Pakaagi hin Tinago nga mga Bahandi

NAKAAGI ka na ba hin tinago nga bahandi ha lugar nga diri mo ginlalaoman? Nahitabo ito kan Ivo Laud, usa han mga Saksi ni Jehova ha Estonia, han Marso 27, 2005. Ginbubuligan niya hi Alma Vardja, usa nga lagas nga Saksi, ha pagbungkag han iya daan na nga payag. Samtang ira gintatangtang an bungbong, nakit-an nira an tabla nga nakatabon ha usa nga bahin han harigi. Han gintangtang ito, nakita nira an guhang nga 4 ka pulgada an kahilapad, 50 ka pulgada an kahilaba, ngan 4 ka pulgada an kahilarom, nga may-ada takop nga tabla. (1) Burutangan ito hin tinago nga mga bahandi! Ano nga mga bahandi? Hin-o an nagtago hito?

Ito nga burutangan may-ada gudtiay nga kahon nga ginputos hin maopay hin madakmol nga papel. (2) An  mga kahon may sulod nga mga literatura han mga Saksi ni Jehova, an kadam-an mga aradman nga artikulo ha Watchtower, nga an iba han 1947 pa. (3) Maopay an pagkasurat hito ha yinaknan han Estonia. Mahibabaroan ha sulod han iba nga kahon kon hin-o an nagtago hito. Mga rekord ito han pag-imbistigara ha bana ni Alma nga hi Villem Vardja. Upod liwat hito an impormasyon samtang priso hiya. Kay ano nga napriso hiya?

Hi Villem Vardja nagkaada hin responsabilidad ha kongregasyon ha Tartu ngan ha urhi nag-alagad ha kongregasyon ha Otepää ha Estonia, usa han mga Republika han Unyon Sobyet hadto. Posible nga hinbaroan niya an kamatuoran ha Biblia antes an Girra ha Kalibotan II. Paglabay hin pipira ka tuig, han Disyembre 24, 1948, gin-aresto hiya han Komunista nga gobyerno tungod han iya buruhaton sugad nga Saksi. Gin-imbistigar ngan ginmaltrato hiya han mga pulis samtang ginpipirit nga isumat an mga ngaran han iba nga Saksi. Waray hiya hatagi hin higayon nga depensahan an iya kalugaringon ha korte, ngan ginsentensyahan hin napulo ka tuig nga kapriso ha mga kampo ha Russia.

Hi Villem Vardja nagpabilin nga matinumanon kan Jehova tubtob han iya kamatay han Marso 6, 1990. Diri maaram an iya asawa nga nakada ito nga mga literatura. Posible nga karuyag niya proteksyonan an iya asawa kon magkaada imbistigasyon. Kay ano nga gintago niya ito? Tungod kay agsob nga an KGB (Soviet State Security Committee) tigda la nga nag-uusisa ha mga balay han mga Saksi basi mamiling hin mga publikasyon. Posible gud nga gintago ni Bugto Vardja an mga literatura basi diri mawarayan hin espirituwal nga pagkaon an kabugtoan kon makuha han KGB an ngatanan nga publikasyon. Han katpaso han 1990, may-ada iba nga burutangan nga hin-agian. An usa hin-agian ha Tartu, ha sur han Estonia. Hi Villem Vardja liwat an nagtago hito.

Kay ano nga matatawag naton ito nga mga bahandi? Tungod kay an mauyatom nga pagsurat ngan pagtago hito hin maopay nagpapamatuod nga ginpabilhan gud han mga Saksi an espirituwal nga pagkaon nga ira nakakarawat hito nga panahon. (Mat. 24:45) Gin-aapresyar mo ba an espirituwal nga mga tagana nga imo nakakarawat yana? Usa hito an Barantayan ha yinaknan han Estonia ngan ha sobra 170 iba pa nga yinaknan.