Kinabuhi nga Waray Kataposan ha Tuna—Paglaom han Kristiano?
Kinabuhi nga Waray Kataposan ha Tuna—Paglaom han Kristiano?
“Pagpapahiron [han Dios] an ngatanan nga luha tikang ha ira mga mata; ngan mawawaray na kamatayon.”—PAH. 21:4.
1, 2. Ano an nagpapamatuod nga damu nga Judio ha siyahan nga siglo an naglalaom han kinabuhi nga waray kataposan ha tuna?
USA nga riko ngan prominente nga batan-on an dinaop kan Jesus, linuhod ha iya atubangan, ngan nagpakiana: “Maopay nga Magturutdo, ano an akon bubuhaton nga makapanunod ako han kinabuhi nga waray kataposan?” (Mar. 10:17) Nagpakiana hiya kon paonan-o makakapanunod hin kinabuhi nga waray kataposan—kondi diin? Sugad han aton ginhisgotan ha nahiuna nga artikulo, ginatos ka tuig antes hito, iginhatag han Dios ha mga Judio an paglaom nga pagkabanhaw ngan kinabuhi nga waray kataposan ha tuna. Ito an padayon nga ginlalaoman han damu nga Judio ha siyahan nga siglo.
2 Sigurado nga ginhunahuna han sangkay ni Jesus nga hi Marta an pagkabanhaw dinhi ha tuna han hiya magsiring mahitungod han iya bugto nga namatay: “Ako maaram, nga hiya mababanhaw ha pagkabanhaw ha kataposan nga adlaw.” (Juan 11:24) Hito nga panahon, an mga Saduseo diri natoo ha pagkabanhaw. (Mar. 12:18) Kondi, ha libro ni George Foot Moore nga Judaism in the First Centuries of the Christian Era, hiya nagsiring: “An mga sinurat . . . ha ikaduha o siyahan nga siglo antes han aton panahon nagpapamatuod nga damu an natoo nga maabot an panahon nga adton nagkamatay mabubuhi utro dinhi ha tuna.” An riko nga dinaop kan Jesus karuyag magkaada hin kinabuhi nga waray kataposan dinhi ha tuna.
3. Ano nga mga pakiana an hihisgotan hini nga artikulo?
3 Yana, damu nga relihiyon ngan eskolar ha Biblia an nasiring nga waray igtutdo ni Jesus an paglaom nga kinabuhi nga waray kataposan ha tuna. Kadam-an an naglalaom nga mabubuhi hira ha kalibotan han mga espiritu kon mamatay hira. Salit kon nababasa ha Kristiano Griego nga Kasuratan an mga pulong nga “kinabuhi nga waray kataposan,” damu an naghuhunahuna nga kinabuhi ha langit an iginpapasabot hito. Amo gud ba? Ano an iginpapasabot ni Jesus han gin-unabi niya an kinabuhi nga waray kataposan? Ano an gintotoohan han iya mga disipulo? Igintututdo ba han Kristiano Griego nga Kasuratan an paglaom nga kinabuhi nga waray kataposan ha tuna?
Kinabuhi nga Waray Kataposan “ha Pagpahiuli”
4. Ano an mahitatabo durante “ha pagpahiuli”?
4 Igintututdo han Biblia nga an dinihogan nga mga Kristiano babanhawon ngadto ha langit basi magmando ha tuna. (Luk. 12:32; Pah. 5:9, 10; 14:1-3) Kondi, han gin-unabi ni Jesus an kinabuhi nga waray kataposan, diri la ito nga grupo an iya ginhuhunahuna. Tagda an iya ginsiring ha iya mga disipulo katapos lumakat nga masurub-on an riko nga batan-on han gin-aghat hiya nga bayaan an ngatanan niya nga panag-iya ngan magin sumurunod ni Kristo. (Basaha an Mateo 19:28, 29.) Ginsumatan ni Jesus an iya mga apostol nga magigin kaupod hira han magmamando sugad nga mga hadi ngan hukom ha ‘napulo kag duha nga katulinan ni Israel,’ nga amo an katawohan ha kabug-osan labot la hadton magmamando ha langit. (1 Kor. 6:2) Gin-unabi liwat niya an balos para ha “bisan hin-o” nga nasunod ha iya. Hira liwat ‘makakapanunod han kinabuhi nga waray kataposan.’ Ini ngatanan mahitatabo durante “ha pagpahiuli.”
5. Ano an “pagpahiuli”?
5 Ano an iginpapasabot ni Jesus ha “pagpahiuli”? Ginhubad ito nga “an bag-o nga kalibotan” ha The Bible—An American Translation. Ha The Jerusalem Bible ginhubad ito nga “kon an ngatanan nabag-o na,” ngan ha The Holy Bible—New International Version ginhubad ito nga “an pagbag-o han ngatanan nga butang.” Han gin-gamit ni Jesus ito nga pulong waray niya ito igsaysay, salit matin-aw nga an iya ginhisgotan amo an maiha na nga paglaom han mga Judio. Magkakaada hin pagpahiuli han mga kahimtang dinhi ha tuna basi magin pariho ito ha hardin han Eden antes makasala hira Adan ngan Eva. Matutuman ha pagpahiuli an saad han Dios nga ‘maghimo hin bag-o nga tuna ngan bag-o nga langit.’—Isa. 65:17, Maopay nga Sumat.
6. Ano an aton mahibabaroan mahitungod han paglaom nga kinabuhi nga waray kataposan ha ilustrasyon han karnero ngan kanding?
6 Gin-unabi utro ni Jesus an kinabuhi nga waray kataposan han naghisgot hiya mahitungod han kataposan han kalibotan. (Mat. 24:1-3) “Kon an Anak han tawo kumanhi ha iya himaya, ngan an ngatanan nga mga anghel upod ha iya,” hiya nagsiring, “niyan hiya malingkod ha lingkoran nga hadianon han iya himaya. Ngan ha iya atubangan pagtitirukon an ngatanan nga mga nasud, ngan iya pagbuburublagon hira sugad han usa nga paramangno ginlalain an karnero tikang ha mga kanding.” Adton paghuhukman “makadto ha sirot nga waray kataposan, kondi an mga magtadong ngadto ha kinabuhi nga waray kataposan.” “An mga magtadong” nga mabubuhi ha waray kataposan amo adton maunungon nga nasuporta ha dinihogan han espiritu nga “kabugtoan” ni Kristo. (Mat. 25:31-34, 40, 41, 45, 46) Tungod kay an mga dinihogan ginpili basi magin magmarando ha langitnon nga Ginhadian, kon sugad “an mga magtadong” amo an ira mga sakop ha tuna. An Biblia nagtagna: “Maghahadi [an Hadi ni Jehova] tikang ha usa nga dagat ngadto liwat ha usa, ngan tikang ha Salog ngadto ha mga sidsid han tuna.” (Sal. 72:8) Ini nga mga sakop magpapahimulos hin kinabuhi nga waray kataposan ha tuna.
Ano an Iginsasaysay han Ebanghelyo ni Juan?
7, 8. Ano an duha nga paglaom nga ginhisgotan ni Jesus kan Nikodemo?
7 Sugad han nakarekord ha mga Ebanghelyo nira Mateo, Markos, ngan Lukas, gin-gamit ni Jesus an pulong nga “kinabuhi nga waray kataposan” ha ginhisgotan na nga mga teksto. Ha Ebanghelyo ni Juan ginkotar niya an mga pulong ni Jesus mahitungod han kinabuhi nga waray kataposan hin mga 17 ka beses. Aton usisahon an pipira hito basi masabtan an ginsiring ni Jesus may kalabotan hini nga paglaom.
8 Sumala kan Juan, siyahan nga ginhisgotan ni Jesus an kinabuhi nga waray kataposan ha Pariseo nga hi Nikodemo. Hiya nagsiring kan Nikodemo: “Waray bisan hin-o nga diri matawo han tubig ngan han espiritu, nga sadang makasulod ha ginhadian han Dios.” Adton masulod ha Ginhadian han Dios kinahanglan “ig-anak tikang ha igbaw,” o ig-anak utro. (Juan 3:3-5) Diri la ito an ginsiring ni Jesus. Gin-unabi liwat niya an paglaom para ha ngatanan nga katawohan. (Basaha an Juan 3:16.) Iya ginhisgotan an kinabuhi nga waray kataposan para ha dinihogan nga mga sumurunod ha langit ngan para ha iba dinhi ha tuna.
9. Ano nga paglaom an gin-unabi ni Jesus ha Samaritana?
9 Katapos makiistorya kan Nikodemo ha Jerusalem, hi Jesus nagbiyahe tipanorte ngadto ha Galilea. Samtang tipakadto, nakaistorya niya an usa nga babaye ha may atabay ni Jakob hirani ha syudad han Sikar ha Samaria. Hiya nagsiring ha babaye: “Bisan hin-o an mainom han tubig nga akon ihinahatag, diri na gud uuhawon; kondi an tubig nga akon ihahatag ha iya, mahihimo nga atabay han tubig ha sulod niya nga magbuburabod ha kinabuhi nga waray kataposan.” (Juan 4:5, 6, 14) Ini nga tubig nagrirepresentar han mga tagana han Dios ha pagpahiuli han ngatanan nga katawohan ha kinabuhi nga waray kataposan, pati na adton mabubuhi dinhi ha tuna. Iginsasaysay ha Pahayag nga an Dios mismo nasiring: “An inuuhaw akon paiinmon han burabod han tubig han kinabuhi nga waray bayad.” (Pah. 21:5, 6; 22:17) Salit an kinabuhi nga waray kataposan nga ginhisgotan ni Jesus ha Samaritana diri la para ha dinihogan nga mga manurunod han Ginhadian kondi para liwat ha magtinoohon nga katawohan nga naglalaom nga mabuhi ha tuna.
10. Katapos tambalon an lalaki ha parigosan ha Betesda, ano an ginsiring ni Jesus ha relihiyoso nga mga parakontra mahitungod ha kinabuhi nga waray kataposan?
10 Han sumunod nga tuig, nakadto na liwat hi Jesus ha Jerusalem. Didto gintambal niya an masakiton nga lalaki ha parigosan ha Betesda. Ha mga Judio nga nagpakaraot han iya ginbuhat, iya iginsaysay nga “an Anak diri sadang makagbuhat tikang ha iya ngahaw, kondi an nakita niya nga ginbuhat han Amay.” Katapos isumat ha ira nga an Amay ‘nagtubyan ha Anak han bug-os nga gahum ha paghukom,’ hi Jesus nagsiring: “An namamati han akon pulong, ngan natoo ha nagsugo ha akon, may kinabuhi nga waray kataposan.” Nagsiring liwat hiya: “Maabot an oras nga an ngatanan, nga aadto ha mga lubnganan, makakabati han . . . tingog [han Anak han tawo]. Ngan an mga maopay an buhat man-gugowa ha pagkabanhaw hin kinabuhi; kondi an mga maraot an buhat mababanhaw ha paghukom hin sirot.” (Juan 5:1-9, 19, 22, 24-29) Iginsaysay ni Jesus ha mga Judio nga persigidor nga hiya an ginpili han Dios basi matuman an paglaom han mga Judio nga kinabuhi nga waray kataposan ha tuna ngan bubuhaton niya ito pinaagi ha pagbanhaw han mga patay.
11. Kay ano nga masisiring naton nga an paglaom nga kinabuhi nga waray kataposan ha tuna nahiuupod ha ginsiring ni Jesus ha Juan 6:48-51?
11 Ha Galilea, nagtikang pagsunod kan Jesus an yinukot nga katawohan nga naruruyag han tinapay nga milagroso nga iya igintagana. Ginhisgotan niya ha ira an lain nga klase hin tinapay—“an tinapay han kinabuhi.” (Basaha an Juan 6:40, 48-51.) “An tinapay nga akon ihahatag amo an akon unod,” siring niya. Iginhalad ni Jesus an iya kinabuhi diri la para ha mga magmamando upod niya ha langitnon nga Ginhadian kondi para liwat ha “kinabuhi han kalibotan,” an katawohan nga takos han lukat. “Kon hin-o an kumaon hini nga tinapay,” karuyag sidngon, an magpakita hin pagtoo ha gahum han halad lukat ni Jesus, magkakaada hiya paglaom nga mabuhi ha waray kataposan. Oo, nahiuupod ha gin-unabi nga “kinabuhi nga waray kataposan” an maiha na nga paglaom han mga Judio nga mabuhi ha waray kataposan ha tuna durante han pagmando han Mesias.
12. Ano nga paglaom an ginhihisgotan ni Jesus han magsiring hiya ha mga parakontra nga ‘hiya mahatag ha iya mga karnero hin kinabuhi nga waray kataposan’?
12 Ha urhi, ha Pyesta han Pagpahinungod ha Jerusalem, hi Jesus nagsiring ha mga nakontra ha iya: “Kamo diri natoo, kay diri kamo upod ha akon mga karnero. An akon mga karnero nanmamati ha akon tingog, ngan ako nakilala ha ira, ngan hira nasunod ha akon. Ngan ako nahatag ha ira hin kinabuhi nga waray kataposan.” (Juan 10:26-28) Ginhihisgotan la ba ni Jesus an kinabuhi ha langit, o ginhuhunahuna liwat niya an kinabuhi nga waray kataposan ha paraiso ha tuna? Antes hito, ginliaw ni Jesus an iya mga sumurunod han hiya magsiring: “Ayaw kahadlok, gutiay nga kapanon; kay ito kanan iyo Amay kaburut-on paghatag ha iyo han ginhadian.” (Luk. 12:32) Kondi, hito liwat nga Pyesta han Pagpahinungod, hi Jesus nagsiring: “Ako may iba man nga mga karnero, nga diri hahani hini nga toril, nga kinahanglan man nga akon hira pagdad-on.” (Juan 10:16) Kon sugad, han nakiistorya hiya hito nga mga parakontra, ginhihisgotan niya an paglaom nga kinabuhi ha langit para ha ‘gutiay nga panon’ ngan kinabuhi nga waray kataposan ha tuna para ha minilyon nga ‘iba nga mga karnero.’
Paglaom nga Diri Na Kinahanglan Isaysay
13. Ano an iginpapasabot ni Jesus han hiya magsiring: “Mabunyog ka ha akon ngadto ha Paraiso”?
13 Han nag-aantos hi Jesus ha pasakitan nga kahoy, naghatag hiya hin diri-maninigaran nga pamatuod mahitungod han paglaom han katawohan. An usa nga kriminal nga iginraysang ha iya sapit nagsiring: “Jesus panumdoma ako, kon ikaw makadto ha imo ginhadian.” Hi Jesus nagsaad ha iya: “Matuod, ako nasiring ha imo: . . . Mabunyog ka ha akon ngadto ha Paraiso.” (Luk. 23:42, 43) Tungod kay ito nga tawo sigurado nga Judio, diri na hiya kinahanglan saysayan pa mahitungod han Paraiso. Maaram hiya han paglaom nga kinabuhi nga waray kataposan ha tuna.
14. (a) Kay ano nga masisiring nga waray masabti han mga apostol an paglaom nga kinabuhi ha langit? (b) Kakan-o nira nasabtan ito nga paglaom?
14 Kondi, an kinahanglan isaysay amo an gin-unabi ni Jesus nga paglaom nga kinabuhi ha langit. Han ginsumatan niya an iya mga disipulo nga makadto hiya ha langit basi mag-andam hin lugar para ha ira, waray nira masabti kon ano an iya karuyag sidngon. (Basaha an Juan 14:2-5.) Ha urhi hiya nagsiring ha ira: “Damu pa nga mga bagay an isisiring ko ha iyo, kondi kamo diri pa makakahimo pagdara yana. Kondi kon hiya, an espiritu han kamatuoran kumanhi, iya kamo pagtutugwayan ngadto han ngatanan nga kamatuoran.” (Juan 16:12, 13) Han Pentekostes han 33 K.P.—katapos dihogan han espiritu han Dios an mga sumurunod ni Jesus basi magin mga hadi ha tidaraon—dida la nira nasabtan nga ha langit hira maghahadi. (1 Kor. 15:49; Kol. 1:5; 1 Ped. 1:3, 4) Iginpahayag an paglaom nga kinabuhi ha langit, ngan ito an nagin tema han giniyahan nga mga surat ha Kristiano Griego nga Kasuratan. Kondi, ginpapamatud-an ba hini nga mga surat an paglaom han katawohan nga kinabuhi nga waray kataposan ha tuna?
Ano an Ginsisiring han Giniyahan nga mga Surat?
15, 16. Ano an ginsisiring han giniyahan nga surat ha mga Hebreohanon ngan han mga pulong ni Pedro mahitungod ha paglaom nga kinabuhi nga waray kataposan ha tuna?
15 Ha surat ni apostol Pablo ha mga Hebreohanon, iya gintawag an iya mga igkasi-tumuroo nga “baraan nga mga kabugtoan, nga mga angbit ha langitnon nga pagtawag.” Kondi, nagsiring liwat hiya nga iginpasakop han Dios kan Jesus “an kalibotan nga tiarabot.” (Heb. 2:3, 5; 3:1) Ha Kristiano Griego nga Kasuratan, an pulong nga iginhubad nga “kalibotan” nagtutudlok pirme ha tuna nga inuukyan han mga tawo. Salit, “an kalibotan nga tiarabot” amo an tidaraon nga sistema dinhi ha tuna ilarom han pagmando ni Jesu-Kristo. Hito nga panahon tutumanon ni Jesus an saad han Dios: “An mga magtadong makakapanunod han tuna, ngan maukoy hira dida hin waray kataposan.”—Sal. 37:29.
16 Hi apostol Pedro giniyahan liwat ha pagsurat mahitungod han tidaraon han katawohan. Hiya nagsurat: “An mga langit nga aada niyan, ngan an tuna, igin-aandam ha kalayo ngan gintitipigan ngada ha adlaw ha paghukom ngan pagbungkag ha mga tawo nga diri magtinahuron ha Dios.” (2 Ped. 3:7) Ano an masaliwan ha sugad-langit nga mga gobyerno ngan ha maraot nga katawohan yana? (Basaha an 2 Pedro 3:13.) Sasaliwnan ito han “bag-o nga langit”—an Mesianiko nga Ginhadian han Dios—ngan han “bag-o nga tuna”—an matadong nga katawohan nga nagsisingba ha matuod nga Dios.
17. Paonan-o iginsaysay an paglaom han katawohan ha Pahayag 21:1-4?
17 Nalilipay kita ha bisyon nga iginsaysay ha ultimo nga libro han Biblia, mahitungod han pagpahiuli ha katawohan ha kahingpitan. (Basaha an Pahayag 21:1-4.) Ini na an paglaom han katawohan nga may pagtoo ha Dios tikang pa han nakasala an siyahan nga tawo ha hardin han Eden. An magtadong mabubuhi ha waray kataposan ha Paraiso nga tuna ngan diri na malalagas. Ini nga paglaom iginbasar gud ha Hebreo ngan Kristiano Griego nga Kasuratan, ngan padayon nga ginpaparig-on hito an magtinumanon nga surugoon ni Jehova tubtob yana.—Pah. 22:1, 2.
Maisasaysay Mo Ba?
• Ano an iginpapasabot ni Jesus ha “pagpahiuli”?
• Ano an ginhisgotan ni Jesus kan Nikodemo?
• Ano an iginsaad ni Jesus ha kriminal nga iginraysang ha iya sapit?
• Paonan-o an surat ha mga Hebreohanon ngan an mga pulong ni Pedro nagpapamatuod han paglaom nga kinabuhi nga waray kataposan ha tuna?
[Mga Pakiana]
[Retrato ha pahina 8]
An sugad-karnero nga katawohan mabubuhi ha waray kataposan dinhi ha tuna
[Retrato ha pahina 10]
Hi Jesus naghisgot han kinabuhi nga waray kataposan