Gin-aapresyar Mo ba an Ginbuhat ni Jehova ha Pagluwas ha Imo?
Gin-aapresyar Mo ba an Ginbuhat ni Jehova ha Pagluwas ha Imo?
“Darayawon an Ginoo nga Dios han Israel! Kay iya dinuaw, ngan nagbuhat pagtubos han iya katawohan.”—LUK. 1:68.
1, 2. Paonan-o maiilustrar kon ano kagrabe an aton kahimtang yana, ngan ano nga mga pakiana an aton hihisgotan?
HANDURAWA nga nahigda ka ha katre ha hospital. Aada ka ha usa nga kwarto nga an ngatanan nga pasyente parapriho an sakit—makamaratay ngan waray tambal. Han imo hinbaroan nga may doktor nga nangunguna ha pamiling hin tambal, nagkaada ka paglaom. Karuyag mo gud hibaroan kon ano na an nahitatabo ha iya pangalimbasog. Usa ka adlaw, nahibaroan mo nga may hin-agian na nga tambal! Daku gud an sakripisyo han doktor nga nakadiskobre hito. Ano an imo aabaton? Sigurado nga maghihilarom an imo pagtahod ngan apresasyon ha doktor nga nangalimbasog gud pagluwas ha imo ngan ha damu pa tikang ha kamatayon.
2 Baga hin imposible mahitabo an sugad hito nga kahimtang, kondi puropariho hito an aton sitwasyon. An kada usa ha aton aada ha kahimtang nga mas grabe pa kay han iginhulagway. Nagkikinahanglan gud kita hin paratalwas. (Basaha an Roma 7:24.) Basi maluwas kita, daku hinduro an iginsakripisyo ni Jehova. Daku liwat an iginsakripisyo han iya Anak. Salit aton tagdon an upat nga importante nga pakiana. Kay ano nga nagkikinahanglan kita hin kaluwasan? Ano an iginsakripisyo ni Jesus basi maluwas kita? Ano an ginbuhat ni Jehova ha pagluwas ha aton? Ngan paonan-o naton maipapakita nga gin-aapresyar naton an pagluwas han Dios?
Kon Kay Ano nga Nagkikinahanglan Kita hin Kaluwasan
3. Kay ano nga maitatanding ha epidemya an sala?
3 Sumala ha bag-o la nga pagbanabana, usa han pinakagrabe nga epidemya ha kasaysayan amo an trangkaso Espanyola han 1918 nga nakamatay hin napulo ka milyon. May iba nga sakit nga mas makamaratay pa. Bisan kon bangin gutiay la an matapnan hito, kadam-an ha ira an namamatay. a Kondi kumusta man kon itanding ha epidemya an sala? Hinumdumi an ginsiring ha Roma 5:12: “Tungod ha usa ka tawo, sinulod an sala ha kalibotan, ngan tungod ha sala an kamatayon; ngan sugad man an kamatayon inagi ha ngatanan nga katawohan, kay an ngatanan nakasala.” An ngatanan nga diri hingpit nakakasala, salit an ngatanan nga tawo natapnan han sala. (Basaha an Roma 3:23.) Pira an namamatay tungod han sala? Hi Pablo nagsurat nga nagresulta ito hin kamatayon ha “ngatanan nga katawohan.”
4. Ano an panlantaw ni Jehova ha kahilawig han aton kinabuhi, ngan paonan-o ito naiiba ha panhunahuna han damu yana?
4 Damu yana an naghuhunahuna nga natural la an sala ngan kamatayon. Nababaraka hira han tinatawag nga diri napapanahon nga kamatayon, kondi para ha ira natural la an kamatayon tungod han kalagas. Madali gud la hingalimtan han mga tawo an panlantaw han Maglalarang. An kahilawig han aton kinabuhi yana diri gud amo an katuyoan han Dios. Ha pagkamatuod, para kan Jehova waray tawo nga inabot hin bisan la “usa ka adlaw.” (2 Ped. 3:8) Salit an Pulong han Dios nasiring nga an aton kinabuhi sugad la hin banwa o hin gininhawa. (Sal. 39:5, Maopay nga Sumat; 1 Ped. 1:24) Kinahanglan pirme naton ito hinumdoman. Kay ano? Kon masabtan naton an kagrabe han “sakit” nga nakakaapekto ha aton, mas maaapresyar naton an pagkaimportante han “tambal”—an aton kaluwasan.
5. Ano an waray naton maeksperyensyahi tungod han sala?
5 Basi masabtan an kagrabe han sala ngan an resulta hito, kinahanglan masantop naton an mga epekto hito ha aton. Ha siyahan bangin makuri ito masabtan tungod kay waray naton maeksperyensyahi an kahimtang hadto nira Adan ngan Eva. Ha tinikangan hingpit hira. Puydi nira kontrolon an ira panhunahuna, pagbati, ngan paggios tungod kay hingpit an ira hunahuna ngan lawas. Salit mahimo hira magpadayon ha pagkultibar hin mag-opay nga kalidad sugad nga mga surugoon ni Jehova nga Dios. Kondi waray nira pabilhi iton presyoso nga regalo. Ginpili nira nga makasala kan Jehova, salit nawara ha ira ngan ha ira mga anak an klase han kinabuhi nga katuyoan unta ni Jehova para ha ira. (Gen. 3:16-19) Dugang pa, nagkaada hira han makamaratay nga “sakit” nga aton ginhihisgotan, ngan pati kita natapnan hito. Husto la nga ginkondenar hira ni Jehova. Kondi ha aton, naghahatag hiya hin paglaom nga maluwas.—Sal. 103:10.
Kon Ano an Iginsakripisyo ni Jesus Basi Maluwas Kita
6, 7. (a) Paonan-o siyahan nga iginpakita ni Jehova nga an aton kaluwasan magkikinahanglan hin daku nga pagsakripisyo? (b) Ano an aton hibabaroan ha paghalad ni Abel ngan han mga patriarka nga nabuhi antes ihatag an Balaud?
6 Maaram hi Jehova nga an pagluwas ha mga anak nira Adan ngan Eva magkikinahanglan hin daku nga pagsakripisyo. Ha tagna nga mababasa ha Genesis 3:15, aton hibabaroan kon ano an ginkinahanglan basi maluwas kita. Hi Jehova magtatagana hin “katulinan” o binhi, usa nga paratalwas nga magbubungkag kan Satanas. Kondi mag-aantos ito nga paratalwas; simboliko nga sasamaron an iya tikod. Baga hin maul-ol ngan makapaluya ito, kondi ano an iginpapasabot hito? Ano gud ba an kinahanglan antuson han Pinili ni Jehova?
7 Basi maluwas an katawohan ha sala, an paratalwas kinahanglan magtagana hin lukat. Pinaagi hito mawawara an mga epekto han sala ngan maibabalik an maopay nga relasyon han tawo ha Dios. Ano an nahiuupod hito? Hadto pa hinsabtan na nga kinahanglan may ighalad. Han an siyahan nga matinumanon nga tawo nga hi Abel naghalad hin hayop, gin-uyonan hiya ni Jehova. Ha urhi, naghalad liwat an mahadlukon ha Dios nga mga patriarka sugad kanda Noe, Abraham, Jakob, ngan Job, ngan nakapalipay ito ha Dios. (Gen. 4:4; 8:20, 21; 22:13; 31:54; Job 1:5) Paglabay hin mga siglo, mas ginpabug-atan ha Mosaiko nga Balaud an paghalad.
8. Ano an ginbubuhat han hitaas nga saserdote kada tuig ha Adlaw han Pagbayad han Sala?
8 Upod han pinakaimportante nga mga halad nga igin-obligar han Balaud amo an iginhahalad kada tuig ha Adlaw han Pagbayad han Sala. Hito nga adlaw, an hitaas nga saserdote may-ada sunod-sunod nga buruhaton nga may ginsisimbolohan. Naghahalad hiya kan Jehova ha pagbayad han mga sala—siyahan para ha mga saserdote ngan sunod para ha mga tribo nga diri saserdote. An hitaas nga saserdote nasulod ha Pinakabaraan nga kwarto han tabernakulo o templo, diin hiya la an puydi sumulod ngan usa la ka beses kada tuig. Didto, iginwiwigtik niya an dugo han mga halad ha atubangan han arka han kauyonan. Ha bawbaw hito nga arka, usahay may-ada mapawa ngan masilaw nga dampog nga nagrirepresentar han presensya ni Jehova nga Dios.—Eks. 25:22; Leb. 16:1-30.
9. (a) Ha Adlaw han Pagbayad han Sala, hin-o an ginpadagawan han hitaas nga saserdote, ngan ha ano nagrepresentar an iya iginhalad? (b) Ano an ginpadagawan han pagsulod han hitaas nga saserdote ha Pinakabaraan nga kwarto?
9 Hi apostol Pablo gin-giyahan ha pagpahayag han kahulogan hito nga mga buruhaton. Iginsaysay niya nga an hitaas nga saserdote nagpadagaw han Mesias nga hi Jesu-Kristo, ngan an paghalad nagrepresentar han paghalad ni Kristo han iya kinabuhi. (Heb. 9:11-14) Iton hingpit nga halad magtatagana hin tinuod nga lukat para ha duha nga grupo—an saserdote nga klase nga amo an 144,000 nga dinihogan han espiritu nga kabugtoan ni Kristo ngan an ‘iba nga mga karnero.’ (Juan 10:16) An pagsulod han hitaas nga saserdote ha Pinakabaraan nga kwarto nagpadagaw han pagsaka ni Jesus ha langit basi ipresenta kan Jehova an bili han halad lukat.—Heb. 9:24, 25.
10. Sumala han tagna ha Biblia, ano an maieksperyensyahan han Mesias?
10 Matin-aw nga daku gud nga sakripisyo an pagkikinahanglanon basi maluwas an katulinan nira Adan ngan Eva. Kinahanglan ighalad han Mesias an iya kinabuhi! Detalyado nga iginsumat ito han mga propeta ha Hebreo nga Kasuratan. Pananglitan, direkta nga gin-unabi ni propeta Daniel nga “uutdon” o papatayon an “dinihogan nga usa, an prinsipe,” ha “paghimo ha pagpahiuli tungod han karat-an.” (Dan. 9:24-26) Igintagna ni Isaias nga an Mesias isasalikway, pagtitimarauton, ngan papatayon, o sasamaron basi ‘pas-anon’ an mga sala han diri-hingpit nga katawohan.—Isa. 53:4, 5, 7.
11. Paonan-o iginpakita han Anak ni Jehova nga andam hiya paghalad han iya kinabuhi basi maluwas kita?
11 Antes kumanhi ha tuna an bugtong nga Anak han Dios, maaram na hiya kon ano an iya igsasakripisyo basi maluwas an katawohan. Mag-aantos hiya hinduro ngan ha urhi papatayon. Han iginsumat ito ha iya han Amay, binaribad ba hiya o nagrebelde? Waray; lugod kinaburut-on nga sinugot hiya. (Isa. 50:4-6) Sugad man, han nakanhi hi Jesus ha tuna, masinugtanon nga gintuman niya an kaburut-on han iya Amay. Kay ano? Iginsaysay niya an usa nga hinungdan, nasiring: “Ako nahigugma ha Amay.” Katapos iya iginsaysay an lain nga hinungdan: “Waray durodaku nga gugma han tawo kay hini nga gugma nga an usa ka tawo, nga makakaghatag han iya kinabuhi tungod han iya mga kasangkayan.” (Juan 14:31; 15:13) Salit usa han nangunguna nga hinungdan nga nagin posible an aton kaluwasan amo an gugma han Anak ni Jehova. Bisan kon nangahulogan ito hin paghalad han iya hingpit nga kinabuhi sugad nga tawo, malipayon nga ginbuhat niya ito basi maluwas kita.
Kon Ano an Ginbuhat ni Jehova ha Pagluwas ha Aton
12. Kan kanay kaburut-on an lukat, ngan kay ano nga igintagana niya ito?
12 Diri hi Jesus an naghikay han lukat. Lugod, usa ito han nangunguna nga bahin han kaburut-on ni Jehova. Iginpakita ni apostol Pablo nga an halaran ha templo nagrepresentar han kaburut-on ni Jehova. (Heb. 10:10) Salit an kaluwasan nga aton makakarawat pinaagi han halad ni Kristo utang naton siyahan kan Jehova. (Luk. 1:68) Kapahayagan ito han iya hingpit nga kaburut-on ngan daku nga gugma ha katawohan.—Basaha an Juan 3:16.
13, 14. Paonan-o an eksperyensya ni Abraham makakabulig ha aton nga masabtan an ginbuhat ni Jehova para ha aton?
13 Ano an ginbuhat ni Jehova basi maipakita an iya gugma ha aton hini nga paagi? Makuri gud ito masabtan hin bug-os. Kondi, may-ada asoy ha Biblia nga mabulig ha aton nga masabtan ito hin maopay. Ginsugo ni Jehova an matinumanon nga hi Abraham nga buhaton an usa nga butang nga makuri hinduro—ihalad an iya anak nga hi Isaak. Mahigugmaon nga amay hi Abraham. Hi Jehova nagsiring kan Abraham nga hi Isaak ‘iya bugtong nga anak, nga iya hinigugma.’ (Gen. 22:2) Bisan pa hito, nasantop ni Abraham nga an pagbuhat han kaburut-on ni Jehova mas importante gud kay han iya gugma kan Isaak. Salit sinugot hiya. Kondi, waray tuguti ni Jehova hi Abraham nga himoon an Iya bubuhaton ha urhi. Antes gud maihalad ni Abraham an iya anak, an Dios nagsugo hin anghel basi pugngan hiya. Determinado gud hi Abraham nga sundon an iya Dios salit andam hiya nga ighalad hi Isaak. Naghunahuna hiya nga makikita la niya utro an iya anak pinaagi han pagkabanhaw. Ngan bug-os an iya pagtoo nga babanhawon han Dios hi Isaak. Ha pagkamatuod, hi Pablo nagsiring nga ginkarawat ni Abraham hi Isaak nga “sugad hin tikang ha kamatayon.”—Heb. 11:19.
14 Nahahanduraw mo ba an kasakit nga inabat ni Abraham han nag-aandam hiya paghalad han iya anak? Iginpapakita hito kon ano an inabat ni Jehova han iya iginsakripisyo an iya gintatawag nga “akon hinigugma nga Anak.” (Mat. 3:17) Kondi, hinumdumi nga posible gud nga mas labaw pa an kasakit nga gin-antos ni Jehova. Nakaupod niya an iya Anak hin diri maihap nga panahon. An Anak malipayon nga nagbuhat kaupod han Amay sugad nga “labaw nga magburuhat” ngan iya Tagapagyakan, “an Pulong.” (Prob. 8:22, 30, 31; Juan 1:1) Diri gud naton mahahanduraw kon ano an gin-antos ni Jehova han an iya Anak ginsakit, gintamay, ngan ha urhi ginpatay sugad hin kriminal. Daku gud an iginsakripisyo ni Jehova basi maluwas kita! Salit, paonan-o naton maipapakita nga gin-aapresyar naton ito?
Paonan-o Mo Maipapakita nga Imo Gin-aapresyar an Kaluwasan?
15. Paonan-o natuman ni Jesus hin bug-os an makatirigamnan nga pagbayad han sala, ngan ano an nagin posible tungod hito?
15 Natuman ni Jesus hin bug-os an makatirigamnan nga pagbayad han sala han ginbanhaw hiya ngadto ha langit. Han nakaupod niya utro an iya hinigugma nga Amay, iginpresenta niya an bili han iya halad. Nagresulta ito hin hura nga bendisyon. Mapapasaylo na hin bug-os an mga sala, siyahan han dinihogan nga kabugtoan ni Kristo, ngan sugad man han ‘bug-os nga kalibotan.’ Tungod hito nga halad, an ngatanan nga sinsero nga nagbabasol ngan nagigin tinuod nga sumurunod ni Kristo mahimo na magkaada duok nga relasyon kan Jehova. (1 Juan 2:2) Paonan-o ini nakakaapekto ha imo?
16. Iilustrar kon kay ano nga sadang naton apresyaron an kaluwasan nga igintagana ni Jehova.
16 Hisgotan naton utro an ilustrasyon ha tinikangan. Pananglitan an doktor nga nakadiskobre han tambal sumiring ha mga pasyente nga bisan hin-o nga kumarawat han pagtambal ngan sumunod ha iginpapabuhat sigurado nga maoopay. Ano man kon kadam-an han imo igkasi-pasyente an diri sumunod ngan mangatadongan nga makuri ito buhaton? Masubad ka ba ha ira bisan kon sigurado ka nga epektibo gud an tambal? Syempre diri! Sigurado nga papasalamatan mo an doktor ngan susundon hin maopay an iya ginsisiring, bangin isumat mo pa ngani ito ha iba. Ha mas hilarom nga kahulogan, an tagsa ha aton sadang magin disidido nga ipakita kan Jehova nga gin-aapresyar gud naton an kaluwasan nga iya igintagana pinaagi han halad lukat han iya Anak.—Basaha an Roma 6:17, 18.
17. Paonan-o mo maipapakita nga imo gin-aapresyar an ginbuhat ni Jehova ha pagluwas ha imo?
17 Kon gin-aapresyar naton an ginbuhat ni Jehova ngan han iya Anak ha pagluwas ha aton tikang ha sala ngan kamatayon, ipapakita naton ito. (1 Juan 5:3) Aatohan naton an tendensya nga makasala. Diri gud naton tutuyoon nga magbuhat hin sala ngan magkinabuhi hin doble. Kay kon bubuhaton naton ito, sugad hin diri naton ginpapabilhan o gin-aapresyar an lukat. Lugod, ipapakita naton an apresasyon pinaagi ha pangalimbasog nga matipigan an maopay nga relasyon kan Jehova. (2 Ped. 3:14) Ipapakita liwat naton ito pinaagi ha pagsumat ha iba han aton makalilipay nga paglaom han kaluwasan, basi hira liwat magkaada maopay nga relasyon kan Jehova ngan paglaom nga kinabuhi nga waray kataposan. (1 Tim. 4:16) Sigurado nga hi Jehova ngan an iya Anak takos gud han ngatanan nga panahon ngan kusog nga aton magagamit ha pagdayaw ha ira! (Mar. 12:28-30) Hunahunaa daw ito! Aton ginpapamulat an panahon nga mawawara na an ngatanan nga epekto han sala. Magkikinabuhi na kita uyon ha kaburut-on han Dios—hingpit ha waray kataposan. Ito ngatanan matutuman tungod han ginbuhat ni Jehova ha pagluwas ha aton!—Roma 8:21.
[Footnote]
a Ginsisiring nga mga 20 tubtob 50 porsyento han populasyon ha kalibotan hito nga panahon an natapnan han trangkaso Espanyola. Posible nga 1 tubtob 10 porsyento han natapnan an nagkamatay. Ha luyo nga bahin, an Ebola nga virus mas talagsahon gud, kondi ha pipira nga kahimtang haros 90 porsyento han natapnan hito an nagkamatay.
Ano an Imo Baton?
• Kay ano nga ginkikinahanglan mo gud an kaluwasan?
• Ano an kapulsanan ha imo han pagsakripisyo ni Jesus?
• Ano an imo inaabat ha regalo ni Jehova nga lukat?
• Disidido ka nga buhaton an ano basi ipakita nga gin-aapresyar mo gud an ginbuhat ni Jehova ha pagluwas ha imo?
[Mga Pakiana]
[Retrato ha pahina 27]
Ha Adlaw han Pagbayad han Sala, an hitaas nga saserdote ha Israel nagpadagaw han Mesias
[Retrato ha pahina 28]
An pagin andam ni Abraham nga ihalad an iya anak nagtututdo ha aton mahitungod han mas daku gud nga sakripisyo ni Jehova