An Hitaas Gud nga Bili han Edukasyon Tikang ha Dios
An Hitaas Gud nga Bili han Edukasyon Tikang ha Dios
“Gin-isip ko nga karag an ngatanan nga mga bagay tungod ha minahal gud nga pagkilala kan Kristo Jesus.”—FIL. 3:8.
1, 2. Ano an ginpipili han iba nga Kristiano, ngan kay ano?
TIKANG han pag-eskwela ni Robert, hiya an pinakabaltok ha ira klase. Han otso anyos pa la hiya, an usa niya nga maestra binisita ha ira balay ngan nagsiring nga makakab-ot niya an bisan ano nga iya karuyag. Naglalaom an maestra nga pag-abot han panahon magigin doktor hi Robert. Tungod kay higtaas an iya grado ha hayskul, puydi hiya umiskwela ha bisan diin nga pinakamaopay nga unibersidad ha ira nasud. Kondi nagdesisyon hiya nga diri salingabuton an oportunidad nga ginhunahuna han iba nga talagsahon gud; lugod, nagregular payunir hiya.
2 Pariho kan Robert, damu nga Kristiano—batan-on man o edaran na—an may mga oportunidad nga mag-uswag hinin presente nga sistema. Kondi ginpipili han iba nga diri ito bug-os nga pahimulosan basi makab-ot an ira espirituwal nga mga tumong. (1 Kor. 7:29-31) Ano an nakakaaghat ha mga Kristiano sugad kan Robert nga magin disidido nga buhaton an ngatanan ha pagsangyaw? Labot la han ira gugma kan Jehova nga amo an nangunguna nga hinungdan, ira liwat gin-aapresyar an hitaas gud nga bili han edukasyon tikang ha Dios. Hinin bag-o la, imo ba nahunahuna kon ano daw la an imo kinabuhi kon waray ka mahibaro han kamatuoran? An pagpamalandong han makalilipay nga mga bendisyon nga resulta han pagin tinutdoan ni Jehova mabulig ha aton nga pirme pabilhan an maopay nga sumat ngan magin madasigon ha pagsangyaw hito.
Pribilehiyo Gud nga Matutdoan han Dios
3. Kay ano nga makakasiguro kita nga karuyag ni Jehova tutdoan an diri-hingpit nga mga tawo?
3 Tungod han pagkamaopay ni Jehova, karuyag niya tutdoan an diri-hingpit nga mga tawo. Mahitungod han dinihogan nga mga Kristiano, an Isaias 54:13 nagtagna: “An ngatanan mo nga anak pagtututdoan ni Jehova; ngan madadaku an kamurayaw han imo mga anak.” Aplikado liwat ito ha ‘iba nga mga karnero’ ni Kristo. (Juan 10:16) Nakikita ito ha tagna nga natutuman ha aton panahon. Ha bisyon, nakita ni Isaias an katawohan tikang ha ngatanan nga nasud nga nagtitipakadto ha tinuod nga pagsingba. Iginsaysay niya nga hira nasiring ha usa kag usa: “Sagka kita ngadto ha bukid ni Jehova, ngadto ha balay han Dios ni Jakob; ngan hiya magtututdo ha aton han iya mga dalan, ngan kita maglalakat ha iya mga agianan.” (Isa. 2:1-3) Pribilehiyo gud nga matutdoan kita han Dios!
4. Ano an ginkikinahanglan ni Jehova ha iya gintututdoan?
4 Ano an sadang naton buhaton basi makapahimulos han edukasyon tikang ha Dios? Kinahanglan gud kita magin maaghop ngan naruruyag magpatutdo. An salmista nga hi David nagsurat: “Maopay ngan matadong hi Jehova. . . . An mga maaghop igtututdo niya an iya dalan.” (Sal. 25:8, 9) Ngan hi Jesus nagsiring: “Ako nagpapasalamat ha imo, O, Amay! Ginoo han langit ngan han tuna, nga imo gintago ini nga mga bagay tikang han mga kamag-araman ngan masinabuton, ngan ipinakita hira ha mga kabataan.” (Luk. 10:21) Sigurado nga hihigugmaon gud naton an Dios nga “nahatag hin grasya ha mapaubsanon,” diri ba?—1 Ped. 5:5.
5. Ano gud an hinungdan nga nahibaro kita mahitungod ha Dios?
5 Sugad nga mga alagad ni Jehova, an aton ba abilidad o kaaram an hinungdan nga nahibaro kita han kamatuoran? Diri. Ha pagkamatuod, kon ha aton la pangalimbasog, diri gud kita mahibabaro mahitungod ha Dios. Hi Jesus nagsiring: “Waray usa nga sadang makakanhi ha akon, kon diri pagdad-on han Amay nga nagpakanhi ha akon.” (Juan 6:44) Pinaagi han pagsangyaw ngan han baraan nga espiritu, gintitirok ni Jehova an sugad-karnero nga mga tawo, “an birilhon nga mga butang han ngatanan nga nasud.” (Hag. 2:7) Mapasalamaton ka ba nga usa ka han ginpahirani ni Jehova ha iya Anak?—Basaha an Jeremias 9:23, 24.
Gahum nga Nakakapabag-o han Kinabuhi
6. Ano an makatirigamnan nga resulta han pagkuha han “hibaro ni Jehova”?
6 Ha tagna ni Isaias, iginhulagway niya hin maopay an pagbag-o han personalidad han mga tawo nga nahitatabo ha aton panahon. An mga madarahog hadto nagin mamurayawon na. (Basaha an Isaias 11:6-9.) An mga magkaaway hadto tungod han pagkaiba han kolor, nasyonalidad, tribo, o kultura nahibaro na pagkinabuhi nga urosa. Simboliko nga ira ‘ginpamanday an ira mga kampilan nga mga punta hin arado.’ (Isa. 2:4) Ano an hinungdan hinin makatirigamnan nga pagbag-o? Hira nagkuha han “hibaro ni Jehova” ngan nag-aplikar hito ha ira kinabuhi. Bisan kon diri hingpit an mga alagad han Dios, may-ada hira bug-os-kalibotan nga pagminagburugto. An kadani han ngatanan nga klase hin tawo ha maopay nga sumat ngan an mag-opay nga resulta hito nagpapamatuod nga hitaas gud an bili han edukasyon tikang ha Dios.—Mat. 11:19.
7, 8. (a) Ano an pipira han “mga kuta” o mga butang nga nakagamot na nga tikang hito gintatalwas han edukasyon tikang ha Dios an mga tawo? (b) Ano nga eksperyensya an nagpapamatuod nga an edukasyon tikang ha Dios naghahatag kadayawan kan Jehova?
7 Iginpariho ni apostol Pablo ha espirituwal nga pakig-away an pagsangyaw han mga alagad han Dios. Hiya nagsiring: “An mga hinganiban han amon pakipag-away diri mga lawasnon, kondi nga mga gamhanan ha atubangan han Dios ha pagguba ha mga kuta; ha pagguba ha mga hunahuna, ngan ha ngatanan nga higtaas nga bagay nga kontra ha kinaadman han Dios.” (2 Kor. 10:4, 5) Ano an pipira han “mga kuta” o mga butang nga nakagamot na nga tikang hito gintatalwas han edukasyon tikang ha Dios an mga tawo? An pipira hito amo an sayop nga katutdoan, patootoo, ngan pilosopiya han tawo nga nakakapabug-at ha katawohan. (Kol. 2:8) An edukasyon tikang ha Dios nakakabulig ha mga tawo nga bayaan an magraot nga buhat ngan kultibaron an mga kalidad nga nakakapalipay ha Dios. (1 Kor. 6:9-11) Napapauswag hito an pagkinabuhi han pamilya. Ngan naghahatag ito ha mga waray paglaom hin tinuod nga katuyoan ha kinabuhi. Ini an klase han edukasyon nga ginkikinahanglan yana.
8 Usa nga kalidad nga igintututdo ni Jehova ha mga tawo amo an pagin tangkod, sugad han aton hibabaroan hini nga eksperyensya. (Heb. 13:18) Ha India, usa nga babaye an nag-aram ha Biblia ngan ha urhi nagin diri-bawtismado nga magwarali. Usa ka adlaw han tipauli hiya tikang ha pagboluntaryo ha pagtukod hin Kingdom Hall, nakapurot hiya hirani ha paradahan hin bulawan nga alahas nga 800 ka dolyar (U.S.) an kantidad. Bisan kon pobre, gindara niya ito ha estasyon han pulis basi maibalik ha tag-iya. Diri gud makatoo an pulis! Ha urhi, may lain nga pulis nga nagpakiana, “Kay ano nga gin-ulî mo pa man ini?” Hiya binaton, “Kay nagbag-o na ako tungod han akon pag-aram ha Biblia, salit tangkod na ako yana.” Nahipausa an pulis ngan nagsiring ha tigurang nga kaupod han babaye: “Sobra 38 ka milyon an naukoy hini nga estado. Kon makakabulig kamo hin napulo nga magin pariho hini nga babaye, daku gud ito nga kalamposan.” Kon aton pamalandungon an minilyon nga nagbag-o tungod han edukasyon tikang ha Dios, damu gud an aton hinungdan nga dayawon hi Jehova, diri ba?
9. Ano an nakakaaghat ha mga tawo nga maghimo hin dagku nga pagbag-o ha ira kinabuhi?
9 An gahum han Pulong han Dios, upod han bulig ni Jehova pinaagi han iya baraan nga espiritu, nakakaaghat ha mga tawo nga maghimo hin dagku nga pagbag-o ha ira kinabuhi. (Roma 12:2; Gal. 5:22, 23) An Kolosas 3:10 nasiring: ‘Manul-ot kamo han bag-o nga tawo, nga ginbag-o ha kinaadman sugad han dagway han nagbuhat ha iya.’ An mensahe ha Biblia may gahum ha pag-usisa han tinuod nga pagkatawo ngan mahimo makapabag-o han panhunahuna ngan bisan han panlantaw. (Basaha an Hebreo 4:12.) Pinaagi han husto nga kahibaro ha Kasuratan ngan pagkinabuhi uyon ha magtadong nga prinsipyo ni Jehova, an usa mahimo magin sangkay han Dios ngan magkaada paglaom nga mabuhi ha waray kataposan.
Pangandam Para ha Tidaraon
10. (a) Kay ano nga hi Jehova gud la an makakabulig ha aton nga mangandam para ha tidaraon? (b) Ano nga makatirigamnan nga mga pagbag-o an hirani na mahitabo ha bug-os nga tuna?
10 Hi Jehova gud la an makakabulig ha aton nga mangandam para ha tidaraon kay hiya an maaram han mahitatabo. Iya iginpapahayag kon ano an magigin tidaraon han katawohan. (Isa. 46:9, 10) Iginsasaysay han tagna ha Biblia nga “an daku nga adlaw ni Jehova hirani na.” (Sep. 1:14) Mahitungod hito nga adlaw, matutuman an mga pulong ha Proberbios 11:4: “An bahandi diri ginpupulsan ha adlaw han kapungot; kondi an pagkamatadong nagluluwas tikang ha kamatayon.” Kon umabot na an adlaw han paghukom ni Jehova ha kalibotan ni Satanas, an pinakaimportante amo an pagin inuyonan han Dios. Mawawaray na pulos an kwarta. Ha pagkamatuod, an Esekiel 7:19 nasiring: “Ira ipipilak an ira salapi ngada ha kakalsadahan, ngan an ira bulawan masusugad han mahugaw nga butang.” An paghibaro hini hin abanse makakabulig ha aton nga gumios hin maaramon yana.
11. Ano an usa nga paagi nga an edukasyon tikang ha Dios nabulig ha aton nga mangandam para ha tidaraon?
11 Usa nga maopay gud nga paagi nga igin-aandam kita han edukasyon tikang ha Dios para ha tiarabot nga adlaw ni Jehova amo an pagbulig ha aton nga magkaada husto nga mga prayoridad. Hi apostol Pablo nagsurat kan Timoteo: “Sugoa adton mga manggaranon hini yana nga panahon, nga diri hira magpakahitaas, ngan diri nira ibutang an ira paglaom dida ha diri kamarig-on han mga bahandi, kondi ha Dios.” Bisan kon diri kita riko, makakapahimulos kita hinin giniyahan han Dios nga sagdon. Ano an nahiuupod hito? Imbes nga magtirok hin materyal nga mga butang, sadang kita mangalimbasog nga ‘magbuhat hin maopay’ ngan magin ‘manggaranon ha mag-opay nga buhat.’ Pinaagi ha pag-una han espirituwal nga mga butang, ‘nagtitirok kita hin maopay nga patukoranan andam ha tidaraon.’ (1 Tim. 6:17-19) Ito nga pagsakripisyo nagpapakita hin praktikal nga kinaadman, kay hi Jesus nagsiring, “ano an pulos han usa nga tawo nga mag-aangkon han bug-os nga kalibotan, kon mawara an iya kalag?” (Mat. 16:26, 27) Tungod kay hirani na an adlaw ni Jehova, an tagsa ha aton sadang magpakiana: ‘Diin ako nagtitirok hin bahandi? Hin-o an akon agaron, an Dios o an Bahandi?’—Mat. 6:19, 20, 24.
12. Kay ano nga diri kita sadang manluya kon tamayon han iba an aton ministeryo?
12 An pinakaimportante ha ‘mag-opay nga buhat’ nga ginpapabug-atan ha Pulong han Dios amo an nagluluwas-kinabuhi nga buruhaton nga pagsangyaw han Ginhadian ngan paghimo hin disipulo. (Mat. 24:14; 28:19, 20) Pariho han nahitabo ha siyahan nga siglo, bangin tamayon han iba an aton ministeryo. (Basaha an 1 Korinto 1:18-21.) Kondi diri hito nababag-o an bili han aton mensahe, ngan diri hito naiibanan an pagkaimportante han paghatag ha ngatanan hin higayon nga tumoo samtang may panahon pa. (Roma 10:13, 14) Samtang ginbubuligan naton an iba nga makapahimulos ha edukasyon tikang ha Dios, makarawat kita hin hura nga bendisyon.
Ginbibendisyonan Tungod han Pagsakripisyo
13. Ano an iginsakripisyo ni apostol Pablo para ha maopay nga sumat?
13 Antes magin Kristiano hi apostol Pablo, ginbabansay na hiya basi magin malampuson ha Judio nga sistema. Han mga 13 anyos hiya, binalhin hiya tikang ha Tarso, an iya syudad nga natawhan, ngadto ha Jerusalem basi tutdoan han bantogan nga magturutdo han Balaud nga hi Gamaliel. (Buh. 22:3) Paglabay han panahon, mas nag-uswag hiya kay han iya mga kadungan-dungan, ngan kon waray hiya umundang bangin nagin prominente hiya ha Judaismo. (Gal. 1:13, 14) Kondi han ginkarawat niya an maopay nga sumat ngan nagtikang pagsangyaw, ginbayaan niya ito ngatanan. Nagbasol ba hi Pablo han iya desisyon? Waray. Ha pagkamatuod, hiya nagsurat: “Gin-isip ko nga karag an ngatanan nga mga bagay tungod ha minahal gud nga pagkilala kan Kristo Jesus nga akon Ginoo: nga tungod ha iya ginkaragan ko an ngatanan nga mga bagay, ngan gin-isip ko hira nga mga sighot.”—Fil. 3:8.
14, 15. Ano nga mga bendisyon an aton nakakarawat sugad nga “mga kabulig han Dios ha pagbuhat”?
14 Pariho kan Pablo, an mga Kristiano yana nagsasakripisyo basi maisangyaw an maopay nga sumat. (Mar. 10:29, 30) May nawawara ba ha aton tungod kay ginbubuhat naton ito? Damu an mauyon kan Robert nga gin-unabi kanina, han hiya magsiring: “Waray gud ako magbasol. An bug-os-panahon nga pag-alagad nakahatag ha akon hin kalipay ngan katagbaw, ngan tungod hito akon ‘natilawan ngan nakita nga hi Jehova maopay.’ Ha kada panahon nga may-ada ako iginsasakripisyo basi makab-ot an espirituwal nga mga tumong, pirme ako ginbibendisyonan ni Jehova hin sobra pa han akon iginsakripisyo. Baga la ngani hin waray ako iginsakripisyo. Nakakarawat pa lugod ako!”—Sal. 34:8; Prob. 10:22.
15 Kon maiha ka na nga nakikigbahin ha pagsangyaw ngan paghimo hin disipulo, sigurado nga naproybahan mo na liwat nga maopay hi Jehova. May-ada ba mga panahon nga inabat ka nga ginbuligan ka han iya espiritu samtang nagsasangyaw? Nakita mo ba an kalipay han iba han ginpagios hira ni Jehova nga mamati han mensahe? (Buh. 16:14) Ginbuligan ka ba ni Jehova nga malamposan an mga ulang, nga bangin tungod hito nagkaada ka higayon nga mapauswag an imo ministeryo? Ginparig-on ka ba niya ha panahon han kakurian salit nakapadayon ka ha pag-alagad bisan kon nanluluya ka na? (Fil. 4:13) Kon naieksperyensyahan naton an bulig ni Jehova ha ministeryo, nagigin mas tinuod hiya ha aton ngan nagigin mas duok kita ha iya. (Isa. 41:10) Bendisyon gud nga magin usa han “mga kabulig han Dios ha pagbuhat” han pinakaimportante nga buruhaton nga pagtutdo mahitungod kan Jehova!—1 Kor. 3:9.
16. Ano an imo masisiring ha imo mga pangalimbasog ngan sakripisyo ha pagtutdo ha iba mahitungod kan Jehova?
16 Damu an naghihingyap nga may mahimo hira nga diri gud hingangalimtan. Hini nga kalibotan, aton naoobserbahan nga bisan an gimaopayi nga mga nahimo agsob nga madali la hingalimtan. Kondi an rekord han ginbubuhat ni Jehova yana pinaagi han iya katawohan ha pagbaraan han iya ngaran sigurado nga matitipigan sugad nga bahin han teokratiko nga kasaysayan. Mahinunumdoman ito ha kadayonan. (Prob. 10:7; Heb. 6:10) Hinaot pabilhan naton an pribilehiyo ha pagtutdo ha iba mahitungod kan Jehova, an buruhaton nga diri gud hingangalimtan.
Ano an Imo Baton?
• Ano an ginkikinahanglan ni Jehova ha iya gintututdoan?
• Paonan-o nababag-o han edukasyon tikang ha Dios an kinabuhi han mga tawo?
• Ano nga mga bendisyon an aton nakakarawat tungod han pagbulig ha iba nga makapahimulos ha edukasyon tikang ha Dios?
[Mga Pakiana]
[Retrato ha pahina 23]
An mga gintututdoan ni Jehova may-ada bug-os-kalibotan nga pagminagburugto
[Retrato ha pahina 24]
Bendisyon gud nga magin usa han “mga kabulig han Dios ha pagbuhat”!