Likayi an Kaulangan Hini nga “Adlaw han Maopay nga mga Sumat”

AN UPAT nga sanlahon naghunahuna kon ano an ira bubuhaton. Waray naglimos ha ira ha ganghaan han syudad. Ginpugngan han naglilikos nga mga Siryahanon an pagsulod han pagkaon ha Samaria basi an mga tawo sumurender o mamatay ha gutom. Waray pulos an pagsulod ha syudad kay mahal hinduro an pagkaon. May-ada na iginsumat nga nagkaon han iya anak.—2 Hadi 6:24-29.

An mga sanlahon naghunahuna, ‘Pakadto lugod kita ha kampo han mga Siryahanon. Waray man mawawara ha aton.’ Pagsirom, kinadto hira ha kampo. Pag-abot nira, mamingaw an palibot. Waray mga gwardya. Nakahigot an mga kabayo ngan asno kondi waray mga sundalo. Ginhiling nira an usa nga tolda. Waray ito tawo, kondi damu an pagkaon ngan irinmon. Nangaon hira ngan nanginom. Nakakita liwat hira hin mga bulawan, salapi, bado ngan iba pa nga birilhon nga butang. Gindara nira ito, gintago, ngan binalik basi kumuha hin dugang pa. Waray na tawo an bug-os nga kampo. Milagroso nga ginpabati ni Jehova an mga Siryahanon hin aringasa han kasundalohan. Kahuna nira nga ginsusulong hira salit namalagiw hira. Puydi kuhaon han bisan hin-o an ira ginbayaan!

Ginkuha han mga sanlahon an birilhon nga mga butang. Kondi, nakonsensya hira han nahinumdoman nira an mga taga-Samaria nga pinan-gugutom. Hira nagsiring: “Waray ta buhata an maopay; ini nga adlaw amo an adlaw han maopay nga mga sumat”! Nagdagmit hira pagbalik ha Samaria ngan iginsumat an ira hin-agian.—2 Hadi 7:1-11.

Nabubuhi liwat kita ha panahon nga matatawag nga “adlaw han maopay nga mga sumat.” Ha paghisgot han makatirigamnan nga bahin han “tigaman han . . . kataposan han kalibotan,” hi Jesus nagsiring: “Ini nga maopay nga sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.” (Mat. 24:3, 14) Paonan-o ito sadang makaapekto ha aton?

Mahimo Kita Mabug-atan han Aton mga Karuyag Ngan Kabaraka

Tungod kay nalipay hinduro an mga sanlahon han ira hin-agian, temporaryo nga ira nahingalimtan an Samaria. Nagin okupado hira ha ira makukuha. Mahimo ba liwat ito mahitabo ha aton? An ‘kagutom’ usa han mga tigaman ha panahon han kataposan hini nga sistema. (Luk. 21:7, 11) Ginpahamangnoan ni Jesus an iya mga disipulo: “Pagmatngon kamo ha iyo kalugaringon, bangin an iyo mga kasingkasing mabug-atan han kahakog, ngan kaparahubog, ngan mga pangarit hini nga kinabuhi.” (Luk. 21:34) Sugad nga mga Kristiano kinahanglan magbantay kita nga an aton mga karuyag ngan kabaraka diri magin hinungdan nga mahingalimot kita nga iini na an “adlaw han maopay nga mga sumat.”

Hi Blessing, waray magpaulang ha iya personal nga mga karuyag. Nagpayunir hiya samtang naeskwela ngan ha urhi nakaasawa hin Bethelite, ngan nagin membro han pamilya han Bethel ha Benin. Hiya nagsiring: “Nalilipay gud ako ha pagin housekeeper.” Yana hi Blessing malipayon nga nahinunumdom han 12 ka tuig nga  bug-os-panahon nga pag-alagad ngan naghuhunahuna pirme nga ini na an “adlaw han maopay nga mga sumat.”

Pag-ikmat ha Kaulangan nga Nakakaubos han Panahon

Han ginsugo ni Jesus an 70 nga disipulo, hiya nagsiring: “An babrion banos gud, kondi an mga magburuhat talagsa. Busa, mag-ampo kamo ha Ginoo han babrion, basi iya pagsugoon an mga magburuhat ngadto ha iya babrion.” (Luk. 10:2) Sugad la nga an paglangan ha pag-ani mahimo magresulta hin kadaot ha aranihon, an pagpasibaya ha pagsangyaw mahimo magresulta hin kamatayon. Salit hi Jesus nagpadayon: “Diri kamo mangumusta bisan hin-o ha aragian.” (Luk. 10:4) An orihinal nga pulong para ha ‘pangumusta’ mahimo mangahulogan hin labaw pa ha pagsiring la nga “maopay nga adlaw.” Mahimo liwat ito mag-upod hin paghangkopay ngan maiha nga pakiistorya kon iginkikita kita hin sangkay. Salit hi Jesus nagtugon ha iya mga sumurunod nga likyan an kaulangan ngan pahimulosan gud an panahon. Apurado gud an mensahe nga ira isasangyaw.

Hunahunaa an panahon nga nagagamit ha nakakaulang nga mga buruhaton. Ha damu nga lugar, maiha na nga an pagkinita hin TV nakakaubos gud han panahon. Kondi, kumusta man an mga cellphone ngan kompyuter? Ha usa nga surbey ha 1,000 nga adulto ha Britanya, hinbaroan nga “ha usa ka adlaw an mga taga-Britanya nagamit hin 88 minutos ha pakiistorya ha telepono, 62 minutos ha cellphone, 53 minutos ha pag-e-mail, ngan 22 minutos ha pagtext.” An kabug-osan nga oras nga nauubos hito sobra pa ha doble han oras nga ginagamit han auxiliary payunir kada adlaw! Pira ka oras an imo nagagamit ha pagtawag ha cellphone, pag-e-mail, ngan pagtext?

Hira Ernst ngan Hildegard Seliger maaramon ha paggamit han ira panahon. Hira nga duha sobra 40 ka tuig nga ginpriso han mga Nazi ngan mga Komunista. Han nakagawas hira, nagpayunir hira tubtob nga natapos an ira tunan-on nga kinabuhi.

Damu an naruyag magsurat ha ira. Mahimo unta nira gamiton an kadak-an nga panahon ha pagbasa ngan paghimo hin mga surat. Kondi, gin-una nira an pag-alagad kan Jehova.

Syempre, kita ngatanan nalilipay ha pakigkomunikar ha aton mga hinigugma ngan maopay ito. Mapulsanon an ginplano hin maopay nga mga buruhaton labot la han aton rutina ha kada adlaw. Kondi, maopay gud nga limitahan naton an nakakaulang nga mga buruhaton nga nakakaubos han oras durante hinin panahon ha pagsangyaw han maopay nga sumat.

Madasigon nga Magsangyaw han Maopay nga Sumat

Bendisyon gud nga mabuhi ha “adlaw han maopay nga mga sumat.” Salit diri kita magpaulang sugad han nahitabo ha upat nga sanlahon. Hinumdumi nga ha urhi hira nagsiring: “Waray ta buhata an maopay.” Diri liwat husto nga magpaulang kita ha aton mga hingyap o ha nakakaubos han panahon nga mga buruhaton nga tungod hito haros waray na kita panahon ha ministeryo.

May kalabotan hini, may-ada kita maopay gud nga susbaranan. Ha paghinumdom han siyahan nga 20 ka tuig han iya ministeryo, hi apostol Pablo nagsurat: “Iginwali ko hin hingpit an maopay nga sumat ni Kristo.” (Roma 15:19.) Waray magpadaog hi Pablo ha bisan ano nga makapaluya han iya kadasig. Magin madasigon kita pariho ha iya samtang ginsasangyaw naton an mensahe han Ginhadian hinin “adlaw han maopay nga mga sumat.”

[Retrato ha pahina 28]

Basi makagpayunir, waray magpaulang hi Blessing ha iya personal nga mga karuyag

[Retrato ha pahina 29]

Gin-gamit hin maaramon han mag-asawa nga Seliger an ira panahon