May-ada Ka ba Pribilehiyo Hadto? Magigin Kwalipikado Ka ba Utro?

MAY-ADA ka ba hadto pribilehiyo ha kongregasyon? Bangin usa ka nga ministeryal, tigurang, o bug-os panahon nga alagad. Sigurado nga malipayon ngan tagbaw ka gud ha imo mga toka, kondi tungod han pipira nga hinungdan waray ka makagpadayon.

Bangin inundang ka ha imo pribilehiyo basi mangnoan an mga membro han pamilya, o tungod han kalagas ngan maluya nga panlawas. Ito nga imo desisyon diri nangangahulogan nga napakyas ka. (1 Tim. 5:8) Hi Felipe usa nga misyonero ha siyahan nga siglo, kondi ha urhi inukoy ha Cesarea basi mangnoan an iya pamilya. (Buh. 21:8, 9) Han lagas na hi Hadi David, ginhikay niya nga an iya anak nga hi Salomon an magin sunod nga hadi. (1 Hadi 1:1, 32-35) Bisan pa hito, hira Felipe ngan David padayon nga ginhigugma ngan gin-apresyar ni Jehova ngan gintatahod han mga tawo tubtob yana.

Kondi, bangin nawad-an ka hin pribilehiyo. Tungod ba ito han sayop nga panggawi? O tungod han mga problema ha pamilya? (1 Tim. 3:2, 4, 10, 12) Bangin naghunahuna ka pa ngani nga diri makatadunganon an desisyon ngan nagdudumot pa tubtob yana.

Pangalimbasog nga Magin Kwalipikado Utro

Maibabalik pa ba an nawara nga pribilehiyo? Kasagaran nga maibabalik pa ito. Syempre, basi magin kwalipikado utro, kinahanglan magin disidido ka ha pagkab-ot hito. (1 Tim. 3:1) Kay ano? Tungod han imo gugma kan Jehova ngan ha mga nag-aalagad ha iya—an hinungdan han imo pagdedikar ha Dios. Kon disidido ka nga ipakita ito nga gugma pinaagi ha pagkab-ot utro hin pribilehiyo, magagamit ka ni Jehova pati an imo eksperyensya antes ngan katapos mawara an imo pribilehiyo.

Hinumdumi an pasarig ni Jehova ha nasud han Israel han makatadunganon nga ginkuha ha ira an mga pribilehiyo ha pag-alagad. Hiya nagsiring: “Ako, hi Jehova, diri nababalhin; busa kamo, O mga anak ni Jakob, diri aanawon.” (Mal. 3:6) Hinigugma ni Jehova an mga Israelita ngan hingyap niya nga gamiton pa hira. Sugad liwat hito an inaabat ni Jehova ha imo. Ha imo kahimtang yana, ano an imo mahihimo? Mas ginkikinahanglan ha pag-alagad an marig-on nga espirituwalidad kay han natural nga abilidad. Salit, samtang waray ka pa dugang nga responsabilidad ha kongregasyon, parig-ona an imo espirituwalidad.

Basi “magmakusog” ha pagtoo, kinahanglan nga ‘pamilngon niyo hi Jehova ngan an iya kusog.’ (1 Kor. 16:13; Sal. 105:4) Usa nga paagi nga mahihimo mo ini amo an kinasingkasing nga pag-ampo. Kon iginsusumat mo an imo kahimtang kan Jehova, ipahayag ha iya an imo pagbati ngan paghangyo nga giyahan ka han iya espiritu. Ha pagbuhat hini, mas magigin duok ka kan Jehova ngan mapaparig-on ka. (Sal. 62:8; Fil. 4:6, 13) Usa pa nga paagi ha pagparig-on han imo espirituwalidad amo an pagpauswag han imo pag-aram ha Pulong han Dios. Yana nga gutiay pa la an imo responsabilidad, mas daku an imo panahon ha personal ngan ha panpamilya nga pag-aram, ngan bangin matuman mo na an eskedyol nga diri nasusunod hadto.

Syempre, nagrirepresentar ka pa gihapon kan Jehova sugad nga usa han iya mga Saksi. (Isa.  43:10-12) An gimaopayi nga pribilehiyo han bisan hin-o ha aton amo an pagin “mga kabulig han Dios.” (1 Kor. 3:9) Maopay gud nga paagi ha pagparig-on han imo espirituwalidad ngan han imo mga kaupod ha ministeryo an dugang nga pakigbahin ha pagsangyaw.

Paglampos ha Imo mga Pagbati

Tungod ha kawad-i hin pribilehiyo bangin maawod ka o magbasol. Bangin pakamatadungon mo an imo ginbuhat. Kondi, kumusta man kon katapos pamatian han mga tigurang an imo mga pangatadongan naghuhunahuna la gihapon hira nga diri ka na kwalipikado ha imo pribilehiyo? Bangin magpabilin an imo kahiubos ngan tungod hito diri ka na mangalimbasog o makurian ka pa ngani nga mahibaro hin leksyon ha nahitabo ha imo. Aton hisgotan kon paonan-o an eksperyensya nira Job, Manases, ngan Jose makakabulig ha usa nga malamposan an kahiubos.

Hi Job usa nga patriarka nga nanguna ha pagsingba kan Jehova ngan nag-alagad sugad nga tigurang ngan hukom. (Job 1:5; 29:7-17, 21-25) Kondi, inabot an makuri nga panahon ha iya kinabuhi nga nawara an ngatanan niya nga panag-iya, namatay an mga anak, ngan nagkasakit hiya. Tungod hito nawara liwat an iya maopay nga reputasyon. Hi Job nagsiring: “Hira nga mga burobata pa kay ha akon nagyuyubit ha akon.”—Job 30:1.

Hi Job naghunahuna nga waray gud hiya sala ngan karuyag niya pamatud-an ito ha Dios. (Job 13:15) Kondi andam hiya nga maghulat kan Jehova, ngan nagresulta ito hin mga bendisyon. Nasantop niya nga kinahanglan hiya sawayon, labi na ha iya mga reaksyon ha pagsari. (Job 40:6-8; 42:3, 6) Ha kataposan, an pagkamapainubsanon ni Job nagresulta hin hura nga bendisyon han Dios.—Job 42:10-13.

Kon nawara an imo pribilehiyo tungod han imo nabuhat nga sayop, bangin mahunahuna mo kon mapapasaylo ngan mangangalimtan gud ba ito ni Jehova ngan han kabugtoan. Tagda an nahitabo kan Hadi Manases han Juda. Hiya “nagbuhat hin daku nga karaotan ha paniplatan ni Jehova, ha paghagit ha iya ha kasina.” (2 Hadi 21:6) Kondi, namatay hiya nga matinumanon sugad nga hadi. Paonan-o ito nahitabo?

Ginkarawat ni Manases an disiplina. Han ginbalewaray niya an mga pahamangno, ginpahinabo ni Jehova nga dakpon hiya han mga Asiryahanon. Ginkadenahan hiya ngan gindara nga bihag ha Babilonya. Didto, hiya “nangita kan Jehova an iya Dios, ngan nagpaubos ha daku gud ha atubangan han Dios han iya mga amay. Ngan hiya nag-ampo ha Iya.” Salit, an kinasingkasing nga pagbasol ni Manases nagpagios ha iya nga tadungon an iya sayop, ngan ginpasaylo hiya.—2 Kron. 33:12, 13.

An nawara nga mga pribilehiyo diri durungan nga nahibabalik. Kondi, ha paglabay han panahon bangin hatagan ka hin pipira nga responsabilidad. An pagkarawat hini, ngan an pagbuhat han imo gimaopayi magriresulta hin dugang nga responsabilidad. Bangin diri ito sugad kasayon han imo ginhuhunahuna. Usahay bangin may-ada mga kapakyasan. Bisan pa hito,  an pagkadisidido ngan pagkamapinadayunon magriresulta hin maopay.

Tagda pananglitan hi Jose nga anak ni Jakob. Disisyete anyos hiya han waray kalooy nga ginbaligya hiya han iya kabugtoan basi magin uripon. (Gen. 37:2, 26-28) Sigurado nga waray hiya maghunahuna nga bubuhaton nira ito ha iya. Kondi, andam hiya nga ilubon an kahimtang, ngan tungod han bendisyon ni Jehova hiya ‘nag-uswag . . . ha balay han iya agaron.’ (Gen. 39:2) Ha urhi, ginpriso hiya. Kondi nagmatinumanon hiya ngan ginbuligan ni Jehova, salit ha kamaihaan igintapod ha iya an mga buruhaton ha prisohan.—Gen. 39:21-23.

Diri maaram hi Jose nga may katuyoan ini ngatanan. Padayon nga ginbuhat la niya an iya mahihimo. Hito nga paagi gin-gamit hiya ni Jehova basi tipigan an katulinan diin magtitikang an iginsaad nga Binhi. (Gen. 3:15; 45:5-8) Bisan kon diri kita naglalaom nga magkaada hin daku nga pribilehiyo sugad kan Jose, nag-aasoy an Biblia nga tikang kan Jehova an mga pribilehiyo nga nakakarawat han Iya mga surugoon. Magin andam pirme ha pagkarawat hin pribilehiyo pariho kan Jose.

Mahibaro hin Leksyon Tikang ha Magkuri nga Eksperyensya

Hira Job, Manases, ngan Jose nakaeksperyensya hin magkuri nga kahimtang. Ginkarawat nira an sitwasyon nga igintugot ni Jehova, ngan an tagsa ha ira nahibaro hin mapulsanon nga mga leksyon. Ano an imo mahibabaroan?

Hunahunaa kon ano an karuyag ni Jehova igtutdo ha imo. Ha pangalimbasog ni Job nga malamposan an kawaray paglaom, waray niya tagda an mas importante nga mga isyu, lugod, an iya kalugaringon la an ginhunahuna. Kondi pinaagi han mahigugmaon nga pagsaway ni Jehova, nahibalik an iya pagin timbang. Hiya nagsiring: “Ako nagyakan hadton waray ko hisabti.” (Job 42:3) Kon nahiubos tungod han kawad-i hin mga pribilehiyo, ‘diri ka maghunahuna hin hitaas ha imo kalugaringon nga labaw han igo mo paghunahunaon; kondi paghunahuna hin malinaw.’ (Roma 12:3) Bangin karuyag ni Jehova nga tadungon ka kondi diri mo pa bug-os nga nasasabtan an iya paagi.

Karawata an disiplina. Ha siyahan bangin nahunahuna ni Manases nga diri hiya takos kumarawat hin sugad kabug-at nga pagsaway. Kondi, ginkarawat niya ito, nagbasol, ngan inundang ha pagbuhat hin sayop. Anoman an imo inaabat ha disiplina nga nakarawat, ‘magpaubos ka ha atubangan han Ginoo, ngan babayawon ka niya.’—1 Ped. 5:6; Jak. 4:10.

Magin mapailubon ngan makinarawaton. An nahitabo kan Jose mahimo unta magpagios ha iya nga magdumot ngan bumulos. Kondi waray niya ito buhata, lugod, naghilarom an iya pagsabot ngan mas nagin maloloy-on. (Gen. 50:15-21) Kon may nakapasubo ha imo, magin mapailubon. Karawata an pagbansay ni Jehova.

May-ada ka ba hadto pribilehiyo ha kongregasyon? Posible nga hatagan ka ni Jehova hin mga pribilehiyo ha tidaraon. Parig-ona an imo espirituwalidad. Timbangi hin pagpailob ngan pagpaubos an imo mga pagbati. Kinaburut-on nga karawata an bisan ano nga toka nga iginhahatag ha imo. Sarig nga “waray maopay nga butang nga iya [Jehova] igpupugong ha ira hadton naglalakat hin matul-iron.”—Sal. 84:11.

[Blurb ha pahina 30]

Magmakusog ha pagtoo pinaagi han kinasingkasing nga pag-ampo

[Retrato ha pahina 31]

Maopay gud nga paagi ha pagparig-on han imo espirituwalidad an dugang nga pakigbahin ha pagsangyaw

[Retrato ha pahina 32]

Posible nga hatagan ka ni Jehova hin mga pribilehiyo ha tidaraon