Kon Paonan-o Nabag-o han Tulo nga Kombensyon an Akon Kinabuhi

Iginsumat ni George Warienchuck

MAY nabatian ka na ba ha aton mga kombensyon nga nakaaghat gud ha imo nga maghimo hin dagku nga pagbag-o ha imo kinabuhi? Nahitabo ito ha akon. Kon ginhuhunahuna ko an naglabay, nahinunumdoman ko nga tulo nga kombensyon an nakabulig gud ha akon nga bag-uhon an akon pagkinabuhi. An usa nakabulig ha akon nga diri na magin duro kaawdanon; an ikaduha nakabulig ha akon nga magin kontento; an ikatulo nakaaghat ha akon nga pauswagon an akon ministeryo. Kondi antes ko ito isumat, karuyag ko anay ig-istorya an mga nahitabo pipira ka tuig antes hito nga mga kombensyon, han bata pa ako.

Natawo ako han 1928; ako an putó ha tulo nga magburugto. Kami han akon mga magurang nga hira Margie ngan Olga nagdaku ha South Bound Brook, New Jersey, E.U.A., usa nga bungto nga may-ada 2,000 nga umurukoy hito nga panahon. Bisan kon pobre kami, mahinatagon hi Nanay. May kwarta ngani hiya, nagluluto hiya hin marasa nga pagkaon ngan gintatagan an amon mga amyaw. Han noybe anyos ako, ginbisita hi Nanay hin Saksi nga nagyayakan han pinulongan han Hungary, nga amo liwat an pinulongan ni Nanay. Nakaaghat ito ha iya nga mamati ha mensahe han Biblia. Ha urhi, hi Bertha, usa nga bugto nga sobra 20 anyos, an nagpadayon ha pagdumara hin pag-aram ha Biblia kan Nanay ngan binulig ha iya nga magin alagad ni Jehova.

Awdanon ako ngan kulang hin pagsarig ha kalugaringon, diri pariho kan Nanay. Nadugangan pa gud ito kay pirme niya ako ginmiminos. Han nagtatangis nga nagpakiana ako, “Kay ano nga pirme mo ako ginmiminos?” nagsiring hiya nga hinigugma niya ako pero diri niya karuyag nga umabusar ako. Maopay an iya tumong, pero tungod kay diri naaapresyar an akon ginbubuhat, nawarayan ako pagsarig ha kalugaringon.

Usa ka adlaw, an amon amyaw nga buotan ha akon naghangyo nga updan an iya mga anak ha Sunday school ha ira singbahan. Maaram ako nga diri malilipay hi Jehova, pero nahadlok ako nga mahiubos an amon amyaw. Salit ha sulod hin pipira ka bulan, naupod ako pagsingba bisan kon nakukonsensya ako. Ha eskwelahan, an kahadlok ha tawo nagin hinungdan liwat nga diri ko sundon an akon konsensya. Maisog an amon prinsipal, ngan gintugon gud niya an mga magturutdo nga pasaluduhon ha bandera an ngatanan nga estudyante. Salit sinaludo liwat ako. Ginbuhat ko ini hin mga usa ka tuig, katapos nagkaada pagbag-o.

Nahibaro Ako nga Magin Maisugon

Han 1939 usa nga grupo han pag-aram ha libro an nagtikang pagkatirok ha amon balay. Hi Ben Mieszkalski, usa nga batan-on nga payunir, an nagdumara hito. Gintawag namon hiya nga Big Ben. Naangay la ito ha iya, kay ha akon pagkita pariho hiya kadaku ngan kahitaas han amon purtahan. Kondi bisan kon maisog hiya pagkit-on tungod han iya kadaku, buotan hiya ngan mahiyom-hiyom, ngan tungod hito nagin komportable dayon ako. Salit han ginpaupod niya ako ha pagsangyaw, malipayon nga inupod ako. Nagin  magsangkay kami. Kon nasusubo ako, ginkakaistorya niya ako sugad han pakiistorya hin magurang ha iya manghod. Gin-apresyar ko gud ito, ngan nagin duok ako ha iya.

Han 1941, gin-imbitar ni Ben an amon pamilya nga sumakay ha iya awto tipakadto ha St. Louis, Missouri basi tumambong hin kombensyon. Malipayon ako hinduro! Waray pa ako makabyahe hin sobra 80 ka kilometro tikang ha balay, pero yana tikadto ako ha usa nga lugar nga sobra 1,500 ka kilometro an kahirayo! Kondi, nagkaproblema ha St. Louis. An mga klero nagtugon ha ira mga nasasakopan nga diri paukyon an mga Saksi ha ira balay. Damu an sinugot hito. An pamilya nga amon uukyan gintarhog liwat, pero ginkarawat la gihapon nira kami. Siring nira nga tutumanon nira an ira saad nga tagan kami hin akomodasyon. Nadasig ako han ira kaisog.

Nabawtismohan an akon kabugtoan hito nga kombensyon. Hito liwat nga adlaw, nagpahayag hi Bugto Rutherford nga tikang ha Brooklyn Bethel. Ha iya mapwersa nga diskurso, iya ginpatukdaw an ngatanan nga kabataan nga karuyag magbuhat han kaburut-on han Dios. Mga 15,000 an nanukdaw, pati na ako. Katapos, ginhangyo niya adton naruruyag magbuhat han ira gimaopayi ha pagsangyaw nga sumiring, “Oo.” Upod han iba nga kabataan, sininggit ako hin “Oo!” Namakpak an ngatanan nga tinambong. Nadasig gud ako.

Katapos han kombensyon, may ginbisita kami nga bugto ha West Virginia. Iginsumat niya nga makausa han nagsasangyaw hiya, ginkastigo hiya hin nasisina nga grupo, ginbuboan hin alkitran ngan ginpaduktan hin mga barahibo. Ginkukulba ako samtang namamati ha iya. “Kondi magpapadayon ako pagsangyaw,” siring niya. Pagbaya namon, inabat ako nga baga na ako hi David. Andam na ako umatubang kan Goliat—an amon prinsipal.

Pagbalik ko ha eskwelahan, ginkaistorya ko an prinsipal. Nasisina nga ginkinita niya ako. Hilom nga nag-ampo ako kan Jehova. Katapos tigda nga nagsiring ako: “Sir, tinambong ako hin kombensyon. Tikang yana, diri na ako masaludo ha bandera!” Nagmingaw hin maiha. Katapos, hinay-hinay nga binuhát an prinsipal ngan dinaop ha akon. Namumula an iya nawong tungod han kasina. Ginuliat hiya: “Diri ka ngani sumaludo, diri ka na puydi umiskwela!” Waray na ako magkompromiso, ngan inabat ko an kalipay nga waray ko pa gud abata hadto.

Naiikag na gud ako pagsumat kan Ben han nahitabo. Han nakita ko hiya ha Kingdom Hall, siniring dayon ako: “Diri na ako ginkakarawat ha eskwelahan! Waray ako sumaludo ha bandera!” Gin-agbayan ako ni Ben, hiniyom hiya, ngan siniring: “Sigurado nga hinigugma ka ni Jehova.” (Deut. 31:6) Naparig-on gud ako han iya ginsiring! Han Hunyo 15, 1942, nabawtismohan ako.

Nahibaro Ako nga Magin Kontento

Katapos han Girra ha Kalibotan II, tigda nga nag-uswag an ekonomiya ha amon nasud, ngan damu an nagin materyalistiko. Maopay an akon trabaho ngan daku an sweldo, ngan mapapalit ko na an mga butang nga ginhihingyap ko la hadto. An iba ko nga sangkay pinalit hin motorsiklo; an iba nagpaayad han ira balay. Pinalit ako hin bag-o nga awto. Tungod han akon hingyap nga makapalit hin damu nga materyal nga butang, waray pag-iha gutiay na la an akon panahon ha pag-alagad kan Jehova. Maaram ako nga sayop ito. Maopay na la nga han 1950 an kombensyon ha New York nakabulig ha akon nga bag-uhon an akon disposisyon.

Hito nga kombensyon gin-aghat han mga mamumulong an mga tinambong nga magin madasigon ha pagsangyaw. An usa nga mamumulong nagsagda ha amon: “Magin kontento ha pagkaada han mga kinahanglanon gud la, ngan dalagana an rumba.” Baga hin ako la an iya ginkakaistorya. Nakatambong liwat ako ha  gradwasyon han usa nga klase ha Gilead, ngan tungod hito nahunahuna ko, ‘Kon nahimo hinin akon kaedad nga mga Saksi nga bayaan an materyal nga kahimyang basi mag-alagad ha iba nga nasud, sadang liwat ako magin andam nga buhaton ito dinhi ha amon.’ Han natapos ito nga kombensyon, disidido na ako magpayunir.

Hito nga panahon, mag-uyab na kami ni Evelyn Mondak, usa nga madasigon nga bugto ha amon kongregasyon. Unom hira nga magburugto nga ginpadaku han ira nanay, nga maisugon nga babaye. Nalilipay hiya pagsangyaw ha kalsada ha atubangan han daku nga singbahan han Katoliko. Bisan kon agsob hiya paiwason han nasisina nga padi, waray hiya maalantad. Pariho ha iya, hi Evelyn diri liwat nahahadlok ha tawo.—Prob. 29:25.

Han 1951, nagpakasal kami ni Evelyn, inundang ha amon trabaho, ngan nagpayunir. Gin-aghat kami han usa nga paramangno han sirkito nga bumalhin ha Amagansett, usa nga baryo ha baybayon han Atlantiko nga mga 160 ka kilometro tikang ha New York. Han ginsumatan kami han kabugtoan didto nga waray hira mapapaukyan ha amon, namiling kami hin treyler kondi waray makaagi hin maaakos namon pagpalit. Katapos, may nakita kami nga ruba nga treyler. Iginbabaligya ito hin 900 ka dolyar, nga nahituman nga amo liwat an kantidad nga amon nakarawat sugad nga regalo ha kasal. Ginpalit namon ito, gin-ayad, ngan gindara ha amon bag-o nga teritoryo. Kondi, pag-abot namon didto waray kami kakurokwarta. Naghunahuna kami kon paonan-o namon masusuportahan an amon pagpayunir.

Hi Evelyn nagtrabaho sugad nga paralimpyo hin balay, ngan ako naman sugad nga paralimpyo ha usa nga Italian nga restawran ha gab-i. An tag-iya nagsiring ha akon: “Dad-a ha imo asawa an ngatanan nga sobra nga pagkaon.” Salit kon nauli ako ha alas-dos han kaagahon, an amon treyler naghaharamot hin pizza ngan iba pa nga Italian nga pagkaon. Iton pinaso nga mga pagkaon maopay gud labi na ha panahon han katugnaw nga ginhahagkot kami hinduro ha sulod han treyler. May-ada liwat mga panahon nga an amon mga kakongregasyon nagbubutang hin daku nga isda ha hagdan han treyler. Durante han mga tuig nga nakaupod namon iton hinigugma nga kabugtoan ha Amagansett, hinbaroan namon nga an pagin kontento ha mga kinahanglanon gud la nagriresulta hin makapatagbaw nga kinabuhi. Makalilipay adto nga panahon.

Napagios nga Pauswagon Pa an Amon Ministeryo

Han Hulyo 1953, nakaistorya namon an ginatos nga misyonero tikang ha ira toka ha iba-iba nga nasud nga tinambong ha internasyonal nga kombensyon ha New York. Igin-istorya nira an ira makalilipay nga mga eksperyensya. Nakakatapon an ira kalipay. Dugang pa, han ginpabug-atan han usa nga mamumulong nga damu nga lugar an waray pa masangyawi, maaram na kami kon ano an sadang namon buhaton. Kinahanglan pauswagon pa namon an amon ministeryo. Hito mismo nga kombensyon, nag-aplay kami ha pagmisyonero. Hito liwat nga tuig, gin-imbitar kami ha ika-23 nga klase han Eskwelahan ha Gilead, nga nagtikang han Pebrero 1954. Daku gud ito nga pribilehiyo!

Nalipay kami hinduro han amon hinbaroan nga ha Brazil kami igintoka. Antes kami magbyahe hin 14 ka adlaw pinaagi hin barko, usa nga bugto nga may daku nga responsabilidad ha Bethel an nagsiring ha akon: “Siyam nga kadaragan-an nga misyonera an iyo upod tipakadto ha Brazil. Ayaw hira pabay-i.” Mahahanduraw mo ba an reaksyon han mga tripulante samtang nasakay ako nga nagbuburuyuboy ha akon luyo an napulo nga  batan-on nga kababayin-an? Kondi waray magkaproblema ha byahe ini nga kabugtoan. Bisan pa hito, nakaginhawa ako han nakaabot kami nga talwas ha Brazil.

Han nahibaro ako pagyakan hin Portuges, igintoka ako nga paramangno han sirkito ha Rio Grande do Sul, usa nga estado ha sur han Brazil. Olitawo an paramangno han sirkito nga akon sasaliwnan, ngan nagsiring hiya ha amon nga mag-asawa: “Nahipausa ako nga mag-asawa an ginpadara dinhi. Makuri ini nga teritoryo.” Higrayo an distansya han mga kongregasyon, ngan an iba makakadto la kon sumakay ka hin trak. Papasakyon ka han drayber kon tatagan mo hiya hin pagkaon. Sugad hin nangangabayo an amon paglingkod ha igbaw han kargamento ngan an amon duha nga kamot nangangapot hin maopay ha mga higot hito. Kon naliko an trak, an kargamento nga amon ginlilingkoran nakiling ngadto ha bakilid salit duro gud an amon pangapot basi diri kami mahulog. Kondi an pakakita ha maglipayon nga kabugtoan nga nagpinamulat gud ha amon sugad hin nakakawara han amon kakapoy ha bug-os-adlaw nga pagbyahe.

Naukoy kami ha balay han kabugtoan. Pobre hira hinduro kondi maabiabihon gud. Ha usa nga hirayo nga lugar, an ngatanan nga kabugtoan nagtatrabaho ha pabrika nga namumutos hin karne. Tungod kay gutiay la an ira sweldo, usa ka beses la hira nakaon ha usa ka adlaw. Kon diri hira nagtatrabaho hin usa ka adlaw, waray hira sweldo. Bisan pa hito, durante han amon pagbisita, duha ka adlaw nga diri hira nagtatrabaho basi makigbahin ha mga buruhaton han kongregasyon. Nasarig hira kan Jehova. An pakig-upod hiton pobre nga kabugtoan nagtutdo ha amon hin diri-hingangalimtan nga mga leksyon mahitungod han pagsakripisyo para ha Ginhadian han Dios. Ito nga mga leksyon diri hibabaroan ha bisan diin nga eskwelahan. Kon akon nahinunumdoman ito nga kabugtoan, nahingangatangis pa gihapon ako tungod han kalipay.

Han 1976, binalik kami ha Estados Unidos basi mangnoan an akon masakiton nga nanay. Makuri para ha amon an pagbaya ha Brazil, kondi mapasalamaton kami nga nakita namon an madagmit nga pagdamu han mga kongregasyon hito nga nasud. Ha kada panahon nga nakakakarawat kami hin surat tikang ha Brazil, amon nahinunumdoman an damu nga makalilipay nga eksperyensya ha amon pag-alagad didto.

Makalilipay Gud nga Pagkirigta Utro

Samtang gin-aataman hi Nanay, nagpayunir kami ngan nagtrabaho sugad nga mga paralimpyo. Han 1980, namatay hi Nanay nga matinumanon kan Jehova. Katapos hito, gin-imbitar ako nga magin paramangno han sirkito ha Estados Unidos. Han 1990, ginbisita namon an usa nga kongregasyon ha Connecticut, ngan didto may-ada kami iginkita nga duok gud ha akon. Usa han mga tigurang amo hi Ben, an binulig ha akon nga dumapig kan Jehova mga 50 ka tuig na an naglabay. Malipayon gud nga naghangkopay kami!

Tikang han 1996, nag-aalagad kami ni Evelyn sugad nga mga infirm nga espesyal payunir ha Elizabeth, New Jersey ha kongregasyon nga Portuges an yinaknan. May sakit ako, pero ha bulig han akon hinigugma nga asawa, nakikigbahin ako ha ministeryo tubtob ha igintutugot han akon kahimtang. May-ada liwat kami maluya ngan lagas na nga amyaw nga ginbubuligan ni Evelyn. Maaram ka ba kon hin-o hiya? Hi Bertha, an binulig kan Nanay nga magin alagad ni Jehova sobra 70 ka tuig na an naglabay! Malipayon kami ha pagkaada higayon nga ipakita an amon apresasyon ha ngatanan nga iya ginbuhat ha pagbulig han amon pamilya nga mahibaro han kamatuoran.

Mapasalamaton ako nga adton tulo nga kombensyon nakapagios ha akon nga dumapig ha tinuod nga pagsingba, pasimplihon an akon kinabuhi, ngan pauswagon an akon ministeryo. Oo, nabag-o hito nga mga kombensyon an akon kinabuhi.

[Retrato ha pahina 23]

An nanay ni Evelyn (wala) ngan hi Nanay

[Retrato ha pahina 23]

An akon sangkay nga hi Ben

[Retrato ha pahina 24]

Ha Brazil

[Retrato ha pahina 25]

Kami ni Evelyn yana