“Magmaabtik Kamo ha Espiritu”

“Ha buruhaton diri kamo maghubya; magmaabtik kamo ha espiritu; mag-alagad kamo ha Ginoo.”—ROMA 12:11.

1. Kay ano nga an mga Israelita naghalad hin mga hayop ngan iba pa?

 GIN-AAPRESYAR ni Jehova an kinaburut-on nga mga halad han iya mga surugoon ha pagpahayag han ira gugma ngan pagsunod ha iya kaburut-on. Ha kadaan nga panahon, ginkarawat niya an magkalain-lain nga halad nga hayop ngan iba pa. Ginbuhat ini han mga Israelita uyon ha Mosaiko nga Balaud basi mapasaylo an ira mga sala ngan maipahayag an ira pagpasalamat. Ha Kristiano nga kongregasyon, diri igin-oobligar ni Jehova an sugad hito nga mga halad. Kondi, ha kapitulo 12 han surat ni apostol Pablo ha mga Kristiano ha Roma, iya iginpakita nga kinahanglan pa gihapon kita maghalad. Aton hisgotan kon ha ano nga paagi.

Buhi nga Halad

2. Sugad nga mga Kristiano, ano an aton paagi han pagkinabuhi, ngan ano an nahiuupod hito?

² Basaha an Roma 12:1, 2. Ha siyahan nga bahin han surat ni Pablo, matin-aw nga iginsaysay niya nga an dinihogan nga mga Kristiano—Judio man o Hentil—iginpahayag nga matadong ha atubangan han Dios tungod han pagtoo, diri han buhat. (Roma 1:16; 3:20-24) Ha kapitulo 12, iya iginsaysay nga sadang ipakita han mga Kristiano an ira pagpasalamat pinaagi han pagkinabuhi nga may pagsakripisyo. Basi mabuhat ito, kinahanglan bag-uhon naton an aton hunahuna. Tungod han napanunod nga pagkadiri-hingpit, sakop kita han “balaud han sala ngan han kamatayon.” (Roma 8:2) Salit, kinahanglan ‘bag-uhon naton an espiritu han aton hunahuna’ pinaagi han bug-os nga pagbag-o han aton disposisyon. (Efe. 4:23) Mahihimo la naton ito pinaagi han bulig han Dios ngan han iya espiritu. Kinahanglan liwat kita magin determinado nga buhaton ito. Nangangahulogan ito nga bubuhaton naton an ngatanan nga aton mahihimo basi diri “umuyon hini nga panahon,” diin kalyap an magraot nga paggawi, nakakadaot nga kaliawan, ngan sayop nga panhunahuna.—Efe. 2:1-3.

3. Kay ano nga nakikigbahin kita ha Kristiano nga mga buruhaton?

³ Ginsasagda liwat kita ni Pablo nga gamiton an aton abilidad ha paghunahuna basi “kasayoran kon ano an maopay ngan karuruyagon ngan hingpit nga kaburut-on han Dios.” Kay ano nga nagbabasa kita han Biblia kada adlaw, namamalandong han aton nababasa, nag-aampo, natambong ha mga katirok, ngan nagsasangyaw han maopay nga sumat han Ginhadian? Tungod ba kay gin-aaghat kita han mga tigurang nga buhaton ito? Aw, mapasalamaton kita ha mga pahinumdom han mga tigurang. Kondi nakikigbahin kita ha Kristiano nga mga buruhaton tungod kay an espiritu ni Jehova nagpapagios ha aton nga ipakita an aton kinasingkasing nga gugma ha iya. Dugang pa, kombinsido gud kita nga kaburut-on han Dios nga buhaton naton ito. (Sak. 4:6; Efe. 5:10) Nalilipay ngan natatagbaw gud kita ha paghibaro nga pinaagi han pagkinabuhi sugad nga tinuod nga Kristiano, mahimo kita uyonan han Dios.

Magkalain-lain nga Hatag

4, 5. Paonan-o sadang gamiton han mga tigurang an hatag ha ira nga mga abilidad?

⁴ Basaha an Roma 12:6-8, 11. Hi Pablo nagsaysay nga “nakarawat ta in magkadurodilain nga mga hatag, sumala han grasya nga iginhatag ha aton.” An pipira nga hatag nga gin-unabi ni Pablo amo an abilidad ha ‘paglaygay ngan pagmando,’ a nga aplikado labi na ha mga tigurang nga gin-aaghat nga manguna hin maduruto.

⁵ Siring ni Pablo nga ito nga pagkamaduruto  sadang makita ha pagtutdo han mga paramangno ngan ha ira “pagkaministro.” Baga hin iginpapakita han konteksto nga an iginpapasabot ni Pablo amo an “pagkaministro” ha sulod han kongregasyon o han “usa nga lawas.” (Roma. 12:4, 5) Ito nga pagkaministro puropariho han gin-unabi ha Buhat 6:4, diin an mga apostol nagsiring: “Kami magpapadayon gud ha pag-ampo ngan pagpasamwak [“pagministeryo,” NW] han pulong.” Ano an nahiuupod hito nga pagkaministro? Ginagamit han mga tigurang an hatag ha ira nga mga abilidad basi parig-unon an mga membro han kongregasyon. Ira ‘iginhahatag an ira bug-os nga kusog ha pagkaministro’ kon maduruto nga ginigiyahan ngan gintututdoan nira an kongregasyon uyon ha Pulong han Dios pinaagi han pag-aram, pagsaliksik, pagtutdo, ngan pagmangno nga inuupdan hin pag-ampo. Sadang gamiton hin maopay han mga paramangno an ira mga abilidad ngan malipayon nga mangnoan an mga karnero.—Roma 12:7, 8; 1 Ped. 5:1-3.

6. Paonan-o naton masusunod an sagdon ha Roma 12:11, an tema nga teksto hini nga artikulo?

⁶ Hi Pablo dugang nga nagsiring: “Ha buruhaton diri kamo maghubya; magmaabtik kamo ha espiritu; mag-alagad kamo ha Ginoo.” Kon maobserbahan naton nga may tendensya kita nga maghinubya ha ministeryo, bangin kinahanglan pauswagon naton an aton personal nga pag-aram ngan magin mas sinsero ngan agsob ha pag-ampo basi mangaro han espiritu ni Jehova nga mabulig ha aton nga malamposan an pagkamalanhod ngan magin madasigon utro. (Luk. 11:9, 13; Pah. 2:4; 3:14, 15, 19) An baraan nga espiritu nagpagios han siyahan nga mga Kristiano nga magyakan han “urusahon nga mga bagay han Dios.” (Buh. 2:4, 11) Mapapagios liwat kita hito nga magin madasigon ha ministeryo ngan ‘magmaabtik ha espiritu.’

Kon Paonan-o Maipapakita an Pagkamapainubsanon

7. Kay ano nga sadang kita magin mapainubsanon ha pag-alagad kan Jehova?

⁷ Basaha an Roma 12:3, 16. Anoman an hatag ha aton nga abilidad, tungod ito han “grasya” o diri-takos nga pagkabuotan ni Jehova. Ha lain nga surat ni Pablo, hiya nagsiring: “Iton amon mga kabatiran tikang ha Dios.” (2 Kor. 3:5) Salit diri naton sadang dayawon an aton kalugaringon. Kinahanglan mapainubsanon nga kilalahon naton nga an aton kalamposan ha ministeryo bendisyon han Dios, diri tungod han aton abilidad. (1 Kor. 3:6, 7) Uyon hini, hi Pablo nagsiring: “Nasiring ako . . . ha tagsa ha iyo, nga diri maghunahuna hin hitaas ha iya kalugaringon nga labaw han igo niya paghunahunaon.” Importante an pagtahod ha kalugaringon ngan an pagin malipayon ngan tagbaw ha pag-alagad kan Jehova. Kondi, an pagkamapainubsanon ngan pagkarawat han aton limitasyon mabulig ha aton nga diri ipirit ha iba an aton opinyon. Lugod, karuyag naton ‘maghunahuna hin malinaw.’

8. Paonan-o naton malilikyan nga “magpaka-makinaadmananon ha [aton] kalugaringon”?

 ⁸ Diri gud maopay nga iparayaw an aton mga nahimo, tungod kay ‘an Dios an naghahatag ha pagtubo.’ (1 Kor. 3:7) Hi Pablo nagsiring nga an Dios naghatag ha tagsa nga membro han kongregasyon hin “taraksan ha pagtoo” o iba-iba nga abilidad. Imbes nga maghunahuna nga labaw kita ha iba, sadang naton kilalahon an ira nahihimo uyon ha ira abilidad. Hi Pablo dugang nga nagsiring: “Pag-urosa kamo ha iyo mga hunahuna.” Ha usa pa niya nga surat, hiya nagsiring nga “diri [kita] magbuhat hin bisan ano tikang ha pagkabahin-bahin o tungod hin padayaw, kondi ha pagpaubos ha hunahuna an tagsa-tagsa mag-isip han iba nga maoroopay pa ha iya ngahaw.” (Fil. 2:3) Ginkikinahanglan an tinuod nga pagkamapainubsanon ngan duro nga pangalimbasog basi karawaton nga an aton kabugtoan mas labaw ha aton ha magkalain-lain nga paagi. An pagkamapainubsanon mabulig ha aton nga diri “magpaka-makinaadmananon ha [aton] kalugaringon.” Bisan kon an iba ha aton mahimo magin kilala tungod han espesyal nga mga pribilehiyo, kita ngatanan magigin malipayon gud kon aton bubuhaton an “mapainubsanon” o ubos nga mga buruhaton nga agsob nga nababalewaray han iba.—1 Ped. 5:5.

An Aton Kristiano nga Pagkaurosa

9. Kay ano nga igintanding ni Pablo an igin-anak ha espiritu nga mga Kristiano ha mga bahin han lawas?

⁹ Basaha an Roma 12:4, 5, 9, 10. Igintanding ni Pablo an dinihogan nga mga Kristiano ha mga bahin han lawas nga urosa nga nag-aalagad nga nagpapasakop ha ira Ulo, hi Kristo. (Kol. 1:18) Iya ginpahinumdoman an igin-anak ha espiritu nga mga Kristiano nga an lawas may-ada damu nga bahin nga iba-iba an buruhaton, ngan ‘bisan damu, usa la ito nga lawas dida kan Kristo.’ Ha pariho nga paagi, gin-aghat ni Pablo an dinihogan nga mga Kristiano ha Efeso: “Ha gugma, magtubo kita ha ngatanan nga mga bagay ngadto ha iya, nga amo an ulo, nga amo hi Kristo: nga tikang ha iya an bug-os nga lawas nga nagkaarangay ha pagtarampo, ngan gindara, pinaagi hito nga kinakarawat tikang ha tagsa-tagsa nga kaluluthan, sumala ha ginbuhat han tagsa-tagsa nga bahin ha iyo nga suruklan ha tagsa nga bahin nahimo ha pagpatubo han lawas, ha pagparig-on hito ha gugma.”—Efe. 4:15, 16.

10. Kan kanay awtoridad an sadang kilalahon han ‘iba nga mga karnero’?

¹⁰ Bisan kon an ‘iba nga mga karnero’ diri bahin han lawas ni Kristo, damu an ira hibabaroan hini nga ilustrasyon. (Juan 10:16) Hi Pablo nagsiring nga “ibinutang [ni Jehova] an ngatanan nga mga bagay nga mga sakop ha ilarom han [kan Kristo] mga tiil, ngan iginhatag niya hiya nga ulo han ngatanan nga mga bagay ha singbahan.” (Efe. 1:22) Yana, an iba nga mga karnero bahin han “ngatanan nga mga bagay” nga iginpasakop ni Jehova ha pagkaulo han iya Anak. Upod liwat hira ha “mga panag-iya” nga igintapod ni Kristo ha iya “matinumanon ngan maaramon nga uripon.” (Mat. 24:45-47, NW) Salit adton may tunan-on nga paglaom sadang kumilala kan Kristo nga ira Ulo ngan magpasakop ha matinumanon ngan maaramon nga uripon ngan ha Nagmamando nga Lawas hito. Sadang liwat hira magpasakop ha kalalakin-an nga ginpili nga mga paramangno ha kongregasyon. (Heb. 13:7, 17) Nagriresulta ini hin Kristiano nga pagkaurosa.

11. Ha ano iginbasar an aton pagkaurosa, ngan ano pa an iginsagdon ni Pablo?

¹¹ An sugad nga pagkaurosa iginbasar ha gugma, nga amo an hingpit nga bugkos han pagkaurosa. (Kol. 3:14) Ha Roma kapitulo 12, ginpabug-atan ini ni Pablo ha pagsiring nga an aton gugma “diri updan hin kasalingkapaw” ngan sadang kita ‘maghigugmaay gud hin minagburugto.’ Nagriresulta ini hin pagtahod ha usa kag usa. Hi Pablo nagsiring: “Palabihon niyo an usa kag usa ha kadungganan.” Syempre, diri naton sadang hunahunaon nga an gugma nangangahulogan hin pagin matinuguton. Kinahanglan buhaton naton an ngatanan basi matipigan nga limpyo an kongregasyon. Han nagsagdon hi Pablo mahitungod han gugma, hiya dugang nga nagsiring: ‘Kangalasi niyo an maraot; kupkop kamo ha maopay.’

 Pagpakita hin Pagkamaabiabihon

12. Ano an aton hibabaroan ha mga Kristiano ha kadaan nga Masedonia mahitungod ha paghatag ha mga nanginginahanglan?

¹² Basaha an Roma 12:13. An aton gugma ha kabugtoan magpapagios ha aton nga ‘mag-amot ha mga kinahanglan han mga baraan’ uyon ha aton maaakos. Bisan kon pobre, mahimo kita maghatag ha iba. Han nagsurat hi Pablo mahitungod han mga Kristiano ha Masedonia, hiya nagsiring: “Ha madamu nga pagpamatuod han kakurian an kahuraan han ira kalipayan ngan mga kakablasan namunga ngadto ha ira pagkamahatagon. Kay ako nagpapamatuod, nga sugad han ira sadang, ngan labaw pa han ira sadang, hira nanhatag ha ira kalugaringon nga kaburut-on, nga naghahangyo gud hira ha amon nahitutungod hini nga grasya ngan paghiangbit ha pagmangno ha mga baraan [ha Judea].” (2 Kor. 8:2-4) Bisan kon pobre, mahinatagon hira hinduro. Gintagad nira nga pribilehiyo an paghatag ha ira nanginginahanglan nga kabugtoan ha Judea.

13. Ano an iginpapasabot han pagin ‘malolooyon ha mga dumuruong’?

¹³ An ekspresyon nga “magmalolooyon ha mga dumuruong” o magin maabiabihon tikang ha Griego nga pulong nga mahimo magpasabot hin kinaburut-on nga paggios. Iginhubad ini han The New Jerusalem Bible nga “pamiling hin mga higayon nga magin maabiabihon.” Usahay maipapakita naton ito pinaagi han pag-imbitar ha pangaon, ngan darayawon ito kon ginbubuhat tungod han gugma. Kondi kon mamimiling kita hin higayon nga magin maabiabihon, maipapakita ito ha damu nga paagi. Pananglitan, kon diri kita makakapangimbitar hin pangaon tungod han kahimtang ha pinansyal o panlawas, maipapakita naton ito pinaagi ha pangimbitar hin simple nga meryenda.

14. (a) Ano nga mga pulong an nagkukompwesto han Griego nga pulong nga iginhubad nga pagkamaabiabihon? (b) Ha aton ministeryo, paonan-o naton maipapakita an pagtagad ha mga langyawanon?

¹⁴ Nahiuupod ha pagkamaabiabihon an aton pagtagad ha iba. An Griego nga pulong nga iginhubad nga “magin maabiabihon” ginkukompwesto hin duha nga pulong nga nangangahulogan hin “gugma” ngan “dumuruong.” Paonan-o naton gintatagad an mga dumuruong, o langyawanon? Usa nga paagi ha pagin maabiabihon amo an pangalimbasog nga mahibaro hin iba nga yinaknan basi makasangyaw han maopay nga sumat ha mga langyawanon nga aada ha aton teritoryo. Syempre, damu ha aton an diri makakag-aram hin iba nga yinaknan tungod han aton kahimtang. Bisan pa hito, kita ngatanan makakabulig ha mga langyawanon pinaagi ha  paggamit hin maopay han bokleta nga Good News for People of All Nations nga may-ada mensahe tikang ha Biblia ha damu nga yinaknan. May-ada ka ba maopay nga eksperyensya ha paggamit hini nga bokleta ha ministeryo?

Abata an Inaabat han Iba

15. Paonan-o iginpakita ni Jesus an iginsagdon ha Roma 12:15?

¹⁵ Basaha an Roma 12:15. An sagdon ni Pablo hini nga teksto mahimo isumaryo hini nga mga pulong: Abata an inaabat han iba. Kinahanglan mahibaro kita pagsabot ngan pag-abat pa ngani han inaabat han iba, kalipay man ito o kasubo. Kon maabtik kita ha espiritu, makikita ha aton nga nalilipay kita para ha mga nalilipay o napaid ha mga nasusubo. Han malipayon nga binalik tikang ha pagsangyaw an 70 nga disipulo ni Kristo ngan nagsumat han maopay nga resulta hito, nalipay liwat hiya. (Luk. 10:17-21) Inabat niya an ira kalipay. Ha luyo nga bahin, hiya ‘nagtangis upod ha mga nananangis’ han namatay an iya sangkay nga hi Lasaro.—Juan 11:32-35.

16. Paonan-o naton maipapakita an empatiya, ngan hin-o an labi na nga kinahanglan magpakita hito?

¹⁶ Karuyag naton subaron hi Jesus ha pagpakita hin empatiya. Kon nalilipay an aton igkasi-Kristiano, sadang kita malipay para ha iya. Sugad man, sadang kita pumaid ha mga kasakitan ngan kasubo han aton kabugtoan. Agsob nga makakabulig kita nga maibanan an kasakit ha emosyon han aton mga igkasi-tumuroo kon maggahin kita hin panahon ha mapinairon nga pagpamati ha ira. Ngan usahay bangin mabantad gud an aton kasingkasing ngan makatuok kita tungod han sinsero nga empatiya. (1 Ped. 1:22) Kinahanglan sundon labi na han mga tigurang an sagdon ni Pablo mahitungod han pagpakita hin empatiya.

17. Ano an aton hinbaroan ha aton ginhisgotan nga mga bersikulo ha kapitulo 12 han Roma, ngan ano an aton hihisgotan ha sunod nga artikulo?

¹⁷ An mga bersikulo nga aton ginhisgotan ha kapitulo 12 han Roma naghatag ha aton hin sagdon nga maiaaplikar ha aton pagkinabuhi sugad nga Kristiano ngan ha aton pakig-upod ha kabugtoan. Ha sunod nga artikulo uusisahon naton an nahibibilin nga mga bersikulo hini nga kapitulo, nga naghihisgot kon paonan-o naton sadang tagdon ngan trataron an mga diri-tumuroo, pati na an mga nakontra ngan naglulutos ha aton.

[Footnote]

Sugad nga Repaso

• Paonan-o naton maipapakita an pagin ‘maabtik ha espiritu’?

• Kay ano nga sadang kita magin mapainubsanon ha pag-alagad ha Dios?

• Ha ano nga mga paagi maipapakita naton an empatiya ngan pagpaid ha aton mga igkasi-tumuroo?

[Mga Pakiana]

[Retrato ha pahina 4]

Kay ano nga nakikigbahin kita hini nga Kristiano nga mga buruhaton?

[Retrato ha pahina 6]

Paonan-o an kada usa ha aton makakabulig ha mga langyawanon nga mahibaro mahitungod han Ginhadian?