Kinabuhi nga Waray Kataposan ha Tuna—Paglaom nga Hatag han Dios
Kinabuhi nga Waray Kataposan ha Tuna—Paglaom nga Hatag han Dios
“An mga linarang iginpasakop ha kawaray-pulos . . . tungod ha paglaom.”—ROMA 8:20, NW.
1, 2. (a) Kay ano nga importante ha aton an paglaom nga kinabuhi nga waray kataposan ha tuna? (b) Kay ano nga damu an nagruruhaduha han kinabuhi nga waray kataposan ha tuna?
BANGIN nahinunumdom ka han kalipay nga imo inabat han hinbaroan mo nga hirani na umabot an panahon nga an mga tawo diri na malalagas ngan mamamatay kondi mabubuhi ha waray kataposan ha tuna. (Juan 17:3; Pah. 21:3, 4) Sigurado nga nalilipay ka pagsumat ha iba hito nga paglaom nga basado ha Biblia. Ha pagkamatuod, an paglaom nga kinabuhi nga waray kataposan importante gud nga bahin han maopay nga sumat nga aton iginsasangyaw. May epekto ito ha aton panlantaw ha kinabuhi.
2 An kadam-an han relihiyon ha Kakristianohan diri natoo ha paglaom nga kinabuhi nga waray kataposan ha tuna. Bisan kon igintututdo han Biblia nga an kalag namamatay, kadam-an han relihiyon an nagtututdo nga kon namamatay an tawo, may-ada hiya diri-namamatay nga kalag nga padayon nga nabubuhi ha lugar han mga espiritu. (Esek. 18:20) Tungod hito, damu an nagruruhaduha han kinabuhi nga waray kataposan ha tuna. Salit bangin magpakiana kita: Igintututdo gud ba han Biblia ito nga paglaom? Kon amo, kakan-o ito siyahan nga iginsumat han Dios ha mga tawo?
“Iginpasakop ha Kawaray-pulos . . . Tungod ha Paglaom”
3. Paonan-o iginpatin-aw han Dios an iya katuyoan para ha katawohan ha tinikangan han kasaysayan han tawo?
3 Iginpatin-aw ni Jehova an iya katuyoan para ha katawohan ha tinikangan pa la han kasaysayan han tawo. Hiya nagsiring nga mabubuhi hi Adan ha waray kataposan kon hiya magmasinugtanon. (Gen. 2:9, 17; 3:22) Sigurado nga hinbaroan han mga tulin ni Adan an kawara han kahingpitan han tawo, ngan may mga pamatuod hito. Ginsadhan an aragian ngadto ha hardin han Eden, ngan an mga tawo nalagas ngan namatay. (Gen. 3:23, 24) Ha paglabay han panahon, nagtikahalipot an kinabuhi han tawo. Hi Adan nabuhi hin 930 ka tuig. Hi Sem nga naluwas ha Baha nabuhi hin 600 ka tuig la ngan an iya anak nga hi Arpaksad, 438 ka tuig. An amay ni Abraham nga hi Tera nabuhi hin 205 ka tuig. Hi Abraham nabuhi hin 175 ka tuig, an iya anak nga hi Isaak 180 ka tuig, ngan hi Jakob 147 ka tuig. (Gen. 5:5; 11:10-13, 32; 25:7; 35:28; 47:28) Sigurado nga damu an nakasantop kon kay ano nga nagtikahalipot an kinabuhi—nawara an paglaom nga kinabuhi nga waray kataposan! Kondi, may basihan ba hira ha paglaom nga maibabalik pa ito?
4. Kay ano nga an magtinumanon nga katawohan hadto tinoo nga ipapahiuli han Dios an mga bendisyon nga nawara ni Adan?
4 An Pulong han Dios nasiring: “An mga linarang [nga tawo] iginpasakop ha kawaray-pulos . . . tungod ha paglaom.” (Roma 8:20, NW) Ano nga paglaom? An siyahan nga tagna ha Biblia nag-unabi han “katulinan” o binhi nga ‘magtutultog han ulo han halas.’ (Basaha an Genesis 3:1-5, 15.) Para ha magtinumanon nga katawohan, an saad nga Binhi naghatag hin paglaom nga tutumanon han Dios an iya katuyoan ha katawohan. Salit tinoo hira Abel ngan Noe nga ipapahiuli han Dios an mga bendisyon nga nawara ni Adan. Bangin nasantop nira nga an ‘pagtultog han tikod’ han binhi magkikinahanglan hin pagpaagas han dugo.—Gen. 4:4; 8:20; Heb. 11:4.
5. Ano an nagpapamatuod nga hi Abraham natoo ha pagkabanhaw?
5 Tagda hi Abraham. Han ginsarihan hiya, sugad hin ‘iginhalad niya hi Isaak, an iya bugtong nga anak.’ (Heb. 11:17) Kay ano nga andam hiya nga buhaton ito? (Basaha an Hebreo 11:19.) Tungod kay natoo hiya ha pagkabanhaw! May-ada basihan an iya pagtoo. Ha pagkamatuod, iginpahiuli ni Jehova an kapasidad niya ngan han iya asawa, hi Sara, nga magkaanak bisan kon lagas na hira. (Gen. 18:10-14; 21:1-3; Roma 4:19-21) Ginpasarig liwat hiya ni Jehova: “Ha kan Isaak pagngangaranan an imo katulinan.” (Gen. 21:12) Salit marig-on an iya mga hinungdan ha pagsarig nga babanhawon han Dios hi Isaak.
6, 7. (a) Ano nga kauyonan an ginhimo ni Jehova kan Abraham? (b) Paonan-o an saad ni Jehova kan Abraham naghatag hin paglaom ha katawohan?
6 Tungod han daku gud nga pagtoo ni Abraham, naghimo hi Jehova hin kauyonan ha iya mahitungod han iya “katulinan” o binhi. (Basaha an Genesis 22:18.) An siyahan nga bahin han binhi amo hi Jesu-Kristo. (Gal. 3:16) Ginsumatan ni Jehova hi Abraham nga an iya binhi padadamuon “sugad han mga bitoon ha mga langit, ngan sugad han baras nga aada ha baybayon” nga an kadamu diri niya hinbabaroan. (Gen. 22:17) Kondi, ha urhi iginsumat ito. Hi Jesu-Kristo ngan an 144,000 nga magmamando upod niya ha iya Ginhadian amo an nagkukompwesto han binhi. (Gal. 3:29; Pah. 7:4; 14:1) Pinaagi han Mesianiko nga Ginhadian “an mga nasud ha kalibotan pagbabaraanon” o magbibendisyon ha ira kalugaringon.
7 Posible nga waray masabti ni Abraham an bug-os nga kahulogan han kauyonan ni Jehova ha iya. Bisan pa hito, “ginhihinulat niya an bungto nga may [tinuod nga] patukoranan,” siring han Biblia. (Heb. 11:10) Ito an Ginhadian han Dios. Basi makarawat an mga bendisyon pinaagi hito nga Ginhadian, kinahanglan mabuhi utro hi Abraham. Pinaagi han pagkabanhaw mabubuhi hiya ha waray kataposan ha tuna. Ngan posible liwat nga mabuhi ha waray kataposan adton matatalwas ha Armagedon o adton babanhawon.—Pah. 7:9, 14; 20:12-14.
‘An Espiritu Nagpipirit ha Akon’
8, 9. Kay ano nga diri la mga pagsari han usa nga tawo an gin-aasoy ha libro han Job?
8 Hi Job nabuhi ha panahon katapos han kamatay han apo ha tuhod ni Abraham nga hi Jose ngan antes matawo hi propeta Moises. An libro han Job, nga posible nga iginsurat ni Moises, nagsasaysay kon kay ano nga gintugotan ni Jehova nga mag-antos hi Job ngan kon ano an nagin resulta hito ha iya. Kondi, diri la mga pagsari han usa nga tawo an gin-aasoy hito; naghihisgot liwat ito han pinakaimportante nga isyu ha uniberso. Iginpapatin-aw hito nga matadong an pagmando ni Jehova, ngan iginpapakita hito nga an integridad ngan paglaom nga kinabuhi han ngatanan nga surugoon han Dios ha tuna nahidadabi ha isyu nga iginbangon ha Eden. Bisan kon diri maaram hi Job hini nga isyu, waray hiya maimpluwensyahi han iya tulo nga sangkay nga hunahunaon nga napakyas hiya ha pagtipig han iya integridad. (Job 27:5) Magpaparig-on ini han aton pagtoo ngan mabulig ha aton nga masantop nga makakagtipig kita han aton integridad ngan makakadapig ha pagkasoberano ni Jehova.
9 Katapos magyakan an tulo nga nagliliaw kunohay kan Job, “hi Elihu an anak nga lalaki ni Barasel an Busitanhon nagbaton.” Ano an nakaaghat ha iya nga magyakan? “Ako puno hin mga pulong,” hiya nagsiring. “An espiritu didi ha akon nagpupugong [“nagpipirit,” NW] ha akon.” (Job 32:5, 6, 18) Bisan kon an giniyahan nga mga pulong ni Elihu natuman han natapos an mga pagsari kan Job, mapulsanon liwat ito ha iba. Naghahatag ito hin paglaom ha ngatanan nga nagpapabilin nga matinumanon ha Dios.
10. Ano an ehemplo nga an mensahe ni Jehova ha usa nga tawo usahay aplikado liwat ha ngatanan?
10 Usahay naghahatag hi Jehova hin mensahe ha usa nga tawo nga aplikado liwat ha ngatanan. Pananglitan, nagtagna hi Daniel may kalabotan ha inop ni Hadi Nabukodonosor han Babilonya mahitungod ha pagpulod han daku hinduro nga kahoy. (Dan. 4:10-27) Bisan kon natuman ito kan Nabukodonosor, may-ada ito mas daku pa nga katumanan. Iginpasabot hito nga an pagmando han Dios ha tuna nga ginrirepresentaran han ginhadian nga ginmamandoan han mga hadi ha katulinan ni David maiestablisar utro katapos han 2,520 ka tuig tikang ha 607 A.K.P. a Naestablisar ito han nahitrono hi Jesus ha langit sugad nga Hadi han 1914. Hunahunaa nga hirani na gud tumanon han Ginhadian an ginlalaoman han masinugtanon nga katawohan!
“Luwasa Hiya Tikang ha Pagtipakadto ha Uhang!”
11. Ano an iginpapasabot han ginsiring ni Elihu mahitungod ha Dios?
11 Han ginbaton ni Elihu hi Job, nag-unabi hiya hin “anghel, usa nga parasaysay, usa dida ha usa ka yukot, ha pagpakita han tawo kon ano in maopay para ha iya.” Ano man kon ini nga anghel ‘mag-ampo ha Dios nga Hiya magmadinapigon [“malipay,” NW] ha iya’? Hi Elihu nagsiring: “Dida hito an Dios maloloy-on ha iya, ngan nagsiring: Luwasa hiya tikang ha pagtipakadto ha uhang, hin-agian ko in lukat. An iya unod malalabi hin kapuraw kay han kanan bata; hiya mabalik ha mga adlaw han iya pagkabatan-on.” (Job 33:23-26) Ito nga mga pulong nagpapasabot nga an Dios andam kumarawat hin “lukat” para ha mabinasulon nga katawohan.—Job 33:24.
12. An ginsiring ni Elihu naghahatag hin ano nga paglaom ha katawohan?
12 Posible nga waray masabti ni Elihu an bug-os nga kahulogan han lukat, sugad la nga waray masabti hin bug-os han mga propeta an ngatanan nga ira ginsurat. (Dan. 12:8; 1 Ped. 1:10-12) Bisan pa hito, ipinapakita han iya ginsiring an paglaom nga maabot an panahon nga an Dios makarawat hin lukat ngan magluluwas ha katawohan tikang ha kalagas ngan kamatayon. Iginsaysay hito an makalilipay nga paglaom nga kinabuhi nga waray kataposan. An libro han Job nag-aasoy liwat nga magkakaada hin pagkabanhaw.—Job 14:14, 15.
13. Paonan-o nagpapahimulos an mga Kristiano ha mga pulong ni Elihu?
13 Yana, padayon nga nagpapahimulos ha mga pulong ni Elihu an minilyon nga Kristiano nga naglalaom nga maluwas ha kabungkagan hini nga sistema. An mga lagas nga maluluwas mabalik ha pagkabatan-on. (Pah. 7:9, 10, 14-17) Dugang pa, padayon nga nakakalipay ha magtinumanon an paglaom nga makita an mga binanhaw nga nabalik ha pagkabatan-on. Syempre, basi makarawat han mga dinihogan an imortalidad ha langit ngan han ‘iba nga mga karnero’ an kinabuhi nga waray kataposan ha tuna, kinahanglan tumoo hira ha halad lukat ni Kristo.—Juan 10:16; Roma 6:23.
An Kamatayon Lalamuyon Tikang ha Tuna
14. Kay ano nga labaw pa ha Mosaiko nga Balaud an ginkinahanglan basi an mga Israelita magkaada hin paglaom nga mabuhi ha waray kataposan?
14 An katulinan ni Abraham nagin usa nga nasud han nagkaada hira kauyonan ha Dios. Han iginhatag ni Jehova an Balaud, hiya nagsiring: “Bantayan niyo an akon mga kasugoanan, ngan an akon mga sugo: nga kon pagbuhaton han usa ka tawo mabubuhi hiya pinaagi ha ira.” (Leb. 18:5) Kondi, tungod kay diri nasusunod han mga Israelita an hingpit nga Balaud, ginhukman hira hito ngan kinahanglan luwason tikang ha pagkahinukman.—Gal. 3:13.
15. Giniyahan hi David pagsurat mahitungod han ano nga paglaom ha tidaraon?
15 Labot kan Moises, giniyahan ni Jehova an iba nga parasurat han Biblia nga unabihon an paglaom nga kinabuhi nga waray kataposan. (Sal. 21:4; 37:29) Pananglitan, an kataposan han usa nga salmo ni David mahitungod han pagkaurosa han tinuod nga magsiringba ha Sion nasiring: “Didto iginsugo ni Jehova an pagkabulahan, daw an kinabuhi ha kagihaponan.”—Sal. 133:3.
16. Ano an iginsaad ni Jehova pinaagi kan Isaias mahitungod han tidaraon han “bug-os nga tuna”?
16 Giniyahan ni Jehova hi Isaias nga magtagna mahitungod han kinabuhi nga waray kataposan ha tuna. (Basaha an Isaias 25:7, 8.) An sala ngan kamatayon sugad hin magbug-at nga pinas-an nga nagpapakuri ha katawohan, pariho hin “tabon” nga nakakapakuri han pagginhawa. Hi Jehova nagpapasarig ha iya katawohan nga lalamuyon, o wawad-on, an kamatayon “tikang ha bug-os nga tuna.”
17. Ano an igintagna nga bubuhaton han Mesias nga pinaagi hito magigin posible an kinabuhi nga waray kataposan?
17 Tagda liwat an kahikayan ha Mosaiko nga Balaud mahitungod han kanding nga Asasel. Makausa ha kada tuig, ha Adlaw han Pagbayad han mga Sala, iginbubutang han hitaas nga saserdote ‘an iya duha nga kamot ha bawbaw han ulo han kanding nga buhi ngan iginsusumat ha bawbaw hito an ngatanan nga karat-an han mga anak ni Israel, ngan iginbubutang niya ito ha bawbaw han ulo han kanding, ngan gindadara han kanding ha bawbaw niya an ngatanan nga karat-an nira ngadto ha tuna nga waray umurukoy.’ (Leb. 16:7-10, 21, 22) Igintagna ni Isaias an pag-abot han Mesias, nga ha pariho nga paagi magkukuha han mga “kasamdong” o kasakit, “kasub-anan,” ngan “sala han kadam-an,” nga pinaagi hito magigin posible an kinabuhi nga waray kataposan.—Basaha an Isaias 53:4-6, 12.
18, 19. Ano nga paglaom an ginpapabug-atan ha Isaias 26:19 ngan Daniel 12:13?
18 Pinaagi kan Isaias, hi Jehova nagsiring ha mga Israelita: “An imo mga patay mabubuhi; an akon patay nga kalawasan mabangon. Pagmata ngan pagkanta, kamo nga nag-uukoy ha tapotapo; kay an imo tun-og sugad-sugad hin tun-og han mga tanom, ngan an tuna masalikway han mga patay.” (Isa. 26:19) Matin-aw nga iginsasaysay ha Hebreo nga Kasuratan an paglaom nga pagkabanhaw ngan kinabuhi ha tuna. Pananglitan, han hi Daniel hirani na mag-100 anyos, ginpasarig hiya ni Jehova: “Mapatay ka, kondi mababanhaw ka hin pagkarawat han imo balos kon umabot na an kataposan nga panahon.”—Dan. 12:13, Maopay nga Sumat.
19 Tungod han paglaom ha pagkabanhaw, hi Marta nakasiring kan Jesus mahitungod han iya bugto nga namatay: “Ako maaram, nga hiya mababanhaw ha pagkabanhaw ha kataposan nga adlaw.” (Juan 11:24) Nabag-o ba ini nga paglaom han mga katutdoan ni Jesus ngan han giniyahan nga mga sinurat han iya mga disipulo? Kinabuhi nga waray kataposan ha tuna pa ba gihapon an paglaom nga iginhahatag ni Jehova ha katawohan? Hihisgotan naton ha sunod nga artikulo an baton hini nga mga pakiana.
[Footnote]
a Kitaa an kapitulo 6 han libro nga Pay Attention to Daniel’s Prophecy!
Maisasaysay Mo Ba?
• An katawohan “iginpasakop ha kawaray-pulos” tungod ha ano nga paglaom?
• Ano an nagpapamatuod nga hi Abraham natoo ha pagkabanhaw?
• An mga pulong ni Elihu kan Job naghahatag ha katawohan hin ano nga paglaom?
• Paonan-o ginpapabug-atan ha Hebreo nga Kasuratan an paglaom nga pagkabanhaw ngan kinabuhi nga waray kataposan ha tuna?
[Mga Pakiana]
[Retrato ha pahina 5]
An ginsiring ni Elihu kan Job naghahatag hin paglaom nga luluwason an katawohan tikang ha kalagas ngan kamatayon
[Retrato ha pahina 6]
Ginpasarig hi Daniel nga ‘makakarawat niya an balos kon umabot na an kataposan nga panahon’