Nahinunumdoman Mo Ba?

Nagpahimulos ka ba ha pagbasa han bag-o nga mga gowa han An Barantayan ngan The Watchtower? Bueno, kitaa kon mababaton mo an masunod nga mga pakiana:

• Babanhawon ba an usa nga minasus-an nga namatay antes ig-anak?

An kinabuhi nagtitikang ha pagpanamkon. Mababanhaw ni Jehova an bisan hin-o anoman an iya edad tungod kay “an ngatanan nga mga bagay nahihimo [han] Dios.” (Mar. 10:27) Kondi waray espisipiko nga ginsiring an Biblia kon babanhawon ba niya an kabataan nga namatay antes ig-anak.—4/15, pahina 12, 13.

• Ano an aton mahibabaroan ha mga hamtik, kuneho ha bato, duron ngan tuko?

Ini nga upat may-ada kinaiya nga kinaadman. Tungod hito, makikita ha ira an kinaadman han Dios. (Prob. 30:24-28)—4/15, pahina 16-19.

• An 2009 an ika-100 ka tuig han ano nga importante nga hitabo ha mga Saksi ni Jehova?

Han 1909 an sentro nga opisina han Watch Tower Bible and Tract Society, an legal nga ngaran han organisasyon ha pagpublikar nga ginagamit han mga Saksi ni Jehova, iginbalhin tikang ha Pittsburgh, Pennsylvania, ngadto ha Brooklyn, New York, diin aadto ito tubtob yana.—5/1-E, pahina 22-24.

• Kay ano nga positibo nga ginhihisgotan ha Biblia an paghilom?

Iginpapasabot hito nga an paghilom usa nga pagpakita hin pagtahod, bulig ha pamalandong, ngan ebidensya han pagin maaramon ngan masinabuton. (Sal. 37:7; 63:6; Prob. 11:12)—5/15, pahina 3-5.

• Ano an kaparihoan nira John Wycliffe, William Tyndale, Robert Morrison, ngan Adoniram Judson?

Ngatanan hira may-ada gugma ha Pulong han Dios ngan naghubad hito ha mga yinaknan nga mababasa han ordinaryo nga mga tawo. Iginhubad ni Wycliffe ngan Tyndale an Biblia ha Iningles, hi Morrison ha Inintsik, ngan hi Judson ha Burmese (Myanmar) nga yinaknan.—6/1-E, pahina 8-11.

• Pira nga hadi ha Juda an nagpakita hin makatirigamnan nga kadasig para ha balay han Dios?

Disinoybe nga hadi an nagmando ha sur nga ginhadian han Juda. Upat ha ira an nagpakita hin makatirigamnan nga kadasig, hira Asa, Jehosapat, Hesekia, ngan Josia.—6/15, pahina 7-11.

• Ngatanan ba nga dinihogan nga Kristiano nakikigbahin ha pag-andam han espirituwal nga pagkaon?

Diri. An ngatanan nga dinihogan membro han matinumanon ngan maaramon nga uripon nga klase, kondi an Nagmamando nga Lawas an nanginginano han pagpakaon ha espirituwal.—6/15, pahina 22-24.

• Kay ano nga naruyagan hinduro han Romano nga kasundalohan an pan-ilarom nga panapton ni Jesus?

An kasundalohan nga nakada han ginpatay hi Jesus waray mag-gisi han iya panapton basi bahin-bahinon. Ito nga klase hin panapton kasagaran nga may dinugtongan, kondi an panapton ni Jesus waray tinakipan o tahi, salit mahal ito.—7/1, pahina 22.

• Kay ano nga gugma an nangunguna nga kaibahan ni Jesus ha mga lider han relihiyon ha pagtratar ha mga tawo?

Imbes nga higugmaon an ordinaryo nga mga tawo, gintamay hira hito nga mga lider. Dugang pa, ito nga mga lider waray gugma ha Dios. Hi Jesus nahigugma ha iya Amay ngan nalooy gud ha mga tawo. (Mat. 9:36) Hiya malumo, mapinairon, ngan buotan ha ira.—7/15, pahina 15.

• Kay ano nga bangin magkaproblema an mag-asawa ha pagdumara hin kwarta, ngan ano an mabulig ha ira ha paglampos hito?

Kasagaran nga pagtapod o kahadlok an hinungdan han diri-pagsinabtanay han mag-asawa may kalabotan han kwarta, ngan bangin magkaiba an ira paagi han pagdumara hito. May upat nga paagi basi malamposan ito: Mahibaro ha pakiistorya hin kalmado mahitungod han kwarta, pagsarabot kon paonan-o gagastuhon an kita, paghimo hin badyet han pamilya, ngan pagdesisyon kon hin-o an tutokahan.—8/1-E, pahina 10-12.