Subara an Panhunahuna ni Kristo

“Karawta niyo ini nga paghunahuna nga iya man ni Kristo Jesus.”—FIL. 2:5.

1. Kay ano nga sadang kita mangalimbasog nga subaron an panhunahuna ni Kristo?

 “KADI ngatanan kamo ha akon,” siring ni Jesu-Kristo. “Magtuon kamo ha akon, kay ako maaghop ngan mapainubsanon ha kasingkasing, ngan kamo makakaagi hin pagpahuway ha iyo mga kalag.” (Mat. 11:28, 29) Ini nga imbitasyon ni Jesus nagpapakita han iya mahigugmaon nga panhunahuna. Waray tawo nga makakapariho han iya maopay nga susbaranan. Bisan kon hi Jesus an gamhanan nga Anak han Dios, nagpakita hiya hin pagpaid ngan pagkamalumo labi na ha mga nag-aantos.

2. Ano nga mga kalidad ni Jesus an aton hihisgotan?

² Hini nga artikulo ngan ha duha pa nga masunod, hihisgotan naton kon paonan-o makukultibar ngan matitipigan an panhunahuna nga pariho han kan Jesus ngan masusubad an “hunahuna ni Kristo.” (1 Kor. 2:16) Pag-aadman naton an lima nga nangunguna nga kalidad ni Jesus: an iya pagin malumo ngan mapainubsanon, buotan, masinugtanon ha Dios, maisugon, ngan an iya diri napapakyas nga gugma.

Mahibaro ha Pagkamalumo ni Kristo

3. (a) Ano nga leksyon ha pagkamapainubsanon an igintutdo ni Jesus ha iya mga disipulo? (b) Ano an reaksyon ni Jesus ha kaluyahan nga iginpakita han iya mga disipulo?

³ Hi Jesus, an hingpit nga Anak han Dios, kinaburut-on nga kinanhi ha tuna basi mag-alagad upod han diri-hingpit ngan makasasala nga mga tawo. Ha urhi papatayon hiya han iba ha ira. Bisan pa hito, nagpabilin hiya nga malipayon ngan may pagpugong ha kalugaringon. (1 Ped. 2:21-23) An pagkita hin maopay ha susbaranan ni Jesus makakabulig ha aton nga matipigan an kalipay ngan pagpugong ha kalugaringon kon naaapektohan kita han mga kasaypanan ngan kaluyahan han iba. (Heb. 12:2) Gin-aghat ni Jesus an iya mga disipulo nga ‘pas-anon an iya yugo’ ngan mahibaro ha iya. (Mat. 11:29) Ano an ira hibabaroan? Usa hito amo an iya pagkamalumo ngan pagkamapailubon ha iya mga disipulo bisan kon nagsasayop hira. Ha gab-i antes hiya mamatay, iya hira ginhimsawan. Nagtutdo ito ha ira hin diri hingangalimtan nga leksyon ha pagin “mapainubsanon ha kasingkasing.” (Basaha an Juan 13:14-17.) Ha urhi, han hira Pedro, Jakobo, ngan Juan waray makapadayon ha ‘pag-agma,’ may pagpaid nga gin-intindi ni Jesus an ira kaluyahan. “Simon, nakaturog ka ba?” nagpakiana hiya. “Pag-agma, ngan pag-ampo, basi kamo diri mahisulod ha panulay. Matuod, an espiritu andam, kondi an unod maluya.”—Mar. 14:32-38.

4, 5. Paonan-o kita mabubuligan han susbaranan ni Jesus nga magkaada husto nga pagtagad ha kaluyahan han iba?

⁴ Ano an aton reaksyon kon an usa nga bugto mahilig makigkompetensya, madulo, o diri nasunod dayon ha sagdon han mga tigurang o han “matinumanon ngan maaramon nga uripon”? (Mat. 24:45-47, NW) Bangin madali kita makaintindi ngan magpasaylo ha kaluyahan han diri igkasi-tumuroo, kondi bangin nakukurian kita ha pagbuhat hito ha aton kabugtoan. Kon naaaringit kita dayon ha mga kaluyahan han iba, kinahanglan pakianhan naton an aton kalugaringon, ‘Paonan-o ko masusubad hin mas maopay an “hunahuna ni Kristo”?’ Hinumdumi nga waray masina hi Jesus ha iya mga disipulo bisan pa han ira mga kaluyahan.

⁵ Tagda an nahitabo kan apostol Pedro. Han ginsidngan hiya ni Jesus nga humaw-as ha  sakayan ngan maglakat ha bawbaw han tubig tipakadto ha Iya, nahimo niya ito hin madaliay. Kondi han nakita ni Pedro nga makusog an hangin, nagtikang hiya pag-unlod. Nasina ba hi Jesus ngan nagsiring ha iya: “Angay la ito ha imo! Magmamaan ka na yana”? Waray! “Ha kadagmitan inunat ni Jesus an iya kamot, ngan kaptan hiya, ngan siniring ha iya: Tawo nga gutiay an pagtoo, kay ano an imo pagruhaduha?” (Mat. 14:28-31) Kon may bugto nga baga hin maluya an pagtoo, iuunat ba naton an aton kamot, siring pa, ngan bubuligan hiya nga magin marig-on an pagtoo? Ito an usa nga leksyon nga hibabaroan ha iginpakita ni Jesus nga pagkamalumo kan Pedro.

6. Ano an igintutdo ni Jesus ha iya mga apostol mahitungod ha paghingyap nga magin labaw?

⁶ Nahidabi liwat hi Pedro ha padayon nga paglantugi han mga apostol kon hin-o an gilalabawi ha ira. Karuyag nira Jakobo ngan Juan nga lumingkod ha too ngan ha wala ni Jesus ha iya Ginhadian. Han hinbaroan ito ni Pedro ngan han iba nga apostol, nasina hira. Maaram hi Jesus nga posible nga nasubad nira ito nga disposisyon ha komunidad diin hira nag-ukoy. Gintawag niya hira ngan nagsiring: “Maaram kamo nga an mga magburuot han mga Hentil, nagpapakaagaron ha bawbaw nira, ngan han kadagkuan, may gahum ha bawbaw nira. Kondi diri angay ha iyo ini; kondi bisan hin-o an karuyag magin daku ha iyo amo lugod an paramangno ha iyo.” Katapos, iginsaysay ni Jesus an iya susbaranan: “Sugad gud an Anak han Tawo waray kumanhi basi pag-aalagdon kondi ha pagmangno, ngan paghatag han iya kinabuhi nga lukat han kadam-an.”—Mat. 20:20-28.

7. Paonan-o makakabulig an kada usa ha aton ha pagkaurosa han kongregasyon?

⁷ An pamalandong ha mapainubsanon nga panhunahuna ni Jesus makakabulig ha aton nga gumios sugad nga “guroguti” kay ha aton kabugtoan. (Luk. 9:46-48) Nagriresulta ito hin pagkaurosa. Pariho hin amay han daku nga pamilya, karuyag ni Jehova nga an iya mga anak ‘magkatarampo ha pag-urosa.’ (Sal. 133:1) Nag-ampo hi Jesus ha iya Amay nga magkaurosa an ngatanan nga tinuod nga Kristiano basi “an kalibotan mahibaro, nga ikaw an nagpakanhi ha akon, ngan mahigugma ka ha ira, sugad gud han imo paghigugma ha akon.” (Juan 17:23) Salit an aton pagkaurosa nagpapakilala nga mga sumurunod kita ni Kristo. Basi magkaurosa, sadang naton subaron an pagtagad ni Kristo ha kaluyahan han iba. Mapinasayloon hiya ngan nagtutdo nga papasayloon la kita kon magpasaylo kita ha iba.—Basaha an Mateo 6:14, 15.

8. Ano an aton hibabaroan ha susbaranan han mag-iha na nga surugoon han Dios?

⁸ Damu liwat an aton hibabaroan kon aton susubaron an pagtoo hadton maiha na nga nagsusubad kan Kristo. Pariho kan Jesus, kasagaran nga gin-iintindi nira an kaluyahan han iba. Hinbaroan nira nga an pagpakita hin pagpaid sugad han ginbuhat ni Jesus nabulig ha aton ha ‘pagdara han mga kaluyahan han mga magluya’ ngan nagriresulta hin pagkaurosa. Dugang pa, nakakadasig ito ha bug-os nga kongregasyon nga magsubad han panhunahuna ni Kristo. Karuyag nira nga buhaton han ira kabugtoan an karuyag ni Pablo nga buhaton han mga Kristiano ha Roma: “An Dios han pagpailob ngan paglipay magtugot unta ha iyo hin pagkaurosa hin hunahuna uyon kan Kristo Jesus. Basi ha pagkaurosa, paghimayaon niyo ha usa nga baba an Dios ngan Amay han aton Ginoo Jesu-Kristo.”  (Roma 15:1, 5, 6) Oo, an aton urosa nga pagsingba nagdadayaw kan Jehova.

9. Kay ano nga kinahanglan naton an baraan nga espiritu basi masubad hi Jesus?

⁹ Iginkaw-ing ni Jesus an pagin “mapainubsanon ha kasingkasing” ha pagkamalumo, nga bahin han bunga han baraan nga espiritu han Dios. Kon sugad, dugang pa ha pag-aram han susbaranan ni Jesus, kinahanglan naton an baraan nga espiritu ni Jehova basi masubad naton hin maopay ito nga susbaranan. Sadang naton pangaroon ha pag-ampo an espiritu han Dios ngan pangalimbasogan nga kultibaron an bunga hito—an “gugma, kalipay, kamurayawan, hilawig nga pagpailob, pagkabuotan, pagkamaopay, pagtoo, pagkamalumo, pagpugong ha kalugaringon.” (Gal. 5:22, 23, NW) Pinaagi ha pagsubad han pagkamapainubsanon ngan pagkamalumo ni Jesus, mapapalipay naton an aton langitnon nga Amay, hi Jehova.

Hi Jesus Buotan ha Iba

10. Paonan-o iginpakita ni Jesus an pagkabuotan?

¹⁰ Bahin liwat han bunga han baraan nga espiritu an pagkabuotan. Hi Jesus pirme buotan ha iba. Iya “gintapo [“ha buotan nga paagi,” NW]” an ngatanan nga namiling ha iya. (Luk. 9:11) Ano an aton hibabaroan hini? An buotan nga tawo makisangkayon, malumo, mapinairon, ngan matinagaron. Sugad hito hi Jesus. Nalooy hiya ha mga tawo tungod kay hira “nanluluya ngan nagpapatlaag, sugad hin mga karnero nga waray magbarantay.”—Mat. 9:35, 36.

11, 12. (a) Pagsaysay hin kahimtang diin nagpakita hi Jesus hin pagpaid. (b) Ano an imo hibabaroan hini nga ehemplo?

¹¹ Diri la kay nalolooy ngan napaid hi Jesus ha mga tawo kondi ginbubuhat liwat niya an iya mahihimo ha pagbulig ha ira. Tagda ini nga kahimtang. Usa nga babaye an 12 ka tuig na nga gindidinugoan. Maaram hiya nga ha Mosaiko nga Balaud gintatagad nga mahugaw an iya kahimtang, ngan magigin mahugaw liwat an bisan hin-o nga makapot ha iya. (Leb. 15:25-27) Bisan pa hito, kombinsido hiya nga hi Jesus may-ada gahum ngan hingyap ha pagtambal ha iya tungod han reputasyon ngan pagtagad ni Jesus ha mga tawo. Naghunahuna hiya: “Kon akon la makamkam an iya mga panapton, maluluwas ako.” Maisugon nga ginbuhat niya ito ngan inabat dayon nga nag-opay hiya.

¹² Nakasabot hi Jesus nga may-ada nagkapot ha iya, ngan liningi hiya kon hin-o ito. Nahadlok an babaye nga bangin isgan hiya tungod kay gintalapas niya an Balaud. Nangungurog hiya nga linuhod ha atubangan ni Jesus ngan iginsumat an ngatanan nga nahitabo. Gin-isgan ba ni Jesus inin makalolooy ngan nag-aantos nga babaye? Waray gud! Lugod, iya ginpasarig hiya: “Anak an imo pagtoo nagluwas ha imo; lakat ka ha kamurayawan.” (Mar. 5:25-34) Sigurado nga naliaw gud an babaye hito nga mga pulong!

13. (a) Kay ano nga naiiba hi Jesus ha mga Pariseo? (b) Paonan-o gintagad ni Jesus an kabataan?

¹³ Diri sugad han mga Pariseo nga matig-a an kasingkasing, waray gud gamita ni Jesus an iya awtoridad basi dugangan an pinas-an han iba. (Mat. 23:4) Lugod, may pagkabuotan ngan pagpailob nga igintutdo niya an mga prinsipyo ni Jehova. Hi Jesus mahigugmaon, buotan, ngan maunungon nga sangkay ha iya mga sumurunod. (Prob. 17:17; Juan 15:11-15) Bisan an kabataan komportable ha iya, ngan sugad man liwat hiya ha ira. Sagipo hiya kondi naggahin hin panahon basi makaupod an kabataan. Makausa, an iya mga disipulo nga nagpapaimportante pa gihapon han ira kalugaringon sugad han mga lider han relihiyon, nagpugong ha mga tawo nga dad-on an ira mga anak kan Jesus basi makaupod niya. Waray malipay hi Jesus ha iya mga  disipulo. Hiya nagsiring: “Tuguti an mga kabataan pagkadi ha akon, ngan ayaw hira pagdid-i, kay an ginhadian han Dios ira han mga sugad ha ira.” Katapos, ginhimo niya nga ehemplo an kabataan basi tutdoan hira hin importante nga leksyon. Hiya nagsiring: “Matuod, ako nasiring ha iyo, nga bisan hin-o an diri kumarawat han ginhadian han Dios sugad han usa nga bata, diri gud makakasulod didto.”—Mar. 10:13-15.

14. Ano an mga kapulsanan ha kabataan kon iginpapakita ha ira an sinsero nga interes?

¹⁴ Hunahunaa an gin-abat hito nga kabataan han dagku na hira ngan ira nahinumdoman nga hi Jesu-Kristo ‘nagkugos ngan nagbendisyon ha ira.’ (Mar. 10:16) Sugad man, an kabataan yana nga ginpapakitaan hin sinsero nga interes han mga tigurang ngan han iba pa malilipay paghinumdom ha ira pagdaku nira. Labaw pa gud hito, bata pa hira hinbabaroan na nira nga an espiritu ni Jehova aada ha iya katawohan.

Magpakita hin Pagkabuotan ha Maraot nga Kalibotan

15. Kay ano nga diri kita sadang mahipausa nga damu yana an diri buotan?

¹⁵ Yana, damu an naabat nga waray hira panahon ha pagpakita hin pagkabuotan. Salit kada adlaw nakakaupod han katawohan ni Jehova an mga tawo nga nagpapakita han espiritu han kalibotan—ha eskwelahan, ha trabaho, samtang nagbibiyahe, ngan ha ministeryo. Bangin makapasubo ito ha aton, kondi diri kita sadang mahipausa. Pinaagi kan Pablo, hi Jehova nagpahamangno ha aton nga hinin makalilisang nga “kataposan nga mga adlaw,” an tinuod nga mga Kristiano magkikinabuhi kaupod hadton ‘mahigugmaon ha ira kalugaringon ngan waray gugma nga kinaiya.’—2 Tim. 3:1-3.

16. Paonan-o naton maipapakita ha kongregasyon an pagkabuotan nga pariho han iginpakita ni Kristo?

¹⁶ Ha luyo nga bahin, ha kongregasyon han tinuod nga mga Kristiano makikita an pagkabuotan nga waray gud ha kalibotan. Pinaagi ha pagsubad kan Jesus, an kada usa ha aton makakabulig basi matipigan iton maopay nga kahimtang. Paonan-o? Damu ha kongregasyon an nanginginahanglan han aton bulig ngan pagdasig tungod han sakit o iba pa nga makuri nga kahimtang. Hinin “kataposan nga mga adlaw,” bangin magtikaduro ito nga mga problema, kondi diri ito bag-o. Ha panahon han Biblia, an mga Kristiano nag-antos hin pariho nga mga problema. Salit, ginkikinahanglan an bulig yana sugad la nga ginkinahanglan ito han mga Kristiano hadto. Pananglitan, hi Pablo nagsagdon ha mga Kristiano nga ‘rig-unon an mga maluya ha kasingkasing, buligan an magluya, magmainilubon ha ngatanan.’ (1 Tes. 5:14) Nag-uupod ini hin pagpakita han pagkabuotan nga pariho han iginpakita ni Kristo.

17, 18. Ano an pipira nga paagi nga masusubad naton an pagkabuotan ni Jesus?

¹⁷ Responsabilidad han mga Kristiano nga ‘karawaton’ ha buotan nga paagi an ira kabugtoan ngan trataron hira sugad han magigin pagtratar ni Jesus, iginpapakita an tinuod nga pagtagad ngada hadton maiha na naton nga kilala ngan hadton yana pa la naton iginkita. (3 Juan 5-8) Sugad la nga hi Jesus nag-una ha pagpakita  hin pagpaid, sadang liwat naton buhaton ito ngan pirme magin buotan ha iba.—Isa. 32:2; Mat. 11:28-30.

¹⁸ Maipapakita han kada usa ha aton an pagkabuotan kon interesado gud kita ha kaopayan han iba. Pamiling hin mga paagi ngan higayon ha pagbulig, ngan pangalimbasog ha pagbuhat hito. Hi Pablo nagsagdon: “Pagsighigugmaay gud kamo hin minagburugto an usa kag usa.” Hiya dugang nga nagsiring: “Palabihon niyo an usa kag usa ha kadungganan.” (Roma 12:10) Nangangahulogan ito hin pagsubad kan Kristo pinaagi ha pagin mahigugmaon ngan buotan, ngan paghibaro ha pagpakita hin “totoo nga gugma.” (2 Kor. 6:6) Iginsaysay ito ni Pablo han hiya magsiring: “An gugma nag-aantos hin maiha, ngan malolooyon [“buotan,” NW]; an gugma waray kaawa, waray pagpadaku ha iya ngahaw, waray pagpadayaw.” (1 Kor. 13:4) Imbes nga magdumot ha kabugtoan, hinaot sundon naton ini nga sagdon: “Magmalolooyon kamo an usa kag usa, magmahumok an iyo kasingkasing, magpinasayloay kamo an usa kag usa, sugad nga ginpasaylo man kamo han Dios pinaagi kan Kristo.”—Efe. 4:32.

19. Ano an mag-opay nga resulta han pagsubad ha pagkabuotan ni Kristo?

¹⁹ An aton pangalimbasog ha pagkultibar ngan pagpakita han pagkabuotan nga pariho han kan Kristo ha ngatanan nga panahon magriresulta hin hura nga balos. An espiritu ni Jehova magios hin maopay ha kongregasyon ngan mabulig ha ngatanan nga ipakita an bunga han espiritu. Dugang pa, kon ginsusubad naton hi Jesus ngan ginbubuligan an iba ha pagbuhat hito, an aton malipayon ngan urosa nga pagsingba makakapalipay ha Dios. Salit, mangalimbasog kita pirme nga subaron an pagkamalumo ngan pagkabuotan ni Jesus ha aton pagtratar ha iba.

Maisasaysay Mo Ba?

• Paonan-o iginpakita ni Jesus nga hiya “maaghop ngan mapainubsanon an kasingkasing”?

• Paonan-o iginpakita ni Jesus an pagkabuotan?

• Dinhi hinin diri-hingpit nga kalibotan, ano an pipira nga paagi nga maipapakita naton an pagkamalumo ngan pagkabuotan nga pariho han kan Kristo?

[Mga Pakiana]

[Retrato ha pahina 8]

Kon magluya an pagtoo han aton bugto sugad han nahitabo kan Pedro, iuunat ba naton an aton kamot ha pagbulig ha iya?

[Retrato ha pahina 10]

Ano an imo maibubulig basi makita an pagkabuotan ha kongregasyon?