May Eskedyol Ka Na ba ha Pag-aram han Biblia?

HAN naglabay nga tuig, iginpahibaro han Nagmamando nga Lawas an pagbag-o ha eskedyol han mga katirok basi magkaada dugang nga panahon ha pag-aram ngan paghisgot han Biblia sugad nga pamilya. Kon ulo ka han pamilya, siguroha nga madumarahan mo an imo pamilya hin regular nga pag-aram ha Biblia nga praktikal ha iyo. Maopay liwat nga gamiton han mag-asawa nga waray anak ini nga panahon ha pag-aram han Biblia nga magkaupod. Magagamit han solo nga kabugtoan nga waray responsabilidad ha pamilya ini nga oras ha personal nga pag-aram han Biblia.

Damu an nagpahayag han ira apresasyon ha kahikayan nga magkaada gab-i para ha Pagsingba han Pamilya. Pananglitan, hi Kevin nga usa nga tigurang nagsurat: “Kulang pa an pagsiring hin ‘salamat’ ha pagpahayag han duro nga apresasyon han amon kongregasyon hini nga kahikayan. Sugad nga mga tigurang, ginhisgotan namon kon paonan-o magagamit an bakante nga gab-i basi sundon an igin-aaghat han Nagmamando nga Lawas nga magdumara hin pag-aram ha amon pamilya.”

Hi Jodi nga asawa hin tigurang nagsurat: “May-ada kami tulo nga anak nga 15, 11, ngan 2 anyos an pangidaron. Bag-o pa la kami nga binalhin ha usa nga kongregasyon ha sign-language. Daku nga panahon ngan duro nga pangalimbasog an ginkikinahanglan ha pangandam ha ngatanan nga katirok. Tungod hini nga pagbag-o, may-ada na kami yana gab-i nga magagamit ha pagsingba han pamilya.”

Hira John and JoAnn, mag-asawa nga regular payunir, nagsurat: “Hadto, agsob nga diri regular an amon pag-aram han pamilya tungod kay ginbubuhat la namon ito kon may bakante nga panahon nga waray mga buruhaton ha kongregasyon. Inin bag-o nga kahikayan usa nga regalo tikang kan Jehova nga magpaparig-on han aton espirituwalidad—kon gagamiton naton ito nga panahon ha husto nga paagi.”

Hi Tony, nga olitawo nga mga 25 anyos, nag-eskedyol han iya personal nga pag-aram ha Martes han gab-i. Ginagamit niya an iba nga adlaw ha pangandam ha mga katirok. Kondi hi Tony nagsiring: “Ginpapamulat ko gud an Martes.” Kay ano? “Ito an akon espesyal nga gab-i para kan Jehova.” Hiya nagsaysay: “Ha sulod hin mga duha ka oras, gin-aadman ko an mga topiko nga nagpaparig-on han akon relasyon kan Jehova. Tungod kay mas daku na an akon panahon ha pag-aram, napapamalandong ko an mga teksto ha Biblia nga akon ginbabasa.” Ano an resulta? “Mas nasasabtan ngan napapabilhan ko yana an sagdon ni Jehova.” May maihahatag ba hiya nga ehemplo? “Ha libro nga Insight, nabasa ko an pagkasangkay nira David ngan Jonatan. Damu an akon hinbaroan ha pagin diri makikalugaringon ni Jonatan. An iya susbaranan nakabulig ha akon nga mas masabtan kon ano gud an tinuod nga sangkay. Ginpapamulat ko gud an Martes han gab-i tungod kay makakadiskobre na liwat ako hin damu pa nga espirituwal nga hiyas.”

Sigurado nga magpapahimulos gud an ngatanan nga alagad ni Jehova kon gagamiton hin husto an panahon nga igin-gahin yana para ha praktikal nga pag-aram han Biblia ngan pagsingba han pamilya.