samtang nag-iistorya kita, nakikita han mga tawo an aton kalipay ngan kadasig. Tinuod ini labi na kon gin-iistorya naton an aton hinigugma. Kasagaran nga karuyag gud naton isumat ha iba an aton hinbabaroan mahitungod ha iya. Aton hiya gindadayaw, ginpapasidunggan, ngan gindidepensahan. Ginbubuhat naton ito tungod kay karuyag naton nga maruyagan liwat hiya han iba.
7. Ano an ginbuhat ni Jesus tungod han iya gugma ha Dios?
7 Antes naton mabuligan an iba nga higugmaon hi Jehova, kinahanglan kita mismo nakilala ngan nahigugma ha iya. Ha pagkamatuod, an totoo nga pagsingba basado ha gugma ha Dios. (Mat. 22:36-38) Hi Jesus an hingpit nga susbaranan hini. Hinigugma niya hi Jehova ha iya bug-os nga kasingkasing, hunahuna, kalag, ngan kusog. Kilala gud ni Jesus an iya Amay tungod kay bangin binilyon ka tuig na nga magkaupod hira ha langit. Ano an nagin resulta? “Ako nahigugma ha Amay,” siring ni Jesus. (Juan 14:31) Ipinakita niya ito ha ngatanan nga iya ginyakan ngan ginbuhat. Pirme ito nagpapagios ha iya nga buhaton an nakakalipay ha Dios. (Juan 8:29) Ito an nag-aghat ha iya nga kondenaron an mga lider han relihiyon nga salingkapaw nga nag-angkon nga nagrirepresentar ha Dios. Nagpagios liwat ito ha iya nga magsangyaw mahitungod kan Jehova ngan buligan an iba nga makilala ngan higugmaon an Dios.
8. Ano an ginbuhat han mga disipulo ni Jesus tungod han ira gugma ha Dios?
8 Pariho kan Jesus, an iya mga disipulo ha siyahan nga siglo nahigugma kan Jehova, ngan ito an nagpagios ha ira nga magin maisugon ngan madasigon ha pagsangyaw han maopay nga sumat. Ira ginpuno an Jerusalem han ira katutdoan bisan kon nakontra an prominente nga mga lider han relihiyon. Diri gud nira napupugngan an pagyakan han mga butang nga ira hinkit-an ngan hinbatian. (Buh. 4:20; 5:28) Maaram hira nga hi Jehova nabulig ngan magbibendisyon ha ira—ngan ginbendisyonan gud hira! Ha pagkamatuod, waray pa mag-30 ka tuig tikang han kamatay ni Jesus, hi apostol Pablo nakagsurat nga an maopay nga sumat naisangyaw na “ha ngatanan nga mga binuhat ha ilarom han langit.”—Kol. 1:23.
9. Paonan-o naton mapaparig-on an aton gugma ha Dios?
9 Kon karuyag naton nga magin epektibo gud ha pagtutdo, kinahanglan siguruhon naton nga padayon nga napaparig-on an aton gugma ha Dios. Paonan-o? Pinaagi han agsob nga pakiistorya ha Dios ha pag-ampo. Napaparig-on liwat naton an aton gugma ha iya pinaagi han pag-aram ha iya Pulong, pagbasa han mga publikasyon nga basado-ha-Biblia, ngan pagtambong ha Kristiano nga mga katirok. Samtang nag-uuswag an aton kahibaro ha Dios, naghihilarom an aton gugma ha iya. Ngan kon an aton gugma ha Dios nakikita ha aton pulong ngan buhat, maoobserbahan ito han iba ngan bangin makaaghat ha ira nga higugmaon hi Jehova.—Basaha an Salmo 104:33, 34.
Kinahanglan Pabilhan Naton an Aton Igintututdo
10. Ano an usa nga pangirilal-an han maopay nga magturutdo?
10 An maopay nga magturutdo nagpapabili han iya igintututdo. Kinahanglan kombinsido hiya nga tinuod, importante, ngan mapulsanon ito. Kon ginpapabilhan niya ito, makikita an iya kadasig, ngan makakaimpluwensya gud ito ha iya gintututdoan. Pero kon diri ginpapabilhan han magturutdo an iya igintututdo, makakalaom ba hiya nga papabilhan ito han iya gintututdoan? Importante gud an imo susbaranan sugad nga magturutdo han Pulong han Dios. Hi Jesus nagsiring: “Masusugad han iya magturutdo an tagsa nga tinon-an.”—Luk. 6:40, An Maopay nga Sumat.
11. Kay ano nga birilhon kan Jesus an iya igintututdo?
11 Birilhon kan Jesus an iya igintututdo. Maaram hiya nga importante an iya isusumat—an kamatuoran mahitungod han iya langitnon nga Amay, an “pulong han Dios” ngan an “mga pulong han kinabuhi nga waray kataposan.” (Juan 3:34; 6:68) An mga kamatuoran nga iya igintutdo pariho hin malamrag nga kapawa nga nagbuhayhag han maraot ngan nagpatin-aw han maopay. Naghatag ito hin paglaom ngan pagliaw ha mga mapainubsanon nga nalimbongan han palso nga mga lider han relihiyon ngan ginpapakurian han Yawa. (Buh. 10:38) An gugma ni Jesus ha kamatuoran makikita diri la ha iya mga katutdoan kondi ha ngatanan nga iya ginbuhat.
12. Ano an pagtagad ni apostol Pablo ha maopay nga sumat?
12 Pariho kan Jesus, ginhigugma ngan ginpabilhan gud han iya mga disipulo an kamatuoran mahitungod kan Jehova ngan kan Kristo salit an mga nakontra waray makapaundang ha ira ha pagsumat hito ha iba. Ha mga igkasi-Kristiano ha Roma, hi Pablo nagsurat: “Andam ako ha pagwali han maopay nga sumat . . . Kay diri ako naaawod han maopay nga sumat; kay ini amo an gahum han Dios ngadto ha kaluwasan ha ngatanan nga natoo.” (Roma 1:15, 16) Para kan Pablo, daku nga kadungganan an pagpasamwak han kamatuoran. Hiya nagsurat: “Ha akon, . . . ini nga grasya iginhatag, ha pagwali ha mga Hentil an diri sadang matugkad nga mga manggad ni Kristo.” (Efe. 3:8) Mahahanduraw gud naton an kadasig ni Pablo samtang nagtututdo hiya ha iba mahitungod kan Jehova ngan ha Iya mga katuyoan.
13. Kay ano nga sadang naton pabilhan an maopay nga sumat?
13 An maopay nga sumat ha Pulong han Dios nabulig ha aton nga makilala an Maglalarang ngan magin duok ha iya. Naghahatag ito hin makapatagbaw nga mga baton ha importante nga mga pakiana ngan may-ada gahum nga bag-ohon an aton kinabuhi, maghatag hin paglaom, ngan magparig-on ha aton ha panahon han kakurian. Dugang pa, nabulig ito ha aton nga magkaada mapulsanon nga kinabuhi nga waray kataposan. Waray kahibaro nga mas birilhon o mas importante kay han maopay nga sumat. Presyoso gud ito nga regalo ngan naghahatag ha aton hin daku nga kalipay. Ngan mas malilipay kita kon aton iginpapaangbit ito ha iba.—Buh. 20:35.
14. Paonan-o naton mapapahilarom an gugma ha kamatuoran nga aton igintututdo?
14 Ano an imo bubuhaton basi mapahilarom pa gud an imo gugma ha maopay nga sumat? Samtang ginbabasa mo an Pulong han Dios, undang ha panapanahon ngan pamalandonga an imo nabasa. Pananglitan, handurawa nga kaupod ka ni Jesus durante han iya ministeryo ha tuna o nagbibiyahe ka upod ni apostol Pablo. Handurawa an imo kalugaringon ha bag-o nga kalibotan ngan an naiiba gud nga kahimtang didto. Pamalandonga an mga bendisyon nga imo nakarawat tungod han pagsunod ha maopay nga sumat. Kon magpapabilin nga marig-on an imo gugma ha maopay nga sumat, aabaton ito han imo gintututdoan. Salit, kinahanglan pamalandungon naton hin maopay an aton hinbabaroan ngan tagdon an aton igintututdo.—Basaha an 1 Timoteo 4:15, 16.
Kinahanglan Higugmaon Naton an mga Tawo
15. Kay ano nga an magturutdo sadang magpakita hin gugma ha iya mga estudyante?
15 Binubuligan han maopay nga magturutdo an iya mga estudyante nga magin komportable basi maaghat hira nga mahibaro ngan ipahayag an ira pagbati. An mahigugmaon nga magturutdo nabulig ha iya mga estudyante nga mahibaro tungod kay kinasingkasing nga nagtatagad hiya ha ira. Iginpapahiuyon niya an iya pagtutdo ha ira panginahanglan ngan kapasidad ha pagsabot. Gintatagad niya an ira mga abilidad ngan kahimtang. Kon sugad hito an gugma han magturutdo, aabaton ito han mga estudyante, ngan magigin makalilipay an pagtutdo ngan pag-aram.
16. Ha ano nga mga paagi iginpakita ni Jesus an iya gugma ha mga tawo?
16 Sugad hito an gugma nga iginpakita ni Jesus. An gidadakui nga kapahayagan han iya gugma amo an paghatag han iya hingpit nga kinabuhi basi maluwas an iba. (Juan 15:13) Durante han iya ministeryo, pirme hiya andam ha pagbulig ngan ha pagtutdo ha iba mahitungod han iya Amay. Imbes nga maghulat nga daupon han mga tawo, nagbaktas hiya hin ginatos ka kilometro basi isangyaw an maopay nga sumat. (Mat. 4:23-25; Luk. 8:1) Mapailubon ngan makonsiderasyon hiya. Han kinahanglan sawayon an iya mga disipulo, mahigugmaon nga ginbuhat niya ito. (Mar. 9:33-37) Gindasig niya hira pinaagi han pagpahayag hin pagsarig nga magigin epektibo hira nga parasangyaw han maopay nga sumat. Waray tawo nga labaw pa kan Jesus sugad nga mahigugmaon nga magturutdo. An gugma nga iya iginpakita ha iya mga disipulo nagpagios ha ira nga higugmaon liwat hiya ngan sundon an iya mga sugo.—Basaha an Juan 14:15.
17. Paonan-o iginpakita han mga disipulo ni Jesus an gugma ha iba?
17 Pariho kan Jesus, an iya mga disipulo nagpakita hin hilarom nga gugma ngan pagtagad ha ira nasasangyawan. Bisan kon ginlulutos ngan namimeligro an kinabuhi, ginbuligan nira an iba ngan naglampos ha pagsangyaw han maopay nga sumat. Hinigugma gud nira adton ira nabuligan ha espirituwal! Ipinakita ni apostol Pablo an iya gugma han hiya nagsurat: “Magtalunoy kami ha butnga niyo, sugad hin usa nga yaya nga nag-uugay ha iya kalugaringon nga anak. Tungod hini, naghigugma gud kami ha iyo, ngan naruruyag kami, diri la ha paghatag han maopay nga sumat han Dios, kondi sugad man an amon mga kalag, tungod kay mga hinigugma kamo namon.”—1 Tes. 2:7, 8.
18, 19. (a) Kay ano nga andam kita magsakripisyo ha pagsangyaw? (b) Paghatag hin ehemplo nga nagpapakita nga naoobserbahan han iba an aton gugma.
18 Yana, an mga Saksi ni Jehova nagsasangyaw ha bug-os nga kalibotan basi pamilngon adton naruruyag gud nga makakilala ngan mag-alagad ha Dios. Ha pagkamatuod, han naglabay nga 17 ka tuig, sobra usa ka bilyon ka oras kada tuig an aton gin-gamit ha pagsangyaw ngan panhimo hin disipulo—ngan nagpapadayon kita hito nga buruhaton. Kinaburut-on nga ginbubuhat naton ito, bisan kon kinahanglan isakripisyo an aton panahon, kusog, ngan materyal nga panag-iya. Pariho kan Jesus, maaram kita nga hingyap han aton mahigugmaon ngan langitnon nga Amay nga an ngatanan magkaada han kahibaro nga naggigiya ha kinabuhi nga waray kataposan. (Juan 17:3; 1 Tim. 2:3, 4) Gugma an nagpapagios ha aton nga buligan an mga tangkod-an-kasingkasing nga makilala ngan higugmaon liwat hi Jehova.
19 Naoobserbahan han iba an gugma nga aton iginpapakita. Pananglitan, usa nga payunir ha Estados Unidos an nagsurat ha mga namatayan han ira hinigugma basi liawon hira. Usa nga lalaki an nagbalos ha iya: “Ha siyahan nahipausa ako nga may-ada nagsakripisyo pagsurat ha diri niya kakilala basi buligan hiya nga makailob ha makuri nga kahimtang. Masisiring ko gud nga may-ada ka gugma ha imo igkasi-tawo ngan ha Dios nga naggigiya ha mga tawo ha dalan han kinabuhi.”
20. Ano an resulta han pagtutdo nga may gugma?
20 May-ada nagsiring nga maopay gud an resulta kon an kaabtik gin-uupdan hin gugma. Ha aton pagtutdo, nangangalimbasog kita nga buligan an aton mga estudyante nga makilala hi Jehova ngan higugmaon hiya. Oo, basi magin epektibo gud nga magturutdo, kinahanglan naton an gugma ha Dios, gugma ha kamatuoran, ngan gugma ha mga tawo. Samtang nangangalimbasog kita nga magkaada hito nga gugma ngan ipakita ito ha ministeryo, naieksperyensyahan naton diri la an kalipay han paghatag kondi an katagbaw liwat ha pagsubad kan Jesus ngan pagpalipay kan Jehova.
Ano an Imo Baton?
• Ha aton pagtutdo han maopay nga sumat, kay ano nga importante nga magkaada hin . . .
gugma ha Dios?
pagpabili ha aton igintututdo?
gugma ha aton gintututdoan?
[Mga Pakiana]
[Retrato ha pahina 15]
Kay ano nga an paagi han pagtutdo ni Jesus naiiba gud ha mga eskriba ngan Pariseo?
[Retrato ha pahina 18]
An maopay nga pagtutdo nagkikinahanglan hin kahibaro, kaabtik, ngan labaw han ngatanan, gugma