“Makigmurayaw Kamo ha Ngatanan nga mga Tawo”
“Makigmurayaw Kamo ha Ngatanan nga mga Tawo”
“Kon sadang mahimo, sugad han nahitutungod ha iyo, makigmurayaw kamo ha ngatanan nga mga tawo.”—ROMA 12:18.
1, 2. (a) Ano an iginpahamangno ni Jesus ha iya mga sumurunod? (b) Diin naton mababasa an sagdon kon ano an sadang buhaton kon may pagkontra?
HI Jesus nagpahamangno ha iya mga sumurunod nga kukontrahon hira han mga nasud ha kalibotan, ngan ha gab-i antes hiya mamatay, iya iginsaysay kon kay ano. Hiya nagsiring ha iya mga apostol: “Kon kamo kanan kalibotan, an kalibotan maghigugma unta han iya kalugaringon; kondi kay diri kamo kanan kalibotan, kondi ginpili ko kamo tikang ha kalibotan, tungod hini an kalibotan nagdudumot ha iyo.”—Juan 15:19.
2 Napamatud-an ni apostol Pablo nga tinuod an ginsiring ni Jesus. Ha ikaduha nga surat ni Pablo ha iya batan-on nga kaupod nga hi Timoteo, hiya nagsiring: “Nagsugot ka ha akon tutdo, gawi, tinutuyo, pagtoo, pag-antos, gugma, pagpailob, mga pagtimaraot, ha mga kagol-anan.” Katapos, nagsiring hiya: “An ngatanan nga mahigugma mabuhi nga matinahuron ha Dios kan Kristo Jesus mag-aantos hin pagtimaraota.” (2 Tim. 3:10-12) Ha kapitulo 12 han iya surat ha mga Kristiano ha Roma, naghatag hiya hin maaramon nga sagdon kon ano an ira sadang buhaton kon may pagkontra. An iya sagdon makakabulig ha aton hinin panahon han kataposan.
‘Magtinguha Kamo ha Mag-opay nga Bagay’
3, 4. Paonan-o an sagdon ha Roma 12:17 maiaaplikar ha (a) pamilya nga diri ngatanan Saksi? (b) pagtratar ha aton mga amyaw?
3 Basaha an Roma 12:17. Iginsaysay ni Pablo nga kon ginkukontra kita, diri kita sadang bumulos. Importante an pagsunod hini labi na ha mga pamilya nga diri ngatanan Saksi ni Jehova. Sadang likyan han Kristiano nga bana o asawa an pagbulos kon ginyayaknan o ginbubuhatan hin maraot. Waray maopay nga resulta an pagbulos hin “maraot ha maraot.” Makakadugang la ito han kasamok.
4 Hi Pablo nagsiring kon ano an maopay nga buhaton: ‘Magtinguha kamo ha mag-opay nga bagay ha atubangan han ngatanan nga tawo.’ Ha panimalay, mahimo malikyan an samok kon iginpapakita han asawa an sinsero nga pagkabuotan kon ginpapakaraot han iya bana an iya mga gintotoohan. (Prob. 31:12) Hi Carlos nga Bethelite na yana, nagsaysay kon paonan-o nalamposan han iya nanay an duro nga pagkontra han iya tatay pinaagi ha pirme pagin buotan ngan pagtimangno hin maopay ha panimalay. “Gintutugon niya kami nga pirme magin matinalahuron kan Tatay. Ginsisidngan niya ako nga makiuyag hin boules (uyag nga bowling ha Fransia) kan Tatay bisan kon diri ako mahilig mag-uyag hito. Nalilipay hito hi Tatay.” Inabot an panahon nga nag-aram hiya han Biblia ngan nagpabawtismo. Mahitungod ha ‘pagtinguha hin mag-opay nga bagay ha atubangan han ngatanan nga tawo,’ agsob nga nawawara an maraot nga pagtagad han iba ha mga Saksi ni Jehova tungod han ira pagbulig ha mga amyaw kon may kalamidad.
Paglampos ha Pagkontra Pinaagi hin “mga Baga”
5, 6. (a) Ano an karuyag sidngon han pagtambak hin “mga baga” ha ulo han usa nga kaaway? (b) Pagsaysay hin eksperyensya ha iyo lugar nga nagpapakita han maopay nga resulta han pag-aplikar han sagdon ha Roma 12:20.
5 Basaha an Roma 12:20. Han iginsurat ini ni Pablo, baga hin iya ginkotar an Proberbios 25:21, 22, diin aton mababasa: “Kon an imo kaaway gutumon, tagi hiya hin tinapay ha pagkaon; kon hiya inuuhaw, tagi hiya hin tubig ha pag-inom: kay ikaw magtatambak hin mga baga ha iya ulo, ngan hi Jehova magbabalos ha imo.” Han gin-gamit ni Pablo an mga baga sugad nga ilustrasyon ha iya sagdon ha Roma kapitulo 12, diri niya karuyag sidngon nga aton sisirotan o papakaalohan an mga parakontra. Lugod, an proberbio—ngan an mga pulong ni Pablo ha mga taga-Roma—baga hin naghihisgot han kadaan nga paagi han pagtunaw han mga metal. Hi Charles Bridges, usa nga Ingles nga eskolar han ika-19 ka siglo, nagsiring: “An metal nga makuri matunaw diri la iginbubutang ha bawbaw han kalayo kondi gintatambakan liwat ito hin mga baga ha igbaw. Pipira la an matig-a hinduro an kasingkasing nga diri mapapahumok han gugma nga mapailubon, nagsasakripisyo, ngan duro kapaso.”
6 Pariho hin “mga baga,” an pagpakita hin pagkabuotan ha mga parakontra mahimo makapahumok han ira kasingkasing ngan bangin makapaundang han ira pagkontra. An buotan nga pagtagad ha mga tawo mahimo makaaghat ha ira nga makiistorya ha mga alagad ni Jehova ngan mamati ha mensahe han Biblia nga ira iginsasangyaw. Hi apostol Pedro nagsurat: “Manggawi kamo hin maopay ha butnga han mga Hentil, nga, bisan kon naglilibak hira ha iyo nga baga magburuhat kamo hin maraot, ha pagtan-aw ha iyo mga mag-opay nga mga binuhatan, ira unta paghimayaon an Dios ha adlaw ha pagduaw.”—1 Ped. 2:12.
“Makigmurayaw Kamo ha Ngatanan nga mga Tawo”
7. Ano an kamurayawan nga iginbilin ni Kristo ha iya mga disipulo, ngan sadang ito magpagios ha aton nga buhaton an ano?
7 Basaha an Roma 12:18. Ha ultimo nga gab-i nga nakaupod ni Jesus an iya mga apostol, hiya nagsiring ha ira: “An kamurayawan ibibilin ko ha iyo; an akon kamurayawan ihahatag ko ha iyo.” (Juan 14:27) An kamurayawan nga iginbilin ni Kristo ha iya mga disipulo amo an kamurayawan ha hunahuna tungod han pag-abat nga hinigugma ngan inuyonan hira ni Jehova nga Dios ngan han iya hinigugma nga Anak. Sadang ini magpagios ha aton nga magin mamurayawon ha iba. An tinuod nga Kristiano nahigugma han kamurayawan ngan ginbubuhat an ngatanan basi makigmurayaw ha iba.—Mat. 5:9.
8. Paonan-o naton maipapakita nga karuyag naton magin murayaw an pamilya ngan kongregasyon?
8 Usa nga paagi han pagpakita nga karuyag naton magin murayaw an pamilya amo an pagsulbad dayon han mga diri pagsinabtanay imbes nga pabay-an la nga magtikaraot an kahimtang. (Prob. 15:18; Efe. 4:26) Aplikado liwat ini ha kongregasyon. Iginpakita ni apostol Pedro nga an pakigmurayaw nag-uupod han pagpugong han dila. (1 Ped. 3:10, 11) Katapos maghatag hin marig-on nga sagdon mahitungod han husto nga paggamit han dila ngan han panginahanglan nga likyan an kaawa ngan pagkabahin-bahin, hi Jakobo nagsurat liwat: “An kinaadman nga tikang ha kahitas-an, siyahan putli, makigdaiton, matalunoy, mapuanguron, puno ha kalooy ngan mag-opay nga bunga, waray pagruhaduha, waray hin kasalingkapaw. Ngan an bunga han katadongan iginsabwag ha kamurayawan tungod ha ira nga magbuhat hin kamurayawan.”—Jak. 3:17, 18.
9. Bisan kon nangangalimbasog kita nga ‘makigmurayaw ha ngatanan,’ ano an sadang naton hinumdoman?
9 An ginsiring ni Pablo ha Roma 12:18 diri la aplikado ha pamilya ngan kongregasyon. Hiya nagsiring nga sadang kita ‘makigmurayaw ha ngatanan nga tawo.’ Upod hito an aton mga amyaw, katrabaho, kaeskwela, ngan adton iginkikita naton ha ministeryo. Kondi iginpakita niya nga an pakigmurayaw may-ada tubtoban han hiya nagsiring: “Kon sadang mahimo, sugad han nahitutungod ha iyo.” Nangangahulogan ito nga bubuhaton naton an aton mahihimo basi ‘makigmurayaw ha ngatanan’ kondi diri ikukompromiso an magtadong nga prinsipyo han Dios.
Hi Jehova an Mabulos
10, 11. Ano an iginsagdon ni Pablo ha Roma 12:19, ngan kay ano nga angayan ito?
10 Basaha an Roma 12:19. Bisan “ha mga nakontra” ha aton buruhaton ngan mensahe, pati na ha dayag nga mga parakontra, kinahanglan kita magin ‘mainantuson’ ngan “maaghop.” (2 Tim. 2:23-25) Hi Pablo nagsagdon ha mga Kristiano nga diri bumulos kondi ‘tagan hin lugar an kasina han Dios.’ Sugad nga mga Kristiano, maaram kita nga waray kita katungod ha pagbulos. An salmista nagsurat: “Bayai an kasina, ngan bayai an kangalas; diri ka magmasamdong, iton tikadto la ha pagbuhat hin maraot.” (Sal. 37:8) Ngan hi Salomon nagsagdon: “Ayaw ikaw siring: Akon babalosan an karaotan: hulat kan Jehova, ngan hiya magluluwas ha imo.”—Prob. 20:22.
11 Kon an mga parakontra magbuhat hin maraot ha aton, mas maopay nga itapod ito kan Jehova basi hiya an magbuot kon sadang ba hira sirotan ngan kon san-o. Matin-aw nga ini an ginhuhunahuna ni Pablo tungod kay hiya dugang nga nagsiring: “Nahisurat na: Akon an pagbulos; ako an mabayad, siring han Ginoo.” (Itanding an Deuteronomio 32:35.) Kon bumulos kita, magpaparagbuot kita ngan gin-aagaw naton an katungod ni Jehova. Dugang pa, ipapakita hito nga kulang an aton pagtoo ha ginsiring ni Jehova: “Akon an pagbulos.”
12. San-o ipapahayag ni Jehova an iya kasina, ngan paonan-o?
12 Ha tinikangan han surat ni Pablo ha mga taga-Roma, hiya nagsiring: “An kasina han Dios ginpahayag tikang ha langit kontra ha ngatanan nga diri matinahuron ha Dios ngan diri kamagtadong han mga tawo, nga ira ginpupugngan an katadongan tungod han ira diri kamagtadong.” (Roma 1:18) Ipapahayag ni Jehova an iya kasina pinaagi han iya Anak ha panahon han “daku nga kagol-anan.” (Pah. 7:14) Ito an magigin “matuod nga tigaman han matadong nga paghukom han Dios,” sugad han iginsaysay ni Pablo ha usa pa niya nga surat: “Kon angay ba nga an Dios magbayad hin kasakitan ha mga nagsasakit ha iyo, ngan kamo nga mga ginsasakit mapahuway kamo upod ha amon, ha pagpahayag han Ginoo nga hi Jesus tikang ha langit upod an mga anghel han iya gahum ha malaga nga kalayo, ha paghatag hin bulos ha mga waray kumilala ha Dios, ngan ha waray pagtuman han maopay nga sumat han aton Ginoo Jesus.”—2 Tes. 1:5-8.
Daoga an Maraot Pinaagi han Maopay
13, 14. (a) Kay ano nga diri kita nahipapausa kon ginkukontra kita? b) Ha ano nga paagi naton mabubulahan an mga naglulutos ha aton?
13 Basaha an Roma 12:14, 21. Tungod kay bug-os nga nasarig nga tutumanon ni Jehova an iya mga katuyoan, mahimo naton isentro an aton pangalimbasog ha buruhaton nga igintoka niya ha aton—an pagsangyaw han “maopay nga sumat han ginhadian” ha “bug-os nga kalibotan.” (Mat. 24:14) Maaram kita nga makakapasina ini ha aton mga kaaway, kay hi Jesus nagpahamangno: “Pagdudumtan kamo han ngatanan nga nasud tungod han akon ngaran.” (Mat. 24:9) Salit diri kita nahipapausa o nanluluya kon ginkukontra kita. Hi apostol Pedro nagsurat: “Mga hinigugma, diri kamo magdumdom nga makatitingala an pagsulaya nga mapaso ha butnga niyo, nga nahinabo ha iyo ha pagproyba ha iyo, sugad nga daw usa nga makatitingala nga butang an nahinabo ha iyo: kondi amo in kaagi nga mga kaangbit kamo han kan Kristo mga pag-antos, magkalipay kamo.”—1 Ped. 4:12, 13.
14 Imbes nga mapungot ha mga naglulutos ha aton, nangangalimbasog kita nga tutdoan hira han kamatuoran tungod kay maaram kita nga ginbubuhat ito han iba ha ira tungod han kawaray sarabotan. (2 Kor. 4:4) Nangangalimbasog kita nga sundon an sagdon ni Pablo: “Bendisyoni niyo an mga nagtitimaraot ha iyo, bendisyoni nga diri pagpakarauton.” (Roma 12:14) Usa nga paagi ha pagbendisyon o pagbulahan ha mga naglulutos ha aton amo an pag-ampo para ha ira. Ha Sermon ha Bukid ni Jesus, hiya nagsiring: ‘Higugmaa an iyo mga kaaway: buhata an maopay hadton nagdudumot ha iyo. Pag-opaya adton nagpapakaraot ha iyo; ngan ig-ampo adton nagpapasipara ha iyo.’ (Luk. 6:27, 28) Tikang ha eksperyensya ni Pablo, iya napamatud-an nga an usa nga persigidor mahimo magin matinumanon nga disipulo ni Kristo ngan madasigon nga alagad ni Jehova. (Gal. 1:13-16, 23) Ha lain nga surat ni Pablo, hiya nagsiring: “Ginpapasipara kami, ginmamaopay namon; nga gintitimaraot kami, nag-iilob kami; nga ginpapakaalohan kami, nakikimalooy kami.”—1 Kor. 4:12,13.
15. Ano an gimaopayi nga paagi basi madaog an maraot pinaagi han maopay?
15 Uyon hito, ginsusunod han tinuod nga mga Kristiano an kataposan nga bersikulo ha Roma kapitulo 12: “Ayaw padaog han maraot; kondi dumaog ka ha maraot biling ha maopay.” Hi Satanas nga Yawa an gintikangan han ngatanan nga karaotan. (Juan 8:44; 1 Juan 5:19) Ha pahayag nga iginhatag kan apostol Juan, iginsumat ni Jesus nga an iya dinihogan nga kabugtoan ‘nagdaog kan Satanas pinaagi han dugo han Kordero ngan pinaagi han pulong han ira pagpamatuod.’ (Pah. 12:11) Ipinapakita hini nga an gimaopayi nga paagi basi madaog hi Satanas ngan an iya maraot nga impluwensya hini nga sistema amo an pagbuhat hin maopay pinaagi han pagsangyaw han maopay nga sumat han Ginhadian.
Magmalipayon ha Paglaom
16, 17. Ano an igintutdo ha aton han Roma kapitulo 12 mahitungod ha (a) kon paonan-o kita sadang magkinabuhi? (b) kon paonan-o kita sadang gumios ha kongregasyon? (c) kon paonan-o naton sadang trataron an mga nakontra ha aton?
16 Damu an iginpahinumdom ha aton han paghisgot han kapitulo 12 han surat ni Pablo ha mga Kristiano ha Roma. Hinbaroan naton nga sugad nga dedikado nga surugoon ni Jehova, kinahanglan andam kita magsakripisyo. Tungod kay ginpapagios han espiritu han Dios, kinaburut-on nga nagsasakripisyo kita kay kombinsido kita nga ito an kaburut-on han Dios. Maabtik kita ha espiritu ngan madasigon nga ginagamit an aton iba-iba nga abilidad. Mapainubsanon gud nga nag-aalagad kita ngan ginbubuhat an ngatanan basi matipigan an aton Kristiano nga pagkaurosa. Maabiabihon kita ngan nagpapakita hin tinuod nga empatiya.
17 Damu liwat an sagdon ha Roma kapitulo 12 kon ano an sadang buhaton kon may pagkontra. Diri kita sadang bumulos. Kinahanglan mangalimbasog kita nga malamposan an pagkontra pinaagi han pagpakita hin pagkabuotan. Tubtob ha aton mahihimo, sadang kita mangalimbasog nga makigmurayaw ha ngatanan nga diri gintatalapas an mga prinsipyo ha Biblia. Aplikado ini ha pamilya, kongregasyon, mga amyaw, ha trabaho, eskwelahan, ngan ha ministeryo. Bisan kon dayag nga ginkukontra kita, ginbubuhat naton an ngatanan basi madaog an maraot pinaagi han maopay, tungod kay maaram kita nga hi Jehova an mabulos.
18. Ano an tulo nga igin-aaghat ha aton ha Roma 12:12?
18 Basaha an Roma 12:12. Labot pa han maaramon ngan praktikal nga sagdon nga ginhisgotan na, may tulo nga igin-aghat hi Pablo. Tungod kay diri naton ini mahihimo kon waray bulig ni Jehova, hi Pablo nagsagdon: “Magpadayon gud kamo ha pag-ampo.” Mabulig ini ha aton nga sundon an usa pa niya nga sagdon nga ‘magmainantuson ha kagol-anan.’ Ha kataposan, kinahanglan pirme nakasentro an aton hunahuna ha iginsaad ni Jehova ha tidaraon ngan ‘magmalipayon ha paglaom’ nga kinabuhi nga waray kataposan, ha langit man o ha tuna.
Sugad nga Repaso
• Ano an sadang naton buhaton kon may pagkontra?
• Kan kanay kita sadang mangalimbasog nga makigmurayaw, ngan ha ano nga paagi?
• Kay ano nga diri kita sadang bumulos?
[Mga Pakiana]
[Retrato ha pahina 8]
An pagbulig ha aton mga amyaw mahimo makawara han ira maraot nga pagtagad ha aton
[Retrato ha pahina 9]
Nangangalimbasog ka ba nga makigmurayaw ha imo igkasi-tumuroo?