Magpabilin ha Gugma han Dios
Magpabilin ha Gugma han Dios
“Magpadayon kamo ha gugma han Dios, nga maghulat kamo ha kalooy han aton Ginoo Jesu-Kristo, ha kinabuhi nga waray kataposan.”—JUD. 21.
1, 2. Paonan-o iginpakita ni Jehova an iya gugma ha aton, ngan kay ano nga diri kita makakalaom nga pirme magpapabilin an gugma ni Jehova?
IGINPAPAKITA ni Jehova an iya gugma ha aton ha damu hinduro nga paagi. Kondi, matin-aw nga an gidadakui nga pamatuod han iya gugma amo an halad lukat. Daku gud an iya gugma ha katawohan salit ginpakanhi niya ha tuna an iya hinigugma nga Anak basi mamatay para ha aton. (Juan 3:16) Ginbuhat ini ni Jehova tungod kay karuyag niya nga mabuhi kita ha kadayonan, ngan magpahimulos han iya gugma ha waray kataposan!
2 Kondi, makakalaom ba kita nga magpapabilin an gugma ni Jehova bisan ano an aton buhaton? Diri. Tungod kay ha Judas 21, aton mababasa ini nga sagdon: “Magpadayon kamo ha gugma han Dios, nga maghulat kamo ha kalooy han aton Ginoo Jesu-Kristo, ha kinabuhi nga waray kataposan.” An mga pulong nga “magpadayon [“magpabilin,” NW] kamo ha gugma han Dios” nagpapasabot nga may-ada kita kinahanglan buhaton. Kon sugad, ano an kinahanglan naton buhaton basi magpabilin ha gugma han Dios?
Paonan-o Kita Magpapabilin ha Gugma han Dios?
3. Sumala kan Jesus, ano an importante gud basi magpabilin ha gugma han iya Amay?
3 Mahibabaroan naton an baton hito ha ginyakan ni Jesus han ultimo nga gab-i niya dinhi ha tuna. Hiya nagsiring: “Kon iyo tipigan [“tumanon,” NW] an akon mga sugo, kamo mabibilin ha akon paghigugma; sugad gud han akon pagtipig han sugo han akon Amay, ngan ako napabilin han iya higugma.” (Juan 15:10) Ipinapakita hini nga maaram hi Jesus nga importante gud an pagtuman han mga sugo ni Jehova basi magpabilin an maopay nga relasyon ha iya Amay. Salit, kon importante gud ito ha hingpit nga Anak han Dios, diri ba sadang magin importante liwat ito ha aton?
4, 5. (a) Ano an siyahan nga paagi nga maipapakita naton nga hinigugma naton hi Jehova? (b) Kay ano nga waray kita hinungdan nga diri sumugot ha mga sugo ni Jehova?
4 Siyahan, ipinapakita naton nga nahigugma kita kan Jehova pinaagi ha pagsugot ha iya. Mahitungod hito, hi apostol Juan nagsiring: “Amo ini an gugma han Dios, nga pagtumanon ta an iya mga sugo: ngan an iya mga sugo diri magbug-at.” (1 Juan 5:3) Kondi, damu yana an diri masinugtanon. Pero hunahunaa ini: “An iya mga sugo diri magbug-at.” Diri iginpapabuhat ni Jehova an makuri hinduro para ha aton.
5 Pananglitan, ipapaalsa mo ba ha imo duok nga sangkay an usa nga butang nga maaram ka nga diri niya maaakos? Syempre diri! Hi Jehova mas maloloy-on ngan mas nakakasabot gud ha aton mga limitasyon. An Biblia nagpapasarig nga hi Jehova ‘nahinunumdom nga mga tapotapo kita.’ (Sal. 103:14) Diri gud niya ipapabuhat ha aton an diri naton maaakos. Salit waray kita hinungdan nga diri sumugot ha iya mga sugo. Lugod, nasasabtan naton nga gimaopayi ito nga higayon ha pagpakita nga hinigugma gud naton an aton langitnon nga Amay ngan karuyag naton magpabilin ha iya gugma.
Espesyal nga Regalo ni Jehova
6, 7. (a) Ano an konsensya? (b) Paghatag hin ehemplo kon paonan-o kita mabubuligan han konsensya nga magpabilin ha gugma han Dios.
6 Hinin masamok nga kalibotan nga aton inuukyan, damu nga desisyon an kinahanglan himoon diin nahidadabi an aton pagkamasinugtanon ha Dios. Paonan-o naton masisiguro nga uyon ito ha iya kaburut-on? Gintagan kita ni Jehova hin regalo nga makakabulig gud ha aton nga magin masinugtanon. Ito nga regalo amo an konsensya. Ano an konsensya? Usa ito nga espesyal nga abilidad ha pag-usisa ha kalugaringon. Sugad ito hin hukom nga nabulig ha aton nga usisahon an mga desisyon nga aton hihimoon o pamalandungon an aton mga nabuhat ngan turotimbangon kon maopay ba ito o maraot, husto o sayop.—Basaha an Roma 2:14, 15.
7 Paonan-o kita mabubuligan han aton konsensya? Tagda ini nga ehemplo. Usa nga hiker an nagbabaktas ha haluag nga kagurangan. Waray dalan, kalsada, ngan karatola. Kondi, nagpapadayon hiya tipakadto ha iya destinasyon. Paonan-o? Nagamit hiya hin kompas nga may-ada magnetiko nga dagum nga pirme nakatudlok ha norte. Kon waray kompas, mawawara hiya. Ha pariho nga paagi, an tawo nga waray konsensya agsob nga waray giya ha paghimo hin maopay, husto, ngan matadong nga mga desisyon.
8, 9. (a) Ano nga mga limitasyon han aton konsensya an kinahanglan pirme naton hunahunaon? (b) Ano an aton bubuhaton basi masiguro nga mabubuligan gud kita han aton konsensya?
8 Kondi, pariho han kompas, an konsensya may-ada mga limitasyon. Kon magbubutang an hiker hin magnet hirani ha iya kompas, an dagum hito diri na matudlok ha norte. Ha pariho nga paagi, kon pasagdan naton an mga hingyap han aton kasingkasing nga magkontrol han aton mga desisyon, ano an mahitatabo? An aton kalugaringon nga mga hilig mahimo gud makadaot han konsensya. An Biblia nagpapahamangno ha aton nga “an kasingkasing malimbungon labaw han ngatanan nga butang, ngan labi hin kamahugaw.” (Jer. 17:9; Prob. 4:23) Dugang pa, kon an hiker waray husto ngan masasarigan nga mapa, gutiay la o waray maibubulig an iya kompas. Ha pariho nga paagi, kon diri kita sumarig ha husto ngan diri paburobag-o nga giya han Pulong han Dios, an Biblia, bangin mawawaray kapulsanan an aton konsensya. (Sal. 119:105) Makasurubo nga damu ha kalibotan an nasunod ha mga hingyap han ira kasingkasing ngan haros waray pagtagad o nagbabalewaray han mga prinsipyo ha Pulong han Dios. (Basaha an Efeso 4:17-19.) Ito an hinungdan nga damu hinduro an nagbubuhat hin karaotan bisan kon may-ada hira konsensya.—1 Tim. 4:2.
9 Sadang kita magin determinado nga diri magin sugad hito! Lugod, padayon nga karawaton naton an pagtutdo ngan pagbansay han Pulong han Dios ha aton konsensya basi mabuligan gud kita hito. Kinahanglan sundon naton an aton konsensya nga nabansay ha Biblia imbes nga pabay-an an kalugaringon nga mga hilig nga magkontrol hito. Sugad man, pangalimbasogan naton nga tahuron an konsensya han aton hinigugma nga kabugtoan. Talinguhaon naton nga diri makapakdol ha ira, ngan pirme hunahunaon nga an konsensya han aton bugto bangin mas sensitibo o istrikto kay han aton.—1 Kor. 8:12; 2 Kor. 4:2; 1 Ped. 3:16.
10. Ano an tulo nga paagi nga aton paghihisgotan diin maipapakita naton an gugma ngan pagsugot kan Jehova?
10 Tagdon naton yana an tulo nga paagi diin maipapakita naton an aton gugma kan Jehova pinaagi han pagkamasinugtanon. Syempre, ha tagsa hini, bubuligan kita han konsensya, kondi basi magin husto an giya hito kinahanglan ginigiyahan ito han mga prinsipyo han Biblia ha paggawi. An tulo nga paagi amo an: (1) Paghigugma han mga hinigugma ni Jehova, (2) pagtahod ha awtoridad, ngan (3) pangalimbasog nga magpabilin nga limpyo ha atubangan han Dios.
Higugmaa Adton Hinigugma ni Jehova
11. Kay ano nga kinahanglan higugmaon naton an mga hinigugma ni Jehova?
11 Siyahan, kinahanglan higugmaon naton an mga hinigugma ni Jehova. May kalabotan ha pakig-upod, an mga tawo pariho hin espongha. Nasusubad naton an bisan ano nga nakapalibot ha aton. Maaram gud an aton Maglalarang nga an mga kaupod mahimo magin peligroso, o magin mapulsanon ha diri-hingpit nga mga tawo. Salit hiya maaramon nga nagsasagdon: “Lakat kaupod han mga tawo nga makinaadmanon, ngan ikaw makikinaadmananon; kondi an kaupod-upod han mga lurong mag-aantos tungod hini.” (Prob. 13:20; 1 Kor. 15:33) Waray usa ha aton an naruruyag ‘mag-antos.’ Karuyag naton nga ‘magin makinaadmananon.’ Tungod kay hi Jehova an pinakamaaramon, waray gud makakaimpluwensya ha iya nga magin mas maaramon pa, o magin maraot. Kondi, maopay hiya nga susbaranan may kalabotan ha pakig-upod. Hunahunaa ini—hin-o nga diri-hingpit nga mga tawo an ginpipili ni Jehova nga magin iya sangkay?
12. Ano nga klase hin sangkay an ginpipili ni Jehova?
12 Gintawag ni Jehova an patriarka nga hi Abraham sugad nga “akon sangkay.” (Isa. 41:8) Maopay gud hiya nga susbaranan ha pagin matinumanon, matadong, ngan masinugtanon—an tawo nga may pagtoo ha Dios. (Jak. 2:21-23) Ito nga klase hin sangkay an ginpipili ni Jehova. Nakikigsangkay hiya yana ha mga tawo nga sugad hito an kalidad. Kon sugad hito nga sangkay an ginpipili hi Jehova, diri ba sadang magin maikmat liwat kita ha pagpili; makig-upod ha mga makinaadmananon basi magin maaramon?
13. Ano an makakabulig ha aton ha pagpili hin maopay nga kasangkayan?
13 Ano an mabulig ha imo ha pagpili hin maopay nga kasangkayan? Makakabulig gud an pag-aram ha mga ehemplo ha Biblia. Tagda an pagin magsangkay nira Rut ngan Naomi nga iya ugangan, nira David ngan Jonatan, o Timoteo ngan Pablo. (Rut 1:16, 17; 1 Sam. 23:16-18; Fil. 2:19-22) An nangunguna nga hinungdan han ira pagin duok amo an tinuod nga gugma kan Jehova. Makakaagi ka ba hin kasangkayan nga nahigugma kan Jehova pariho ha imo? Makakalaom ka nga damu dida ha kongregasyon an sugad hito nga kasangkayan. Diri hira mag-aaghat ha imo nga magbuhat hin makakapasubo kan Jehova. Lugod, mabulig hira ha imo nga magin masinugtanon kan Jehova, mag-uswag ha espirituwal, ngan magpugas may kalabotan ha espiritu. (Basaha an Galasia 6:7, 8.) Mabubuligan ka nira nga magpabilin ha gugma han Dios.
Pagtahod ha Awtoridad
14. Ano an mga hinungdan nga nakukurian kita ha pagtahod ha awtoridad?
14 An ikaduha nga paagi nga maipapakita naton an gugma kan Jehova amo an may kalabotan ha awtoridad. Kinahanglan naton tahuron an awtoridad. Kay ano nga usahay nakukurian gud kita ha pagbuhat hito? An usa nga hinungdan, tungod kay diri hingpit an mga aada ha awtoridad. Dugang pa, kita mismo diri hingpit. Nangangalimbasog kita nga lamposan an napanunod nga tendensya nga magrebelde.
15, 16. (a) Kay ano nga importante nga aton tahuron an gintaporan ni Jehova hin responsabilidad ha pagmangno ha iya katawohan? (b) Ano an importante nga leksyon nga aton mahibabaroan ha pagtagad ni Jehova han nagrebelde an mga Israelita kan Moises?
15 Salit bangin magpakiana ka, ‘Kon makuri hinduro ha aton an pagtahod ha awtoridad, kay ano nga kinahanglan naton buhaton ito?’ An baton may kalabotan ha isyu han pagkasoberano. Hin-o an imo pipilion sugad nga soberano o magmarando? Kon pilion naton hi Jehova sugad nga Soberano, kinahanglan tahuron naton an iya awtoridad. Pero kon diri, masisiring gud ba naton nga hiya an aton Magmarando? Dugang pa, kasagaran nga ipinapakita ni Jehova an iya awtoridad pinaagi ha pagtapod hin responsabilidad ha diri-hingpit nga mga tawo nga magmangno ha iya katawohan. Kon magrebelde kita ha iya gintaporan, ano an magigin pagtagad ni Jehova ha aton?—Basaha an 1 Tesalonika 5:12, 13.
16 Pananglitan, han nagngurutob an mga Israelita ngan nagrebelde kan Moises, gintagad ito ni Jehova sugad nga pagrebelde ha iya. (Num. 14:26, 27) An Dios waray magbag-o. Kon magrebelde kita ha iya gintaporan hin awtoridad, ha pagkamatuod, ha iya kita nagrirebelde!
17. Ano an sadang naton kultibaron may kalabotan ha aton pagtagad hadton gintaporan hin awtoridad ha kongregasyon?
17 Iginsaysay ni apostol Pablo kon paonan-o naton sadang tagdon adton may responsabilidad ha kongregasyon. Hiya nagsurat: “Magtuman ngan magpasakop kamo ha iyo mga magmarando: kay nagmamangno hira tungod ha iyo mga kalag, sugad nga hira in maghahatag hin kahusayan; basi nga pagbuhaton ini nira ha kalipayan; ngan diri ha kasakitan: kay ini mawawaray kapulsanan ha iyo.” (Heb. 13:17) Ha pagkamatuod, kinahanglan kultibaron naton an pagkamasinugtanon ngan pagkamapinasakupon. Hinumdumi nga nangangalimbasog liwat kita nga magpabilin ha gugma han Dios. Diri ba takos gud ito han aton bug-os nga pangalimbasog?
Magpabilin nga Limpyo ha Paniplatan ni Jehova
18. Kay ano nga karuyag ni Jehova nga magpabilin kita nga limpyo?
18 An ikatulo nga paagi nga maipapakita naton an gugma kan Jehova amo an pangalimbasog nga magpabilin nga limpyo ha iya paniplatan. Natural la ha mga kag-anak nga siguruhon nga limpyo an ira mga anak. Kay ano? An usa nga hinungdan, tungod kay importante ito ha kahimsog ngan kaopayan han bata. Dugang pa, kon limpyo an anak, nakakahatag ito hin maopay nga impresyon ha pamilya ngan nagpapakita nga hinigugma ngan gin-aataman hiya han iya kag-anak. Ha pariho nga hinungdan, karuyag ni Jehova nga magin limpyo kita. Maaram hiya nga an kalimpyo makakaopay ha aton ngan makakahatag hin maopay nga impresyon ha iya, an aton langitnon nga Amay. Importante gud ito, tungod kay makakaaghat ito ha mga tawo nga mag-alagad ha Dios kon nakikita nira nga naiiba kita ha mga tawo hinin mahugaw nga kalibotan.
19. Paonan-o naton hinbaroan nga importante an pagin limpyo ha pisikal?
19 Ha ano nga bahin kita sadang magpabilin nga limpyo? Ha ngatanan nga bahin han aton kinabuhi. Ha kadaan nga Israel, ginpabug-atan ni Jehova ha iya katawohan nga kinahanglan magin limpyo hira ha pisikal. (Leb. 15:31) Upod han Mosaiko nga Balaud an paglimpyo han mga garamiton, paghunaw, paghimsaw, paglaba, ngan paglubong han baya han tawo. (Eks. 30:17-21; Leb. 11:32; Num. 19:17-20; Deut. 23:13,14) Ginpahinumdom an mga Israelita nga hi Jehova nga ira Dios baraan—karuyag sidngon, “limpyo,” “putli,” ngan “sagrado.” Kinahanglan magin baraan liwat an mga surugoon han baraan nga Dios.—Basaha an Lebitiko 11:44, 45.
20. Ha ano nga mga paagi kinahanglan magpabilin kita nga limpyo?
20 Kon sugad, kinahanglan limpyo kita ha espirituwal ngan ha pisikal. Nangangalimbasog kita nga pirme limpyo an aton hunahuna. Matinumanon nga ginsusunod naton an mga prinsipyo ni Jehova ha moral, bisan kon ubos hinduro an moralidad han kalibotan. Labaw ha ngatanan, gintitipigan gud naton nga limpyo an aton pagsingba ngan naglilikay nga mahugawan han palso nga relihiyon. Pirme naton nahinunumdoman an pahamangno ha Isaias 52:11: “Iway kamo, iway kamo, lakat kamo tikang didto, ayaw kawkaw hin mahugaw nga butang; gawas tikang ha butnga niya; maglinis kamo.” Yana, nagpapabilin kita nga limpyo ha espirituwal pinaagi ha paglikay ha ngatanan nga mahugaw ha paniplatan han aton langitnon nga Amay may kalabotan ha pagsingba. Salit, diri kita nakikigbahin ha mga selebrasyon ngan pyesta han palso nga relihiyon nga popular gud yana. Oo, makuri an pagpabilin nga limpyo. Kondi pinangangalimbasogan ito han katawohan ni Jehova, tungod kay nabulig ito ha ira nga magpabilin ha gugma han Dios.
21. Paonan-o naton masisiguro nga magpapabilin kita ha gugma han Dios?
21 Karuyag ni Jehova nga magpabilin kita ha iya gugma ha waray kataposan. Kondi kinahanglan siguruhon han tagsa ha aton nga buhaton an gimaopayi basi magpabilin ha gugma han Dios. Mahihimo naton ini pinaagi ha pagsubad kan Jesus ngan paghigugma kan Jehova pinaagi ha pagsunod han Iya mga sugo. Kon buhaton naton ito, makakasiguro kita nga waray “sadang makabulag ha aton ha gugma han Dios, nga aada kan Kristo Jesus nga aton Ginoo.”—Roma 8:38, 39.
Nahinunumdoman Mo Ba?
• Paonan-o an aton konsensya nabulig ha aton nga magpabilin ha gugma han Dios?
• Kay ano nga kinahanglan naton higugmaon an mga hinigugma ni Jehova?
• Kay ano nga importante an pagtahod ha awtoridad?
• Kay ano nga importante nga magin limpyo an katawohan han Dios?
[Mga Pakiana]
[Kahon/Retrato ha pahina 20]
PUBLIKASYON NGA NAG-AAGHAT HAN MAOPAY NGA PANGGAWI
Durante han 2008 nga distrito nga kombensyon iginpagowa an 224 ka pahina nga libro nga may ulohan, “Magpabilin ha Gugma han Dios.” Ano an katuyoan hinin bag-o nga libro? Basi buligan an mga Kristiano nga hibaroan ngan higugmaon an mga prinsipyo ni Jehova, labi na gud an mahitungod ha Kristiano nga panggawi. An pag-aram hin maopay ha “Magpabilin ha Gugma han Dios” magpaparig-on han aton pagtoo nga an pagsunod ha mga prinsipyo ni Jehova an gimaopayi nga paagi han pagkinabuhi yana ngan maggigiya ngadto ha kinabuhi nga waray kataposan.
Labaw pa, katuyoan hito nga buligan kita nga masabtan nga diri makuri an pagsugot kan Jehova. Lugod, usa ito nga paagi nga maipapakita naton nga hinigugma gud naton hiya. Salit, ini nga libro mag-aaghat ha aton nga pakianhan an aton kalugaringon, ‘Kay ano nga nasugot ako kan Jehova?’
Kon an iba makasurubo nga nagsasayop tungod ha pagsalikway han gugma ni Jehova, kasagaran nga sayop nga panggawi an hinungdan, diri an kakulang hin pagsabot ha doktrina. Kon sugad, importante gud nga parig-unon naton an aton gugma ngan apresasyon ha mga balaud ngan prinsipyo ni Jehova nga naggigiya ha aton ha kada adlaw! Nasarig kita nga inin bag-o nga publikasyon mabulig ha mga alagad ni Jehova ha bug-os nga kalibotan basi magpabilin nga marig-on ha kon ano an husto, pamatud-an nga buwaon hi Satanas, ngan labaw ha ngatanan, magpabilin ha gugma han Dios!—Jud. 21.
[Retrato ha pahina 18]
‘Kon iyo tipigan an akon mga sugo, kamo magpapabilin ha akon gugma; sugad gud han akon pagtipig han mga sugo han akon Amay, ngan ako nagpapabilin ha iya gugma’