Relihiyon Hin-o an Mapili—Ako o an Akon mga Kag-anak?

HA Poland damu an nasiring ha mga Saksi ni Jehova, “An akon relihiyon nga ginmat-an amo na an akon pakakamatyan.” Ipinapakita hito nga ginhuhunahuna nira nga an relihiyon usa nga panurundon tikang ha mga kag-anak. Sugad ba liwat hito an panhunahuna han mga tawo ha iyo lugar? Ano an kasagaran nga resulta hito? An relihiyon nagigin pormalidad ngan tradisyon na la han pamilya. Posible ba ini mahitabo ha mga Saksi nga nahibaro han kamatuoran tikang ha ira mga kag-anak o kaapoyan?

Waray ito mahitabo kan Timoteo, nga ginbansay han iya mahadlukon ha Dios nga nanay ngan lola nga toohan ngan higugmaon an tinuod nga Dios. Maaram hiya han baraan nga mga sinurat ‘tikang ha kabata.’ Inabot an panahon nga nakombinse hiya, pati na an iya nanay ngan lola, nga an Kristianidad amo an kamatuoran. Naaghat hiya nga toohan an iya hinbaroan ha Kasuratan mahitungod kan Jesu-Kristo. (2 Tim. 1:5; 3:14, 15) Salit bisan kon ginbubuhat han Kristiano nga mga kag-anak an ira gimaopayi basi buligan an ira mga anak nga mag-alagad kan Jehova, an mga anak mismo an kinahanglan magkaada hingyap nga buhaton ito.—Mar. 8:34.

An kada usa kinahanglan makombinse pinaagi han maopay nga pangatadongan basi mapagios hiya nga mag-alagad kan Jehova tungod han gugma ngan magpabilin nga matinumanon anoman an mahitabo. Hito nga paagi magigin marig-on an iya pagtoo.—Efe. 3:17; Kol. 2:6, 7.

An Responsabilidad han mga Anak

“Maaram ako nga an mga Saksi ni Jehova an tinuod nga relihiyon,” siring ni Albert a nga nagdaku ha pamilya nga Saksi, “kondi nakurian ako pagkarawat han ira ginsisiring nga paagi han pagkinabuhi nga sadang ko sundon.” Kon usa ka nga batan-on, bangin ito liwat an imo inaabat. Pangalimbasugi nga hibaroan kon ano an nahiuupod ha paagi han pagkinabuhi nga karuyag han Dios ngan malipay ha pagbuhat han iya kaburut-on. (Sal. 40:8) “Nagtikang ako pag-ampo,” siring ni Albert. “Ha tinikangan nakurian ako. Kinahanglan piriton ko pa an akon kalugaringon. Kondi waray pag-iha, nahunahuna ko nga malilipay ha akon an Dios kon tatalinguhaon ko nga buhaton an husto. Tungod hito nagin determinado ako nga magbag-o.” Pinaagi ha pagkultibar hin duok nga relasyon kan Jehova, magkakaada ka hingyap nga buhaton an iya ginkikinahanglan ha aton.—Sal. 25:14; Jak. 4:8.

 Paghunahuna hin isport nga nasarihan mo na pag-uyag, sugad han basketbol. Kon diri ka maaram han mga patakaran o diri maopay mag-uyag, makahurubya gud ito. Pero kon maaram ka na ngan maopay na mag-uyag, maruruyagan mo gud ito ngan mamimiling ka pa ngani hin higayon nga makauyag, diri ba? Sugad liwat hito an Kristiano nga mga buruhaton. Salit pangalimbasog nga mag-andam para ha mga katirok ngan makigbahin hito. Bisan kon batan-on ka pa, mahimo madasig an iba han imo susbaranan!—Heb. 10:24, 25.

Pariho liwat hito an pagsumat ha iba han imo gintotoohan. Sadang buhaton ito tungod ha gugma, diri tungod kay napipiritan ka la. Pakianhi an imo kalugaringon: ‘Kay ano nga karuyag ko mag-istorya ha iba mahitungod kan Jehova? Kay ano nga sadang ko hiya higugmaon?’ Kinahanglan makilala mo hi Jehova sugad nga mahigugmaon nga Amay. Pinaagi kan Jeremias hiya nagsiring: “Kamo mangingita ha akon, ngan makakaagi ha akon, kon kamo mangita ha akon ha bug-os niyo nga kasingkasing.” (Jer. 29:13, 14) Ano an bangin pagkinahanglanon hini ha imo? “Kinahanglan bag-uhon ko an akon panhunahuna,” siring ni Jakub. “Tikang ha kabata natambong ako ha mga katirok ngan nagsasangyaw, kondi baga hin nagin rutina la ito. Nagin madasigon la ako ha pag-alagad han nakilala ko hin maopay hi Jehova ngan nagkaada duok nga relasyon ha iya.”

An maopay ngan makapadasig nga mga kaupod makakabulig gud ha imo nga magin mas malipayon ha ministeryo. “Lakat kaupod han mga tawo nga makinaadmananon, ngan ikaw makikinaadmananon,” siring han giniyahan nga proberbio. (Prob. 13:20) Salit pakigsangkay hadton nagtatalinguha ha pagkab-ot hin espirituwal nga mga tumong ngan malipayon nga nag-aalagad kan Jehova. Hi Jola nagsiring: “Nadasig ako han pakig-upod ha damu nga batan-on nga madasigon ha pag-alagad. Nagin regular ako ngan malipayon gud ha ministeryo.”

An Responsabilidad han mga Kag-anak

“Nagpapasalamat gud ako ha akon mga kag-anak nga ira ako gintutdoan mahitungod kan Jehova,” siring ni Jola. Oo, daku an impluwensya han mga kag-anak ha desisyon nga ginhihimo han ira mga anak. Hi apostol Pablo nagsurat: “Kamo mga amay, . . . aghata [an iyo mga anak] ha pagturon-an ngan paglaygay han Ginoo.” (Efe. 6:4) Inin giniyahan nga sagdon nagpapakita nga responsabilidad han mga kag-anak nga itutdo ha ira mga anak an mga prinsipyo ni Jehova, diri an ira. Imbes nga ipasilsil ha ira an iyo karuyag, mas maopay gud kon bubuligan niyo hira nga magin tumong an pagkinabuhi uyon ha mga katuyoan ni Jehova!

Mahimo niyo itutdo ha iyo mga anak an mga pulong ni Jehova ngan ‘maghimangraw mahitungod hini kon malingkod ha balay, malakat ha dalan, mahigda, ngan ha iyo pagbuhat.’ (Deut. 6:6, 7) Hira Ewa ngan Ryszard nga may-ada tulo nga anak nga lalaki nagsiring: “Agsob namon ig-istorya ha ira an iba-iba nga bahin han bug-os-panahon nga pag-alagad.” Ano an resulta? “Bata pa hira karuyag na nira magpalista ha Teokratiko nga Eskwelahan, nagin magwarali, ngan nagdesisyon  nga magpabawtismo. Ha urhi, nag-alagad hira hin bug-os-panahon.”

Importante gud an susbaranan han mga kag-anak. Hi Ryszard nagsiring, “Determinado kami nga diri magkinabuhi hin doble—iba an paggawi ha balay ngan iba liwat ha kongregasyon.” Salit pakianhi an imo kalugaringon: ‘Ano an nakikita han akon mga anak ha akon pagkinabuhi? Nakikita ba nira nga hinigugma ko gud hi Jehova? Naoobserbahan ba nira ito ha akon mga pag-ampo ngan regular nga personal nga pag-aram? Nakikita ba nira ito ha akon pagtagad ha pagsangyaw, kaliawan, ngan materyal nga mga butang, ngan ha akon ginsisiring mahitungod ha amon mga kakongregasyon?’ (Luk. 6:40) Makikita han iyo mga anak an iyo ginbubuhat kada adlaw ngan maoobserbahan nira kon iba an iyo ginsisiring ha iyo ginbubuhat.

Importante gud an disiplina ha pagpadaku han mga anak. Kondi, an Pulong han Dios nagsasagda ha aton nga ‘pahiaraon an bata ha dalan nga iya paglalaktan.’ (Prob. 22:6) Hira Ewa ngan Ryszard nagsiring, “Gindudumarahan namon hin pag-aram ha Biblia an kada usa ha ira.” Syempre, an mga kag-anak an magdidesisyon kon kinahanglan iba an eskedyol han pag-aram han tagsa nga anak. Anoman an kahimtang, sadang hira trataron sugad nga indibiduwal. Nagkikinahanglan ini hin pagpauyon-uyon ngan pagin makatadunganon. Pananglitan, imbes nga sumatan la hira nga maraot an iba nga musika, kay ano nga diri ipakita ha ira kon paonan-o magdidesisyon hin maaramon ngan paonan-o nahidadabi an mga prinsipyo ha Biblia?

Posible nga maaram an iyo mga anak kon ano gud an iyo ginlalaoman ha ira ngan bangin ito an ira ginbubuhat. Kondi, kinahanglan matugkad niyo an ira kasingkasing. Hinumdumi nga “an sagdon ha kasingkasing han tawo pariho hin hilarom nga tubig; kondi an tawo nga may sarabotan makakahukad hini.” (Prob. 20:5) Magin masinabuton ngan alerto ha bisan ano nga tigaman nga nagpapakita nga may-ada problema an iyo mga anak, ngan gios dayon. Ipakita nga nababaraka kamo pero ayaw pagbutang-butang. Pagbangon hin angayan nga mga pakiana, kondi likayi an damu hinduro nga pakiana. An iyo sinsero nga pagtagad makakatugkad han ira kasingkasing, ngan mabubuligan niyo hira.

 An Responsabilidad han Kongregasyon

Sugad nga alagad han Dios, mabubuligan mo ba an mga batan-on ha kongregasyon nga apresyaron an ira espirituwal nga panurundon? Bisan kon responsabilidad han mga kag-anak an pagbansay ha ira mga anak, mahimo hira buligan han iba nga membro han kongregasyon, labi na han mga tigurang. Ginkikinahanglan ito labi na ha mga pamilya nga diri Saksi an usa nga kag-anak.

Ano an mahihimo han mga tigurang basi buligan an mga batan-on nga higugmaon hi Jehova ngan umabat nga ginpapabilhan ngan gin-aapresyar hira? Hi Mariusz, usa nga paramangno han kongregasyon ha Poland, nagsiring: “An mga tigurang sadang makiistorya, makiistorya, makiistorya ha mga batan-on, diri la ha panahon nga may problema kondi ha iba liwat nga higayon—ha ministeryo, katapos han mga katirok, o ha iba nga kahimtang.” Mahimo mo ba ipakiana kon ano an ira inaabat mahitungod han kongregasyon? An sugad nga pakiistorya nakakabulig ha mga batan-on nga magin duok ha kongregasyon ngan umabat nga bahin hira hito.

Kon usa ka nga tigurang, nangangalimbasog ka ba nga makilala an mga batan-on ha iyo kongregasyon? Bisan kon hi Albert nga gin-unabi kanina usa na nga tigurang, han tinedyer hiya nakaeksperyensya hiya hin mga pagsari. Hiya nagsiring, “Sugad nga tinedyer, ginkinahanglan ko an pagbisita han mga tigurang.” Maipapakita liwat han mga tigurang an ira interes ha mga batan-on pinaagi ha pag-ampo para ha ira espirituwal nga kaopayan.—2 Tim. 1:3.

Maopay gud nga makigbahin an mga batan-on ha mga buruhaton han kongregasyon, kay kon diri, bangin maisentro an ira atensyon ha kalibotanon nga mga tumong. Mga kabugtoan nga edaran na, puydi ba niyo hira ig-upod ha ministeryo ngan makisangkay ha ira? Pakig-upod ha ira ha pagpahalibway basi sumarig ngan makisangkay hira ha iyo. Hi Jola nagsiring: “Usa nga payunir nga babaye an nagpakita hin personal nga interes ha akon. Hiya an akon kaupod han siyahan ko nga pagsangyaw nga diri na ako nag-aalang.”

Ikaw an Magdidesisyon

Mga batan-on, pakianhi an iyo kalugaringon: ‘Ano an akon mga tumong? Kon diri pa ako bawtismado, tumong ko ba nga magpabawtismo?’ Hilarom nga gugma kan Jehova an sadang magpagios ha imo nga magpabawtismo, diri an pagsunod ha nahiaraan na han pamilya.

Oo, hinaot magin tinuod mo nga Sangkay hi Jehova, ngan magin bahandi mo an kamatuoran. Pinaagi kan propeta Isaias, hi Jehova nagsiring: “Ayaw kahulop, kay ako an imo Dios.” Diri ka papabay-an ni Jehova kon magpapabilin ka nga iya sangkay. Paririg-unon ka niya ngan “aagang-agangon [“kakaptan,” NW] pinaagi han too nga kamot han [iya] pagkamatadong.”—Isa. 41:10.

[Footnote]

[Retrato ha pahina 4]

Pangalimbasugi nga masabtan kon ano an aada ha kasingkasing han iyo anak

[Retrato ha pahina 6]

Hilarom nga gugma kan Jehova an sadang magpagios ha imo nga magpabawtismo