An Gugma ni Kristo Nagpapagios ha Aton nga Maghigugma
An Gugma ni Kristo Nagpapagios ha Aton nga Maghigugma
“Kay ginhigugma [ni Jesus] an mga iya kalugaringon dinhi ha kalibotan, ginhigugma niya hira tubtob ha kataposan.”—JUAN 13:1.
1, 2. (a) Kay ano nga makatirigamnan gud an gugma ni Jesus? (b) Ano nga mga paagi han pagpakita hin gugma an hihisgotan naton hini nga artikulo?
HI Jesus nagpakita hin hingpit nga susbaranan han gugma. Nakita ito ha iya pagyakan, paggawi, pagtutdo, ngan paghalad han iya kinabuhi. Tubtob ha kamatayon, iya iginpakita an gugma ha ngatanan nga iya iginkita ngan labi na ha iya mga disipulo.
2 An makatirigamnan nga gugma nga iginpakita ni Jesus maopay gud nga susbaranan ha iya mga sumurunod. Nagpapagios liwat ito ha aton nga ipakita an pariho nga gugma ha aton kabugtoan ngan ha ngatanan. Hini nga artikulo hihisgotan naton kon ano an hibabaroan han mga tigurang kan Jesus mahitungod ha pagpakita hin gugma ha mga nakakasayop, bisan ha mga nakakasala hin seryoso. Hihisgotan liwat naton kon paonan-o an gugma ni Jesus nagpapagios ha mga Kristiano nga buligan an ira igkasi-tumuroo ngan an iba ha panahon han kakurian, kalamidad, ngan sakit.
3. Bisan kon nakasala hin seryoso hi Pedro, paonan-o hiya gintagad ni Jesus?
3 Han gab-i antes hi Jesus mamatay, tulo ka beses nga iginlirong hiya han iya apostol nga hi Pedro. (Mar. 14:66-72) Kondi han nagbasol hi Pedro, sugad han igintagna ni Jesus, ginpasaylo hiya. Igintapod ni Jesus kan Pedro an dagku nga responsabilidad. (Luk. 22:32; Buh. 2:14; 8:14-17; 10:44, 45) Ano an aton hibabaroan ha pagtagad ni Jesus ha mga nakakasala hin seryoso?
Subara an Panhunahuna ni Kristo ha mga Nakakasala
4. Ha ano nga kahimtang labi nga ginkikinahanglan an pagsubad han panhunahuna ni Kristo?
4 Damu an kahimtang diin ginkikinahanglan an pagsubad han panhunahuna ni Kristo. Usa nga kahimtang nga makabibido gud amo an seryoso nga pakasala han usa nga kapamilya o kakongregasyon. Makasurubo nga samtang nagtitikahirani an kataposan han sistema ni Satanas, padayon nga gindadaot han espiritu hini nga kalibotan an mga prinsipyo ha moral. An maraot ngan waray pagtagad nga paggawi hini nga kalibotan mahimo makaimpluwensya ha bisan hin-o ha aton ngan makapaluya han aton determinasyon nga magbuhat hin husto. Ha siyahan nga siglo, an pipira kinahanglan paiwason ha Kristiano nga kongregasyon, ngan an iba ginsaway. Nahitatabo liwat ito yana. (1 Kor. 5:11-13; 1 Tim. 5:20) Bisan pa hito, kon an mga tigurang nga nagtutuhay han problema nagpapakita hin gugma nga pariho han kan Kristo, mahimo ito magkaada daku gud nga epekto ha nakasala.
5. Paonan-o sadang subaron han mga tigurang an panhunahuna ni Kristo ha mga nakakasala?
5 Pariho kan Jesus, kinahanglan sundon pirme han mga tigurang an matadong nga mga prinsipyo ni Jehova. Ha pagbuhat hito, ira ginsusubad an pagkamalumo, pagkabuotan, ngan gugma ni Jehova. Kon an nakasala sinsero nga nagbabasol, ‘masinakitnon an kasingkasing’ ngan “mabinasulon an espiritu,” bangin diri makurian an mga tigurang nga ‘pabalikon hiya ha espiritu ha kaaghop.’ (Sal. 34:18; Gal. 6:1) Kondi paonan-o nira sadang tagdon an usa nga naato ngan diri nagbabasol?
6. Ano an sadang likyan han mga tigurang ha ira pagtratar ha mga nakasala, ngan kay ano?
6 Kon an nakasala diri nasunod ha Kasuratanhon nga sagdon o ginbabasol an iba ha iya nabuhat nga sayop, bangin masina an mga tigurang ngan an iba. Tungod kay maaram hira han maraot nga epekto han iya ginbuhat, bangin maaghat hira nga ipahayag an ira pagbati mahitungod hito. Kondi, an kasina nakakadaot ngan diri nagpapakita han “hunahuna ni Kristo.” (1 Kor. 2:16; basaha an Jakobo 1:19, 20.) Prangka nga ginsaway ni Jesus an iba, kondi waray gud hiya magyakan hin maraot o nakakapasubo. (1 Ped. 2:23) Lugod, ha iya pulong ngan buhat iginpaabat niya ha mga nakasala nga mahimo hira magbasol ngan bumalik kan Jehova. Ha pagkamatuod, usa han nangunguna nga hinungdan han pagkanhi ni Jesus ha kalibotan amo an “pagluwas ha mga magpakasasala.”—1 Tim. 1:15.
7, 8. Ano nga giya an sadang sundon han mga tigurang ha pagdumara hin hudisyal nga mga kaso?
7 Paonan-o ini nga susbaranan ni Jesus sadang makaapekto ha aton pagtagad hadton kinahanglan disiplinahon ha kongregasyon? Hinumdumi nga an Kasuratanhon nga kahikayan mahitungod han hudisyal nga aksyon nagpapanalipod ha panon ngan mahimo magpagios ha gindisiplina nga magbasol. (2 Kor. 2:6-8) Makasurubo nga an iba diri nagbabasol ngan kinahanglan paiwason, kondi makalilipay nga paglabay han panahon damu ha ira an nabalik kan Jehova ngan ha iya kongregasyon. Kon ginsusubad han mga tigurang an panhunahuna ni Kristo, binubuligan nira an nakasala nga magbasol ngan ha kataposan bumalik. Paglabay han panahon, diri gud hingangalimtan hini nga mga nakasala an respeto ngan gugma nga iginpakita han mga tigurang, bisan kon bangin hinngalimtan na nira an iba nga iginsagdon tikang ha Kasuratan.
8 Salit, kinahanglan ipakita han mga tigurang an “bunga han espiritu,” labi na an gugma nga pariho han kan Kristo, bisan kon diri ginkakarawat han nakasala an sagdon ha Kasuratan. (Gal. 5:22, 23) Diri gud hira sadang magdali-dali ha pagdesisyon nga paiwason hiya. Kinahanglan ipakita nira nga karuyag nira hiya buligan nga bumalik kan Jehova. Hito nga paagi, kon ha urhi magbasol hiya, sugad han ginbuhat han iba, bangin magpasalamat gud hiya kan Jehova ngan ha “hatag” o regalo nga kalalakin-an nga nakabulig basi magin mas masayon ha iya nga makabalik ha kongregasyon.—Efe. 4:8, 11, 12.
Ipakita an Gugma nga Pariho han kan Kristo Hinin Panahon han Kataposan
9. Pagsaysay hin ehemplo diin iginpakita ni Jesus an gugma ha iya mga disipulo ha praktikal nga paagi.
9 Iginsurat ni Lukas an usa nga makatirigamnan nga ehemplo han pagpakita ni Jesus hin gugma ha praktikal nga paagi. Tungod kay maaram hi Jesus nga maabot an panahon nga lilikosan han Romano nga kasundalohan an Jerusalem ngan waray makakapalagiw, mahigugmaon nga nagpahamangno hiya ha iya mga disipulo: “Kon makita niyo an Jerusalem, nga ginlilibotan han mga sundalo, niyan hibabaroan niyo, nga hirani na an kaguba niya.” Ano an sadang nira buhaton? Naghatag hi Jesus hin matin-aw ngan espisipiko nga instruksyon. “Niyan an mga aadto ha Judea, manmalagiw ngadto ha mga kabukiran; ngan an aada ha butnga, man-gowa; ngan an mga ha kauumhan, diri manulod. Kay hadto nga mga adlaw amo an mga adlaw ha pagbulos, basi matuman an ngatanan nga mga bagay, nga nahisurat.” (Luk. 21:20-22) Katapos likosan han Romano nga kasundalohan an Jerusalem han 66 K.P., ginsunod han masinugtanon nga mga sumurunod ni Jesus ini nga instruksyon.
10, 11. Paonan-o mabulig ha aton ha pagpangandam ha “daku nga kagol-anan” an paghisgot han pagpalagiw han mga Kristiano ha Jerusalem ha siyahan nga siglo?
10 Durante han pagpalagiw han mga Kristiano ha Jerusalem, kinahanglan ipakita nira ha usa kag usa an gugma nga pariho han iginpakita ni Kristo ha ira. Sigurado nga kinahanglan nira ipaangbit ha iba kon ano an may-ada hira. Kondi ito nga tagna ni Jesus may-ada mas daku pa nga katumanan kay ha kabungkagan han Jerusalem. Hiya nagtagna: “Maabot in daku nga kagol-anan, sugad nga waray pa nahinabo tikang han tinikangan han kalibotan tubtob yana, ngan nga diri [na] gud mahinabo.” (Mat. 24:17, 18, 21) Antes ngan durante hiton “daku nga kagol-anan” nga hirani na mahitabo, kita liwat bangin makaeksperyensya hin kakurian ngan kakulang hin materyal nga panginahanglan. An pagsubad han panhunahuna ni Kristo mabulig ha aton nga makailob.
11 Hito nga panahon, kinahanglan subaron naton hi Jesus ha pagpakita hin nagsasakripisyo nga gugma. May kalabotan hini, hi Pablo nagsagdon: “An tagsa-tagsa ha aton maglipay ha iya amyaw tungod ha maopay, ngan karig-onan. Kay hi Kristo waray man liwat malipay ha iya kalugaringon . . . Niyan an Dios han pagpailob ngan paglipay magtugot unta ha iyo hin pagkaurosa hin hunahuna uyon kan Kristo Jesus.”—Roma 15:2, 3, 5.
12. Ano nga gugma an kinahanglan kultibaron naton yana, ngan kay ano?
12 Hi Pedro nga ginpakitaan ni Jesus hin gugma nag-aghat liwat ha mga Kristiano nga magkaada “putli nga paghigugma ha mga kabugtoan” ngan magpakita hin “pagkamasinugtanon ha kamatuoran.” Kinahanglan ‘maghigugmaay gud hira tikang ha kasingkasing.’ (1 Ped. 1:22) Yana, labi na gud nga kinahanglan kultibaron naton an sugad hito nga mga kalidad. Nagtitikaduro na an kakurian nga naieksperyensyahan han ngatanan nga katawohan han Dios. Waray sadang sumarig ha bisan ano nga bahin hini nga kalibotan, sugad han iginpapakita han kawaray kasigurohan han sistema-pinansyal han kalibotan yana. (Basaha an 1 Juan 2:15-17.) Lugod, samtang nagtitikahirani an kataposan hini nga sistema, kinahanglan magin mas duok kita kan Jehova ngan ha usa kag usa, mangalimbasog nga magkaada duok nga mga sangkay ha kongregasyon. Hi Pablo nagsagdon: “Pagsighigugmaay gud kamo hin minagburugto an usa kag usa; . . . palabihon niyo an usa kag usa ha kadungganan.” (Roma 12:10) Dugang nga ginpabug-atan ito ni Pedro ha pagsiring: “Labaw ha ngatanan nga mga bagay maghigugmaay gud kamo hinduro an usa kag usa; kay an gugma nakakatabon hin damu nga mga sala.”—1 Ped. 4:8.
13-15. Paonan-o an gugma nga pariho han kan Kristo iginpakita han iba nga kabugtoan katapos han kalamidad?
13 Ha bug-os nga kalibotan, kilala an mga Saksi ni Jehova ha pagpakita hin gugma nga pariho han kan Kristo. Tagda an mga Saksi nga nagboluntaryo pagbulig katapos madaot han magkusog nga bagyo an daku nga bahin han sur han Estados Unidos han 2005. Tungod kay napagios han susbaranan ni Jesus, sobra 20,000 an nagboluntaryo. Damu an binaya ha ira mag-opay nga balay ngan permanente nga trabaho basi buligan an ira kabugtoan nga naapektohan han kalamidad.
14 Ha usa nga lugar, an dagat nakaabot hin 80 ka kilometro tikang ha baybayon, nga 10 metros an kahilarom. Paghubas han tubig, sobra 30 porsyento han kabablayan ngan iba nga istraktura an nabungkag. An boluntaryo nga mga Saksi tikang ha magkalain-lain nga nasud, nga an iba may abilidad ha pangayad ngan panukod, nagdara hin mga gamit ngan materyales ngan disidido pagbulig ha bisan ano nga trabaho. Duha nga magbugto nga babaye nga mga balo an nagkarga han ira mga gamit ha gutiay nga trak ngan nagbyahe hin sobra 3,000 ka kilometro basi bumulig. Usa ha ira an nagpabilin didto, nabulig pa gihapon ha relief committee hito nga lugar ngan nag-aalagad sugad nga regular payunir.
15 Sobra 5,600 nga balay han mga Saksi ngan han iba pa dida hito nga lugar an gintukod utro o gin-ayad. Ano an inabat han kabugtoan nga nakakarawat hiton makatirigamnan nga pagpakita hin gugma? Usa nga bugto nga babaye nga nawarayan hin balay an binalhin ha gutiay nga treyler nga nagtuturo an atop ngan ruba an lutoan. Gintukoran hiya han mga kabugtoan hin simple kondi komportable nga balay. Samtang iya ginkikinita an iya maopay nga bag-o nga balay, nagtuok hiya tungod han pagpasalamat kan Jehova ngan ha kabugtoan. Ha damu pa nga kahimtang, an mga Saksi nga nawad-an hin balay nagpabilin pa gihapon ha ira akomodasyon bisan kon sobra usa ka tuig na tikang nga natukod utro an ira mga balay. Kay ano? Basi maukyan ito han mga boluntaryo. Maopay gud ito nga ehemplo han pagsubad han panhunahuna ni Kristo!
Subara an Pagtagad ni Kristo ha mga Masakit
16, 17. Ha ano nga mga paagi naton masusubad an pagtagad ni Kristo ha mga masakit?
16 Pipira la ha aton an nagigin biktima hin daku nga kalamidad. Kondi, haros an ngatanan nagkakasakit, kita man o an aton kapamilya. An pagtagad ni Jesus ha mga masakit maopay nga susbaranan ha aton. Tungod han gugma, nalooy hiya ha ira. Han gindara han mga tawo ha iya an mga masakiton, iya gintambal hira ngatanan.—Mat. 8:16; 14:14.
17 Yana, an mga Kristiano waray gahum ha panambal sugad kan Jesus, kondi ginsusubad nira an iya mapinairon nga pagtagad ha mga masakit. Paonan-o ito iginpapakita? Usa nga paagi amo an paghikay han mga tigurang nga buligan an mga may sakit ha kongregasyon ngan pagsiguro nga natutuman ito, ginsusunod an prinsipyo ha Mateo 25:39, 40. a (Basaha.)
18. Paonan-o iginpakita han duha nga bugto nga babaye an tinuod nga gugma ha ira igkasi-tumuroo, ngan ano an resulta?
18 Syempre, diri kinahanglan magin tigurang basi magbuhat hin maopay ha iba. Tagda an kahimtang han 44-anyos nga hi Charlene nga may kanser ngan ginsidngan nga napulo ka adlaw na la mamamatay na hiya. Han nakita han iya igkasi-tumuroo nga hira Sharon ngan Nicolette nga nagkinahanglan hiya ngan an iya bana hin bulig, bug-os-panahon nga ginbuligan nira hiya ha nabibilin nga mga adlaw han iya kinabuhi. An napulo ka adlaw inabot hin unom ka semana, kondi iginpakita hinin duha nga kabugtoan an ira gugma kan Charlene tubtob han iya kamatay. “Makuri gud kon maaram ka nga an usa diri na maoopay,” siring ni Sharon. “Kondi ginparig-on kami ni Jehova. Tungod hito, nagin mas duok kami ha iya ngan ha usa kag usa.” An bana ni Charlene nagsiring: “Diri ko gud hingangalimtan an pagpaid ngan praktikal nga bulig hini nga kabugtoan. Tungod han ira maopay nga motibo ngan positibo nga panhunahuna, nagin mas masayon ha akon hinigugma nga asawa nga magmatinumanon tubtob ha kamatayon, ngan nakahatag ito ha akon hin pisikal nga bulig ngan pagliaw nga ginkikinahanglan ko gud. Waray kataposan an akon pagpasalamat ha ira. An ira pagsakripisyo nagparig-on han akon pagtoo kan Jehova ngan han akon gugma ha ngatanan nga kabugtoan.”
19, 20. (a) Ano an lima nga nangunguna nga kalidad ni Jesus nga aton ginhisgotan? (b) Determinado ka nga buhaton an ano?
19 Hinin tulo nga artikulo, aton ginhisgotan an lima nga nangunguna nga kalidad ni Jesus ngan kon paonan-o naton hiya masusubad. Magin “maaghop [kita] ngan mapainubsanon ha kasingkasing” pariho kan Jesus. (Mat. 11:29) Hinaot mangalimbasog liwat kita nga magin buotan ha iba, bisan kon nakikita naton an ira kasaypanan ngan kaluyahan. Maisugon nga sundon naton an ngatanan nga ginkikinahanglan ni Jehova bisan kon nakakaeksperyensya hin mga pagsari.
20 Sugad man, ipakita naton ha ngatanan nga kabugtoan an gugma nga pariho han kan Kristo, “tubtob ha kataposan.” Ito nga gugma nagpapakilala ha aton sugad nga tinuod nga sumurunod ni Jesus. (Juan 13:1, 34, 35) Oo, an iyo “minagburugto nga gugma magpadayon unta.” (Heb. 13:1) Ayaw pag-alang ha pagbuhat hito! Magin determinado nga gamiton an imo kinabuhi ha pagdayaw kan Jehova ngan pagbulig ha iba! Bibendisyonan ni Jehova an imo sinsero nga pangalimbasog.
[Footnote]
a Kitaa an artikulo nga “Do More Than Say: ‘Keep Warm and Well Fed’” ha Oktubre 15, 1986 nga The Watchtower.
Maisasaysay Mo Ba?
• Paonan-o masusubad han mga tigurang an panhunahuna ni Kristo ha mga nakasala?
• Kay ano nga importante gud an pagsubad han gugma ni Kristo hinin panahon han kataposan?
• Paonan-o naton masusubad an pagtagad ni Kristo ha mga masakit?
[Mga Pakiana]
[Retrato ha pahina 17]
Karuyag han mga tigurang nga buligan an nakasala nga bumalik kan Jehova
[Retrato ha pahina 18]
Paonan-o iginpakita han mga Kristiano nga pinalagiw ha Jerusalem an panhunahuna nga pariho han kan Kristo?
[Retrato ha pahina 19]
Kilala an mga Saksi ni Jehova ha pagpakita hin gugma nga pariho han kan Kristo