Magin Masinugtanon Ngan Maisugon Pariho kan Kristo

“Pagmaisog kamo! Gindaog ko na an kalibotan.”—JUAN 16:33, Maopay nga Sumat.

1. Isaysay kon paonan-o iginpakita ni Jesus an bug-os nga pagkamasinugtanon ha Dios.

 HI Jesu-Kristo pirme nagbubuhat han kaburut-on han Dios. Waray gud hiya maghunahuna nga supakon an iya langitnon nga Amay. (Juan 4:34; Heb. 7:26) Kondi tungod han iya naeksperyensyahan dinhi ha tuna, diri masayon ha iya an pagsugot. Ha tinikangan pa la han iya ministeryo, an iya mga kaaway, upod na hi Satanas, nangalimbasog nga kombinsihon, piriton, o limbongan hiya basi diri magpabilin nga matinumanon. (Mat. 4:1-11; Luk. 20:20-25) Ginpaantos hi Jesus han iya mga kaaway hin duro nga kasakit ha mental, emosyonal, ngan pisikal, ngan ha kataposan ginpatay ha pasakitan nga kahoy. (Mat. 26:37, 38; Luk. 22:44; Juan 19:1, 17, 18) Bisan pa hito ngatanan, hi Jesus “nagmasinugtanon tubtob ha kamatayon.”—Fil. 2:8.

2, 3. Ano an aton hibabaroan ha pagkamasinugtanon ni Jesus bisan kon nag-antos hiya?

² An naeksperyensyahan ni Jesus dinhi ha tuna nagtutdo ha iya nga magin masinugtanon bisan ha magkuri nga kahimtang. (Heb. 5:8) Sugad hin waray na hiya sadang hibaroan pa ha pag-alagad kan Jehova, kay ha pagkamatuod, maiha hinduro nga duok nga nagkaupod hira ni Jehova ngan hiya an “labaw nga magburuhat” han Dios ha paglarang. (Prob. 8:30) Kondi, an iya  pagkamatinumanon sugad nga tawo bisan pa han pag-antos nagpamatuod han iya bug-os nga integridad. Hi Jesus, an Anak han Dios, nagin mas duok ha iya Amay. Ano an aton hibabaroan ha iya eksperyensya?

³ Bisan kon hingpit nga tawo hi Jesus, waray hiya sumarig ha iya kalugaringon basi bug-os nga magmasinugtanon. Nag-ampo hiya ha Dios para hin bulig. (Basaha an Hebreo 5:7.) Basi magpabilin nga masinugtanon, kinahanglan liwat kita magpaubos ngan pirme mag-ampo. Tungod hini, hi apostol Pablo nagsagdon ha mga Kristiano: “Karawta niyo ini nga paghunahuna nga iya man ni Kristo Jesus,” nga “nagpaubos hiya ha iya ngahaw, nga nagmasinugtanon tubtob ha kamatayon.” (Fil. 2:5-8) An ginbuhat ni Jesus nagpamatuod nga mahimo magmasinugtanon an tawo bisan kon aanhi hinin maraot nga kalibotan. Oo, hingpit hi Jesus, kondi kumusta man kita nga diri hingpit?

Masinugtanon Bisan Diri Hingpit

4. Ano an iginpapasabot han aton pagkaada hin kagawasan ha pagbuot?

⁴ Ginlarang han Dios hira Adan ngan Eva nga may abilidad ha paghunahuna ngan kagawasan ha pagbuot. Sugad nga ira katulinan, kita liwat may-ada hito nga kagawasan. Ano an iginpapasabot hito? Nangangahulogan ito nga makakadesisyon kita nga buhaton an maopay o maraot. Karuyag sidngon, ginhatagan kita han Dios hin kagawasan ha pagbuot kon masugot kita ha iya o diri. An paggamit hito nga kagawasan nag-uupod hin responsabilidad. Ha pagkamatuod, an aton mga desisyon magriresulta hin kinabuhi o kamatayon. Makakaapekto liwat ito ha mga duok ha aton.

5. Ano nga kakurian an naieksperyensyahan naton ngatanan, ngan paonan-o kita maglalampos?

⁵ Tungod han aton napanunod nga pagkadiri-hingpit, makuri an pagsugot. Diri pirme masayon an pagsunod ha mga balaud han Dios. Naeksperyensyahan ini ni Pablo. Hiya nagsurat: “Hinkit-an ko an lain nga balaud ha akon mga bahin han lawas, nga nakikipag-away kontra han balaud han akon hunahuna, ngan ginbibihag niya ako ngadto han balaud han sala nga aadi ha akon mga bahin han lawas.” (Roma 7:23) Syempre, mas masayon an pagsugot kon waray pagsakripisyo, pag-antos, o kakurian. Kondi ano an aton bubuhaton kon an “kairiphon han unod ngan an kairiphon han mga mata” nakontra ha aton hingyap nga magin masinugtanon? Ini nga mga kairiphon resulta han aton pagkadiri-hingpit sugad man han “espiritu han kalibotan,” ngan makusog gud an impluwensya hito ha aton. (1 Juan 2:16; 1 Kor. 2:12) Basi maatohan ito, kinahanglan naton iandam an aton kasingkasing antes umabot an kakurian o pagsulay ngan magin determinado ha pagsugot kan Jehova anoman an mahitabo. (Sal. 78:8) Damu an aton susbaranan ha Biblia nga naglampos tungod kay gin-andam nira an ira kasingkasing.—Esra 7:10; Dan. 1:8.

6, 7. Isaysay kon paonan-o an personal nga pag-aram makakabulig ha aton ha paghimo hin maaramon nga desisyon.

⁶ Usa nga paagi ha pag-andam han aton kasingkasing amo an maduruto nga pag-aram ha Biblia ngan ha mga publikasyon nga basado hito. Handurawa an imo kalugaringon hini nga kahimtang. Yana nga gab-i an imo eskedyol ha personal nga pag-aram. Pag-aampo mo pa la nga buligan ka han espiritu ni Jehova nga iaplikar an imo hibabaroan ha iya Pulong. May usa nga salida ha TV nga karuyag mo kitaon buwas nga gab-i. Siring han iba nga maopay ito, pero maaram ka liwat nga may-ada ito imoral ngan madarahog nga mga eksena.

⁷ Ginpapamalandong mo an sagdon ni Pablo ha Efeso 5:3: “An pakighilawas, ngan an ngatanan nga mahugaw, o kaaawaon, diri ngani unta kahingaranan ha butnga niyo, sugad nga angay ha mga baraan.” Nahinunumdoman mo liwat an iya sagdon ha Filipos 4:8. (Basaha.) Samtang imo ginpapamalandong iton giniyahan nga sagdon, ginpakianhan mo an imo kalugaringon, ‘Kon kikitaon ko ito nga salida, ginsusunod ko ba an susbaranan ni Jesus ha bug-os nga pagsugot ha Dios?’ Ano an imo bubuhaton? Magkikita ka pa ba hito nga salida?

8. Kay ano nga kinahanglan pirme naton sundon an mga prinsipyo ni Jehova?

⁸ Sayop gud kon paluyahon naton an aton  determinasyon nga sundon an mga prinsipyo ni Jehova, bangin naghuhunahuna nga marig-on na kita ngan makakaato ha impluwensya han maraot nga kaupod, upod na an madarahog ngan imoral nga kaliawan. Lugod, sadang naton panalipdan an aton kalugaringon ngan an aton mga anak ha nakakadaot nga impluwensya ni Satanas. An may mga kompyuter nangangalimbasog gud nga protektahan ito ha mga virus nga mahimo makapara han mga impormasyon ha sulod hito, makaruba hito, ngan maggamit pa ngani hito ha pagruba han iba nga kompyuter. Diri ba sadang liwat kita magin maikmat basi maprotektahan an aton kalugaringon ha “mga limbong” ni Satanas?—Efe. 6:11.

9. Kay ano nga kada adlaw sadang kita magin determinado ha pagsunod kan Jehova?

⁹ Haros kada adlaw, kinahanglan magdesisyon kita kon susundon naton hi Jehova o diri. Basi maluwas, kinahanglan sundon naton an Dios ngan magkinabuhi uyon ha iya magtadong nga prinsipyo. Pinaagi ha pagsubad han pagkamasinugtanon ni Kristo bisan “tubtob ha kamatayon,” maipapakita naton nga tinuod an aton pagtoo. Babalosan ni Jehova an aton pagkamatinumanon. Hi Jesus nagsaad: “An magpadayon tubtob ha kataposan, ini amo an maluluwas.” (Mat. 24:13) Matin-aw nga ginkikinahanglan hini an pagkaada husto nga kaisog pariho han iginpakita ni Jesus.—Sal. 31:24.

Hi Jesus an Gimaopayi nga Susbaranan ha Pagpakita hin Kaisog

10. Ano nga mga pagsari an bangin maeksperyensyahan naton, ngan ano an aton sadang buhaton?

¹⁰ Ginkikinahanglan naton an kaisog basi diri maimpluwensyahan han maraot nga kinaiya ngan paggawi nga kalyap hini nga kalibotan. Nakakaeksperyensya kita hin mga pagsari may kalabotan ha moralidad, pakig-upod ha iba, kwarta, ngan relihiyon nga mahimo makaaghat ha aton nga bumaya ha matadong nga dalan ni Jehova. Damu an ginkukontra han ira kapamilya. Ha iba nga nasud, padayon nga igintututdo ha eskwelahan an teoriya han ebolusyon, ngan nagtitikadamu an nasuporta ha ateyismo. Kon naieksperyensyahan naton ito, diri kita sadang magpakabuta-bungol ngan waray la hihimoon. Kinahanglan umato kita basi panalipdan an aton kalugaringon. Iginpapakita han susbaranan ni Jesus kon paonan-o kita maglalampos.

11. Paonan-o an pamalandong ha susbaranan ni Jesus makakabulig ha aton nga magin mas maisugon?

¹¹ Hi Jesus nagsiring ha iya mga disipulo: “Pagpapaantuson kamo han kalibotan; kondi pagmaisog kamo! Gindaog ko na an kalibotan.” (Juan 16:33, Maopay nga Sumat) Waray gud hiya magpaimpluwensya ha kalibotan. Waray gud niya ito tuguti nga makaulang ha iya pagsangyaw o makapaluya han iya determinasyon nga magpabilin ha tinuod nga pagsingba ngan husto nga paggawi. Kinahanglan sugad liwat kita hito. Ha pag-ampo, hi Jesus nagsiring mahitungod han iya mga disipulo: “Diri hira kanan kalibotan, sugad nga diri man ako kanan kalibotan.” (Juan 17:16) An pag-aram ngan pamalandong han susbaranan ni Kristo ha pagpakita hin kaisog makakaparig-on ha aton nga magpabilin nga bulag ha kalibotan.

 Mahibaro ha Pagpakita hin Kaisog Tikang ha Susbaranan ni Jesus

12-14. Pagsaysay hin mga hitabo diin nagpakita hi Jesus hin kaisog.

¹² Maisugon gud hi Jesus ha iya bug-os nga ministeryo. Waray kahadlok nga gin-gamit niya an iya awtoridad sugad nga Anak han Dios han hiya “sinulod ha templo han Dios, ngan gintabog niya ha gawas an ngatanan nga mga nanmamaligya ngan nanmamalit ha templo, ngan pinanmalintong an mga lamesa han mga magbaralyo han kwarta, ngan an mga lingkoran han mga magbaraligya han mga sarapati.” (Mat. 21:12) Han aarestuhon na hiya han mga sundalo ha gab-i antes hiya patayon, maisugon nga gin-atubang niya hira basi protektahan an iya mga disipulo, nasiring: “Kon iyo ako ginpipinamiling, tuguti ini hira hin pagkalakat.” (Juan 18:8) Waray pag-iha katapos hito, iya ginsidngan hi Pedro nga itakob an iya kampilan. Iginpapakita hito nga nasarig hiya kan Jehova, diri ha mga hinganiban.—Juan 18:11.

¹³ Waray kahadlok nga iginbuhayhag ni Jesus an diri-mahigugmaon ngan buwaon nga mga magturutdo ngan an ira sayop nga katutdoan. “Kairo niyo, mga salingkapaw nga mga eskriba ngan mga Pariseo! Kay iyo gintakpan an ginhadian han langit ha atubangan han mga tawo,” siring ni Jesus ha ira. “Iyo binayaan an mga butang nga durodagko han Kasugoanan, an katadongan, an kalooy, ngan an pagkamatinoohon. . . . Iyo ginlilinisan an gawas han irinman ngan han pinggan, kondi an mga sakob nira mga puno han panlugos ngan han kapangahasan.” (Mat. 23:13, 23, 25) Pagkikinahanglanon han mga disipulo ni Jesus an pariho nga kaisog tungod kay lulutuson liwat hira ngan an iba ha ira papatayon han mga lider han buwa nga relihiyon.—Mat. 23:34; 24:9.

¹⁴ Maisugon nga gin-atohan ni Jesus bisan an mga demonyo. Makausa, gintapo hiya hin tawo nga kontrolado hin demonyo. Makusog hinduro ito nga tawo salit diri hiya nagagapos hin kadena. Waray kahadlok nga ginpagowa ni Jesus an damu nga demonyo nga nagkukontrol ha iya. (Mar. 5:1-13) Yana, an Dios waray maghatag hin gahum ha mga Kristiano ha pagbuhat hin sugad hito nga milagro. Kondi, ha aton pagsangyaw ngan pagtutdo kinahanglan makig-away liwat kita kan Satanas nga nagbubuta han ‘hunahuna han diri magtinoohon.’ (2 Kor. 4:4) Pariho kan Jesus, an aton hinganiban “diri mga lawasnon, kondi nga mga gamhanan ha atubangan han Dios ha pagguba ha mga kuta”—an nakagamot na kondi sayop nga mga katutdoan. (2 Kor. 10:4) Damu an aton hibabaroan kan Jesus ha paggamit hinin espirituwal nga hinganiban.

15. Ha ano iginbasar an kaisog ni Jesus?

¹⁵ An kaisog ni Jesus iginbasar ha pagtoo, diri ha kapintas. Kinahanglan sugad liwat hito an aton kaisog. (Mar. 4:40) Paonan-o kita magkakaada tinuod nga pagtoo? An susbaranan ni Jesus maggigiya liwat ha aton. May-ada hiya hilarom nga pagsabot ha Kasuratan ngan bug-os nga pagsarig hito. Waray hiya gumamit hin literal nga kampilan, kondi an kampilan han espiritu, an Pulong han Dios. Pauroutro nga gin-gamit niya an Kasuratan sugad nga pamatuod ha iya igintututdo. Kasagaran nga an iya ginsisiring nagtitikang ha: “Nahisurat na,” karuyag sidngon, nahisurat ha Pulong han Dios. a

16. Paonan-o kita magkakaada mas marig-on nga pagtoo?

¹⁶ Basi magkaada pagtoo nga makakailob ha mga pagsari nga resulta han pagin disipulo ni Kristo, sadang kita magbasa ngan mag-aram han Biblia kada adlaw ngan tumambong ha  mga katirok, iginpapasilsil ha hunahuna an mga kamatuoran nga amo an pundasyon han pagtoo. (Roma 10:17) Kinahanglan liwat naton pamalandungon an aton hinbabaroan basi magpagios ito ha aton. An buhi la nga pagtoo an magpapagios ha aton nga magin maisugon. (Jak. 2:17) Ngan kinahanglan mag-ampo kita ha pangaro hin baraan nga espiritu tungod kay an pagtoo bahin han bunga hito.—Gal. 5:22.

17, 18. Paonan-o an usa nga batan-on nagpakita hin kaisog ha eskwelahan?

¹⁷ Naeksperyensyahan han batan-on nga hi Kitty nga an tinuod nga pagtoo nakabulig ha iya nga magmaisugon. Tikang ha kabata, maaram hiya nga diri niya sadang ‘ikaawod an maopay nga sumat’ ha eskwelahan, ngan karuyag gud niya nga magsangyaw ha iya mga kaklase. (Roma 1:16) Kada tuig, determinado hiya nga sangyawan an iba, kondi nag-aalang hiya tungod han kakulang hin kaisog. Paglabay hin pipira ka tuig, binalhin hiya hin eskwelahan. Hiya nagsiring, “Yana, mabawi ako han panahon nga waray ako makasangyaw.” Nag-ampo hiya nga magkaada hin kaisog nga pariho han kan Kristo, kaaram, ngan maopay nga higayon.

¹⁸ Ha siyahan nga adlaw han klase ginhangyo hira han ira maestro nga magpakilala. An iba nagsumat han ira relihiyon kondi nagsiring nga diri nira ginsusunod an ira gintotoohan. Nasantop ni Kitty nga ini na an baton ha iya pag-ampo. Han hiya na an magpapakilala, may-kompyansa nga nagsiring hiya: “Usa ako han mga Saksi ni Jehova, ngan an Biblia amo an akon giya ha pagsingba ngan paggawi.” Samtang nagyayakan hiya, nanyam-id an iba nga estudyante. Kondi an iba namati ngan katapos nagpakiana ha iya. Ginhimo pa ngani hiya nga susbaranan han ira maestro tungod han iya pagdepensa ha iya gintotoohan. Malipayon gud hi Kitty nga nahibaro hiya ha susbaranan ni Jesus ha pagpakita hin kaisog.

Ipakita an Pagtoo ngan Kaisog nga Pariho han kan Kristo

19. (a) Ano an nahiuupod ha pagkaada tinuod nga pagtoo? (b) Paonan-o naton mapapalipay hi Jehova?

¹⁹ Nasantop liwat han mga apostol nga an ira maisugon nga mga buhat kinahanglan igbasar ha pagtoo. Nakimalooy hira kan Jesus: “Dugangi an amon pagtoo.” (Basaha an Lukas 17:5, 6.) An pagkaada tinuod nga pagtoo labaw pa kay ha pagkarawat la nga may-ada Dios. Nagkikinahanglan ito hin pangalimbasog nga magin duok kan Jehova, pariho han pagin duok han gutiay nga bata ha iya buotan ngan mahigugmaon nga amay. Hi Salomon gin-giyahan ha pagsurat: “Anak ko kon an imo kasingkasing magmakinaadmananon, an akon kasingkasing magmamalipayon, bisan an akon. Oo, an akon kasingkasing marayhak, kon an imo mga im-im magyakan han mag-opay nga mga butang.” (Prob. 23:15, 16) Ha pariho nga paagi, an aton maisugon nga pagsunod ha magtadong nga prinsipyo nakakapalipay kan Jehova, ngan an paghibaro hito nabulig ha aton nga magin mas maisugon. Salit, pirme naton subaron hi Jesus ngan maisugon nga dumapig ha katadongan!

[Footnote]

Maisasaysay Mo Ba?

• Ano an makakabulig ha aton nga magpabilin nga masinugtanon bisan kon diri kita hingpit?

• Paonan-o kita magkakaada tinuod nga pagtoo, ngan paonan-o ito makakabulig ha aton nga magmaisugon?

• Ano an magigin resulta han aton pagkamasinugtanon ngan pagpakita hin kaisog nga pariho han kan Kristo?

[Mga Pakiana]

[Retrato ha pahina 13]

Gin-aandam mo ba an imo kasingkasing basi makaato ha pagsulay?

[Retrato ha pahina 15]

Pariho kan Jesus, maipapakita naton an kaisog nga iginbasar ha pagtoo